ଲୁକ 13
13
ପାପ୍ କନ୍ସ୍ ମାଲ୍ମୁଟ୍ ଇଲୁକ୍ ଡୋଲାଟ୍
1ଆଦ୍ ଦିନାମ୍ ତେ ଆଗେ ମାନ୍ଦାନ୍ ବେସ୍ତୁଡ଼୍ ନାରୁଡ଼୍ ଜିସୁଙ୍କ୍ କେତ୍ତଡ଼୍ ଯେ, ଗାଲିଲୀୟ ନାରୁଡ଼୍ ଇଶ୍ୱର୍ ତେ ଗାର୍ରେ ବଲି ଉତ୍ସର୍ଗ ମାଡ଼ାନ୍ ୱେଲେ ପିଲାତ ଅଡ଼୍କିଂଙ୍କ୍ ହାୱ୍କି ମାତ୍ତଡ଼୍ । 2ଆସୁଟେ ଜିସୁ ଅଡ଼୍କିଂଙ୍କ୍ କେତ୍ତଣ୍ଡ୍, ମିଡ଼୍ ବାତ୍ ଆଲ୍ସୁତିଡ଼୍ ଯେ, ହି ନାରୁଡ଼୍ ଗାଲିଲୀୟ ନାର୍ଦେ ଲୋପେଙ୍କ୍ ଗାଟି ପାପି ମାତ୍ତଡ଼୍ ଇଞ୍ଜ ଅଡ଼୍କିଂଙ୍କ୍ ଇଦ୍ ହାୱୁକ୍ତେ ଆଦ୍ ୱେୟ୍ତା କି ? 3ନାନେ ମିକିଂଙ୍କ୍ କେତୁତାନ୍, ଇଲା, ବାତେଙ୍କ୍ ଇତ୍କେ ପାପତାଗାଙ୍କ୍ ମନ୍ ପରିବର୍ତ୍ତନ୍ ମାଡ଼କଟ୍ ମାତ୍କେ ମିଡ଼୍ଆନ୍ତେ ସାରେ ରକମ୍ ନଷ୍ଟ ଆଦ୍ତିଡ଼୍ । 4ଶିଲୋହତାଗ୍ ବେଲା ୱେରନ୍ ନାରୁଡ଼୍ ପରୁ ବେଡ଼୍ୟାଦ୍ ଲୋନ୍ ଉର୍ଙ୍ଗି ରାଲ୍ତେ, ମିଡ଼୍ ବାତ୍ ଆଲ୍ସୁତିଡ଼୍ ? ଅଡ଼୍ ଯିରୁଶାଲେମ୍ତାଗ୍ ମାନ୍ଦାନ୍ ନାରୁଡ଼୍ ୱିଡ଼୍ସି ଅଦିକ୍ ପାପି ମାତ୍ତଡ଼୍ କି ? 5ନାନେ ମିକିଂଙ୍କ୍ କେତୁତାନ୍, ଇଲା, ବାତେଙ୍କ୍ ଇତ୍କେ ପାପତାଗାଙ୍କ୍ ମନ୍ ପରିବର୍ତ୍ତନ୍ ମାଡ଼କଟ୍ ମାତ୍କେ ମିଡ଼୍ଆନ୍ତେ ସାରେ ରକମ୍ ନଷ୍ଟ ଆଦ୍ତିଡ଼୍ ।
ଆଦକଟ ମାନ୍ଦାନ୍ ତୟ୍ମାଡ଼େତ୍ ୱେଷଡ଼୍
6ଆସୁଟେ, ଜିସୁ ଅଡ଼୍କିଂଙ୍କ୍ ଇଦ୍ ୱେଷଡ଼୍ କେତ୍ତଣ୍ଡ୍, “ୱେରନ୍ ଅଙ୍ଗୁର୍ ଗୁଡ଼େତାଗ୍ ୱେରଡ଼୍ ତୟେମାଡ଼ା ମାତ୍ତା, ଅଣ୍ଡ୍ କାୟାନ୍ ସେଙ୍ଗେ ମାଡ଼େତ୍ ଗାର୍ରେ ଆତ୍ତଣ୍ଡ୍, ବାତେଙ୍କ୍ ଇତ୍କେ ବାତେମିକା ଦର୍କ୍ତଣ୍ଡ୍ । 7ଆସୁଟେ ଅଣ୍ଡ୍ ଆଦ୍ ବଗିଚାତେ ମାଲିକ୍ତିଙ୍କ୍ କେତ୍ତଣ୍ଡ୍, ଉଡ଼େ, ମୁଣ୍ଡ୍ ଏଣ୍ଡ୍ ଆଦୁତ୍ ନାନେ ୱାସ୍ ହି ତୟେମାଡ଼୍ତାଗ୍ କାୟା ମେହ୍କୁତାନ୍, ଇତ୍କେ ଦର୍ସ୍କାନଙ୍କ୍ ପାର୍ୱନ୍; ଇଦିଙ୍କ୍ ନାଡ଼୍କି ଏସାଟ୍ ବାତେଙ୍କ୍ଇତ୍କେ ଇଦ୍ ବୂମ୍ଦିଙ୍କ୍ ମିକା ନଷ୍ଟ ମାଡ଼ୁତେ । 8ବାତେଙ୍କ୍ ଇତ୍କେ ଚାକର୍ ମାଲିକ୍ତିଙ୍କ୍ କେତ୍ତଣ୍ଡ୍, ୱେରଡ଼୍ ଏଣ୍ଡେତ୍ ମାଇଦିଙ୍କ୍ ଇଦିଙ୍କ୍ ୱିଡ଼୍ସିମ୍, ନାନେ ଇଦିଙ୍କ୍ ଚାର୍ପାକା ଡେୱିମେଣ୍ଡେ କାତାମ୍ ହିଦ୍ତାନ୍, 9ୱାଦାନ୍ ଏଣ୍ଡ୍ ଯଦି ହି ମାଡ଼େତାଗ୍ କାୟା ଆଦିତ୍ ହିତ୍କେ ତ ସାୟ୍ । ଇଲୁକ୍ ଆଦକଟ ମାତ୍କେ ଆସୁଟେ ହି ମାଡ଼େତିଙ୍କ୍ ନାଡ଼୍କିମ୍ ।”
ଜିସୁ ଅରଟ୍ ମୁର୍ଗ ନାଟାଡ଼୍ତିଙ୍କ୍ ବିଶ୍ରାମବାରତାଗ୍ ସୁସ୍ଥ ମାଡ଼୍ତଣ୍ଡ୍
10ଅଣ୍ଡ୍ଦାମ୍ ଜିସୁ ବିଶ୍ରାମ୍ଦିନାତେ ୱେରଡ଼୍ ଯିହୁଦୀ ପ୍ରାର୍ତନା ମାଡ଼ାନ୍ ଲୋନ୍ ଶିକ୍ଷା ହିସମାତ୍ତଣ୍ଡ୍ । 11ଆଗେ ୱେରଡ଼୍ ନାଟାଡ଼୍ ମାତ୍ତେ ବେଲା କି ଅଟ୍ର ଏଣ୍ଡ୍ ଯାକ ଅଣ୍ଡୟ୍ ବୁତ୍ ଆତ୍ମା ତେ ମୁର୍ଗ ଆଶେ ମାତ୍ତେ । ନିଜ୍ତିଙ୍କ୍ ବେଲାମେଣ୍ଡେ ମାଡ଼ି ତିନାଙ୍କ୍ ଆଦାଙ୍କ୍ ପାର୍ୱକଟ ମାତ୍ତେ । 12ଜିସୁ ତାକିଂଙ୍କ୍ ଉଡ଼ି ଗାର୍ରେ କାର୍ଙ୍ଗି କେତ୍ତଣ୍ଡ୍, ହୋ ନାଟାଡ଼୍ତି, ନି ଦୁର୍ବଲ୍ତାଗାଙ୍କ୍ ମୁକ୍ତ ଆଦ୍ତିଡ଼୍ । 13ଆସୁଟେ, ଜିସୁ ତାନ୍ ପରୁ କାୟ୍ ୱାଟ୍ତଣ୍ଡ୍, ଆସୁଟେ, ଆଦ୍ ନାଟାଡ଼୍ ସାଙ୍ଗେ ସାଙ୍ଗେ ତିନାଙ୍କ୍ ଆସ୍ ନିସ୍ ପର୍ମେଶ୍ୱରତ୍ ମହିମା ବା ସ୍ତୁତି ମାଡ଼୍ତେ ।
14ବାତେଙ୍କ୍ ଇତ୍କେ ଜିସୁ ବିଶ୍ରାମ୍ଦିନାତେ ସୁସ୍ଥ ମାଡ଼୍ ତାଙ୍କ୍ ପ୍ରାର୍ତନା ମାଡ଼ାନ୍ ଲୋତ୍ତେ ମୁକ୍ୟାଲ୍ କପାମ୍ ଆସ୍ ନାରୁଡ଼୍କିଂଙ୍କ୍ କେତ୍ତଣ୍ଡ୍, “ପାଡ଼ିୟ୍ ମାଡ଼ାନ୍ ମାଇଦିଙ୍କ୍ ଆରୁଦିନା ଦିନାମ୍ ମିନ୍ଦେ । ଆଦ୍ ଦିନାତେ ୱାସ୍ ସୁସ୍ଥ ଆୟ୍ମୁଟ୍, ବିଶ୍ରାମଦିନା ତେ ୱାଡ଼୍ମାଟ୍ ।”
15ବାତେଙ୍କ୍ ଇତ୍କେ ପ୍ରବୁ ଅଂକିଙ୍କ୍ କେତ୍ତଣ୍ଡ୍, “ହୋ ମଣ୍ଡିଡ଼ି ମିଡ଼୍ ବାତ୍ ବିଶ୍ରାମ୍ଦିନାତେ ମି ଗଡ୍କିଂଙ୍କ୍ କି ଗଦତିଙ୍କ୍ କଟାତାଗାଙ୍କ୍ ୱିଡ଼୍ସି ହେର୍ ହୁସ୍ପାଙ୍କ୍ ବାୟିଦେ ଆୟ୍ୱିଡ଼୍ କି ? 16ଆଦ୍ ଅଣ୍ଡୟ୍ ଅବ୍ରାହାମ୍ତେ ବଂଶତେ ପିକିଡ଼୍ । ଶୟ୍ତାନ୍ ତାକିଂଙ୍କ୍ ଅଟ୍ର ଏଣ୍ଡ୍ ଆଇନା ତହ୍ସ୍ମାତ୍, ବିଶ୍ରାମ୍ଦିନାତେ ଆଦ୍ ମୁକ୍ତ ବା ସୁସ୍ଥ ଆଦ୍ଦାନ୍ ଲେକେତ୍ ଇଲେ କି ?” 17ଇଦ୍ ଗଟ୍ ତାମ୍ ଶିଷ୍ୟଡ଼କ୍ ସିଗ୍ ମାଡ଼୍ତେ, ଆଗେକ୍ବା ତାମାଦ୍ ବାକ୍ୱା ପାଡ଼ିୟିତ୍ ମାଇଦିଙ୍କ୍ ନାରୁଡ଼୍ ସାରେତଡ଼୍ ସାର୍ଦା ଆଦ୍ତଡ଼୍ ।
ସୋରିଷ ପେଡ଼େମ୍ତାଦ୍ ୱେଷଡ଼୍
(ମାତିଉ ୧୩:୩୧-୩୨; ମାର୍କ ୪:୩୦-୩୨)
18ଆସୁଟେ ଜିସୁ ପାଚ୍ରାମାଡ଼୍ତଣ୍ଡ୍, “ପରମେଶ୍ୱର୍ତେ ରାଜ୍ୟ ବେଦ୍ପୁଟୁଙ୍କ୍ ? ମେଣ୍ଡେ, ନାନେ ହିଦିଙ୍କ୍ ବେନନ୍ ତ ସାମାନ୍ ମାଡ଼୍ପାର୍ଦ୍ ତାନ୍ ? 19ପରମେଶ୍ୱର୍ତେ ରାଜ୍ୟ ଅଣ୍ଡୟ୍ ସୋରିଷ ପେଡ଼େମ୍ତେ ଲେକାମ୍ । ୱେରନ୍ ନାରୁଡ଼୍ ଆଦ୍ ସୋରିଷ ପେଡ଼େମ୍ତିଙ୍କ୍ ଅଣ୍ଡ୍ ବଗିଚାତାଗ୍ ୱିତିତଣ୍ଡ୍ । ପେଡ଼େମ୍ତାଗାଙ୍କ୍ ଗାଜ୍ଜେ ପେୟ୍ସ୍ ମାଡ଼ା ଆଦ୍ ତେ ଆଦ୍ ମାଡ଼୍ତେ କମ୍ତାଗ୍ ପିଟେ ତୁଉକା ତାରିତା ।”
କମୀରତେ ୱେଷଡ଼୍
(ମାତିଉ ୧୩:୩୩)
20ଜିସୁ ମେଣ୍ଡେ କେତ୍ତଣ୍ଡ୍, “ନାନ୍ ପରମେଶ୍ୱର୍ତେ ରାଜ୍ୟତିଙ୍କ୍ ବେନନ୍ ତ ସାମାନ୍ ମାଡ଼୍ପାର୍ଦ୍ ତାନ୍ ? 21ଇଦ୍ ଅଣ୍ଡ୍ କମୀରତେ ଲେକାମ୍ । ୱେରଡ଼୍ ନାଟାଡ଼୍ ରୂଟି ତିଆର୍ ମାଡ଼ାନ୍ ମାଇଦିଙ୍କ୍ ଅଣ୍ଡୟ୍ ବେଡ଼୍ୟାଦ୍ ଗିନେତାଗ୍ ମାନ୍ଦାନ୍ ଅଟା ତଡ଼୍ ହି କମୀରତିଙ୍କ୍ କାଲ୍ପିତ୍ । କମୀର ଅଟାତିଙ୍କ୍ ତୟ୍ପିତ୍ତେ ।”
ସୁଦୁରାଦ୍ ଆର୍
(ମାତିଉ ୭:୧୩,୧୪,୨୧-୨୩)
22ଜିସୁ ସାରେ ନାର୍ ନୁ ନାର୍ ଆଞ୍ଜ୍ ଶିକ୍ଷା ହିସମାତ୍ତଣ୍ଡ୍, ଅନ୍ ତାକି ଯିରୁଶାଲେମ୍ତ୍ ପାକେ ଆତ୍ତଣ୍ଡ୍ । 23ଆସୁଟେ, ମେଣ୍ଡେ ୱେରଣ୍ଡ୍ ଜିସୁଙ୍କ୍ କେତ୍ତଣ୍ଡ୍, “ପ୍ରବୁ ବେସ୍ତୁଡ଼୍ ନାରୁଡ଼୍ ପରିତ୍ରାଣ ଆଦ୍ ପାର୍ଦ୍ତଡ଼୍ ? ବାତେଏ ସୁକୁକେ ନାରୁଡ଼୍ ?” 24“ସୁଦୁରାଦ୍ ହାର୍ଇସ୍ ସ୍ୱର୍ଗତାଗ୍ ଆଦ୍ଦାନ୍ ମାଇଦିଙ୍କ୍ ଆଲ୍ସି ମାଡ଼ାଟ୍ । ବାତେଙ୍କ୍ ଇତ୍କେ ନାନେ କେତୁତାନ୍, ନାର୍ଗେମାନ୍ଦେ ଆଦ୍ଦାନ୍ ମାଇଦିଙ୍କ୍ ଆଲ୍ସି ମାଡ଼ିତଡ଼୍ ? ବାତେଙ୍କ୍ ଇତ୍କେ ଆଦାଙ୍କ୍ ପାର୍ୱଡ଼୍ । 25ଲୋତ୍ତେ ମାଲିକ୍ ତେଦି କାପାଟ୍ତିଙ୍କ୍ ବନ୍ଦ୍ ମାଡ଼୍ତେ ପେର୍କେ, ମିଡ଼୍ ବାୟିଦେ ନିସ୍ ମେଣ୍ଡେ କାପାଟ୍ତିଙ୍କ୍ ତାଲ୍ସିତିଡ଼୍, ବା ଅନୁରଦ୍ ମାଡ଼ି କେତିତିଡ଼୍, ମାଲିକ୍, ମା ମାଇଦିଙ୍କ୍ କାପାଟ୍ ତେର୍ସିମ୍ । ବାତେଙ୍କ୍ ଇତ୍କେ ଅଣ୍ଡ୍ କେତିତଣ୍ଡ୍, ମିଡ଼୍ ବେନେ ଜାଗେତେ ନାରୁଡ଼ି, ବା ବେଗାଙ୍କ୍ ୱାସ୍ମିନ୍ଦେଡ଼ି, ନାନେ ଆଦ୍ ପୁନନ୍ । 26ତାନ୍ ପେର୍କେ ମିଡ଼୍ କେତିତିଡ଼୍, ନିମ୍ ନୁ ମାମ୍ ଅଣ୍ଡୟାଗେ ମାଞ୍ଜ କାୟ୍ଲି ତିତ୍ତାଡ଼୍ । ନିମେ ମା ନାର୍ ଶିକ୍ଷା ଇସ୍ମାତିନ୍ 27ଆସୁଟେ, ଅଣ୍ଡ୍ କେତ୍ତଣ୍ଡ୍, ମିଡ଼୍ ବେନେ ପାଡ଼୍ଗେତେ ନାରୁଡ଼ି, ବା ବେଗାଙ୍କ୍ ୱାସ୍ମିନ୍ଦେଡ଼ି, ନାନେ ଆଦ୍ ପୁନନ୍ । ମିଡ଼୍ କାରାପ୍ ପାଡ଼୍ୟି ମାଡ଼ାନ୍ ନାରୁଡ଼ି, ନାୟାଗାଙ୍କ୍ ଜେକା ଆୟ୍ମୁଟ୍ । 28#ମାତିଉ ୨୨:୧3; ୨୫:3୦.#ମାତିଉ ୮:୧୧,୧୨.ବେସୁଙ୍କ୍ ମିଡ଼୍ ଅବ୍ରାହାମ୍, ଇସ୍ହାକ୍ ନୁ ଯାକୁବ୍ ନୁ ସାରେ ବାବବାଦୀଡ଼୍ ପରମେଶ୍ୱର୍ତେ ରାଜ୍ୟତାଗ୍ ମାନ୍ଦାନାଦ୍ ଉଡ଼ିତଡ଼୍ ବାତେଙ୍କ୍ ଇତ୍କେ ନିଜେ ବାୟିଦେ ରାଲିମାନ୍ଦାନାଦ୍ ଉଡ଼ିତଡ଼୍, ଆସୁଙ୍କ୍ ଆଗେ ନିଜେ କେୟାନାଦ୍ ନୁ ପାଲ୍କ୍ କିଟ୍ରୁମ୍ କାଟ୍ରୁମ୍ ଆଦାନାଦ୍ କେଞ୍ଜିତଡ଼୍ । 29ପୂର୍ବ ନୁ ପଶ୍ଚିମ୍, ଉତ୍ତର୍ ନୁ ଦକ୍ଷିଣ୍ପାକେତ୍ ନାରୁଡ଼୍ ୱାସ୍ ପରମେଶ୍ୱର୍ତେ ରାଜ୍ୟତାଗ୍ ତିନ୍ଦାଙ୍କ୍ କୁଦିତଡ଼୍ । 30#ମାତିଉ ୧୯:3୦; ୨୦:୧୬; ମାର୍କ ୧୦:3୧.ଆସୁଟେ ଉଡ଼ାଟ୍, ବେନଡ଼୍ ଇଞ୍ଜେ ପେର୍କେ ମାନ୍ଦାନଡ଼୍ ବେସ୍ତୁଡ଼୍ ମୁନ୍ ଆଦ୍ତଡ଼୍ ମେଣ୍ଡେ, ମୁନ୍ ମାନ୍ଦାନଡ଼୍ ବେସ୍ତୁଡ଼୍ ପେର୍କେ ଆଦ୍ତଡ଼୍ ।”
ଯିରୁଶାଲେମ୍ତାଗ୍ ଜିସୁନାଦ୍ ପ୍ରେମ୍
(ମାତିଉ ୨୩:୩୭-୩୯)
31ଆଦ୍ ଦିନାମ୍ ତେ ବେସ୍ତୁଡ଼୍ ପାରୂଶୀ ନାରୁଡ଼୍ ୱାସ୍ ଜିସୁଙ୍କ୍ କେତ୍ତଡ଼୍, “ହି ପଡ଼ିୟ୍ ୱିଡ଼୍ସି ବେଗ୍ଆୟି ଅନ୍ । ବାତେଙ୍କ୍ ଇତ୍କେ ହେରଦ୍ ରାଜାଲ୍ ନିକିଂଙ୍କ୍ ଆୱ୍କାଂଙ୍କ୍ ଇଚ୍ଛା ମାଡ଼ୁତଣ୍ଡ୍ ।”
32ଜିସୁ ଅଡ଼୍କିଂଙ୍କ୍ କେତ୍ତଣ୍ଡ୍, ଆନୁଟ୍, ଆଦ୍ କଙ୍ଗାନାକାତିଙ୍କ୍ କେଲ୍ମୁଟ୍, ନାନେ ନେଣ୍ଡ୍ ନୁ ନାଡ଼୍ ବୁତ୍କିଂଙ୍କ୍ ତଲିତାନ୍ ମେଣ୍ଡେ ନୁ ନାରୁଡ଼୍କିଂଙ୍କ୍ ସୁସ୍ଥ ମାଡ଼ିତାନ୍, ମୁଣ୍ଡ୍ ଦିନାତେ ନା ପାଡ଼ିୟ୍ ତେରିତ୍ । 33ବେଲାମେଣ୍ଡେ ଆୟି, ନାକିଂଙ୍କ୍ ନେଣ୍ଡ୍, ନାଡ଼୍ ନୁ ମାନେଟି ଯାକ ଆଦ୍ ୱେୟ୍ତିତ୍, ବାତେଙ୍କ୍ ଇତ୍କେ ଯିରୁଶାଲେମ୍ତେ ବାୟିଦେ ବାବବାଦୀଡ଼୍ ଡୋଲାନାଦ୍ ଲେକେତ୍ ଆୟ୍ୟ ।
34ହୋ ଯିରୁଶାଲେମ୍ ହୋ ଯିରୁଶାଲେମ୍ ନିମେ ତ ବାବବାଦୀ ଲଡ଼୍କିଙ୍କ୍ ଆୱ୍କ୍ତି । ବେନ୍ ନାରୁଡ଼୍କିଂଙ୍କ୍ ପରମେଶ୍ୱର୍ ନି ଗାର୍ରେ ରୟ୍ସ୍ ମାତ୍ତେ, ନିମେ ଅଡ଼୍କିଂଙ୍କ୍ କାଲ୍କ୍ ହେସି ରେହେତିଡ଼୍ । ୱେରଡ଼୍ କୋର୍ ତାନ୍ ରେକାନ୍ ମଦଲ୍ କୋର୍ପିଲାଙ୍କ୍ ଅଣ୍ଡୟ୍ୟାଗ୍ ଗୁଡ଼୍ପାନ୍ ଲେକାମ୍, ନାନେ ମି ନାରୁଡ଼୍କିଂଙ୍କ୍ ଅଣ୍ଡୟ୍ୟାଗ୍ ଗୁଡ଼୍ପାଙ୍କ୍ ଇଚ୍ଛା ମାଡ଼ିମାତ୍ତାନ୍ । ବାତେଙ୍କ୍ ଇତ୍କେ ମିଡ଼୍ ନାକିଂଙ୍କ୍ ଆଦ୍ ଲେକାମ୍ ମାଡ଼ାଙ୍କ୍ ହିୱିଡ଼୍ । 35ଉଡ଼େ, ନିୟାଦ୍ ମନ୍ଦିର୍ତିଙ୍କ୍ ମି ନାରୁଡ଼୍ ୱିଡ଼୍ସିତ୍ତଡ଼୍ । ନାନେ ନିକିଂଙ୍କ୍ କେତୁତାନ୍, “ପ୍ରବୁନ୍ ପେଦେର୍ ତେ ବେନ ୱାଦୁତଣ୍ଡ୍, ଅନ୍ ଦନ୍ୟ, ଇଦ୍ କେଲ୍ୱେ ଯାକ ନିମ୍ ନାକିଂଙ୍କ୍ ମେଣ୍ଡେ ଉଡ଼୍ ପାର୍ୱିନ୍ ।”
Currently Selected:
ଲୁକ 13: NTKaa20
Highlight
Share
Copy
Want to have your highlights saved across all your devices? Sign up or sign in
The New Testament in Koya Language © The Word for the World International and Koya Translation Samithi, Malkangiri, Odisha 2020
