ମାର୍କ 5
5
ବାହିନୀ ବୁତ୍ପଇତେ ନାରୁଙ୍କ୍ ଜିସୁ ସାୟେ ମାଡ଼୍ତନ୍
(ମାତିଉ ୮:୨୮-୩୪; ଲୁକ ୮:୨୬-୩୯)
1ଜିସୁ ନୁ ତାନ୍ ଶିଷ୍ୟନଡ଼୍ ଗାଲିଲୀ ବେଡ଼େମ୍ ମେଣ୍ଡନ୍ ପାକେ ଗରାଶୀୟନଡ଼୍ ନାର୍ଦାଗ୍ ହେଉତ୍ତଡ଼୍ । 2ଜିସୁ ଓଡେତାଗାଙ୍କ୍ ଡ଼ିଗାନ୍ ସାଙ୍ଗେ ସାଙ୍ଗେ ଆଗେ ମାନ୍ଦାନ୍ କବର୍ ବା ପାଡ଼୍କିନ୍ ଲୋପେଙ୍କ୍ ୱେରନ୍ ବୁତ୍ପଇତେ ନାରୁନ୍ ୱାସ୍ ଅଙ୍କ୍ କାଇଲ୍ତନ୍ । 3ଅଣ୍ଡ୍ ୱିସ୍କିନାଗ୍ ମାନ୍ନୁନ୍ । ବେନ ଅଙ୍କ୍ ଇକ୍ଲେମ୍ତ ମିକା ତଅତ୍ତେ ପାର୍ୱେ ମାନ୍ମାନ । 4ଅଣ୍ଡ୍ କାଇକିନାଉ ଇକ୍ଲେମ୍ ଦେହେସ୍ ମାତ୍ତନ୍ ନୁ ଡେକାନ୍ ବେଡ଼ି ଉୱୁସ୍ ମାନ୍ନୁନ୍ । ଅନାହୁ କାଇକ୍ ଡ଼େକା ଇକ୍ଲେକ୍ ତହସ୍ ମାତ୍ତଡ଼୍ । କିନ୍ତୁ ଅଙ୍କ୍ ପଇତାନ୍ ସେଙ୍ଗେ ବେନନାଦ୍ ଶକ୍ତି ଇଲ୍ଲେ । 5ଅଣ୍ଡ୍ ନାର୍କା ପାୟାଲ୍ ମେଟାନାଗ୍ ନୁ ୱିଷ୍କିନାଗ୍ ଉଡମାନ୍ନୁନ୍, କିଡ଼୍କି ମିକା କାଲ୍କିନାଗ୍ ନିଜେତ୍ ମେନ୍ଦୁଲ୍ତିଙ୍କ୍ ଚିହ୍ନା ମାଡ଼ମାତ୍ତଣ୍ତ୍ ।
6ସୁଦୁଟ୍ ଯେକା ଜିସୁଙ୍କ୍ ଉଡ଼ି ଅଣ୍ଡ୍ ମିରିୱାସ୍ ଅନ୍ ମୁନେ ମର୍ମିଣ୍ଡା ଇସ୍, 7ଗାଟିଲେଙ୍ଗ୍ଦେ କେତ୍ତାନ୍, “ହୋ ସର୍ବୋପରିସ୍ଥ ଇଶ୍ୱର୍ତେ ମାର୍ ଜିସୁ ! ନା ପାକେ ନିୟାଦ୍ ବାତେ ପାଡ଼୍ୟି ? ଇଶ୍ୱର୍ତେ ପେଦେର୍ତେ କେତୁତାନ୍, ନାକିଙ୍କ୍ ଯନ୍ତ୍ରଣା ଇମା ।” 8ଅଣ୍ଡ୍ ଇଦ୍ଗଟ୍ କେତ୍ତନ୍, ବାତେଙ୍କ୍ ଇତ୍କେ ଆସୁଙ୍କ୍ ଅନାଗେ ମାନ୍ଦାନ୍ ବୁତ୍କିଂଙ୍କ୍ ପେଇସ୍ ଆଦାନ୍ ସେଙ୍ଗେ କେସମାତ୍ତନ୍ ।
9ଜିସୁଅଙ୍କ୍ କେତ୍ତନ୍, “ନି ପେଦେର୍ ବାତ୍ତେ ?” ଅଣ୍ଡ୍ ଉତ୍ତର୍ ହିତ୍ତନ୍, “ନା ପେଦେର୍ ବାହିନୀ ।”
10“ମାମେ ନାର୍ଗେ ।” ଆୱିକିଂଙ୍କ୍ ଆଦ୍ ନାର୍ଦାଗାଙ୍କ୍ ଯେକା ତଲ୍ମାଟ୍ ଇଞ୍ଜ ଅଣ୍ଡ୍ ଜିସୁଙ୍କ୍ କେତାନଙ୍କ୍ ପସ୍ପ୍ତନ୍ ।
11ଗାର୍ରେ ମାନ୍ଦାନ୍ ମେଟେତାଗ୍ ମାନ୍ଦେ ପାଦି ମେୟ ମାତ୍ତା । 12ବୁତ୍କ୍ ଜିସୁଙ୍କ୍ ଅନୁରଦ୍ ମାଡ଼ି କେତ୍ତା, “ଆୱୁ ପାଦି ମାନ୍ଦେ ଲୋପେ ନେଙ୍ଗାନ୍ ସେଙ୍ଗେ ମାକିଙ୍କ୍ ଇମ୍ ।” 13ଜିସୁ କେସ୍ ଇତ୍ତନ୍ ନୁ ବୁତ୍କ୍ ଆ ନାରୁନାଗାଙ୍କ୍ ପେଇସ୍ ୱାସ୍ ପାଦି ମାନ୍ଦେ ଲୋପେ ନେଙ୍ଗ୍ତା ନୁ ସାରେ ରେଣ୍ଡ୍ହଜାର୍ ପାଦି ଗାଟି ଉର୍ଗିଙ୍କ୍ ମିରି ମେଟେତ୍ ଜୁଟିନାଗାଙ୍କ୍ ରାଲ୍ଲି ମୁଡ଼୍ନ୍ଦି ଡଲ୍ତା ।
14ପାଦିଙ୍କ୍ କେପାନଡ଼୍ ମିରିଆଞ୍ଜ୍ ଇଦ୍ କବର୍ ସହର୍ ନୁ ଗାରେମାନ୍ଦାନ୍ ନାକିନାଗ୍ କେସ୍ସିତ୍ତଡ଼୍ । ବାତେ ଗଟେମ୍ ଆତ୍ତେ, ଉଡ଼ାନଙ୍କ୍ ନାର୍ଗେ ନାରୁଡ଼୍ ଆତ୍ତଡ଼୍ । 15ଅଡ଼୍ ଉଡ଼୍ତଡ଼୍ ଯେ ବୁତ୍ପଇତେ ନାରୁନ୍ ଚକା କେର୍ସ୍ ଲେକେତ୍ ତିଆର୍ ଆସ୍ ଜିସୁନ୍ ଗାରେ କୁଦ୍ତନ୍ । ଆଦ୍ ଉଡ଼ି ଅଡ଼୍ ବାକ୍ୱା ଆତ୍ତଡ଼୍ । 16ବୁତ୍ପଇତେ ନାରୁନ୍ ବେଲାନ୍ ସୁସ୍ଥ ଆତ୍ତନ୍ ନୁ ପାଦି ବେଲାନ୍ ନଷ୍ଟ ଆସ୍ ମାତ୍ତା, ଇୱୁସାରେ ଗଟ୍ନା ଉଡ଼ିମାନ୍ଦାନ୍ ନାରୁଡ଼୍ ଅଡ଼୍କିଂଙ୍କ୍ କେତ୍ତଡ଼୍ ।
17ଆଦ୍ କେଞ୍ଜି ଅଡ଼୍ ଜିସୁଙ୍କ୍ ଆଦ୍ ନାର୍ ୱିଡ଼୍ସି ଆଦାଙ୍କ୍ କେତ୍ତଡ଼୍ ।
18ଜିସୁ ଓଡେତାଗ୍ ତାରେନଙ୍କ୍ ଆଦାନ୍ ୱେଲେ ବୁତ୍ତାଗାଙ୍କ୍ ରକ୍ଷା ଆସ୍ମାନ୍ଦାନ୍ ନାରୁଣ୍ଡ୍ ଅନ୍ତଡ଼୍ ଆଦାନ୍ ସେଙ୍ଗେ କେତ୍ତନ୍ ।
19ଜିସୁ ଅଙ୍କ୍ ତାନ୍ଡ଼୍ ଆଦାଙ୍କ୍ ଇୱକଟ୍ କେତ୍ତନ୍, “ଲେକେତ୍ ମିଇ ଲୋନ୍ ମୀଇ ନାରୁଡ଼୍ ପାକେ ମାଲ୍ସ୍ ଆନ୍ । ପ୍ରବୁ ନିଇ ସେଙ୍ଗେ ବାତ୍ତେ ସାରେ ମାଡ଼୍ତନ୍ ନୁ ନିଇ ମାଇଦିଙ୍କ୍ ବେନ୍ ଦୟା ତତ୍ତନ୍, ଇଦ୍ ଗଟ୍ ଅଡ଼୍କିଂଙ୍କ୍ କେଲ୍ମ୍ ।”
20ନାରୁଣ୍ଡ୍ ଦେକାପଲୀ ଅଞ୍ଚଲ୍ତା ଆଞ୍ଜ୍ ଜିସୁ ଅନ୍ସେଙ୍ଗେ ବାତେ ମାଡ଼ିମାତ୍ତନ୍, ସାରେପାକେ କେତ୍ତନ୍ । ବେନଡ଼୍ ଅନ୍ ଗଟି କେଞ୍ଜ୍ତଡ଼୍, ସାରେତଡ଼୍ ବାକ୍ୱା ଆତ୍ତଡ଼୍ ।
ନାଟାଡ଼୍ ସୁସ୍ଥ ଆତ୍ତେ ଯାଇରସ୍ତେ ମାୟାଡ଼୍ ଗେଲ୍ସ୍ତେ
(ମାତିଉ ୯:୧୮-୨୬; ଲୁକ ୮:୪୦-୫୬)
21ଜିସୁ ବେଡ଼େମ୍ତେ ମେଣ୍ଡ୍ନ୍ ପାକେ ମାଲ୍ସ୍ ଆତ୍ତନ୍ । ଆ ସମୁଦ୍ର ଆଞ୍ଚିନାଗ୍ ନାର୍ଗେ ନାରୁଡ଼୍ ଅଙ୍କ୍ ତିଡ଼ିୟି ନିସ୍ ଗୁଡ଼୍ତଡ଼୍ । 22ଆଗେମାନ୍ଦାନ୍ ଲୋତ୍ତେ ଯାଇରସ୍ ପେଦେର୍ତନ୍ ୱେରଣ୍ଡ୍ ନାରୁଣ୍ଡ୍ ଆଗେ ହେଉତ୍ତନ୍, 23ନୁ ଜିସୁଙ୍କ୍ ଉଡ଼ି ଅନ୍ ଡେକାନ୍ ମଦଲ୍ ରାଲି ହୃଦୟତେ ନିବେଦନ୍ ମାଡ଼୍ତନ୍, “ନା ମାୟାଡ଼୍ ନାର୍ଗେ ରୋଗ୍ତେ ମିନ୍ଦେ । ନିମେ ୱାସ୍ ତାନ୍ ପରୁ କାଇ ୱାଟ୍କେ, ଆଦ୍ ସାୟେ ଆସ୍ ଗେଲ୍ସିତ୍ ।”
24ଜିସୁ ଅନ୍ତୋଡ଼୍ ଆଦାନଙ୍କ୍ ପେଇତ୍ତନ୍ । ନାର୍ଗେ ମୁଲ୍ ନାରୁଡ଼୍ ଅନ୍ତଡ଼୍ ଆଞ୍ଜମାତ୍ତଡ଼୍ ଯେ ଅନ୍ ପରୁ ଅଡ଼୍ ସାରେପାକେଙ୍କ୍ ତାଲ୍ଗି ରାୟମାତ୍ତଡ଼୍ ।
25ୱେରଡ଼୍ ମୁତ୍ତେ ପ୍ରାୟ ବାର ହେଣ୍ଡେକ୍ ପୟିସ୍ ନେତୁର୍ ପେଇତାନ୍ ରୋଗ୍ତେ ଗାଟି ତିପାଲ୍ ଆସମାତ୍ତେ । 26ନାର୍ଗେଦାମ୍ ସାୟେ ମାଡ଼୍କେ ମିକା ସାୟେ ଆୱେ ମାତ୍ତେ, ତାନାଉ ସାରେ ଡାବ୍କ୍ ତେରମାତ୍ତେ ମିକା, ରୋଗ୍ ଲେକେତ୍ ଆୟ୍ୱେ ମାତ୍ତେ ନୁ ନାର୍ଗେ ଆସମାତ୍ତେ । 27ଆଦ୍ ଜିସୁନ୍ ବିଷୟ୍ତେ କେଞ୍ଜିମାତ୍ତେ ନୁ ନାରୁଡ଼୍ ଗହଲି ଲୋପେଙ୍କ୍ ଜିସୁନ୍, ସିଲେତିଙ୍କ୍ ହିଟ୍ତେ, 28ପେର୍କେଙ୍କ୍ ୱାସ୍ ଆଲ୍ସମାତ୍ତେ, “ନାନେ ଯଦି ଅନାଦ୍ ସିଲେତିଙ୍କ୍, ହିଟ୍କେ ନାନେ ସାୟେ ଆଦ୍ତାନ୍ ।”
29ଆଦ୍ ଜିସୁନ୍ ସିଲେତିଙ୍କ୍ ଇଟ୍ତେ ସାଙ୍ଗେ ସାଙ୍ଗେ ତାନାଦ୍ ନେତୁର୍ ପେଇତାନାଦ୍ ବନ୍ଦ ଆତ୍ତେ ନୁ ଆଦ୍ ରୋଗ୍ତାଗାଙ୍କ୍ ସାୟେ ଆତ୍ତେ ଇଞ୍ଜ ଏର୍କେ ମାଡ଼୍ତେ । 30ଆସୁଙ୍ଗେ ଜିସୁ ଅନାଗାଙ୍କ୍ ଶକ୍ତି ପେୟିସ୍ ଆଦାନାଦ୍ ପୁତ୍ତନ୍ ନାରୁଡ଼୍ ପାର୍କେ ମିଡ଼୍ନ୍ଦି ମିକା କେତ୍ତନ୍, “ବେନ ନା ସିଲେତିଙ୍କ୍ ଇଟ୍ତନ୍ ?”
31ତାନ୍ ଶିଷ୍ୟନଡ଼୍ ଉତ୍ତର୍ ହିତ୍ତଡ଼୍, “ନିମେ ତ ଉଡ଼ମିନ୍ଦେନି, ବେଲାନ୍ ନି ସାରେ ପାକା ନାରୁଡ଼୍ ମାନ୍ଦେ ଆସ୍ମିନ୍ଦେଡ଼୍ । ନିକିଙ୍କ୍ ବେନ ଇଟ୍ତନ୍ ଇଞ୍ଜ କେସମିନ୍ଦେନି ବାତ୍ତିଙ୍କ୍ ?” 32କିନ୍ତୁ ବେନ ଅଙ୍କ୍ ଇଟ୍ତନ୍, ପୁନ୍ଦାନ୍ ମାଇଦିଙ୍କ୍ ଜିସୁ ସାରେ ପାକ୍କେ ଉଡ଼୍ତନ୍ । 33ସାରେ ଗଟି ପୁନ୍ଦେପାର୍ସ୍ ଆ ନାଟାଡ଼୍ ୱେର୍ଗିଙ୍କ୍ ଜିସୁନ୍ ଡେକାନ୍ ମଦଲ୍ ମର୍ମିଣ୍ଡା ଇସ୍ ସାରେ ସତ୍ ଗଟି କେତ୍ତେ । 34ଜିସୁ ଆଦିଙ୍କ୍ କେତ୍ତନ୍, “ପିକି ! ନିୟାଦ୍ ବିଶ୍ୱାସ୍ ନିକିଙ୍କ୍ ସୁସ୍ଥ ମାଡ଼୍ତେ । ସାରେତାଗାଙ୍କ୍ ସାୟେ ଆସ୍ ଶାନ୍ତିତେ ମାଲ୍ସ୍ ଅନ୍ ।”
35ଜିସୁ ଇଦ୍ଗଟ୍ କେତାନ୍ ୱେଲେ, ଯାଇରସ୍ତେ ଲୋତ୍ତେ କଞ୍ଜ୍ କବର୍ ତାସ୍ ମାନ୍ଦାନ୍ ନାରୁଡ଼୍ ଅଙ୍କ୍ କେତ୍ତଡ଼୍, “ନି ମାୟାଡ଼୍ ଡଲିଆତ୍ତେ, ମେଣ୍ଡେ ବାତ୍ତିଙ୍କ୍ ଗୁରୁଙ୍କ୍ ତିପାଲ୍ ମାଡ଼ୁତିନ୍ ।” 36ଜିସୁ ଅଡ଼ାୱୁ ଗଟିଙ୍କ୍ କେଞ୍ଜିମିକା ଯାଇରସ୍ତିଙ୍କ୍ କେତ୍ତନ୍, “ୱେର୍ମା; ମାତର୍ ବିଶ୍ୱାସ୍ ମାଡ଼େ ।” 37ତାନ୍ ପେର୍କେ ଯାକୁବ୍, ତାନ୍ ତାମୁଣ୍ଡ୍ ଯୋହନ୍ ନୁ ପିତର୍ତିଙ୍କ୍ ୱିଡ଼୍ସି ସାଙ୍ଗେତେ ମେଣ୍ଡେ ବେନଙ୍କ୍ ଆୟକଟ୍ ଜିସୁ ଯାଇରସ୍ତେ ଲୋନ୍ ଆତ୍ତଣ୍ତ୍ । 38ଆଗେ ହେଉସ୍ ଅଣ୍ଡ୍ ଉଡ଼୍ତନ୍, ନାଟା ଗାଟିଲେଙ୍ଗ୍ଦେ କେୟ ମାତ୍ତା, 39ଆଦ୍ ମାନ୍ଦେତିଙ୍କ୍ ଆଞ୍ଜ୍ ଆୱିଙ୍କ୍ କେତ୍ତନ୍, “ବାତ୍ତିଙ୍କ୍ ମର୍ ଆଦୁତିଡ଼୍ ? ବାତ୍ତିଙ୍କ୍ କେୟୁତିଡ଼୍ ? ପିକିଡ଼୍ ଡଲ୍ଲ, ଉଞ୍ଜ୍ତେ ।”
40ଅଡ଼୍ ଅଙ୍କ୍ ବାକ୍ୱାଲ୍ ଆଲ୍ସି କାୱୁତ୍ତଡ଼୍ । ଜିସୁ ସାରେତଡ଼୍କ୍ ପେସ୍ପିତ୍ତନ୍ ନୁ ମାତର୍ ନିଜେତ୍ ମୁୱୁଡ଼୍ ଶିଷ୍ୟ ନୁ ପିଲେତ୍ ୟାୟ ବାବାଙ୍କ୍ ଆସ୍ ଆଦ୍ ଉଞ୍ଜିମାନ୍ଦାନ୍ ବାକ୍ଡ଼େତାଗ୍ ଆତ୍ତଡ଼୍ । 41ପିଲେତ୍ କାଇଦିଙ୍କ୍ ପଇସ୍ ଜିସୁ କେତ୍ତନ୍, “ତାଲିତା କୁମ୍,” ଇତ୍କେ “ପିକି, ନାନ୍ କେତୁତାନ୍ ତେଦା ।” 42ପିକିଡ଼୍ ଆସୁଙ୍ଗେ ତେଦ୍ଦି ତାଆକ ଉଡ଼ାଙ୍କ୍ ପସ୍ପ୍ତେ । ଆସୁଙ୍ଗ୍ ତାନ୍ ବୟସ୍ ମାତର୍ ବାର ହେଣ୍ଡେକ୍ । ଇଦ୍ ଗଟ୍ନାତାଗ୍ ସାରେତଡ଼୍ ବାକ୍ୱା ଆତ୍ତଡ଼୍ । 43କିନ୍ତୁ ଇଦ୍ ବିଷୟ୍ତେ ବେନଙ୍କ୍ ବାତ୍ତେ କେତାନଙ୍କ୍ ଅଣ୍ଡ୍ ଅଡ଼୍କିଂଙ୍କ୍ କେଲ୍ମାଟ୍ ଇଞ୍ଜ କେତ୍ତନ୍ । ତାନ୍ପେର୍କେ ପିକ୍ତିଙ୍କ୍ ବାତ୍ତେ ତିନ୍ଦାଙ୍କ୍ ଇଦାନ୍ ସେଙ୍ଗେ ଜିସୁ ଅଡ଼୍କିଂଙ୍କ୍ କେତ୍ତନ୍ ।
Currently Selected:
ମାର୍କ 5: NTKaa20
Highlight
Share
Copy
Want to have your highlights saved across all your devices? Sign up or sign in
The New Testament in Koya Language © The Word for the World International and Koya Translation Samithi, Malkangiri, Odisha 2020
