Luke 20

Jisu Matorna jarra Rakelna

(Matt 21:23-27; Mk 11:27-33)

1Nisuokhat Jisu'n biak-inna mipui diang iminchu khat-um chong kahoi arilla aleiom phakhan, thiampu kalian ngai, Dan karu ngai khat-um katar ngaikha inheiwa-ah 2Jisu diang injuoti, “Keini diang heitiro, ang ranak naneiya hiwa ngaihi nithome? Emakli tume hiwa thonasik-ah ranak kanapeii?””

3Jisu'n inmani diang aleimasang, “Kei innum nangnidiang rakelna naneikate, keidiang heitiru, 4John'n baptism imintho kha, Pathian diang makheiya kajuobe emakli manmasi makheiya kajuobe?””

5Halli inmani karra inbiakna inneiya inleiti, “Eini'n “‘Pathian diang makheiya’’ niti inchu, ama'n natite halle “‘angjarra amakha ningngamna makme?’’ 6Halli “‘Eini'n minring makheiya eii’’ niti innum mipui'n eini kha lungnga innadeeng thatsik eii, ajarchu mipui'n John hi Pathian chongkachoi inkhat eii tia inlei.”” 7Khawa jarra inmani'n “Humakheiya kajuome jetmung tia inleimasang.””

8Halli Jisu'n inmani diang aleimasang, “Ang ranak kaneiya hiwa ngairakip kithome kei innum nangnidiang tinuning.””

Rahuon Kangaak ngai Minkhina

(Matt 21:33-46; Mk 12:1-12)

9Halli Ama'n hiwa chong minkhi nahi mipui diang karil aleiphut: “Apha inkhat-ah theibombil katho miring inkhat aleiom, rahuonkha chuon katho mi ngaidiang aminhuumma apha kasoot taksik-ah aleisi. Isa 5:1

10Theibom rakhoolpha ahongtungnga ama'n suok inkhat rahuon katho mi ngaidiang ramparman kalei aleiminsi takkha rahuon katho mi ngai'n suokpa kha inleiwuok-ah iteii minchoi lekleiya injuominkir. 11Halli ama'n suok inkhat aleiminsi nookjei, ama kha-um inwuok ah jakna kaomthei omchanna inrachaak ah kut karuok-ah inhongmin kirnookjei. 12Khawasuoli inthum changna suok kha-um aleitir, inmani'n ama kha kase-ah inwuok-ah inleidenjuon. 13Khawa khan rahuon mapu pa'n ati, “‘Angme kei'n kathosik? Kasapa kiminriang inkhat beihi kaminsi inchu inmani'n ama hi kaya inte!’’ 14Takkha rahuon katho ngai'n amakha inmupha khan, inmani inkhatli inkhat inlei inti, “‘Hiwahi inluo kaluoksikpa kha eii, ama changsik kasuokkha einita enasik-ah eini'n amahi thattui!’’ 15Inmani'n amakha inthat-ah halli akaluong kha rahuon raaltiang inleideengjuon.””

“Jisu'n aleirakel, angme rahuon mapupa in inmani diang athosik?”” 16“Ama'n heiwata rahuon kangaak rakip ngaikha thatta, halli rahuon kha aleiilaak rahuon kangaak inkhat diang apesik eii,””

Mi ngai'n hiwahi injet phakhan, inmani'n inleiti, “Acha inchu hiwahi kasuok emarase!””

17Jisu'n inmani diang ahei enna aleiti, “Angme, inthiang chong in iti?

“‘Inn kasak ngai'n anemna ommakjei tia indeengjuon lungkha

akilla kaom nemna kaomkhet lungkha ahong eii.’’Minpkla 118:22

18Khawa lungchungnga kajuota miring rakip in alek alek ah inkoisik eii, halli khawa lung inn atu ka-ang diang ajuodeeng inchu ama kha rahut inchangsik eii.””

Rampar Pesik jarra Chongrakelna

(Matt 22:15-22; Mk 12:13-17)

19Khawapha takkhan thiampu kalian ngaili dan karu ngai'n Jisu kha surnasik inleingaidon, ajarchu inmani'n hiwa minkhina rilsena chonghi inmani diang eii tia inleijet, takkha inmani'n mipu kha inleichi. 20Khale inruoiya inmani'n Jisu kha inmaruongnga chong rakel li surra, waikaroonpa li ranak kanei ngai kutchungnga peinasik inmani'n sialla inracho akatha inleem mi lekkhat Jisu kaensuisik inleiminsi. 21Kaensui ngai'n Jisu diang inleiti, “Karu, nangchu kadik khat-um katuunna naminchu halli mi-um khoithen makche, takkha Pathian lungdou katuun kha naminchu tihi keini'n kijet. 22Keini'n Caesar diang rampar pesik hi Dan khan koibe koimakbe?””

23Takkha Jisu inmani ngaidon kathamak kha aleijet ah inmani diang aleiti, 24“Dangkapum kha naminmuro, khawa khan atu ramil omme?””

Inmani'n inti, “Caesar's.””

25Jisu'n inmani diang ati, “Caesar takha Caesar's diang peru, halli Pathian takha Pathian diang peru.””

26Inmani'n mipui karra achongrilla Jisu kha leisur matormu, takkha ama masang nakhan inleingak ah inmani'n rilsik leijeitmuwa inomchianjei.

Kathi makheiya Hongringna jarra Rakelna

(Matt 22:23-33; Mk 12:18-27)

27Khawa khan kathi makheiya kahongring ommak kati Sadducees lekkhat Jisu diang inheiwa ah injuoti, Chuon 23:8

28halli inmani'n Jisu diang inleirakel, “Karu, Moses Dan in keini sik-ah aleimajia, “‘Atu ka-ang a-u inkhat numei leineiya asa omleiya a-upa athi inchu anaipa'n anumei kha neita a-upa sik-ah sa aneipi sik eii. Innidan 25:5

29Ulenai sari inleiom, upapa khan numei aneili sa neileiya athijei. 30Halli inni huuinapa'n aneinookjei, 31khat-um inthum huuinapa innum aneinook jei, hiwa angnga sari ngai'n innei wiak ah sa neileiya inthiwiakjei. 32Khawa suoli numeisanu um athijei. 33Kha e-inle kathi makheiya hongringni khan numeisanu kha atu numei esik me? Ajarchu numeisanu kha mi sari numei alei ejei.””

34Halli Jisu'n inmani diang aleimasang, “Atuunnna khangnga sa ngachu inn innei khat-um inn neisik-ah azootpi. 35Takkha kahongsik khang khat-um kathiya inphut ringna kamusik rahoi ejei tia inlei mi ngai khachu inn neinunu khat-um inn kanei ti omnunijei. 36Ajarchu inmani kha woikhat thinunujei, ajarchu inmani kha marwaan tirton ngaile in-angjei, halli thiya inphut karing sa ngaikha in-e jarra Pathian sangai inejei. 37Khawa jarra Moses innum, “‘Abraham Pathian, Isaac Pathian, khat-um Jacob Pathian tia’’ akoilai khan kathi rakip inhongringjei tia Pumi jarra suulbuklai kaangna larik munkhan inthiangnga amalarjei. Suok 3:6

38Khawa jarra amahi kathi Pathian emak takkha akaring Pathian eii, halli mi rakip in amadiang ringna inmusik eii.””

39Dan karu lekkhat ngai'n inhongmasang, “Karu, katha ah namasangjei.”” 40Khawa makheiya inmani'n inngam hiaiya Jisu diang iteii leirakelzoot mujei.

Messiah jarra Rakelna

(Matt 22:41-46; Mk 12:35-37)

41Takkha Jisu'n inmani diang aleiti, “Angtho thoa Christa hi nangni'n David phungrui eii ningtime? 42Tichu David tak in ati Minpaakla larik ah,

“‘Pumi in kei ka Pumi diang ati:

kei kakut changtiang in-ongro, Minpkla 118:22

43Kei'n ninhalpui ngaikha naketouna kaminchang makleiseng.’’

44David innum “‘Pumi’’; tia akoi inle, angtho thoa Messiah hi David's sapa eniame?””

Jisu'n Dan Minchuna jarra Chongmakaina

(Matt 23:1-36; Mk 12:38-40)

45Khale inruoiya mipui'n inrangaiya inom phakhan Jisu'n asiamruoi ngaidiang aheiti. 46“Dan karu ngai makheiya insingtheiru, songkol inchuol inlukzoot, halli phaisungnga chubei inthosik kamanuom, Synagogue ngaikhan in-ongna kathakhet kakadang, mipui bubakna karra in-ong mun kahoikhet kakadang ngaikha in eii. 47Inmani'n Chuulmei ngai innle-lei inkasut, halli aomchan kathoa kasoot ah Pathian kani, inmani ngai poongna kha kheella asedoomsik eii!””

Currently Selected:

Luke 20: KHMNT

Highlight

Copy