प्रेरितान काम 14
14
इकुनियुम माय पौलुस एने बरनबास
1इकुनियुम माय इहकेरीन एनो काय पौलुस एने बरनबास यहुदिन बोक्ती केरन्या गेरा माय आरही आरही गीया, एने ओहल्यु वातु केऱ्या काय यहुदि एने बिगेर यहुदि दुयाम रेन मोकतास माणहे बुरहो केऱ्या। 2पुण बुरहो नाह केरनारे यहुदि बिगेर यहुदि माणहान मोना माय विश्वासी बायाख ने विरोद ईरेचेड़ाया, एने तान मोन माय जेहेर बोर देना। 3बरनबास एने पौलुस जुलूम दिह वोर ता थोब रेना, एने मालीक पोर बुरहो मेलते लेन ईमोत हेऱ्या पारचार केरती रेना, एने मालीक तान द्वारे बोंगलाय ओहला काम निसाणी एने चोमेत्कार केरावीन तान गीणान खोबरीह खेराय माय देखाड़ते रिनो। 4पुण हेयरान माणहा माय फुट पोड़ गियी: थोड़ाक माणहे ते यहुदिन उगे, एने थोड़ाक माणहे प्रेरितान उगे एय गीया।
5तेवी थोड़ाक बिगेर यहुदि एने यहुदि तान आदिकारी हेऱ्या मिलीन प्रेरिता हेऱ्या खाराब वेवार केरने, एने ताह देगड़ाठणेन चाल चाल्या। 6जेवी बरनबास एने पौलुस ज्यी वातीह जाण गीया, एने लुकाउनिया, लुस्रा, एने दिरबे हेयरा माय एने तान आहने पाहनेन देसा माय नाह गीया। 7एने ताहरी जाईन ता हाजाली खुबेर होमलावते रेना।
लुस्रा एने दिरबे माय पौलुस एने बरनबास
8लुस्रा माय एक माणुह बोह रियेल एतो जो पायान पांगलो एतो। तो पायदा सेस लेंगड़ो एतो, एने केदिस नाह चालेल एतो। 9तो पौलुसाह वातु केरतालो होमेलने बाजरियेल एतो। एने पौलुस तान उगे हास केरीन दिख्यो, काय ज्याह हुदेरनेन बुरहो हे, 10एने मोठेस केयो, “तु तारा पाया पोर हुतरो उब रे!” तेवी तो कुदिन उठनो एने चालने फिरने बाज गीयो। 11माणहान गेरदी पौलुसान ज्यो काम देखीन लुकाउनियान बाषा माय मोठेस आयड़ीन केया, “देव माणहान वेहा माय आमरी फाय उतेर आयेल हे!” 12एने ता बरनबासाह ज्युस, एने पौलुसाह हिरमेस केया, काहाकाय पौलुस वातु केरने माय मुखी ईतो। 13एने ज्युस ने मोंदिर ने चाकर्यो जो तान हेयरान सामने ईतो, बुयेल एने फुलान हार बायणा पोर लावो, एने माणहा हिऱ्यो बोली केरने होदतालो।
14पुण प्रेरित बरनबास एने पौलुस जेवी ज्यो होमल्या, ते तान फाड़का फाड़ देना, एने माणहान गेरदी माय रिगीन आयड़ीन केया, 15“एय माणहे, तुमू ज्यो काहा केरतेह? आमु बी तुमरी गेत माणहे हेते! एने तुमूह बोगवानान हाजाली खुबेर होमलावणेन केरता आमु न्या आयेल हेते, एने तुमू ज्यु उदड्यु चिजीह रेन आलेग एन जीवताला बोगवानान उगे वोलो, जो हेरोग, देरती, देरीयो एने जो काय ता माय हे, बाणायो। 16तो गीया टेमा माय आखा देसान माणहाह तान तान वाटे चालने दिनो। 17पुण तो जेलेम बोलायीन काम केरनेन द्वारे तान अस्तित्वाह प्रमाणीत केऱ्यो, तो तुमूह जुगाम रेन पाणी आप्यो एने रूतून गेत कामाय आप्यो तो तुमूह खाणो आपेह एने तुमरा मोनाह खुसी माय बोर दिथे।” 18इहकेरीन केयीन प्रेरित ता माणहाह जेमतेम रोक्या काय आमरी केरता बोली नाय केरी।
19पुण थोड़ाक यहुदि फिसीदियान अन्ताकिया एने इकुनियुम रेन आवीन माणहाह तान उगे केर लेदा; एने पौलुसाह देगड़ाठ्या, एने तो मोर गीयोह सोमजीन ताह हेयरान बाहेर गीहलीन टाक देना। 20पुण जेवी विश्वासी तान कावदेन आवीन उबरेय गीया, ते पौलुस उठनो एने पुशो हेयरा माय गीयो। ओवतो दिहरे दिह बरनबासा हिऱ्यो दिरबे माय जात रिनो।
सीरीयान अन्ताकियाम वोलनो
21पौलुस एने बरनबास दिरबे गावान माणहाह हाजाली खुबेर होमलावीन जुलूम होवटा चेला बाणाया। एने लुस्रा, इकुनियुम एने फिसीदियान अन्ताकिया गावा माय ता पोशा आवा, 22एने विश्वासीन मोनाह मोजबुत किरते रेना, एने ज्यो उत्साह किरते रेना काय बोरहान खेरायी माय टिकीन रिवो। एने ज्यो हिकवोण आपताला, “आमुह मोटलो दुख वेठीन बोगवानान राज माय रिगणे पोड़ी।” 23एने ता एक एक मोंडली माय तान केरता अगुवा निवाड़ेन नियुक्त केऱ्या, एने उपास एने विन्ता केरीन ताह मालीकान आथा माय होप्या जा पोर ता बुरहो किरेल एता।
24तेवी प्रेरित पिसीदिया माय रेन पंफुलीया माय आवा। 25एने पिरगा माय वचन होमलावीन फिसीदियान अन्ताकिया माय आवा, 26एने ता रेन ता सीरीयान अन्ताकिया माय जाणेन डोंडह्या माय बोहीन निकेलना, जाहरी ता ता कामान केरता जा ता पुरो किरेल एता, बोगवानान गीणा माय होपाय जायेल एता।
27एने जेवी ता अन्ताकिया माय पोचना ते मोंडलीह टुलो केऱ्या, एने जो बोगवान ता हिऱ्यो रेन किरेल तो केय होमलाया, एने बिगेर यहुदिह बुरहो केरनेन केरता किहीक बायणो उगाड़ दिनो। 28एने ता विश्वासी हेऱ्या जुलूम दिह वोर रेना।
Currently Selected:
प्रेरितान काम 14: NTNii2020
Highlight
Share
Copy
Want to have your highlights saved across all your devices? Sign up or sign in
The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020
