ମାର୍କ 6
6
ନାଜରିତ୍ତି ଲୋକୁ ଜିସୁଙ୍ଗୁଁ ମାନ୍ଏତାର୍
(ମାତିଉ ୧୩:୫୩-୫୮; ଲୁକ ୪:୧୬-୩୦)
1ଜିସୁ ଆୟାବାଡି ଡ଼ିସ୍ସି ସିସୁରିୱାଲେ ନିଜେ ଏମେ ବାଡ଼ିଦୁ ପିରିତା ମାର୍ଆନ୍ ଆୟା ବାଡ଼ିଦୁ ୱାତାର୍ ମାରି ୱାନି ଶିଶୁର୍ ୱାନି ୱାଲେ ୱାଲେ ସର୍ଆର୍ । 2ରମ୍ନିଦିନ୍ ଇଗା ୱାତାତ୍ ଆକା, ଜିସୁ ପାର୍ତନା କିନି ଇଲୁଦୁ ସର୍ଆନ୍ନୋ ଶିକ୍ଷା ସିଦେଙ୍ଗ୍ ଆସ୍ତାନ୍; ମାରି, ଆବେ ମାର୍ହି ୱିଜେରେ ୱାନି ମାଟା ୱେର୍ଆର୍ରୋ କାବାଆଜି ଇର୍ହାର୍, “ଇୟା ଲୋକୁ ଇୟାୱିଜୁ ଶିକ୍ଷା ଆମାଣ୍କୁ ପଇତାନ୍ ? ଇୟା ୱାନିଙ୍ଗ୍ ଆମାଣ୍କୁ ବୁଦି ପୁଟ୍ତାମାନାତ୍ ? ମାରି ଏମେ ସାକ୍ତିଦି ପାଣି ୱେନି କିୟୁଦାନ୍ ଆଜିନାତ୍, ଇୟାୱିଜୁ ଇନିକା ? 3ଇକାନ୍ ଆଜିନାନ୍ ଆୟା ବଡ଼େଇ ଆଏନ୍ । ୱେନି ଆଇସି ଦର୍ ମରିୟମ୍, ଯାକୁବ, ଯୋସି, ଯିହୁଦା ମାରି ସିମୋନ୍ ୱେନି ତଡ଼ାନ୍କୁ । ୱେନି ତାଙ୍ଗିଁକ୍ ମା ୱାଲେ ମାନେ ।” ଇୟାୱାଜା ଇଜି ୱାର୍ ଜିସୁଙ୍ଗୁଁ ମାନାଏତାର୍ ।
4 #
ଜୋହନ ୪:୪୪. ଜିସୁ ୱାରିଙ୍ଗ୍ ଇର୍ହାନ୍, “ବାବବାଦିର୍ ନିଜେଦି ରାଜିଦୁ, ନିଜେଦି ଇଲ୍ତୁ ମାରି ନିଜେଦି ଲୋକାଙ୍ଗ୍ ଡ଼ିସ୍ତିଙ୍ଗ୍ ଆଇ ଲୋକାମାନୁ ସମ୍ମାନ୍ ପଇନାର୍ ।”
5ଆୟା ବାଡିଦୁ ଜିସୁ ଏସୋ ରୋଗିଲୋକାଙ୍ଗ୍ ମୁସ୍କୁ କିୟୁ ଇଡ୍ଜି ନେଗେଣ୍ତ୍ କିନିକା ଡ଼ିସ୍ତିଙ୍ଗ୍ ମାରି ଇନି ନାଣ୍ତ କାବାଦି ପାଣି କିଦେଙ୍ଗ୍ ଆଟ୍ଏତାନ୍ । 6ମାରି, ଜିସୁ ୱାରି ଅବିସ୍ବାସ୍ ସୁଡ଼୍ଜି କାବାଆତା ସରଆନ୍ ।
ଜିସୁ ବାର ଲୋକାଙ୍ଗ୍ ପୋକତାନ୍
(ମାତିଉ ୧୦:୫-୧୫; ଲୁକ ୯:୧-୬)
7ୱେନ୍କା ଜିସୁ ସାରିବେଡ଼୍ତି ନାର୍କାଙ୍ଗ୍ଁ ନାର୍କାଙ୍ଗ୍ଁ ବୁଲାଜି ଶିକ୍ଷା ସିଦେଙ୍ଗ୍ ଆସ୍ତାନ୍ । ଆୟାୱାଲେ ଜିସୁ ବାରଲୋକ୍ ସିସୁରିଙ୍ଗ୍ ଲାକ୍ତୁ କୁକ୍ତାନ୍ନୋ ୱାରିଙ୍ଗ୍ ରିଏର୍ ରିଏର୍ କିଜି ପୋକ୍ତେଙ୍ଗ୍ ଆସ୍ତାନ୍ ମାରି ୱାରିଙ୍ଗ୍ ତାଗ୍ଇ ଆତ୍ମେଙ୍ଗ୍ଆଙ୍ଗ୍ ପେର୍ଦେଙ୍ଗ୍ ଅଦିକାର୍ ସିତାନ୍, 8ମିର୍ ସନିୱାଲେ ଉଣ୍ତ୍ରି ବାଡିଗା ଡ଼ିସ୍ତିଙ୍ଗ୍ ରୁଟି, ବା ମଣି ବା ଡାବୁଙ୍ଗୁଁ ଇଡ୍ନି ମଣି ଅମାଟ୍ ଇଜି ଆଦେସ୍ ସିତାନ୍ । 9ୱାରିଙ୍ଗ୍ ଜୁତେଙ୍ଗ୍ ବା ଯୋଡ଼୍କୁ ଆରାଦେଙ୍ଗ୍ ଇର୍ଆନ୍, ମାତର୍ ଆରାତିମାନି ଆଙ୍ଗିଁ ଡ଼ିସ୍ତିଙ୍ଗ୍ ଆଇକା ଅମାଟ୍ । 10ମାରି, ଜିସୁ ୱାରିଙ୍ଗ୍ ଇର୍ଆନ୍, “ଆମା ଇନ୍ଡ୍ରଣି ଲୋକୁ ମିଙ୍ଗିଁ ମାନାନାର୍, ଆୟା ବାଡି ଡ଼ିସ୍ନି ସନି ସାନ୍ଦି ଆବେ ତେବାଦୁ । 11#ପ୍ରେରିତ ୧୩:୫୧.#ଲୁକ ୧୦:୪-୧୧.ଜଦି ମିର୍ ଏମେ ନାର୍ତୁ ସନିଦେର୍ ଆୟା ବାଡ଼ିଦି ଲୋକୁ ମିଙ୍ଗିଁ ମାନାଏର୍, ବା ମି ମାଟା ୱେନ୍ଏର୍, ଆୟା ବାଡି ଡ଼ିସ୍ନିୱାଲେ ୱାରିମାନୁ ସାକି ସିଦେଙ୍ଗ୍ ମି ପାଦାମ୍କାଣି ଦୁଡ଼ି ସାଡ଼୍ତୁ ।”
12ଇୟା ୱେନ୍କା ସିସୁର୍ ନାର୍କାଙ୍ଗ୍ଁ ସଲ୍ସି ପାପ୍ସାରି ଡ଼ିସ୍ସି ମନତିଙ୍ଗ୍ ଡ଼େପ୍ସି ରାଦୁ ଇଜି, ଆକା ଲୋକାମାନୁ ପ୍ରଚାର୍କିତାର୍ । 13#ଜାକୁବ ୫:୧୪.ୱାର୍ ନାଣ୍ତ ଦୁବା କାସ୍ତି ଲୋକାଙ୍ଗ୍ ଦୁବେଙ୍ଗ୍ ଡ଼ିସିସ୍ କିତାର୍ ମାରି ନାଣ୍ତ ରୋଗ୍ ଲୋକାଙ୍ଗ୍ ନିୟୁ ଉସ୍ସି ନେଗେଣ୍ତ୍କିତାର୍ ।
ଡୁବନ୍ସିନି ଯୋହନତି ସାନିକା
(ମାତିଉ ୧୪:୧-୧୨; ଲୁକ ୯:୭-୯)
14 #
ମାତିଉ ୧୬:୧୪; ମାର୍କ ୮:୨୮; ଲୁକ ୯:୧୯. ଜିସୁ ଦର୍ ୱିଜୁ ତରିନ୍ ୱେଙ୍ଗିଁତାତ୍ଆକା ୱାନି ବିସୟତାନ୍ ହେରୋଦ ରାଜା ୱେର୍ଆନ୍, ମାରି ଲୋକୁ ଇଜିମାର୍ଆର୍, “ଡୁବନ୍ସିନି ଯୋହନ ସାତିଲୋକାମାଣାନ୍କୁ ନିଙ୍ଗିଁତାମାନାନ୍, ଆୟା ଉଣ୍ତିଙ୍ଗ୍ ଇୟାୱିଜୁ ସାକ୍ତି ୱେନିମାନୁ ପାଣିକିଜିନାତ୍ ।”
15ମାତର୍ ଆଇ ଲୋକ୍ଡର୍ ଇଜିମାର୍ଆର୍, “ୱାଣ୍ତ୍ରୁ ଏଲିୟ୍,” ମାରି ଏସୋ ଲୋକୁ ଇଜିମାର୍ଆର୍, “ପୁର୍ବେଦି ବାବବାଦିରି ୱାଜା ୱାଣ୍ତ୍ରୁ ବା ଅରେନ୍ ବାବବାଦି ।”
16ମାତର୍ ହେରୋଦ ଇକା ୱେର୍ଆ ଇର୍ଆନ୍, “ନାନ୍ ଆମା ଯୋହନତି ତାଲା କଇତା ମାର୍ହା, ଆୟା ଯୋହନ ମାରିଡ଼େସି ନିଙ୍ଗିଁତାମାନାନ୍ ।” 17#ଲୁକ ୩:୧୯,୨୦.ହେରୋଦ, ଯୋହନତିଙ୍ଗ୍ ତର୍ସି ଜଇଲ୍ତୁ ଇଡ୍ଦେଙ୍ଗ୍ ଆଦେସ୍ ସିତାମାର୍ଆନ୍, ଇରିଙ୍ଗ୍ ହେରୋଦ ୱାନି ତଡ଼ାନ୍ ପିଲିପ୍ତି ଆଡ଼୍ସି ହେରୋଦିଆଦିଙ୍ଗ୍ ପେଡ଼ି ଆତା ମାର୍ଆନ୍ ଆକା ଇକା କିତାନ୍ । 18ଇରିଙ୍ଗ୍ ଯୋହନ ହେରୋଦତିଙ୍ଗ୍ ଇଜିମାର୍ଆନ୍, “ନିଜେଦି ତଡ଼ାନ୍ତି ଆଡ଼ିଦିଙ୍ଗ୍ ଇଡ୍ନିକା ନିୟମ୍ ସିଲେତ୍ ।”
19ଇୟାଉଣ୍ତିଙ୍ଗ୍ ହେରୋଦିଆ ଯୋହନତିଙ୍ଗ୍ ଶାତ୍ରୁୱାଜା ସୁଡ଼୍ଜି ରିସା ଆତାଦୋ ସାୟାମାର୍ଗା ଡାକ୍ତେଙ୍ଗ୍ ବଦା କିଜିମାର୍ଆତ୍, ମାତର୍ ଆଟ୍ଏଜି ମାର୍ଆତ୍; 20ଇରିଙ୍ଗ୍ ହେରୋଦ ଯୋହନତିଙ୍ଗ୍ ଅରେନ୍ ଦାର୍ମୁ ମାରି ପବିତ୍ର ଲୋକ୍ ଇଜି ନେସ୍ସି ତିଲାଜି ମାର୍ଆନ୍, ମାରି ଯୋହନତିଙ୍ଗ୍ ରକ୍ଷା କିଦେଙ୍ଗ୍ ବଦାକିଜି ମାର୍ଆର୍, ମାରି ହେରୋଦ ଯୋହନତି ମାଟା ୱେନ୍ଜି ନାଣ୍ଡ ତରବର ଆଜିମାର୍ହାନ୍ ଆତିଙ୍ଗ୍ବା ୱେଡ଼ିକାଦାନ୍ ଆୟା ମାଟା ୱେନ୍ଜି ମାର୍ଆନ୍ ।
21ସାରାସାରି ଏସ ଦିନ୍ ୱେନ୍କା ହେରୋଦିଆଦିଙ୍ଗ୍ ଉଣ୍ତ୍ରି ସାରି ତରିତାତ୍ । ହେରୋଦ ୱାନି ଜନମ୍ ଦିନ୍ତୁ ୱିଜୁ ପେରି ପେରି ଲୋକାଙ୍ଗ୍, ସେନାପତିରିଙ୍ଗ୍ ମାରି ଗାଲିଲିଦି ୱିଜୁ ପେରି ଲୋକାଙ୍ଗ୍ ଉଣ୍ତେଙ୍ଗ୍ ନାଡ଼ା ସମୟତୁ ଉଣ୍ତ୍ରି ବୋଜି ତିଆର୍ କିତାନ୍; 22ମାରି, ହେରୋଦିଆଦି ଗାଡ଼୍ସି ଲୋଇ ୱାତାତ୍ଦ ଗାତ୍ସି ହେରୋଦ ମାରି ବୋଜିଦୁ ବାସ୍ତି ମାର୍ହି କୁଡ଼ାଆଙ୍ଗ୍ ମୋନ୍ତିଙ୍ଗ୍ ୱେଡ଼ିକା କିବିସ୍କିତାତ୍ । ଆବେଟ୍ ହେରୋଦ ରାଜା ଗାଡ଼୍ସିଙ୍ଗ୍ ୱେନ୍ବାତାନ୍, “ନିନ୍ ଇନିକା ବଦାକିଜିନି, ଲସ୍ଆ, ନାନ୍ ଆକା ନିଂଇ ସିନା ।” 23“ନାନ୍ ପାର୍ମାଣ୍ କିଜି ଇଜିନା, ନିନ୍ ଆମାକା ଲସ୍ନି, ଆକା ରାଜିଦି ଆଧା ବାଗ୍ ବା ସିନା ।”
24ଆବେଟ୍ ଗାଡ଼୍ସି ଆତ୍ରେ ସର୍ହାଦୋ ତାନି ଆଇସିଙ୍ଗ୍ ୱେନ୍ବାତାତ୍, ନାନୁ ଇନିକା ଲସ୍ନା ? ତାମେ ଆଇସି ଦାପେ ଦାପେ, ତାନେଙ୍ଗ୍ ଇର୍ହାତ୍, “ନିନୁ ଡୁବନ୍ ସିନି ଯୋହନତି ତାଲା ଲସ୍ଆ ।”
25ଆୟାଦାପ୍ରେ ଗାଡ଼୍ସି ରାଜାମାନୁ ଉରୁକ୍ସି ୱାଜି ଇର୍ହାତ୍, “ନା ବଦା ଯେ, ନିନ୍ ଡୁବନ୍ସିନି ଯୋହନତି ତାଲା ଇୟାଦାପ୍ରେ ନାଂଇ ଉଣ୍ତ୍ରି ସାଡ଼୍ୱାଦୁ ସିଦା ।”
26ଇକା ମାଟା ୱେନ୍ଜି ହେରୋଦ ରାଜା ନାଣ୍ତ ଦୁଃଖ କିତାନ୍ ମାତର୍ କୁଡ଼ାଆଙ୍ଗାଁ ଆଗ୍ଡ଼ି ପାର୍ମାଣ୍ କିତାମାର୍ହାନ୍ଆକା ସିଲେ ଇନ୍ଡ୍ରେଙ୍ଗ୍ ଆଟ୍ଏତାନ୍ । 27ଆବେଟ୍ ରାଜା ଦାପ୍ରେ ଅରେନ୍ ସନ୍ୟଙ୍ଗ୍ ପୋକ୍ତାନ୍ ନୋ ଯୋହନତି ତାଲା ତାତେଙ୍ଗ୍ ଆଦେସ୍ ସିତାନ୍ । ୱାଣ୍ତ୍ରୁ ସର୍ଆନ୍ ନୋ ଜଇଲି ଲୋଇ ଯୋହନତି ତାଲା କଇତାନ୍, 28ଯୋହନତି ତାଲା ଉଣ୍ତ୍ରି ସାଡ଼୍ୱାଦୁ ତାତାନ୍ ନୋ ଆଇଲିଦିଙ୍ଗ୍ ସିତାନ୍, ଆୟାକା ଆଇଲି ଆସ୍ତାଦୋ ତାମେ ଆଇସିଙ୍ଗ୍ ସିତାତ୍ । 29ଯୋହନତି ସିସୁର୍ ଆୟା କାବୁର୍ ୱେର୍ଆର୍ରୋ ୱାତାର୍ ମାରି ୱାନି ସାତି ମାଡ଼ା ଆସ୍ତା ଅତାରୋ ଦୁକି ଗୁଟାଦୁ ମୁସ୍ତାର୍ ।
ଜିସୁ ପାସ୍ ହାଜାର୍ ଲୋକାଙ୍ଗ୍ ଉଠ୍ପିସ୍ କିତାନ୍
(ମାତିଉ ୧୪:୧୩-୨୧; ଲୁକ ୯:୧୦-୧୭; ଜୋହନ ୬:୧-୧୪)
30ୱେନ୍କା ସିସୁର୍ ଜିସୁ ଲାକ୍ତୁ ଉଣ୍ତାତାର୍, ୱାରୁ ଏମେ ଏମେକା କିତାମାର୍ଆର୍ ମାରି ଏମେ ଏମେକା ଶିକ୍ଷା ସିତାମାର୍ଆର୍, ଆୟାୱିଜୁ ୱାନିଙ୍ଗ୍ ୱେର୍ତାର୍ । 31ଆବେଟ୍ ୱାନ୍ ୱାନି ସିସୁରିଙ୍ଗ୍ ଇର୍ଆନ୍, “ସାଦୁ ମାଡୁ ଏର୍ନାଡ ଉଣ୍ତ୍ରି ସିମ୍ରା ବାଡିଦୁ ସନାଟ୍ । ଆବେ ଏସୋ ସମୟ ରୋମ୍ନାଟ୍ ।” ଇରିଙ୍ଗ୍ ନାଣ୍ତ ଲୋକୁ ୱିଜେରେ ସନିକା ୱାନିକା ଆଜିମାର୍ହାର୍ ଆକା ୱାରିଙ୍ଗ୍ ଉଣ୍ତେଙ୍ଗ୍ ବା ସମୟ ସିଲେତାତ୍ । 32ଆୟାୱେନ୍କା ଜିସୁ ମାରି ୱାନି ଶିଶୁର୍ ଡଙ୍ଗାଁଦୁ ଏକ୍ତାର୍ନୋ ଉଣ୍ତ୍ରି ସିମ୍ରା ବାଡିଦୁ ସନ୍ଡ଼୍ରେଙ୍ଗ୍ ସତାର୍ ।
33ମାତର୍ ୱାର୍ ସନିୱାଲେ ଏସୋ ଲୋକୁ ୱାରିଙ୍ଗ୍ ସୁଡ଼୍ଜି ମାରି ସିନିସ୍ କିତାର୍, ମାରି ଲୋକୁ ୱିଜେରେ ୱିଜୁ ଗାଡ୍କାଣାକୁ ପାଦାମ୍କାଣ୍କୁ ଆବେ ଅର୍ସେ ଉରୁକ୍ସି ସରଆର୍ ରୋ ୱାରି ଆଗିଡ଼ି ଇଗା ସରଆର୍ । 34#ମାତିଉ ୯:୩୬.ଜିସୁ ଡଙ୍ଗାଁଦାନ୍ ସତାନ୍ନୋ ନାଣ୍ତ ଲୋକାଙ୍ଗ୍ ସୁଡ଼୍ଜି ୱାରି ଉଣ୍ତିଙ୍ଗ୍ ଦୁଃକ୍ କିତାନ୍, ଇରିଙ୍ଗ୍ ୱାର୍ ଗାଉଡ଼ୁ ସିଲି ମେଣ୍ତେଙ୍ଗାଁ ମାନ୍ଦା ୱାଜା ୱାର୍ ସାକାସିଲିକା ନି ସିନ୍ତା ଆଜିମାର୍ହାର୍; ମାରି, ୱାଣ୍ତ୍ରୁ ୱାରିଙ୍ଗ୍ ନାଣ୍ତ ସିକିୟା ସିଦେଙ୍ଗ୍ ଆସ୍ତାନ୍ । 35ନାଣ୍ତ ୱେଡ଼ା ଆତାତ୍ଆକା ୱାନି ସିସୁର୍ ୱାନି ଲାକ୍ତୁ ୱାତା ଇର୍ହାର୍, “ଇୟାବାଡିତୋ ସିମ୍ରା, ମାରି ନାଣ୍ତ ୱେଡ଼ା ଆତାତ୍ନି; 36ଲୋକୁ ଏଣ୍ତେସ୍କି ସାରିବେଡ଼୍ତି ନାର୍କାଙ୍ଗ୍ଁ ସନାର୍ ନିଜେ ନିଜେଦି ଉଣ୍ତିଙ୍ଗ୍ ଏସୋ ଉଣି ଖାଦି କଣାର୍, ଆୟାଉଣ୍ତିଙ୍ଗ୍ ୱାରିଙ୍ଗ୍ ପୋକ୍ଆ ।”
37ମାତର୍ ଜିସୁ ୱାରିଙ୍ଗ୍ ଇର୍ହାନ୍, “ମିର୍ ୱାରିଙ୍ଗ୍ ଉଣ୍ତେଙ୍ଗ୍ ସିଦୁ,” ସିସୁର୍ ୱାନିଙ୍ଗ୍ ଇର୍ହାର୍, “ମାପ୍ ଇନିକା ଆଟ୍ଗୋଟା ଲେଜ୍ତି କୁଲି ଡାବୁଦାନ୍ ରୁଟି କଣାପ୍ ୱେରିଙ୍ଗ୍ ସିନାପ୍ ?”
38ଜିସୁ ୱାରିଙ୍ଗ୍ ଇର୍ଆନ୍, “ମି ଲାକ୍ତୁ ଏସୋ ଗୋଟା ରୁଟିଙ୍ଗ୍ ମାନେ ? ସଲ୍ସ ସୁଡ଼୍ଦୁ ।” ସିସୁର୍ ସର୍ଆ ୱେର୍ଆ ୱାତା ରୋ ୱାନିଙ୍ଗ୍ ଇର୍ହାର୍, “ପାସ୍ଗୋଟା ରୁଟିଙ୍ଗ୍ ମାରି ରୁଣ୍ତି ମିନ୍କୁ ମାନେ ।”
39ୱିଜେରେ ଏଣ୍ତେସ୍କି ଧାଡ଼ି ଧାଡ଼ି ଆଜି କଡ଼୍କି ଲାଟା ମାନି ବାଡିଦୁ ବାସ୍ନାର୍, ଆୟା ଉଣ୍ତିଙ୍ଗ୍ ଜିସୁ ବାସିସ୍ କିଦେଙ୍ଗ୍ ୱାରିଙ୍ଗ୍ ଆଦେସ୍ ସିତାନ୍ । 40ଆବେଟ୍ ୱିଜେରେ ଶହେ ଶହେ ଲୋକୁ ମାରି ପଚାସ୍ ପଚାସ୍ ଲୋକୁ ଧାଡ଼ି ଆଜି ବାସ୍ତାର୍ । 41ଆୟାୱେନ୍କା ଜିସୁ ଆୟା ପାସ୍ଗୋଟା ରୁଟିଙ୍ଗ୍ ମାରି ରୁଣ୍ତି ମିନ୍କୁ ଅସି ସ୍ୱର୍ଗ ମୁସ୍କୁ ସୁଡ଼୍ଜି ମାପୁରୁଦିଙ୍ଗ୍ ଦନ୍ୟବାଦ୍ ସିତାନ୍ ମାରି ରୁଟିଙ୍ଗ୍ ରୁକ୍ସି ଲୋକାଙ୍ଗ୍ ବାଟାକିଜି ସିଦେଙ୍ଗ୍ ସିସୁରିଙ୍ଗ୍ ସିତାନ୍ । ଆୟା ରୁଣ୍ତି ମିନ୍କାଙ୍ଗ୍ ବା ବାଟାକିଜି ସିଦେଙ୍ଗ୍ ସିତାନ୍ । 42ୱିଜୁ ଲୋକୁ ୱିଜେରେ ତିର୍ଆରୋ ପଟାପାଜିତାର୍ । 43ଇୟା ୱେନ୍କା ସିସୁର୍ ଏଜିତି ରୁଟିଙ୍ଗ୍ ମାରି ମିନ୍କୁ ମୋକେଙ୍ଗ୍ ପେର୍ଜି ବାରଗୋଟା ଡାଡ଼ିଦୁ ବର୍ତି କିତାର୍ । 44ଏମେ ଲୋକ୍ଡର୍ ଇୟା ରୁଟିଙ୍ଗ୍ ତିର୍ହା ମାର୍ଆର୍, ୱାରି ଲୋଇ ଆବ୍କା ମେମାର୍ଙ୍ଗୁଁ ଲୋକୁନେ ୫,୦୦୦ ହାଜାର୍ ମାର୍ଆର୍ ।
ଜିସୁ ଏର୍ ମୁସ୍କୁ ବୁଲାତାନ୍
(ମାତିଉ ୧୪:୨୨-୩୩; ଜୋହନ ୬:୧୫-୨୧)
45ଆୟାଦାପ୍ରେ ଜିସୁ ୱାନି ସିସୁରିଙ୍ଗ୍ ଡଙ୍ଗାଁଦୁ ବାସିସ୍ତାନ୍ ନୋ ସାମ୍ଦୁର୍ତୁ ଆୟା ପାଡ଼ିଦି ବେତ୍ସାଇଦାଦୁ ୱାନି ଆଗ୍ଡ଼ିନେ ସଣ୍ଡ୍ରେଙ୍ଗ୍ ଇର୍ହାନ୍, ଆବେଟ୍ ଲୋକାଙ୍ଗ୍ ଜିସୁ ପୋକ୍ତାନ୍ । 46ଜିସୁ ଲୋକାଙ୍ଗ୍ ପୋକ୍ତି ୱେନ୍କା ୱାନ୍ ପାର୍ତନା କିଦେଙ୍ଗ୍ ଇଜି ଗରନ୍ ମୁସ୍କୁ ସର୍ହାନ୍ । 47ମିଲିମିଲିକା ଆଜି ୱାନିୱାଲେ ଡଙ୍ଗାଁ ସାମ୍ଦୁର୍ ନାଡ଼୍ମି ମାର୍ଆତ୍ ମାରି ୱାନ୍ ପାଡ଼ି ଅରେନ୍ ମାର୍ଆନ୍ । 48ଜିସୁ ସୁଡ଼ୁତାନ୍ ଯେ ସିସୁରି ଡଙ୍ଗାଁଦି ସାଟ୍ୱା ଡାକ୍ତେଙ୍ଗ୍ଁ ଇଜି ନାଣ୍ତ ବାଦାଜି ମାର୍ଆର୍ । ଇରିଙ୍ଗ୍ ନାସ୍ତିୱାଲେ ଗାଲି ୱାରି ଆଗ୍ଡ଼ି ସାରି ୱାଜି ମାର୍ଆତ୍ । ସାଲ୍ଦି ଆନିୱାଲେ ଜିସୁ ଏର୍ ମୁସ୍କୁ ବୁଲାଜି ବୁଲାଜି ଶିଶୁରି ଲାକ୍ତୁ ୱାତାନ୍, ୱାଣ୍ତ୍ରୁ ସିସୁରି ଲାକ୍ତୁରାନ୍ ଆଜି ଆଗ୍ଡ଼ି ସନ୍ଡ଼୍ରେଙ୍ଗ୍ ବଦା କିଜି ମାର୍ହାନ୍ 49ମାତର୍ ସିସୁର୍ ୱାନିଙ୍ଗ୍ ସାମ୍ଦୁର୍ ମୁସ୍କୁ ବୁଲାନିକା ସୁଡ଼ୁତାରୋ, “ଦୁବା ଇଜି” ଅଡ୍ବିତାରୋ ନାଣ୍ତ ଆଉଲି ଆତାର୍, 50ଇରିଙ୍ଗ୍ ୱିଜେରେ ଜିସୁଙ୍ଗୁଁ ସୁଡ଼ୁତାର୍ ତିଲାତା ସର୍ହାମାର୍ଆର୍ । ମାତର୍ ଜିସୁ ଆୟାଦାପ୍ରେ ୱାରିୱାଲେ ୱାର୍ଗିଜି ୱାରିଙ୍ଗ୍ ଇର୍ଆନ୍, ସାସ୍ ଆସ୍ତୁ, ତିଲାମାଟ୍, “ନାନ୍ ତୋ ଜିସୁ ।” 51ଜିସୁ ୱାରି ଲାକ୍ତୁ ସର୍ଆନ୍ନୋ ଡଙ୍ଗାଁଦୁ ଏକ୍ତାନ୍, ଆବେଟ୍ ଗାଲି ତିର୍ ଆତାତ୍ । ସିସୁର୍ ମନ୍ ଲୋଇ ନାଣ୍ତ କାବାଆତା ସରଆର୍ । 52ଇରିଙ୍ଗ୍ ୱାର୍ ପାସ୍ ହଜାର୍ ଲୋକାଙ୍ଗ୍ ରୁଟିଙ୍ଗ୍ ଉଠ୍ପିସ୍କିତି ବିସୟଦି ଅର୍ତ ବୁଝାଏତା ମାର୍ଆର୍, ଇରିଙ୍ଗ୍ ୱାରି ବୁଦ୍ଧି ଗୁପାତା ମାର୍ଆତ୍ ।
ଜିସୁ ଗିନେସର୍ତୁ ନାଣ୍ତ ରୋଗ୍ ଲୋକାଙ୍ଗ୍ ନେଗେଣ୍ତ୍ କିତାନ୍
(ମାତିଉ ୧୪:୩୪-୩୬)
53ଜିସୁ ମାରି ୱାନି ସିସୁର୍ ସାମ୍ଦୁର୍ ନାସି ଗିନେସରତି ସାନ୍ଧିଦୁ ୱାତାର୍ନୋ ସାମ୍ଦୁର୍ ପାଡ଼ି ଡଙ୍ଗାଁ ତର୍ତାର୍ । 54ୱାର୍ ଡଙ୍ଗାଁଦାଣ୍ତ୍ ରେତି ୱାତିଦାପ୍ରେ ଲୋକୁ ଜିସୁଙ୍ଗୁଁ ସୁଡ଼୍ଜି ସିନିସ୍ତାର୍ । 55ଆବେଟ୍ ଆୟା ସାରିବେଡ୍ତି ନାର୍କାଙ୍ଗ୍ ଉର୍କୁସି ସର୍ଆର୍ । ଜିସୁ ଆମା ଆମା ବାଡ଼ିଦୁ ମାର୍ଆନ୍ ମାରି ଲୋକୁ ୱିଜେରେ ରୋଗ୍ ଲୋକାଙ୍ଗ୍ କାଟେଲ୍ତୁ ପିଣ୍ତ୍ଜି ଜିସୁମାନୁ ତାତାର୍ । 56ଜିସୁ ଏମେ ଏମେ ନାର୍, ଗାଡ଼୍ ମାରି ଲୋଇରି ନାର୍କାଙ୍ଗ୍ ସର୍ହାନ୍, ଲୋକ୍ ୱିଜେରେ ୱିଜୁ ବାଡ଼ିଦି ରୋଗିଲୋକାଙ୍ଗ୍ ସାତାଦୁ ତାତାରୋ ଉଣ୍ତାକିତାର୍, ମାରି ରୋଗିଲୋକ୍ ଏଣ୍ତେସ୍କି ୱାନି ୱାତି ଜାଲି ଅଡ଼ପ୍ ମୁଟ୍ନାର୍, ଆୟାଉଣ୍ତିଙ୍ଗ୍ ଜିସୁଙ୍ଗୁଁ ମାଡ଼ିସ୍ କିତାର୍; ମାରି ଏସୋ ଲୋକ୍ଡର୍ ଜିସୁଦି ୱାତି ଜାଲି ମୁଟ୍ତାର୍ ଆୟା ଲୋକ୍ଡର୍ ନେଗେନ୍ ଆତାର୍ ।
Currently Selected:
ମାର୍କ 6: NTKoo20
Highlight
Share
Copy
Want to have your highlights saved across all your devices? Sign up or sign in
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020
