Luke 17

Manu Jarra

(Matt 18:6,7,21,22; Mk 9:42)

1Khale inruoiya Jisu'n asiamruoi ngaidiang aleiti, “ Manu thonasik-ah miringngai chungnga matheemna omgersik eii, takkha khawa ngai akamasuok amakha angtuk poongna kaomsikme. 2Ama'n akasiin naipang ngaikha manu kamintho neek achu, ama riingnga lungchakari inkhit-ah tuipui suungnga indeengjuon kha athadet.”” 3Ningtheinuo ah insingtheiru!

“Na-u nanai inkhat in manu intho inchu, ama kha ranro, halli ama'n amalung ahongthuul inchu rangaidamro. Matt 18:15

4Ama'n nisuokhat ah nangdiang woisari manu athoa, halli woisari nangdiang heikeirra “‘kei kamalung kathuuljei ati inchu,’’ nang in ama kha rangaidamro.””

Inngamna

5Tirton ngai in Pumi diang inleiti, “Keini ngamnahi naminlokpiro.””

6Pumi'n aheimasang, “Anchamru tiatbit nang ngamna kha om-inchu, nang in hiwa mulberry thingkuung hi arajungnga inphuk inlang halli tuipuiya juomoongro nati innum! ama'n nang nachongkha ajuisik eii.

Suok Chuonthosik

7“Nangni karra miring inkhat keelngam kakhaal sik khat-um leikakhuoi sik suok inkhat aneiya halli ama'n lei makheiya ahongkir phakhan, amadiang innoottheiya heiwa inlang bu juobaktaro katipisik tu ning ommame? 8Khawa rathuulla nang in nakhoong khit inlaang “‘Kabak ka-insik minsuukro, kabak ka-insuo maklaiseng kasepa thoro, khawa suoli nang-um baktro nang in amadiang timak tinnabe.’’ 9Suokpa'n ama chongpe ajui jarra minpaak sik rahoi suokmak, ama rahoi suok abe? 10Khawale in-ang rip-ah, nangnidiang thosik innapeii chounkha ningtho phakhan, “‘Keini chu rahoi kasuokmak suok ngaikha kin eii halli kinthosik kasuok chuonkha kintho eii”” tiru.

Jisu'n Takbangri Karoon Miring soom Mindamna

11Jisu'n Jerusalem lamtiang aleisi phakhan Samaria li Galilee kongkarra aleitheng. 12Ama'n khuosuung aheiluut phakhan kalaak-ah ka-ngirra kaleiom takbangri karool miring soom alei intongpui. 13Halli inkheek-ah inheiti, “Jisu, Karu, keini diang naminriangro.””

14Halli Jisu'n inmani kha aleimuwa aleiti, “Si inlang thiampu ngaidiang juoinmuru.””

Halli inmani'n insina lamma in-iroon takbangri kha juodam tirjei.#17:14: juodam tirjei: 5:12 enru 15Inmani karra miring inkhat in ama idamkha amupha khan, aheikirnook ah rasa inringnga Pathian aleiminpaak. 16Halli Jisu kekuungnga inbok ah inpaakna aleimalar, halli ama kha Samaritan mi alei eii. 17Jisu'n aleiti, “Kadam kha miring soom emuwabe? Khawa ngai khale hun inom mejei? 18Hiwa zaatlop mipahi elekleiya aleiilaak heikirra Pathian kaminpaaksik ommu bejei?”” 19Halli Jisu'n amadiang aleiti, “Inthei inlang sitaro; nang ngamna khan nidam ejei.””

Pathian Rengram kajuosik

(Matt 24:23-28,37-41)

20Pharisee ngai'n Pathian Rengram kha angtik ajuosikme tia Jisu diang inleirakel phakhan, ama'n inmani diang aleimasang, “Pathian Rengram chu eini mit-enna nimu angnnga juonuni. 21Tuteii innum tinunu, “‘Enru, hin omjei!’’ emakli, “‘Enru, sosun omjei!’’ ajarchu Pathian Rengram kha nangni suungnga om.#17:21: nangni suungnga; emakli nangni karra; emakli jetleitheileiya nangni karra inlar duoi.””

22Halli ama'n asiamruoi ngaidiang aleiti, “Nangni'n Miring sapa kha ningmuzootna nikhuo inkhat alahongsik eii takkha nangni'n munutun. 23Halli mi ngai'n nangnidiang innati sik eii, “‘Sosun enru, emakli hin enru!’’ takkha nangni'n juimaru khat-um suokmaru. 24Ajarchu lairalak mun inkhat makheiya kool juo-inlek phakhan, lairalaak mun inkhatiang ijuowar angnga miring sapa jouni khannum khawa ka-angsik eii. 25Ama'n poongna angjet intongpui masasik eii halli hiwa khang mi ngai'n amakha zootnunu. 26Khat-um Noah khangnga kaleisuok angnga Miring sapa nikhuoni khannum alasuoksik eii. Inphut 6:5-8

27Noah in rakuong suungnga aluutmak laiseng, inmani'n inbak in-inna, inn inneiya, moi inruoiya inleiom, halli tuikalok tuikalian asuok ah inmani rakip aleiminmangjei. Inphut 7:6-24

28Hiwale in angrip ah Lot nikhuoni khannum, inmani'n inbak in-in, inracho, injour, inling, halli inn insak ah inleiom. Inphut 18:29; 19:25

29Takkha Lot in Sodom makheiya asuok nikhan marwaan makheiya mei khat-um kaatmei kha ruosur angnga ajuosurra inmani rakip ngaikha aleiminmang. 30Miring sapa juo-inlarna nikhuo nikhan num khawa angnga akasuok sik eii.””

31“Khawa nikhuoni khan innchungnga kaom in aneinaak kaleisik-ah innsuungnga juochumkhai marase, halli hiwa angnga leiya kaom atu ka-ang innum inntiang hongkirkhai marase. Matt 24:17-18; Mk 13:15,16

32Lot numei kha ngaidonru! Inphut 19:26

33Atu ka-ang in ama ringkhuo kaminringsik ah ka-entok ama khan aminmangsik eii, atu ka-ang in ama ringkhuo kaminmang amakha'n ringna amusik eii. Matt 10:39; 16:25; Mk 8:35; Luk 9:24; Jn 12:25

34Kei'n kanati, khawani zaanna zaalmun inkhat-ah mi inni inleizaalsik eii, miring inkhatkha aruoisik halli minring inkhat kha adasik eii. 35Mi inni'n saang inleisuksik eii, miring inkhat aruoisik halli mi inkhat kha adasik eii.”” 36Leiya mi inni inleiomsik eii, miring inkhat kha aruoisik halli miring inkhat kha adasik eii.

37Halli inmani'n amadiang inheiti, “Hunme Pumi?””

halli Jisu'n aleimasang, “Mikathi kaluong omna munkhan laangkia ngai'n intuupsik eii.””

Currently Selected:

Luke 17: KHMNT

Highlight

Copy