ମାତିଉ 8
8
ଜିସୁ ୱେରଣ୍ଡ୍ କୃଷ୍ଟ ରୋଗିଙ୍କ୍ ସୁସ୍ଥ ମାଡ଼୍ତଣ୍ଡ୍
(ମାର୍କ ୧:୪୦-୪୫; ଲୁକ ୫:୧୨-୧୬)
1ଜିସୁ ମେଟେତ୍ ପର୍ରକଞ୍ଚ୍ ଡିଗି ୱାତ୍ତେ ପେର୍କେ ପିନାକେ ନାରୁଡ଼୍ ଅଂକିଙ୍କ୍ ଲେକେତ୍ ମାଡ଼୍ତଡ଼୍ । 2ଆସୁଟେ ୱେରଣ୍ଡ୍ କୁଷ୍ଠରଗୀ ଅନା ୱାସ୍ କେତ୍ତଣ୍ଡ୍, “ପ୍ରବୁ, ନିମେ ଯଦି ଇଚ୍ଛା ମାଡ଼ିତି, ଆଲାତ୍କେ ନାକିଂଙ୍କ୍ ସୁସ୍ଥ ମାଡ଼୍ଡ଼େ ପାର୍ଦ୍ତିନ୍ ।”
3ଜିସୁ କାୟ୍ ଆସ୍ ଅଂକିଙ୍କ୍ ଇଟି କେତ୍ତଣ୍ଡ୍, “ନାନ୍ ଇଚ୍ଛା ମାଡ଼ୁତାନ୍, ନିମ୍ ଲେକେତ୍ ହାଇମ୍ ।” 4ଜିସୁ ଅଂକିଙ୍କ୍ କେତ୍ତଣ୍ଡ୍, “କେଞ୍ଜା, ନିମ୍ ବେଲା ଆସ୍ ଲେକେତ୍ ଆଦ୍ତିନ୍, ବେନଙ୍କ୍ କେଲ୍ମା; ନିମ୍ ସିଦା ପୁରହିତ୍ତା ଗାର୍ରେ ହାଞ୍ଜ୍ ନିଜେତିଙ୍କ୍ ପରିକ୍ଷାମାଡ଼େ ମେଣ୍ଡେ ନିମ୍ ସୁସ୍ଥ ଆଦ୍ତିନ୍ ଇଞ୍ଜ୍ ସାରେତଡ଼୍କିଂଙ୍କ୍ କେଞ୍ଜ୍ପାଙ୍କ୍ ସେଙ୍ଗେ ମୋଶାନ୍ ତଡ଼୍ ତିଆର୍ ଆତ୍ତେ ଇଞ୍ଜ ଉସ୍ୱର୍ଗ ମାଡ଼ା ।”
ଜିସୁ ୱେରନ୍ ରୋମିୟ ସେନାପତିନ୍ ଦାସଙ୍କ୍ ସୁସ୍ଥ ମାଡ଼୍ତଣ୍ଡ୍
(ଲୁକ ୭:୧-୧୦)
5ଜିସୁ କଫର୍ନାହୁମ୍ ସହର୍ତାଗ୍ ହେଉତ୍ତେ ସାଙ୍ଗେ ସାଙ୍ଗେ ୱେରନ୍ ରୋମିୟ ସେନାପତି ଅଂକିଙ୍କ୍ କାଇଲି ଅନୁରଦ୍ ମାଡ଼ି କେତ୍ତଣ୍ଡ୍, 6“ପ୍ରବୁ, ନାୱଣ୍ଡ୍ ୱେରଣ୍ଡ୍ ଦାସ ରୋଗ୍ତେ ମିନ୍ଦେଣ୍ଡ୍ । ଅଣ୍ଡ୍ ମେଇଲାଙ୍କ୍ ପାର୍ୱନ୍, ଗାଟି କଷ୍ଟ ଆଦୁତନ୍ ।”
7ଜିସୁ ଅଂକିଙ୍କ୍ କେତ୍ତଣ୍ଡ୍, “ନାନ୍ ୱାସ୍ ଅଂକିଙ୍କ୍ ସୁସ୍ଥ ମାଡ଼ିତାନ୍ ।”
8ସେନାପତି କେତ୍ତଣ୍ଡ୍, “ଇଲେ, ପ୍ରବୁ, ନିମ୍ ନା ଲନ୍ ୱାଦ୍ତିନ୍, ନାନ୍ ହିଦ୍ଲେକାମ୍ ଯୋଗ୍ୟ ନାରୁନ୍ ଆୟନ୍ । ନିମ୍ ମାତର୍ ୱେରଡ଼୍ ପଦ୍ କେସିମ୍, ନା ଦାସ ସୁସ୍ଥ ଆଦ୍ତନ୍ । 9ନା ପର୍ରତ୍ ଦାସନ୍ ଗଟ୍ତେ ନାନ୍ ପାଡ଼୍ୟି ମାଡ଼୍କେ ମିକା ନା ଗଟ୍ତେ ନାର୍ଗେ ସୈନିକିଡ଼୍ ମିନ୍ଦେଡ଼୍ । ଅଡ଼୍ ଲୋପେଙ୍କ୍ ଅର୍ତୁଙ୍କ୍ ଯଦି ନାନ୍ ‘ଆନ୍’ ଇଞ୍ଜ୍ କେତିତାନ୍, ଅଣ୍ଡ୍ ଆଦ୍ତନ୍ । ମେଣ୍ଡେ ଅର୍ତୁଙ୍କ୍ ‘ୱାଡ଼େ’ ଇଞ୍ଜ କେତ୍କେ, ଅଣ୍ଡ୍ ୱାଦ୍ତନ୍ । ନା ଦାସଙ୍କ୍ ‘ହିଦ୍ମାଡ଼େ ହିଞ୍ଜ’ କେତ୍କେ ଅଣ୍ଡ୍ ଆଦ୍ ମାଡ଼ିତନ୍ ।”
10ଜିସୁ ଆଦେକେଞ୍ଜି ବାକ୍ୱା ଆତ୍ତନ୍ ନୁ ମେଣ୍ଡେ ଅନ୍ ପେର୍କେ ୱାଦାନଡ଼କ୍ କେତ୍ତଣ୍ଡ୍, “ନାନ୍ ସତ୍ କେତୁତାନ୍, ଇଶ୍ରାୟେଲ୍ତେ ବେନ୍ ନାରୁନ୍ନାଗ୍ ଇଣ୍ଡ୍ ନାରୁନ୍ ଲେକାମ୍ ବିଶ୍ୱାସ୍ ନାନ୍ ଉଡ଼ନ୍ । 11#ଲୁକ ୧3:୨୯.ଏର୍କା ମାଡ଼ାଟ୍, ମୁନେତ୍ ଦେଶ୍ତାଗାଙ୍କ୍ ନୁ ପଡ଼ଦ୍ଆଦାନ୍ ଦେଶ୍ତାଗାଙ୍କ୍ ନାର୍ଗେ ନାରୁଡ଼୍ ୱାସ୍ ସ୍ୱର୍ଗ ରାଜ୍ୟତାଗ୍ ଅବ୍ରାହାମ୍, ଇସ୍ହାକ୍ ନୁ ଯାକୁବ୍ ଅଣ୍ଡୟାଗେ କାର୍ଙ୍ଗି ତିନ୍ଦାନଙ୍କ୍ କୁଦିତଡ଼୍ । 12#ମାତିଉ ୨୨:୧3; ୨୫:3୦; ଲୁକ ୧3:୨୮.ବାତେଙ୍କ୍ ଇତ୍କେ ବେନଡ଼୍ ଇ ରାଜ୍ୟତାଗ୍ ମାନ୍ଦାନ୍ ମାତ୍ତେ ଅଡ଼୍କିଂଙ୍କ୍ ବାଇଦେ ଇକାଡ଼୍ତାଗ୍ ୱାଟିଦ୍ତଡ଼୍ । ଆଗେ ଅଡ଼୍ କେଇକେଇ ପାଲ୍କ୍ କର୍କିତଡ଼୍ ।” 13ଜିସୁ ସେନାପତିଙ୍କ୍ କେତ୍ତଣ୍ଡ୍, “ଲୋନ୍ ଆନ୍ । ନିମ୍ ବାତେଏ ବିଶ୍ୱାସ୍ ମାଡ଼ୁତି, ଆଦେକେ ଆଦ୍ତେ ।” ଟିକ୍ ଆଦ୍ ସମୟ୍ତେ ସେନାପତିନ୍ ଦାସ ସୁସ୍ଥ ଆତ୍ତନ୍ ।
ଜିସୁ ନାର୍ଗେ ନାରୁଡ଼୍କ୍ ସୁସ୍ଥ ମାଡ଼୍ତଣ୍ଡ୍
(ମାର୍କ ୧:୨୯-୩୪; ଲୁକ ୪:୩୮-୪୧)
14ଜିସୁ ପିତର୍ତେ ଲୋନ୍ ଆଞ୍ଜ୍ ଉଡ଼୍ତନ୍, ପିତର୍ତେ ପୟେଙ୍କ୍ ବୟଙ୍କାର୍ ହେଡ଼୍କ୍ ଆସ୍ମାତ୍ତେ । 15ଜିସୁ ତାନ୍ କାଇଦିଙ୍କ୍ ହିଟ୍ତେ ସାଙ୍ଗେ ସାଙ୍ଗେ ହେଡ଼୍କ୍ ୱିଡ଼୍ସ୍ତେ ନୁ ଆଦ୍ ତେଦି ମିକା ଜିସୁନାଦ୍ ସେବା ମାଡ଼ାଙ୍କ୍ ପସ୍ପ୍ତେ ।
16ମୁଲ୍ପୁଟ୍ ଆତ୍ତାଙ୍କ୍ ନାରୁଡ଼୍ ନାର୍ଗେ ବୁତ୍ପଇତେ ନାରୁଡ଼୍କିଂଙ୍କ୍ ଜିସୁନ୍ ଗାର୍ରେ ତାତ୍ତଡ଼୍ । ପଦେନ୍ ଗଟ୍ତେ ଅଣ୍ଡ୍ ବୁତ୍ଆତ୍ମାକିଙ୍କ୍ ତଲ୍ତନ୍ ନୁ ରଗି ନାରୁଡ଼୍କିଂଙ୍କ୍ ସୁସ୍ଥ ମାଡ଼୍ତଣ୍ଡ୍ । 17ଆଦିନ୍ ସେଙ୍ଗେ ଆଦ୍ ବାବବାଦୀଡ଼୍ ଯିଶାୟିନ୍ ବବିଷ୍ୟତ୍ ବାଣିତିଙ୍କ୍ ସାରେ ମାଡ଼୍ତଣ୍ଡ୍ । ଯିଶାୟ କେତ୍ତଣ୍ଡ୍, “ଅଣ୍ଡ୍ ମାୱାଦ୍ କଷ୍ଟତିଙ୍କ୍ ଦୁରାମ୍ ମାଡ଼୍ତଣ୍ଡ୍ ନୁ ମାକିଂଙ୍କ୍ ରୋଗ୍ତାଗାଙ୍କ୍ ମୁକ୍ତି ମାଡ଼୍ତଣ୍ଡ୍ ।”
ଜିସୁନ୍ ଶିଷ୍ୟ ଆଦାନ୍ ଇଚ୍ଛା
(ଲୁକ ୯:୫୭-୬୨)
18ଅନ୍ ତିଡ଼୍ପାକା ନାରୁଡ଼୍ ଗଅଲି ହାଦାନାଦ୍ ଉଡ଼ି, ଜିସୁ ଶିଷ୍ୟନଡ଼୍କ୍ ଇଲ୍କେତ୍ ଆପାକେ ଆଦାଙ୍କ୍ କେତ୍ତଣ୍ଡ୍ । 19ୱେରନ୍ ଦର୍ମଗୁରୁ ୱାସ୍ ଜିସୁଙ୍କ୍ କେତ୍ତଣ୍ଡ୍, ହୋ “ଗୁରୁ, ନିମ୍ ବେଗେ ଆଦ୍ତିନ୍, ଆଗେ ନାନ୍ନେ ମିକା ଆଦ୍ଦାଙ୍କ୍ ତିୟାର୍ ମିନ୍ଦେନ୍ ।”
20ଜିସୁ ଅଂକିଙ୍କ୍ କେତ୍ତଣ୍ଡ୍, “କଙ୍ଗାନାକାନ୍ ଦୋର୍ରା ମିନ୍ଦେ, ପିଟେଙ୍କ୍ ତୁହୁକା ମିନ୍ଦେ । ବାତେଙ୍କ୍ ଇତ୍କେ ରମାନ୍ ସେଙ୍ଗେ ନାରୁଡ଼୍କ୍ ପଡ଼ିୟେ ଇଲେ ।”
21ଜିସୁଙ୍କ୍ ମେଣ୍ଡ୍ଅର୍ତୁନ୍ ଶିଷ୍ୟ କେତ୍ତଣ୍ଡ୍, “ପ୍ରବୁ, ମୁନେନ୍ ଆଞ୍ଜ୍ ନା ବାବାଙ୍କ୍ ସମାଦି ହିଦାନ୍ ମାଇଦିଙ୍କ୍ ଗଟ୍ ହିମ୍ ।”
22ଜିସୁ ଅଂକିଙ୍କ୍ କେତ୍ତନ୍ ନା ପେର୍କେପେର୍କେ ୱାଡ଼େ, ଡଲ୍ତେନଡ଼୍କିଂଙ୍କ୍ ସମାଦି ହିଦାଙ୍କ୍ ଡୋଲ୍ତଡ଼୍କ୍ ୱିଡ଼୍ସିମୁଟ୍ ।
ଜିସୁ ଗାଲ୍, ୱାର୍ସାତିଙ୍କ୍ ଅଟ୍କା ମାଡ଼୍ତଣ୍ଡ୍
(ମାର୍କ ୪:୩୫-୪୧; ଲୁକ ୮:୨୨-୨୫)
23ଅନ୍ଦିନେ ଜିସୁ ଶିଷ୍ୟଡ଼୍ ତଡ଼୍ ଓଡେତେ ଆଞ୍ଜମାତ୍ତଣ୍ଡ୍ । 24ହଟାତ୍ ସମୁଦ୍ରତାଗ୍ ଇଦ୍ଲେକାମ୍ ଗାଟି ଗାଲ୍ୱାର୍ସାମ୍ ୱାତ୍ତେ ନୁ ଓଡ୍ ହେର୍ଦାଗ୍ ମୁଡ଼୍ନ୍ଦାନ୍ ଲେକାମ୍ ଆତ୍ତେ । ବାତେଙ୍କ୍ ଇତ୍କେ ଜିସୁ ଆସୁଟେ ଉଞ୍ଜି ମାତ୍ତନ୍ । 25ଶିଷ୍ୟନଡ଼୍ ଅଂକିଙ୍କ୍ ତେସ୍ କେତ୍ତଡ଼୍, “ପ୍ରବୁ, ମାକିଂଙ୍କ୍ ରକ୍ଷା ମାଡ଼େ । ହିଲୁକ୍ ମାମ୍ମେ ମୁଡ଼୍ନ୍ଦି ଡଲିତମ୍ ।”
26ଜିସୁ ଉତ୍ତର୍ କେତ୍ତଣ୍ଡ୍, “ବାତ୍ତିଙ୍କ୍ ହିସର୍ ୱେର୍ଦୁତିଡ଼୍ ? ମିଡ଼୍ ସାରେତଡ଼ି ବାତେଏ ସୁଦୁଟ୍ ବିଶ୍ୱାସିଡ଼୍ ?” ତାନ୍ ପେର୍କେ ଅଣ୍ଡ୍ ତେଦି ଗାଲ୍ତିଙ୍କ୍ ନୁ ତଲ୍କଡ଼୍ତିଙ୍କ୍ କଟ ଆଦାଙ୍କ୍ ଆଦେଶ୍ ହିତ୍ତନ୍ । ସାଙ୍ଗେ ସାଙ୍ଗେ ସାରେ ଶାନ୍ତି ଆତ୍ତେ ।
27ଆଗାଙ୍କ୍ ସାରେତଡ଼୍ ବାକ୍ୱା ଆତ୍ତଡ଼୍ । ଅଡ଼୍ ନିଜେ ନିଜେ କେତାକେତି ଆତ୍ତଡ଼୍ “ହିଣ୍ଡ୍ ବେସତ୍ ନାରୁନ୍ ? ଗାଲ୍ ନୁ ତଲ୍କଡ଼୍ ମିକା ଅନ୍ ଗଟ୍ କେଞ୍ଜୁତା ।”
ହିର୍ୱୁଡ଼୍କ୍ ବୁତ୍ପୟ୍ତେ ନାରୁଡ଼୍କ୍ ଜିସୁ ସୁସ୍ଥ ମାଡ଼୍ତଣ୍ଡ୍
(ମାର୍କ ୫:୧-୨୦; ଲୁକ ୮:୨୬-୩୯)
28ଜିସୁ ଇଲ୍କେତ୍ ମେଣ୍ଡନ୍ ପାକେ ଗଦରିୟ ଯାଗାତାଗ୍ ଆସ୍ତେ ସାଙ୍ଗେ ସାଙ୍ଗେ ହିର୍ଉଡ଼୍ ନାରୁଡ଼୍କ୍ କାହିଲ୍ତଣ୍ଡ୍ । ଅଡ଼୍ ସମାଦି ପାଡ଼୍କିନ୍ ଲୋପେ ମାଞ୍ଜମାତ୍ତଡ଼୍ । ଅଡ଼୍ ବୁତ୍ ପହିତେନଡ଼୍ ନୁ ଗାଟି ବୟଙ୍କାର୍ ମାତ୍ତଡ଼୍ ଆଦ୍ ଆର୍ ଇସ୍ ଆଦ୍ଦା ୱାଦା ମାଡ଼ାଙ୍କ୍ ବେନମିକା ସାହାସ୍ ମାଡ଼ାଙ୍କ୍ ପାର୍ୱେ ମାତ୍ତଡ଼୍ । 29ଅଡ଼୍ ଜିସୁଙ୍କ୍ ଉଡ଼୍ତେ ସାଙ୍ଗେ ସାଙ୍ଗେ ଗାଟିଲେଙ୍କ୍ଦେ କେତ୍ତଡ଼୍, “ହୋ ଇଶ୍ୱର୍ତେ ମାର୍ ! ମାୟାଗ୍ କଞ୍ଜ୍ ନିମ୍ ବାତ୍ଇଚ୍ଛା ହାଦୁତିନ୍ ? ମାୱାଦ୍ ଦିନାମ୍ ହେଉୱାକେ ମାକିଂଙ୍କ୍ ବାତ୍ ଦଣ୍ଡ୍ ହିଦାଙ୍କ୍ ୱାତ୍ତିନ୍ ?”
30ଆଗାଙ୍କ୍ ସୁଦୁଟ୍ ଦୁରାମ୍ ପାଦ୍ ମାନ୍ଦେ ମେୟମାତ୍ତା । 31ଆ ନାରିଡ଼୍ ଲୋପେ ମାନ୍ଦାନ୍ ବୁତ୍କ୍ ଜିସୁଙ୍କ୍ ଅନୁରଦ୍ ମାଡ଼ିକେତ୍ତା, “ମାକିଙ୍କ୍ ଯଦି ତଲାନଙ୍କ୍ ଇଚ୍ଛା ମାଡୁତିନ୍ ଆଲାଇତ୍କେ, ଆଉ ମାନ୍ଦେପାଦିନ୍ ଲୋପେ ରହସିମ୍ ।”
32ଜିସୁ କେତ୍ତଣ୍ଡ୍ “ଆନୁଟ୍ । ବୁତ୍କ୍ ସାଙ୍ଗେ ସାଙ୍ଗେ ନାରୁଙ୍କ୍ ୱିଡ଼୍ସି ମାନ୍ଦେପାଦିନ୍ ଲୋପେ ହସ୍ତା । ପାଦି ମିରିଆଞ୍ଜ୍ ନୁ ମେଟେତ୍ ଆଞ୍ଚ୍ ମଦଲ୍ ଡିଗି ଇଲ୍କେତାଗ୍ ରାଲି ଡଲ୍ତା ।”
33ପାଦି କେପାନ୍ ନାରୁଡ଼୍ ଗାର୍ରେତ୍ ସହର୍ତାଗ୍ ମିରିଆଞ୍ଜ୍ ବୁତ୍ପଇତେ ନଣ୍ଡ୍ ସେଙ୍ଗେ ବାତ୍ ଗଟେମ୍ଆତ୍ତେ ନୁ ମେଣ୍ଡେ ବାଗାତ୍ ସାରେ ଗଟି ଆଗେ କେସଡ଼୍ ଉଡ଼୍ତଡ଼୍ । 34ଆସୁଟେ ଆଦ୍ ସହର୍ତେ ସାରେତଡ଼୍ ଜିସୁଙ୍କ୍ କାଇଲାନ୍ ସେଙ୍ଗେ ପେଇତଡ଼୍ ମେଣ୍ଡେ ଅଂକିଙ୍କ୍ କାହିଲି ଆଦ୍ ପଡ଼ିୟେ ୱିଡ଼୍ସି ଆଦାନ୍ ସେଙ୍ଗେ ଅଂକିଙ୍କ୍ ଅନୁରଦ୍ ମାଡ଼୍ତଡ଼୍ ।
Currently Selected:
ମାତିଉ 8: NTKaa20
Highlight
Share
Copy
Want to have your highlights saved across all your devices? Sign up or sign in
The New Testament in Koya Language © The Word for the World International and Koya Translation Samithi, Malkangiri, Odisha 2020
