ମାର୍କ 9
9
1ମାରିଡ଼େସି ଜିସୁ ୱାରିଙ୍ଗ୍ ୱେର୍ତାନ୍, “ନାନ୍ ମିଙ୍ଗିଁ ସତ୍ ଇଜିନା, ମାପୁରୁଦି ରାଜିଦୁ ସାକ୍ତିଦାନ୍ ମାନିବାଡି ସୁଡ଼୍ଇ ସାନ୍ଧି ଇବେନୁ ନିନି ମାନି ଲୋକା ମାଣ୍କୁ ଏସୋ ଲୋକୁ ଏଣ୍ତେସ୍ କିଜିବା ସାନିକା ୱେଡ଼୍ଏର୍ ।”
ଜିସୁଦି ରୁପ୍ ବାଦ୍ଲାତାତ୍
(ମାତିଉ ୧୭:୧-୧୩; ଲୁକ ୯:୨୮-୩୬)
2 #
୨ ପିତର ୧:୧୭,୧୮. ଛଦିନ୍ ୱେନ୍କା ଜିସୁ କେବଲ୍ ପିତର୍, ଜାକୁବ ନି ଯୋହନତିଙ୍ଗ୍ ଅର୍ସେ ଆସ୍ସି ମିସାଜି ୱାରିଙ୍ଗ୍ ଉଣ୍ତ୍ରି ପେରି ଗରନ୍ତୁ ଅତାନ୍ । 3ମାରି ଜିସୁ ୱାରିଙ୍ଗ୍ ସୁଡ଼ୁବୁ ସୁଡ଼ୁବୁ ୱାନି ମୁର୍ତି ବାଦଲାତାତ୍, ୱାନି ଆଙ୍ଗିଁ ଇୟାୱାଜା ଜାୟ୍ ନି ପୁରା ଅଡ଼ିନିକା ଆତାତ୍ ଯେ, ଦୁନିଆତି ଏମେ ନର୍ବାନି ଲୋକ୍ବା ଇୟାୱାଜା ଅଡ଼ିନିକା କିଦେଙ୍ଗ୍ ଆଟ୍ଏନ୍ । 4ମାରି, ମୋଶା ନି ଏଲିୟ୍ ଜିସୁୱାଲେ ୱାର୍ଗିଜି ମାର୍ରିକା ୱାରିଙ୍ଗ୍ ତରାତାତ୍ । 5ଆବେନୁ ପିତର ଜିସୁଙ୍ଗୁଁ ଇର୍ହାନ୍, “ଏ ଗୁରୁ, ମାପ୍ ଜେ ଇୟା ବାଡିଦୁ ଏସୋ ନେଗେନ୍ତାନ୍ ମାନାପ୍, ମାପୁ ମୁଣ୍ତ୍ରି ଗୁଡ଼େଏଙ୍ଗ୍ ତିଆର୍ କିନାପ୍, ନି ଉଣ୍ତିଙ୍ଗ୍ ଉନ୍ଡ୍ରି, ମୋସାଦି ଉଣ୍ତିଙ୍ଗ୍ ଉନ୍ଡ୍ରି ମାରି ଏଲିୟ୍ଦି ଉଣ୍ତିଙ୍ଗ୍ ଉନ୍ଡ୍ରି ।” 6ପିତର ଇନି ଉତର୍ ସିଦେଙ୍ଗ୍ ଇଜି ନେସ୍ଏନ୍ ମାରାନ୍, ଆବେଟ୍ ସିସୁର୍ ନାଣ୍ତ ତିଲାତା ସର୍ଆର୍ ।
7 #
ମାତିଉ ୩:୧୭; ମାର୍କ ୧:୧୧; ଲୁକ ୩:୨୨. ମାରି, ଖାଣ୍ତେକ୍ ବାଦଡ଼୍ ଇମ୍ଜି ୱାତା ଦୋ ୱାରିଙ୍ଗ୍ ବାଦଡ଼୍ତି ନିଡ଼୍ଗା ପିଡ଼ିକ୍ତାତ୍; ମାରି ଆୟା ବାଦଡ଼ତାନ୍ ଉଣ୍ତ୍ରି ବଲ୍ ୱାତାତ୍, “ଏ ନା ଲାଡ୍ତି ମାରିନ୍, ୱାନି ବାକ୍ୟ ୱେନ୍ଡ୍ରୁ ।” 8ମାରି, ଉଲୁସ୍ତେ ସିସୁର୍ ସାରିବେଡ଼୍ତି ସୁଡ଼ୁତାର୍ ୱାରି ତଡ଼୍କାୱାଲେ ଲୋକା ଲୋଇରାନ୍ କେବଲ୍ ଜିସୁଙ୍ଗୁଁ ଡ଼ିସ୍ତିଙ୍ଗ୍ ମାରି ଏଙ୍ଗ୍ବା ସୁଡ଼ୁଏତାର୍ ।
9ୱାର୍ ଗରନ୍ତାନ୍ ରେତାଜି ୱାନିୱାଲେ ଜିସୁ ସିସୁରିଙ୍ଗ୍ ଆଟ୍ୱା ମାଟା ସିଜି ୱେର୍ତାନ୍, “ମିର୍ ଆମାକା ଆମାକା ସୁଡ଼୍ତିଦେର୍, ଆୟାୱିଜୁ ସାତି ଲୋକାମାଣ୍କୁ ନାନ୍ ଯେ ମନୁଷ୍ୟପୁତ୍ରଦି ମାରିଡ଼େସି ଜିବନ୍ ଆନି ସାନ୍ଦି ଆୟାମାଟା ଏଙ୍ଗ୍ବା ଇନ୍ମାଟ୍ ।”
10ଆବେଟ୍ ୱାର୍ ଆୟା ମାଟା ଆସ୍ତାରୋ ସାଜ ମାରିଡ଼େସି ଜିବନ୍ଆଜି ନିଂଇକା ଇନିକା, ଆୟା ବିସୟତାନ୍ ୱାରି ୱାରି ଲଅ ୱାର୍ଗିତାର୍ । 11#ମାତିଉ ୧୧:୧୪.ମାରି, ସିସୁର୍ ଜିସୁଙ୍ଗୁଁ ୱେନ୍ବାତାର୍, “ଏଲିୟ୍ ଆଗ୍ଡ଼ି ୱାନିକା ମାନାତ୍ ଇଜି, ଶାସ୍ତ୍ରୀର୍ ଏନ୍ଦା ଇନାର୍ ?”
12ଆବେନୁ ଜିସୁ ସିସୁରିଙ୍ଗ୍ ୱେର୍ତାନ୍, ଏଲିୟ୍ ଆଗ୍ଡ଼ି ୱାନାନ୍ନୋ ୱିଜୁ ବିସୟ ମାରିଡ଼େସି ତିଆର୍ କିନିକା ସତେନେ । ମାତର୍ ନାନ୍ ଯେ ମନୁସ୍ୟପୁତ୍ର ନାଣ୍ତ ଦୁଃକ୍ ବୋଗାଜି ନିନ୍ଧା ପଇନା ମାରି ସେମାର୍ ପୟନା, ଇୟାକା ଏଣ୍ତେସ୍ ୱାନି ବିସୟତାନ୍ ରାସ୍ତିକା ମାନାତ୍ ? 13ମାତର୍ ନାନ୍ ମିଙ୍ଗିଁ ଇଜିନା, “ଏଲିୟ୍ ୱାତାତ୍ନି, ମାରି ୱାନି ବିସୟତୁ ଏଣ୍ତେସ୍ ରାସାତା ମାନାତ୍, ଆୟାୱାଜା ୱାରୁ ୱାନି ଉଣ୍ତିଙ୍ଗ୍ ଆମାକା ବଦା ଆୟାକା କିତାମାନାର୍ ।”
ଜିସୁ ଅରେନ୍ ଦୁବାକାସ୍ତି କଡ଼ଦିଙ୍ଗ୍ ନେଗେଣ୍ତ୍ କିତାନ୍
(ମାତିଉ ୧୭:୧୪-୨୦; ଲୁକ ୯:୩୭-୪୩)
14ୱେନ୍କା ୱାର୍ ଆଇ ସିସୁରି ଲାକ୍ତୁ ୱାତା ରୋ ସୁଡ଼ୁତାର୍, ୱାରି ସାରିବେଡ଼୍ତି ନାଣ୍ତ ଲୋକୁ ଉଣ୍ତାତାର୍, ମାରି ଶାସ୍ତ୍ରୀର୍ ୱାରିୱାଲେ ମାଟାଦିଙ୍ଗ୍ମାଟା ଆନିକା ସୁଡ଼ୁତାନ୍ । 15ଲୋକ୍ଡର୍ ଜିସୁଙ୍ଗୁଁ ଉଲୁସ୍ତେ ସୁଡ଼୍ତି ଦାପ୍ରେ ବେମ୍ରି ଆତା ସର୍ଆର୍ ମାରି ଉରୁକ୍ସି ୱାଜି ଜିସୁଙ୍ଗୁଁ ମାଡ଼ିସ୍କିଦେଙ୍ଗ୍ ଆସ୍ତାର୍ । 16ଜିସୁ ୱାନି ସିସୁରିଙ୍ଗ୍ ୱେନ୍ବାତାନ୍, “ମିର୍ ଶାସ୍ତ୍ରୀରି ୱାଲେ ଇନିକା ମାଟାଦିଙ୍ଗ୍ମାଟା ଆଜି ସାଜି ମାର୍ଇଦେର୍ ?”
17ଲୋକାମାଣ୍କୁ ଅରେନ୍ ଜିସୁଙ୍ଗୁଁ ଉତର୍ ସିତାନ୍, “ଏ ଗୁରୁ, ନାନ୍ ନା ମାରିନ୍ତିଙ୍ଗ୍ ନି ଲାକ୍ତୁ ତାତାମାର୍ହା; ୱାନିଙ୍ଗ୍ ଉଣ୍ତ୍ରି ଗୁଲାଦୁବା ଆସ୍ତାମାନାତ୍; 18ଆମା ବାଡିଦୁ ଆପିତ୍ ଦୁବା ୱାନିଙ୍ଗ୍ ଆସ୍ନାତ୍, ୱାନିଙ୍ଗ୍ ଆଡ୍ଗି ଆର୍ପ୍ନାତ୍, ୱାନି ମକ୍ମତାନ୍ ପେପଲ୍ ସନାତ୍ ମାରି ୱାଣ୍ତ୍ରୁ ପାଲ୍କୁ କାତ୍ରେକିନାନ୍, ମାରି ୱାଡ୍ରୁ ୱାର୍ସି ସଲ୍ସିନାନ୍; ଆୟା ଦୁବା ପେର୍ଦେଙ୍ଗ୍ ଉଣ୍ତିଙ୍ଗ୍ ନାନ୍ ନି ସିସୁରିଙ୍ଗ୍ ୱେର୍ତା, ମାତର୍ ନି ସିସୁର୍ ଦୁବା ପେର୍ଦେଙ୍ଗ୍ ଆଟ୍ଏତାର୍ ।”
19ଜିସୁ ୱାରିଙ୍ଗ୍ ଇର୍ହାନ୍, “ଏ ଅବିସ୍ବାସ୍ତି କୁଟୁମ୍ ! ଏସୋଦିନ୍ ନାନ୍ ମି ୱାଲେ ମାନା ? ଏସୋଦିନ୍ ନାନ୍ ମି ପାଣି କିଜିମାନା ? ମାରିନ୍ତିଙ୍ଗ୍ ନା ଲାକ୍ତୁ ଆସ୍ସି ରାଦୁ ।” 20ଆବେଟ୍ ୱାର୍ ୱାନିଙ୍ଗ୍ ଜିସୁ ଲାକ୍ତୁ ତାତାର୍ । ମାରି, ଜିସୁଙ୍ଗୁଁ ସୁଡ଼ୁତିଦାପ୍ରେ ଦୁବା ଆୟା କଡ଼ଦିଙ୍ଗ୍ ବୟ୍ଙ୍କାର୍ତାନ୍ ତିର୍ପିସି ଆସ୍ତାତ୍ ମାରି କଡ଼ ବୁମିଦୁ ଆର୍ଜି ୱେୟୁତାନ୍ ପେପଲ୍ ସପ୍ସି ଗୁର୍ଦେଙ୍ଗ୍ ଆସ୍ତାନ୍ । 21ନାସ୍ତିୱାଲେ ଜିସୁ କଡ଼ଦି ବୁବାସିଙ୍ଗ୍ ୱେନ୍ବାତାନ୍, ଏସୋ ଦିନ୍ ଆତାତ୍ ଇୟାକା ଇୟାୱାଜା ଆତାମାନାତ୍ ? ୱାଣ୍ତ୍ରୁ ୱେର୍ତାନ୍, “ଇସ୍ରିରି ୱାଲେରାନ୍ନେ ।”
22“ଦୁବା ୱାନିଙ୍ଗ୍ ଡ଼େଇଦେଙ୍ଗ୍ ଏସଦେବା ସିସୁ ନି ଏର୍ତୁ ପୋକ୍ତାମାର୍ଆତ୍; ମାତର୍ ନିନ୍ ଜଦି କିଦେଙ୍ଗ୍ ଆଟ୍ନି, ଆତିଙ୍ଗ୍ ମା ଉଣ୍ତିଙ୍ଗ୍ ଦୟା କିଜି ମାଙ୍ଗିଁ ସାହାଜ୍ୟ କିଆ ।”
23ଆବେଟ୍ ଜିସୁ ୱାନିଙ୍ଗ୍ ୱେର୍ତାନ୍, “ଇନିକା ଇର୍ଇ ? ଜଦି କିଦେଙ୍ଗ୍ ଆଟ୍ନି ! ଏନ୍ ବିସ୍ବାସ୍ କିନାନ୍ ୱାନି ଉଣ୍ତିଙ୍ଗ୍ ୱିଜୁ ଆନାତ୍ ।”
24ଆୟାଦାପ୍ରେ କଡ଼ଦି ବୁବାସି ନାଣ୍ତ ଆଉଲି ଆଜି ଇର୍ଆନ୍, “ନାନ୍ ବିସ୍ବାସ୍ କିଜିନା, ନା ବିସ୍ବାସ୍ ନାଣ୍ତ କିଦେଙ୍ଗ୍ ନାଂଇ ସାହାଜ୍ୟ କିଆ ।”
25ତାନେୱେନ୍କା ଲୋକ୍ଡର୍ ଅର୍ସେ ଉରୁକ୍ସି ୱାଜିନାର୍ ଇକା ସୁଡ଼ୁତାନ୍ନୋ ଜିସୁ ଆୟା ଦୁବାଦିଙ୍ଗ୍ ଆଦ୍ରିସି ଇର୍ଆନ୍, “ଏ ଗୁଲା ନି ବଇରା ଆତ୍ମା,” ନାନ୍ ନିଂଇ ଆଦେସ୍ ସିଜିନା, “ଇୟା କଡ଼ଦି ମାଣ୍କୁ ସହସି ସାଙ୍ଗ୍, ମାରି ଏସାଙ୍ଗ୍ବା ୱାନି ଲୋଇ ଡ଼ୁଗ୍ମା ।”
26ଆବେଟ୍ ଆୟା ଦୁବା ଆଉଲି ଆଜି କଡ଼ଦିଙ୍ଗ୍ ଆଡ୍ଗି ପେର୍ଜି ପୋକ୍ସି ୱାନି ମେନ୍ଧଲ୍ ଲୋଇରାନ୍ ସତା ସର୍ଆତ୍, ମାରି ଆୟା କଡ଼ ସାତିୱାଜା ଆତାନ୍, ଇୟାୱାଜାକି ଏସୋ ଲୋକ୍ଡର୍ ଇର୍ହାର୍, “ୱାଣ୍ତ୍ରୁ ସାତାନ୍ ।” 27ମାତର୍ ଜିସୁ ୱାନି କିୟୁ ଆସ୍ତାନ୍ନୋ କଡ଼ଦିଙ୍ଗ୍ ନିକ୍ତାନ୍, ମାରି ୱାଣ୍ତ୍ରୁ ନିଙ୍ଗ୍ତାନ୍ ।
28ମାରି, ଜିସୁ ଇଲୁ ଲୋଇ ୱାତାନ୍, ୱାନି ସିସୁରି ଜିସୁଙ୍ଗୁଁ ଏନ୍ ନେସେଇ ୱାଜା ୱେନ୍ବାତାର୍, “ମାପ୍ ଇନ୍ଦାନିଙ୍ଗ୍ ଆୟା ଦୁବାଦିଙ୍ଗ୍ ପେର୍ଦେଙ୍ଗ୍ ଆଟ୍ଏତାପ୍ ?”
29ଜିସୁ ସିସୁରିଙ୍ଗ୍ ୱେର୍ତାନ୍, “ଇୟାୱାଜା ଦୁବା ଆବ୍କା ପାର୍ତାନା ଶକ୍ତିଦାଣ୍ତ୍ ପେର୍ଦେଙ୍ଗ୍ ଆଟ୍ତେଙ୍ଗ୍ ଆନାତ୍, ମାରି ଆଇ ଉପାୟ ସାରି ସିଲେତ୍ ।”
ଜିସୁ ମାରିଡ଼େସି ୱାନି ସାନି ବିସୟ ଇର୍ଆନ୍
(ମାତିଉ ୧୭:୨୨-୨୩; ଲୁକ ୯:୪୩-୪୫)
30ଜିସୁ ନି ୱାନି ସିସୁର୍ ଆୟା ବାଡି ଡ଼ିସ୍ସି ଗାଲିଲି ରାଜି ସାନ୍ଧିସିଜି ସରଆର୍ । ମାରି ଏମେ ବାଡିଦୁ ମାନାନ୍ ଏନ୍ବା ନେସ୍ମାପିର୍ ଇଜି ୱାଣ୍ତ୍ରୁ ବଦାକିଜିମାର୍ଆନ୍, 31ମାତର୍ ୱାନ୍ ୱାନି ସିସୁରିଙ୍ଗ୍ ଇୟା ମାଟା ସିଜି ଶିକ୍ଷା ସିତାନ୍ । ମାରି ୱାନ୍ ଇର୍ଆନ୍, “ନାନ୍ ଯେ ମନୁସ୍ୟପୁତ୍ର ଲୋକା କିୟୁଦୁ ସର୍ପେ ଆଦେଙ୍ଗ୍ ସଲ୍ସିନାନ୍, ମାରି ୱାରୁ ନାଂଇ ଡାକ୍ନାର୍, ମାରି ନାନୁ ସାନା ମାତର୍ ନାନୁ ମୁନେଟି ୱେନ୍କା ମାରିଡ଼େସି ଜିବନ୍ଆଜି ନିଙ୍ଗ୍ନା ।”
32ମାତର୍ ସିସୁର୍ ଆୟା ମାଟା ବୁଝାଏତାର୍ ମାରି ୱାନିଙ୍ଗ୍ ୱେନ୍ବାଦେଙ୍ଗ୍ ତିଲାଜି ମାର୍ଆର୍ ।
ଜିସୁ ଇନାନ୍ ୱିଜେରିଙ୍ଗ୍ ପେରିକାନ୍ ଏନ୍
(ମାତିଉ ୧୮:୧-୫; ଲୁକ ୯:୪୬-୪୮)
33ୱେନ୍କା ଜିସୁ ନି ୱାନି ସିସୁର୍ କପର୍ନାହୁମ୍ ନାର୍ତୁ ୱାତାର୍ । ୱାନ୍ ଇନ୍ଡ୍ର ଇତାନ୍ନୋ ସିସୁରିଙ୍ଗ୍ ୱେନ୍ବାତାନ୍, “ମିର୍ ସାର୍ଦୁ ୱାନିୱାଲେ ଇନି ବିସୟତାନ୍ ୱାରଗିଜିସାଜି ମାର୍ଇଦେର୍ ?”
34 #
ଲୁକ ୨୨:୨୪. ମାତର୍ ସିସୁର୍ ଆଲେତା ମାର୍ଆର୍, ଇରିଙ୍ଗ୍ ୱାରି ଲୋଇ ଏନ୍ ପେରିକାନ୍, ଇୟା ବିସୟତୁ ୱାର୍ ସାରିଦୁ ଲୋଇ ଲୋଇ ୱାର୍ଗିଜି ସାଜି ମାର୍ଆର୍ । 35#ମାତିଉ ୨୦:୨୬,୨୭; ୨୩:୧୧; ମାର୍କ ୧୦:୪୩,୪୪; ଲୁକ ୨୨:୨୬.ଆବେନ୍ ଜିସୁ ବାସ୍ତାନ୍ନୋ ବାର ଲୋକୁ ସିସୁରିଙ୍ଗ୍ କୁକ୍ତାନ୍ ମାରି ୱାରିଙ୍ଗ୍ ଇର୍ଆନ୍, “ଜଦି ଏନ୍ ପେରିକାନ୍ ଆଦେଙ୍ଗ୍ ବଦା କିନାନ୍, ୱାଣ୍ତ୍ରୁ ୱିଜେରେ ମାଣ୍କୁ ନିଜେଦିଙ୍ଗ୍ ନିସ୍ରିକା ଆପିନ୍ ମାରି ୱିଜେରି ସେବାକିନିକାନ୍ ଆପିନ୍ ।” 36ମାରି, ଜିସୁ ଉଣ୍ତ୍ରି ଇସ୍ରି କଡ଼ଦିଙ୍ଗ୍ ତାତାନ୍ନୋ ୱିଜେରି ଆଗ୍ଡ଼ି ନିଲ୍ପ୍ତାନ୍ ମାରି ୱାନିଙ୍ଗ୍ ଗାତୁ ବାସା କିଜି ୱାରିଙ୍ଗ୍ ଇର୍ଆନ୍, 37#ମାତିଉ ୧୦:୪୦; ଲୁକ ୧୦:୧୬; ଜୋହନ ୧୩:୨୦.“ଏନ୍ବା ନା ଦର୍ତୁ ଇୟାୱାଜା ଇସ୍ରି କଡ଼ରିଙ୍ଗ୍ ମାଣ୍କୁ ଅରେନ୍ ୱାନିଙ୍ଗ୍ ମାନାନାର୍, ୱାଣ୍ତ୍ରୁ ନାଂଇ ମାନାନାର୍; ମାରି, ଏନ୍ବା ନାଂଇ ମାନାନାର୍, ୱାଣ୍ତ୍ରୁ ନାଂଇ ଲାଡ୍ କିଏନ୍, ମାତର୍ ନା ପୋକ୍ତିମାନି ମାଲିକ୍ତିଙ୍ଗ୍ ମାନାନାର୍ ।”
ଏନ୍ ମାଙ୍ଗିଁ ବିରଦ୍ କିଏନ୍, ୱାନ୍ ମା ତରିନ୍
(ଲୁକ ୯:୪୯-୫୦)
38ଯୋହନ ଜିସୁଙ୍ଗୁଁ ଇର୍ଆନ୍, “ଏ ଗୁରୁ, ମା ଦଲ୍ତୁ ସିଲି ଲୋକ୍ତିଙ୍ଗ୍ ନି ଦର୍ତାନ୍ ଦୁବା ପେର୍ନିକା ସୁଡ଼ୁତାପ୍, ମାରି ୱାଣ୍ତ୍ରୁ ମା ଦଲ୍ତୁ ସିଲେନ୍ ଇଜି ମାପ୍ ୱାନିଙ୍ଗ୍ ମନା କିତାପ୍ ।” 39ମାତର୍ ଜିସୁ ଇର୍ଆନ୍, “ୱାନିଙ୍ଗ୍ ମନା କିମାଟ୍,” ମାତର୍ ନା ଦର୍ତି ସାକ୍ତିଦାନ୍ ପାଣି କିନାନ୍ ୱାଣ୍ତ୍ରୁ ଦାପେ ଦାପେ ନା ବିରଦ୍ତାନ୍ ଇନିକା ଇନ୍ଡ୍ରେଙ୍ଗ୍ ଆଟ୍ଏନ୍, ଇୟାୱାଜା ଲୋକୁ ଏନ୍ ସିଲେନ୍ । 40#ମାତିଉ ୧୨:୩୦; ଲୁକ ୧୧:୨୩.ମାତର୍ ଏନ୍ ମା ବିରୁଦ୍ ମାଟା ଇନ୍ଏନ୍, ୱାଣ୍ତ୍ରୁ ମା ନିଜେତି ଲୋକୁ । 41#ମାତିଉ ୧୦:୪୨.ନାନ୍ ମିଙ୍ଗିଁ ସତ୍ ଇଜିନା, ମିର୍ କ୍ରିସ୍ତଦି ଲୋକୁ ଆତିମାନି ଉଣ୍ତିଙ୍ଗ୍, ଏନ୍ବା ନା ଉଣ୍ତିଙ୍ଗ୍ ଗିଲାସ୍ ଏର୍ ଉଣ୍ତେଙ୍ଗ୍ ସିନାନ୍, ୱାନ୍ ଏଣ୍ତେସ୍ କିଜିବା ନିଜେଦି ପୁରସ୍କାର୍ ପଇନିକା ଆରାଏନ୍ ।
ଆଇ ଲୋକାଙ୍ଗ୍ ପାପ୍ କିବିସ୍କିଇ ବିସୟତାନ୍ ଶିକ୍ଷା ସିତାନ୍
(ମାତିଉ ୧୮:୬-୯; ଲୁକ ୧୭:୧-୨)
42ଜିସୁ ମାରି ଇର୍ଆନ୍, ଏମେ ଲୋକୁ ନା ଲାକ୍ତୁ ବିସ୍ବାସ୍ କିଜିମାନି ଇସ୍ରି ଲୋକ୍ତି ମାଣ୍କୁ ଅରେନ୍ ୱାନିଦି ବିସ୍ବାସ୍ତୁ ବାଧା ସିନିକାନ୍ଆନାନ୍, ୱାନି କକ୍ଲାଦୁ ଉଣ୍ତ୍ରି ପେରି ଗୁଡ଼ୁବେଲି କାଲୁ ତର୍ସି ୱାନିଙ୍ଗ୍ ସାମ୍ଦୁର୍ତୁ ପୋକ୍ତିଙ୍ଗ୍ ନେଗେଣ୍ତ୍ ଆତାତ୍ମାନ୍ଧି । 43#ମାତିଉ ୫:୩୦.ମାରି, ଜଦି ମି ଉଣ୍ତ୍ରି କିୟୁ ମିଙ୍ଗିଁ ପାପ୍ତି ପାଣି କିବିସ୍କିଜିମାନାତ୍, ଆଦେଙ୍ଗ୍ ଆୟା କିୟୁଦିଙ୍ଗ୍ କୟଜ ପୋକ୍ତୁ; ଇରିଙ୍ଗ୍ ରୁଣ୍ତି କିକୁ ଅସ ନରକଦୁ, ୱିଜୁଦିନ୍ ସିସୁକାସ୍ସି ମାନି ନର୍କଦୁ ସନି ବାଦ୍ଲୁ ଗୁଲା ଆଜି ଜିବନ୍ ଆସ୍ସି ମୁସ୍କୁପୁରତୁ ସନିକା ମି ଉଣ୍ତିଙ୍ଗ୍ ନେଗେତ୍ । 44ଇରିଙ୍ଗ୍ ନର୍କଦୁ ୱାରିଙ୍ଗ୍ ଏମେ ପିଡ଼୍କୁ ତିନେ ଆକେଙ୍ଗ୍ ଏସାଙ୍ଗ୍ବା ସାଉ, ମାରି ଆୟା ସିସୁ ଏସ୍ସାଙ୍ଗ୍ବା ନାମ୍ଏତ୍ । #୯:୪୪ ଏସ ପାଡ଼ିଇ ରାସ୍ତିମାନୁ ସିଲେତ୍ । 45ମାରି, ମି ପାଦାମ୍ ଉଣ୍ତିଙ୍ଗ୍ ମି ବିସ୍ବାସ୍ ନାଷ୍ଟୁ ଆନାତ୍, ଆଦେଙ୍ଗ୍ ଆୟା ପାଦାମ୍କାଙ୍ଗ୍ କୟଜ ପୋକ୍ତୁ, ରୁଣ୍ତି ପାଦାମ୍କାଙ୍ଗ୍ ଅର୍ସେ ନରକଦୁ ସନି ବାଦ୍ଲୁ ସଟା ଆଜି ଜିବନ୍ ଅସି ମୁସ୍କୁପୁର୍ତୁ ସନିକା ନେଗେତ୍ । 46ଇରିଙ୍ଗ୍ ନର୍କଦୁ ୱାରିଙ୍ଗ୍ ଏମେ ପିଡ଼୍କୁ ତିନେ ଆକେଙ୍ଗ୍ ଏସାଙ୍ଗ୍ବା ସାଉ, ମାରି ଆୟା ସିସୁ ଏସ୍କାଙ୍ଗ୍ବା ନାମ୍ଏତ୍ । #୯:୪୬ ଏସ ପାଡ଼ିଇ ରାସାତିମାନୁ ସିଲେତ୍ । 47#ମାତିଉ ୫:୨୯.ମାରି, ମି କାଣ୍ଗା ଉଣ୍ତିଙ୍ଗ୍ ଜଦି ମି ବିସ୍ବାସ୍ ନାସ୍ଟୁ ଆଜିନାତ୍, ଆଦେଙ୍ଗ୍ ଆୟା କାଣ୍ଗାଦିଙ୍ଗ୍ ଉନ୍ଦ୍ଜ ପୋକ୍ତୁ; ରୁଣ୍ତି କାଣୁକୁ ଅସ ନରକଦୁ ପୋକ୍ନି ବାଦ୍ଲୁ ଉଣ୍ତ୍ରି କାଣ୍ଗା ମାନ୍ଜି ମାପୁରୁଦି ପୁର୍ତୁ ସନିକା ମିଙ୍ଗିଁ ନେଗେତ୍ । 48ଇରିଙ୍ଗ୍ ନର୍କଦୁ ୱାରିଙ୍ଗ୍ ଏମେ ପିଡ଼୍କୁ ତିନେ ଏସାଙ୍ଗ୍ବା ସାଉ । ମାରି, ଆୟା ସିସୁ ଏସ୍କାଙ୍ଗ୍ବା ନାମ୍ଏତ୍ ।
49ପୁଜାସିନି ସର୍ତାନ୍ ନର୍ନି ୱାଜା ୱିଜେରେ ସିସୁଦାନ୍ ନରାଇ ଆନାର୍ ।
50 #
ମାତିଉ ୫:୧୩; ଲୁକ ୧୪:୩୪,୩୫. ସରୁ ଉଣ୍ତ୍ରି ନେଗ୍ରି ଜିନିସ୍, ମାତର୍ ସର୍ ଜଦି କାର୍ୟା ଆନିକା ଗୁଣୁ ଆରାକିନାତ୍, ତାନେଙ୍ଗ୍ ମାରିଡ଼େସି ଏଣ୍ତେସ୍ କାରିୟା କିଦେଙ୍ଗ୍ ଆଟ୍ନିଦେର୍ ? “ଆଦେଙ୍ଗ୍ ମିର୍ ସର୍ ୱାଜା ନେଗି ଗୁଣୁ ଆସ୍ତୁ ମାରି ୱିଜେରି ୱାଲେ ସାନ୍ତିଦାଣ୍ତ୍ ମାନ୍ଡ଼୍ରୁ ।”
Currently Selected:
ମାର୍କ 9: NTKoo20
Highlight
Share
Copy
Want to have your highlights saved across all your devices? Sign up or sign in
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020
