ମାତିଉ 20
20
ଅଙ୍ଗୁର୍କିଡ଼ିଇଦୁ ପାଣିକିନିକାନ୍
1ମୁସ୍କୁପୁର୍ ଇୟାୱାଜା । ଅରେନ୍ ଲୋକୁ ଅର୍ଲେନ୍ ଉଟ୍ଲା ନାଡ଼ାକାଦେ ୱାନି ଅଙ୍ଗୁର୍ କିଡ଼ିଇଦୁ ପାଣି କିଦେଙ୍ଗ୍ ଇଜି ବୁତିଲୋକାଙ୍ଗ୍ ପୟ୍ଦେଙ୍ଗ୍ ସୋତାନ୍ । 2ଆମାୱାରିଙ୍ଗ୍ ପୟ୍ତାନ୍, ୱିଜେରିଙ୍ଗ୍ ଅର୍ଲେଟିଙ୍ଗ୍ ଉନ୍ଡ୍ରି ଲାକା ୱେଣ୍ଡିଅଦ୍ଲି ବୁତି ଡାବୁଙ୍ଗ୍ ସିଦେଙ୍ଗ୍ ତେୱେତାନ୍ନୋ ୱାରିଙ୍ଗ୍ ନିଜେଦି କିଡ଼ିଇଦୁ ପୋକ୍ତାନ୍ । 3ତାନେୱେନ୍କା ନାଣ୍ତିଙ୍ଗ୍ ନଅଟା ବେଡ଼ାଦୁ ସାତାଦୁ ସର୍ର୍ହାନ୍ନୋ ସୁଡ଼ୁତାନ୍, ମାନ୍ଦାଲୋକ୍ ସିମ୍ରା ଆଜି ନିର୍ଆମାନାର୍ । 4ୱାରିଙ୍ଗ୍ ୱାନ୍ ଇର୍ହାନ୍, ମିର୍ ବା ନା ଅଙ୍ଗୁର୍ କିଡ଼ିଇଦୁ ସୋଲ୍ସ ପାଣି କିଦୁ, ମିଙ୍ଗିଁ ସାମାନ୍ ବୁତି ସିନା । 5ୱାର୍ ସୋର୍ହାର୍ନୋ ପାଣି କିଦେଙ୍ଗ୍ ଆସ୍ତାର୍ । ୱେଡ଼େ ବାର୍ଟା ମାରି ତିନ୍ଟା ବେଡ଼ାଦୁ ଟିକ୍ ଆୟାୱାଜା ମାରି ଏସ ପାଣିକିନିୱାରିଙ୍ଗ୍ ତାତାନ୍ନୋ ପାଣିଦୁ ଲାଗିସ୍କିତାନ୍ । 6ମାରି ମିଲ୍ମିଲିକା ପାସ୍ଟା ବେଡ଼ାଦୁ ମାରି ଉନ୍ଡ୍ରି ଦେବା ସାତାଦୁ ସର୍ହାନ୍ନୋ ସୁଡ଼ୁତାନ୍, ମାରି ଏସ ଲୋକୁ ନିର୍ଆମାନାର୍, ୱାରିଙ୍ଗ୍ ୱେନ୍ବାତାନ୍, ୱେଡ଼୍ୱେଡ଼ାର୍ ପାଣିକିଏଣ୍ଗା ଏନ୍ଦା ଇବେନୁ ସମୟ୍ ନାସ୍ଟୁକିଜିନିଦେର୍ ? 7ୱାର୍ ଇର୍ହାର୍, ଏନ୍ ମାଙ୍ଗିଁ ପାଣିଦୁ ଲାଗିସ୍କିଏର୍ । ୱାନ୍ ୱାରିଙ୍ଗ୍ ଇର୍ହାନ୍, ଆର୍ତିଙ୍ଗ୍ ମିର୍ ୱିଜୁ ନା ଅଙ୍ଗୁର୍ କିଡ଼ିଇଦୁ ସୋଲ୍ସ ପାଣିକିଦୁ ।
8ଆୟାନାଣ୍ତିଙ୍ଗ୍ ମିଲ୍ମିଲିକା ବେଡ଼ାଦୁ କିଡ଼ିଇଦି ମାଲିକ୍ ଗୁମାସ୍ତାଦିଙ୍ଗ୍ ଇର୍ହାନ୍, ପାଣିକିତିୱାରିଙ୍ଗ୍ କୁକ୍ଆ । ଆମାକାର୍ ୱିଜେରିମାଣାନ୍ ୱେନ୍କା ପାଣି ଆରାମ୍କିତାମାନାର୍, ଆଗ୍ଡ଼ି ୱାରି ବୁତି ସିଆ । ଆମାକାର୍ ୱିଜେରି ଆଗ୍ଡ଼ି ପାଣିଦୁ ୱାତାମାନାର୍ ୱାରି ବୁତିଡାବୁଙ୍ଗ୍ ସାରାସାରିୱେନ୍କା ସିଆ । 9ମିଲ୍ମିଲିକା ପାସ୍ଟାଦୁ ଆମାକାର୍ ପାଣିଦୁ ୱାତା ମାର୍ହାର୍, ୱାର୍ ୱିଜେରେ ଉନ୍ଡ୍ରି ୱେଣ୍ଡିଅଦ୍ଲି ଡାବୁଙ୍ଗ୍ ପୟ୍ତାର୍ । 10ଆମାକାର୍ ଆଗ୍ଡ଼ି ପାଣି ଆରାମ୍ କିତାମାର୍ହାର୍, ୱାର୍ ନାଣ୍ତ ପୟ୍ନିକା ଇଜି ଅଡ଼୍ବିତାର୍, ମାତର୍ ୱାନ୍ ବା ଉନ୍ଡ୍ରେ ଉନ୍ଡ୍ରେ ୱେଣ୍ଡିଅଦ୍ଲି ଡାବୁଙ୍ଗ୍ ପୟ୍ତାର୍ । 11ୱାର୍ ନିସ ଅସି ମାଲିକ୍ ବିରଦ୍ତାନ୍ ୱେଡ଼ିକାଆଏଣ୍ଗା ୱେର୍ସି ଇର୍ହାର୍, 12ମିଲ୍ମିଲିକା ପାସ୍ଟାଦୁ ପାଣି ଆରାମ୍ କିତିମାନିକାର୍ ଉନ୍ଡ୍ରେ ଗନ୍ଟାନେ ପାଣି କିତାମାନାର୍ । ମାପ୍ ଇୟା ନିସ ତେର୍ୱେଲ୍ତିଙ୍ଗ୍ ୱେଡ଼ାର୍ କଟେଆତାପ୍, ମାରି ବୁତିଡାବୁଙ୍ଗ୍ ସିତିୱାଲେ ୱାରିଙ୍ଗ୍ ମା ୱାଲେ ସାମାନ୍ କିଜିସିତି ।
13ମାଲିକ୍ ୱାରି ଲୋଇରାନ୍ ଅରେନ୍ୱାନିଙ୍ଗ୍ ଇର୍ହାନ୍, ବନ୍ଧୁ; ନାନ୍ ନିଙ୍ଗିଁ ଟକେକିଏ । ଅର୍ଲେଟି ବୁତି ଡାବୁଙ୍ଗ୍ ଉନ୍ଡ୍ରେ ୱେଣ୍ତି ଅଦ୍ଲି ଅସି ପାଣି କିଦେଙ୍ଗ୍ ମିର୍ ୱିଜିଦେର୍ ରାଜିଆତିମାରିଇଦେର୍ । 14ମି ଆୟା ବୁତିଡାବୁଙ୍ଗ୍ ଅସି ଇନ୍ଡ୍ର ସାନ୍ଡ୍ରୁ, ମିଙ୍ଗିଁ ଏସ ସିତାମାନା, ଉନ୍ଡ୍ରେ ଗନ୍ଟା ପାଣି କିତିମାନି ଲୋକ୍ତିଙ୍ଗ୍ ବା ନାସନେ ସିଦେଙ୍ଗ୍ ନା ବଦା । 15ନା ନିଜେଦି ଦନ୍ତିଙ୍ଗ୍ ଏଣ୍ତେସ୍ ବଦା ଆୟାୱାଜା କାର୍ସୁକିଦେଙ୍ଗ୍ ଇନିକା ନା ଅଦିକାର୍ ସିଲେତ୍ ? ସିଲେ ନାନ୍ ଦାନ୍ସିନିକାନ୍ ଆତିଙ୍ଗ୍ ମିର୍ ନାଙ୍ଗିଁ ଆକାର୍ଆଜିନିଦେର୍ ?
16 #
ମାତିଉ ୧୯:୩୦; ମାର୍କ ୧୦:୩୧; ଲୁକ ୧୩:୩୦. ଇୟା କାତାଦି ମାଟା ୱିସ୍ତାନ୍ନୋ ଜିସୁ ଇର୍ହାନ୍, “ୱେନ୍କା ମାନି ଲୋକୁ ଆଗ୍ଡ଼ି ଆନାର୍ ମାରି ଆଗ୍ଡ଼ି ମାନି ଲୋକୁ ୱେନ୍କା ଆନାର୍ ।”
ଜିସୁ ନିଜେଦି ସାନି ନିଙ୍ଗିଁନି ବିସୟ୍ତାନ୍ ମୁନ୍ଡ୍ରି ଦେବେଙ୍ଗ୍ ଇର୍ହାନ୍
(ମାର୍କ ୧୦:୩୨-୩୪; ଲୁକ ୧୮:୩୧-୩୪)
17ଜିସୁ ଜିରୁସାଲମ୍ତୁ ସନି ସାରିଦୁ ବାର୍ଲୋକ୍ ସିସୁରିଙ୍ଗ୍ ଉନ୍ଡ୍ରି ଲାକ୍ତୁ କୁକ୍ତାଅତାନ୍ନୋ ଅରେନ୍ନେ ଇର୍ହାନ୍, 18“ୱେନ୍ଡ୍ରୁ, ମାଡ୍ ଜିରୁସାଲମ୍ତୁ ସୋଲ୍ସିନିକା, ଆବେନୁ ମନୁସ୍ୟପୁତ୍ର ପେରି ଜାଜକ ମାରି ଦାର୍ମୁଗୁରୁରି କିୟୁଦୁ ସର୍ପେଆନାନ୍ । ମାରି ୱାର୍ ୱାନିଙ୍ଗ୍ ସାନିଦଣ୍ତ୍ ସିନାର୍ 19ମାରି ୱାର୍ ଅଣଜିହୁଦିରି କିୟୁଦୁ ସର୍ପେ କିଜି ସିନାର୍ । ଆଇଜାତିଦିକାର୍ ୱାନିଙ୍ଗ୍ ସେମାର୍ କିନାର୍, କର୍ଡା ମାଡ୍ ଡାକ୍ନାର୍ ମାରି କ୍ରୁସକାଟ୍ତୁ ଏକିସ୍କିନାର୍, ମାତର୍ ମୁନେଟି ୱେନ୍କା ୱାନ୍ ମାରିଡ଼େସି ଜିବନ୍ଆଜି ନିଙ୍ଗିଁନାନ୍ ।”
ଅରେତ୍ ୟାୟାଦି ମାଡ଼ିସ୍କିନିକା
(ମାର୍କ ୧୦:୩୫-୪୫)
20ଇୟା ସମୟ୍ତୁ ଜେବଦିଦି ଆଡ଼୍ସି ତାନି ରିଏରି ମାରିସିରି ୱାଲେ ଜିସୁଦି ଲାକ୍ତୁ ୱାଜି, ଜିସୁଙ୍ଗୁଁ ମାଡ଼ିସ୍କିଜି ୱାନିମାଣାନ୍ ଇନିକା କିଦେଙ୍ଗ୍ ଲସ୍ତାତ୍ ।
21ଜିସୁ ତାନିଙ୍ଗ୍ ୱେନ୍ବାତାନ୍, “ନିନ୍ ଇନିକା ବଦାକିଜିନି ?” ୱାଦ୍ ଇର୍ହାତ୍, “ନିନ୍ ଏସ୍ତିୱାଲେ ରାଜା ଆନି, ନା ଇୟା ରିଏର୍ ମାରିସିରିଙ୍ଗ୍ ନି ଉଣେରି କିୟୁ ତରିନ୍ ମାରି ଅରେନ୍ ଲୋକ୍ତିଙ୍ଗ୍ ନି ଡେବ୍ରିକିୟୁ ତରିନ୍ ବାସ୍ତେଙ୍ଗ୍ ମାଟା ସିଦା ।”
22ଜିସୁ ଜେବଦିରି ରିଏର୍ ମାରିସିରିଙ୍ଗ୍ ଇର୍ହାନ୍, “ମିର୍ ଇନିକା ଲସ୍ସିନିଦେର୍, ଆୟାକା ମିର୍ ନେସ୍ତେଙ୍ଗ୍ କି ବୁଝାଦେଙ୍ଗ୍ ଆଟ୍ଏଜିନିଦେର୍ । ନାନ୍ ଏମେ ଦୁଃକ୍ବୋଗ୍ତି ଉଣିଡୁବାଇତାନ୍ ଉନ୍ଣ୍ତେଙ୍ଗ୍ ସୋଲ୍ସିନା, ମିର୍ ଇନିକା ଆବେଟ୍ତାନ୍ ଉନ୍ଣ୍ତେଙ୍ଗ୍ ଆଟ୍ନିଦେର୍ ?”
ୱାର୍ ଇର୍ହାର୍, “ହୁଁ ଆଟ୍ନାପ୍ ।”
23ଜିସୁ ୱାରିଙ୍ଗ୍ ଇର୍ହାନ୍, “ମିର୍ ନା ଆୟା ଡୁବାଇତୁ ଉଣିଦେର୍ ସତ୍, ମାତର୍ ନା ଉଣେରି ମାରି ଡେବିରି ତରିନ୍ ବାସ୍ତେଙ୍ଗ୍ଇଜି ଏଙ୍ଗ୍ ଆସ୍କିଦେଙ୍ଗ୍ ଅଦିକାର୍ ନାଙ୍ଗିଁ ସିଲେତ୍ । ଆମାୱାରି ଉଣ୍ତିଙ୍ଗ୍ ନା ବୁବା ଆୟା ବାଡି ତିଆର୍ କିତାମାନାନ୍, ଆକା କେବଲ୍ ୱାରିଦି ।”
24ଏସ୍ତିୱାଲେ ଆଇ ଦାସ୍ଲୋକ୍ ସିସୁର୍ ଇୟା ମାଟା ୱେର୍ଆର୍, ଆୟା ତଡ଼ରିଏରି ମୁସ୍କୁ ଗିଦ୍ରି ଆତାର୍ । 25#ଲୁକ ୨୨:୨୫,୨୬.ଜିସୁ ସିସୁରିଙ୍ଗ୍ ଉନ୍ଡ୍ରେମାନୁ କିଜି ଇର୍ହାନ୍, “ମିର୍ ନେସ୍ନିଦେର୍, ଇୟା ଦୁନିଆଦି ଅଣଜିହୁଦି ରାଜାର୍ ଆଇୱାରି ମୁସ୍କୁ ଅଦିକାର୍ କିତାର୍ମାନ୍ଦି ମାରି ପେରି ପେରି ନେତାର୍ ବା ଆଇୱାରି ମୁସ୍କୁ ସାସନକିନାର୍ । 26#ମାତିଉ ୨୩:୧୧; ମାର୍କ ୯:୩୫; ଲୁକ ୨୨:୨୬.ମି ଲୋଇ ଆୟାୱାଜା ସିଲେତ୍, ମାତର୍ ମି ଲୋଇରାନ୍ ଅରେନ୍ ପେରିକାନ୍ ଆଦେଙ୍ଗ୍ ବଦାକିନାନ୍, ୱାନ୍ ଆଇୱାରି ସେବାକିନିକାନ୍ ଆପିନ୍, 27ମାରି ମି ଲୋଇରାନ୍ ଏନ୍ ପେରିକାନ୍ ଆଦେଙ୍ଗ୍ ବଦାକିନାନ୍, ୱାନ୍ ଆଇୱାରି ଗତିମୁରୁଲି ୱାଜା ୱାରି ସେବା କିପିନ୍, 28ଏଣ୍ତେସ୍ ମନୁଷ୍ୟପୁତ୍ର ଯେ ନାନ୍ ସେବା ପଇଦେଙ୍ଗ୍ ରେଏ, ମାତର୍ ସେବା କିଜି ଆଇୱାରିଦି ଡ଼ିସିସ୍କିନି ଉଣ୍ତିଙ୍ଗ୍ ନିଜେଦି ଜିବନ୍ ସିଦେଙ୍ଗ୍ ଇଜି ୱାତାମାନାନ୍ ।”
ଜିସୁ ରିଏର୍ କାଣାରିଙ୍ଗ୍ ସୁଡ଼ୁନି ସାକ୍ତି ସିତାନ୍
(ମାର୍କ ୧୦:୪୬-୫୨; ଲୁକ ୧୮:୩୫-୪୩)
29ଅର୍ଲେନ୍ ଜିସୁ ସିସୁରି ୱାଲେ ଜିରିହୋ ଗାଡ଼୍ ଡ଼ିସ୍ସି ସନିୱାଲେ ନାଣ୍ତଲୋକୁ ୱାନି ୱେନ୍କା ୱେନ୍କା ବୁଲାତାର୍ । 30ରାସ୍ତା ପାଡ଼ି ବାସ୍ତିମାନି ରିଏର୍ କାଣାର୍, ଜିସୁ ଆୟା ସାରି ୱାଜିନାନ୍ ଇଜି ୱେନ୍ଞ୍ଜି ନାଣ୍ତ ଆଉଲି ଆଜି କୁକ୍ତାର୍, “ଏ ପ୍ରବୁ, ଦାଉଦତି ମାରିନ୍ ! ମାଙ୍ଗିଁ ଦୟା କିଆ ।”
31ଲୋକ୍ ୱିଜେରେ ୱାରିଙ୍ଗ୍ ଆଦ୍ରିସ୍କିଜି ଆଲେଜ ମାନ୍ଡ୍ରେଙ୍ଗ୍ ଇର୍ହାର୍, ମାତର୍ ୱାର୍ ମାରି ନାଣ୍ତ ଆଉଲି ଆଜି ଇର୍ହାର୍, “ଏ ପ୍ରବୁ, ଦାଉଦତି ମାରିନ୍ ! ମାଙ୍ଗିଁ ଦୟା କିଆ ।”
32ଆବେନୁ ଜିସୁ ନିର୍ଆନ୍ନୋ ୱାରିଙ୍ଗ୍ କୁକ୍ତାନ୍ନୋ ୱେନ୍ବାତାନ୍, “ନାନ୍ ମିଙ୍ଗିଁ ଇନିକା କିନା ଇଜି ମିର୍ ବଦା କିଜିନିଦେର୍ ?”
33ୱାର୍ ଇର୍ହାର୍, “ପ୍ରବୁ ମାଙ୍ଗିଁ ସୁଡ଼ୁନି ସାକ୍ତି ସିଦା ।”
34ମାରି, ଜିସୁ ଦୟାଦାନ୍ ଦାନ୍ଦାଆଜି ୱାରି କାଣ୍କାଙ୍ଗ୍ ମୁଟ୍ତାନ୍, ମାରି ଆୟାଦାପ୍ରେ ୱାର୍ ସୁଡ଼ୁଦେଙ୍ଗ୍ ଆଟ୍ତାର୍ ମାରି ୱାନି ୱେନ୍କା ୱେନ୍କା ବୁଲାଦେଙ୍ଗ୍ ଆସ୍ତାର୍ ।
Currently Selected:
ମାତିଉ 20: NTKoo20
Highlight
Share
Copy
Want to have your highlights saved across all your devices? Sign up or sign in
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020
