ମାତିଉ 10
10
ବାର୍ଲୋକ୍ ସିସୁର୍
(ମାର୍କ ୩:୧୩-୧୯; ଲୁକ ୬:୧୨-୧୬)
1ଜିସୁ ୱାନି ବାରଲୋକ୍ ସିସୁରିଙ୍ଗ୍ କୁକ୍ସି ଦୁବେଙ୍ଗ୍ ଡ଼ିସିସ୍କିଦେଙ୍ଗ୍ ଇଜି ମାରି ୱିଜୁ ରକମ୍ତି ରଗ୍ କାସ୍ଟୁ ନେଗେନ୍ କିଦେଙ୍ଗ୍ ଇଜି ଅଦିକାର୍ ସିତାନ୍ । 2ଆୟା ବାର ଲୋକ୍ ପ୍ରେରିତ ସିସୁରି ଦର୍ ଆତାତ୍ ସିମୋନ ପିତର୍ ଦର୍ତାନ୍ ବା ୱେଙ୍ଗ୍ଁନାତ୍ ମାରି ୱାନି ତଡ଼ାନ୍ ଆନ୍ଦ୍ରିୟ; ଜେବଦଦି ରିଏର୍ ମାରିସିର୍ ଜାକୁବ ନି ଯୋହନ; 3ପିଲିପ୍, ବାର୍ତଲମି, ଥୋମା, ମାରି ସିସ୍ଟୁ ଲୋସ୍ନି ମାତିଉ, ଆଲପିଦି ମାରିସି ଜାକୁବ, ଥଦ୍ଦୀୟ; 4କିଣାନିୟ ସିମୋନ ଏନ୍ କି ଇସ୍ରାଏଲ୍ ଦେସ୍ତିଙ୍ଗ୍ ରକିୟା କିଦେଙ୍ଗ୍ ବଦା କିଜିମାର୍ହାନ୍ ମାରି ଜିସୁଙ୍ଗୁଁ ସାତ୍ରୁରି କିୟୁଦୁ ସର୍ପେ କିତିସିତି ଇସ୍କାରିୟୋତିୟ ଜିହୁଦା ।
ବାରଲୋକ୍ ସିସୁରିଙ୍ଗ୍ ସିତିମାର୍ରି ପାଣିଦିବଜୁ
(ମାର୍କ ୬:୭-୧୩; ଲୁକ ୯:୧-୬)
5ଜିସୁ ଇୟା ବାରଲୋକ୍ ସିସୁରିଙ୍ଗ୍ ପକ୍ନିୱାଲେ ଆଦେସ୍ ସିଜିଇର୍ହାନ୍, “ମିର୍ ଅଣଜିହୁଦିରି ରାଜିଦୁ ସଲ୍ମାଟ୍ । ମାରି ଆମା ସମିରୋଣ ଗାଡ଼୍ତୁ ବା ସଲ୍ମାଟ୍ । 6ମାତର୍ ମୁର୍ତିମାନି ମେଣ୍ତେଙ୍ଗାଁ ୱାଜା ଇସ୍ରାଏଲ୍ତି ଲୋକା ଲାକ୍ତୁ ସାନ୍ଡ୍ରୁ । 7ୱାରିମାନୁ ପ୍ରଚାର୍ କିଜି ଇନ୍ଡ୍ରୁ, ମୁସ୍କୁପୁର୍ ଇଗା ୱାତାତ୍ ! 8ରଗ୍ତୁ ମାନି ଲୋକାଙ୍ଗ୍ ନେଗେନ୍କିଦୁ, ସାତି ଲୋକାଙ୍ଗ୍ ଡ଼େସି ନିକ୍ତୁ, କୁସ୍ଟରୋଗ୍ତି ଲୋକାଙ୍ଗ୍ ନେଗେନ୍କିଦୁ, ଦୁବେଙ୍ଗ୍ ଡ଼ିସିସ୍ କିଦୁ । ଆମାକା ଆର୍ଏ ପୟ୍ତିମାନିଦେର୍, ଆକା ଆଇୱାରିଙ୍ଗ୍ ଆର୍ଏ ସିଦୁ । 9ଅର୍ସେ ବାଙ୍ଗାଁରାମ୍ ନି ୱେଣ୍ତି ବା ଡାବୁଙ୍ଗୁଁ ଇଡ୍ନି ମଣି ଅମାଟ୍, 10#୧ କରିନ୍ତିୟ ୯:୧୪; ୧ ତିମତି ୫:୧୮.ମାରି ଡ଼ଆନି ମଣି ଆସ୍ସି ବୁଲାମାଟ୍ । ନାଣ୍ତ ଆଙ୍ଗିଁଙ୍ଗ୍, ଜୁତେଙ୍ଗ୍ ମାରି ବାଡିଗା ବା ଅମାଟ୍ । ପାଣିକିନିକାର୍ ନିଜେଦି କୁଲି ଡାବୁଙ୍ଗ୍ଁ ପୟ୍ଦେଙ୍ଗ୍ ଜଗ୍ ମାନାତ୍ ।
11“ଉନ୍ଡ୍ରି ଗାଡ଼୍ ବା ନାର୍ତୁ ଇତି ୱେନ୍କା ଆବେ ଏନ୍ ମି ସେବାକିନାନ୍, ଆୟା ମାଟା ମିର୍ ପୟ୍ଦୁ, ଆଇମାନୁ ସନି ସାନ୍ଦି ତାମେ ଇଲ୍ତୁ ମାନ୍ଡ଼୍ରୁ । 12ଉନ୍ଡ୍ରି ଇନ୍ଡ୍ର ଡ଼ୁଗୁନି ୱାଲେ ଆବେମାନି ଲୋକାଙ୍ଗ୍ ମାଡ଼ିସ୍କିଜି ଇନ୍ଡ୍ରୁ, ମି ସାନ୍ତି ଆପିତ୍ । 13ଇଲ୍ତି ଲୋକୁ ଜଦି ମିଙ୍ଗିଁ ସେବାକିନାର୍, ୱାରି ଉଣ୍ତିଙ୍ଗ୍ ମାଡ଼ିସ୍ କିତିକା ସାନ୍ତି ଆନାତ୍ । ମାତର୍ ଜଦି ୱାର୍ ମିଙ୍ଗିଁ ସେବା କିଏର୍, ମି ମାଡ଼ିସ୍କିନିକା ଡ଼େପ୍ସ ଅତୁ । 14#ପ୍ରେରିତ ୧୩:୫୧.ଜଦି ଏମେ ଇନ୍ଡ୍ର ମାରି ଗାଡ଼୍ତୁ ମିଙ୍ଗିଁ ଲୋକୁ ମାନାଏର୍, ଆତିଙ୍ଗ୍ ୱାରିଙ୍ଗ୍ ଡ଼ିସ୍ତିଙ୍ଗ୍ ଇଜି ସିନାଦି ୱାଜା ପାଦାମ୍ତି ଦୁଡ଼ି ସାଡ଼୍ସି ସିଜି ଆୟା ବାଡି ଡ଼ିସ୍ସୋ ସିଦୁ । 15#ମାତିଉ ୧୧:୨୪.#ଲୁକ ୧୦:୪-୧୨.ନାନ୍ ମିଙ୍ଗିଁ ସତ୍ ଇଜିନା, ବିସାର୍ ଦିନ୍ତୁ ୱେରି ମାଣ୍କୁ ସଦମ୍ ଗମୋରାଦି ଲୋକା ଉଣ୍ତିଙ୍ଗ୍ ମାପୁରୁ ନାଣ୍ତ ଦୟା ତର୍ନାନ୍ ।
ୱାନି ତାଡ଼ନା
(ମାର୍କ ୧୩:୯-୧୩; ଲୁକ ୨୧:୧୨-୧୭)
16 #
ଲୁକ ୧୦:୩. “ୱେନ୍ଡ୍ରୁ ! ନୋରେସ୍କା ଲାକ୍ତୁ ମେଣ୍ତେଙ୍ଗାଁ ୱାଜା ନାନ୍ ମିଙ୍ଗିଁ ପୋକ୍ସିନା, ମାରି ସାରାସ୍ତି ୱାଜା ଜାଗାର୍ତା ମାରି ପାର୍ୱାଦି ୱାଜା ସାନ୍ତି ଆଦୁ । 17#ମାର୍କ ୧୩:୯-୧୧; ଲୁକ ୧୨:୧୧,୧୨; ୨୧:୧୨-୧୫.ଜାଗାର୍ତା ମାନ୍ଡ଼୍ରୁ, ଇରିଙ୍ଗ୍ ଲୋକୁ ମିଙ୍ଗିଁ ତର୍ସି ବିସାର୍ କିନି ସଭାଦୁ ଅନାର୍ର ସର୍ପେ କିନାର୍ । ପାର୍ତନାକିନି ଇଲ୍କାଙ୍ଗ୍ ୱାର୍ ମିଙ୍ଗିଁ କର୍ଡା ଡାକ୍ନାର୍ । 18ନା ଉଣ୍ତିଙ୍ଗ୍ ମିର୍ ରାଜା ନି ସାସନ୍କିନିୱାରି ଆଗ୍ଡ଼ି ତାଆୟ୍ଆଜି ବିସାର୍ଆନିଦେର୍ । ଇୟାଉଣ୍ତିଙ୍ଗ୍ ୱାରିଙ୍ଗ୍ ନି ଅଣଜିହୁଦି ଲୋକାଙ୍ଗ୍ ନେଗିକାବୁର୍ ସାକି ସିଦେଙ୍ଗ୍ ଇଜି ସାରି ପୟ୍ନିଦେର୍ । 19ମି ବିସାର୍ ଆନିୱାଲେ ଇନିକା ଇନିଦେର୍, ମାରି ଏଣ୍ତେସ୍ ଇନିଦେର୍, ଆୟା ବିସୟ୍ତାନ୍ ସିନ୍ତା କିମାଟ୍ । ଟିକ୍ ଆୟା ସମୟ୍ତୁ ଆକା ମିଙ୍ଗିଁ ୱେର୍ଆଇଆଜି ସିଆନାତ୍ । 20ଇରିଙ୍ଗ୍ ମିଙ୍ଗିଁ ନିଜେ ଇନିକା ଇନ୍ଡ୍ରେଙ୍ଗ୍ ଆଏତ୍ । ମି ବୁବା ମାପୁରୁଦି ପବିତ୍ର ଆତ୍ମା ମି ୱେୟୁ ସିଜି ମାଟା ଇନାନ୍ ।
21 #
ମାର୍କ ୧୩:୧୨; ଲୁକ ୨୧:୧୬. “ଆୟା ସମୟତୁ ଲୋକୁ ତଡ଼ାନ୍ ତଡ଼ାନ୍ତିଙ୍ଗ୍ ମାରି ବୁବା ମାରିନ୍ତିଙ୍ଗ୍ ସାପିସ୍ତେଙ୍ଗ୍ ଇଜି ସର୍ପେ କିଜି ସିନାର୍ । ବୁବାସି ବା ନିଜେଦି କଡ଼କକ୍ରାରିଙ୍ଗ୍ ଉଣ୍ତିଙ୍ଗ୍ ଆୟାୱାଜା କିନାନ୍ । କଡ଼କକ୍ରା ବୁବାସି ଆଇସି ବିରୁଦ୍ତାନ୍ ନିଙ୍ଗ୍ନାରୋ ୱାରିଙ୍ଗ୍ ସାୟାମାର୍ଗା ଡାକ୍ନାର୍ । 22#ମାତିଉ ୨୪:୯; ମାର୍କ ୧୩:୧୩; ଲୁକ ୨୧:୧୭; ମାତିଉ ୨୪:୧୩; ମାର୍କ ୧୩:୧୩.ନା ଉଣ୍ତିଙ୍ଗ୍ ୱିଜେରେ ମିଙ୍ଗିଁ କାଡ଼୍ନାର୍; ମାତର୍ ଏନ୍ ସାରାସାରି ସାନ୍ଦି ବିସ୍ବାସ୍ତୁ ତିର୍ଆଜିତେବାନାନ୍, ୱାନ୍ ରକିୟା ପୟ୍ନାନ୍ । 23ଉନ୍ଡ୍ରି ଗାଡ଼୍ତୁ ମିର୍ କାସ୍ଟୁ ପୟ୍ତିଙ୍ଗ୍ ଆଇ ଗାଡ଼୍ତୁ ଉର୍କ୍ତୁ । ନାନ୍ ମିଙ୍ଗିଁ ସତ୍ତାନ୍ ଇଜିନା, ମିର୍ ଇସ୍ରାଏଲ୍ତି ୱିଜୁ ଗାଡ଼୍କାଙ୍ଗ୍ ପାଣି ସେସ୍କିନି ଆଗ୍ଡ଼ି ମନୁସ୍ୟପୁତ୍ର ଡ଼େସି ୱାନାମାନାନ୍ ।
24 #
ଲୁକ ୬:୪୦;
ଜୋହନ ୧୩:୧୬; ୧୫:୨୦. “ଏମେ ସିସୁ ୱାନି ଗୁରୁମାଣାନ୍ ସିସୁ ପେରିକାନ୍ ଆଏନ୍, ମାଲିକ୍ତି ମାଣାନ୍ ସାକର୍ ପେରିକାନ୍ ସିଲେ । 25#ମାତିଉ ୯:୩୪; ୧୨:୨୪; ମାର୍କ ୩:୨୨; ଲୁକ ୧୧:୧୫.ସିସୁ ଗୁରୁ ୱାଜା ମାରି ସାକର୍ ମାଲିକ୍ତି ୱାଜା ଆଦେଙ୍ଗ୍ ଆଟ୍ତିଙ୍ଗ୍ ନାସଦୁନେ ୱେଡ଼ିକା ଆନିକାମାନାତ୍ । ଉନ୍ଡ୍ରି ଇଲ୍ତି ମେମାରିଙ୍ଗ୍ ଜଦି ଲୋକୁ ବାଲ୍ଜିବୁଲ୍ ଇଜି କୁକ୍ନାର୍, ଇଲ୍ତି ଆଇୱାରିଙ୍ଗ୍ ମାରି ଏସ ତାଗ୍ଇ ଦର୍ ସିଏର୍ ?
ଏଙ୍ଗ୍ ତିଲାନିକା
(ଲୁକ ୧୨:୨-୭)
26 #
ମାର୍କ ୪:୨୨; ଲୁକ ୮:୧୭. “ଆୟାଉଣ୍ତିଙ୍ଗ୍ ଲୋକାଙ୍ଗ୍ ତିଲାମାଟ୍ । ଆମାକା ଇଲେଇ ପିଡ଼ିଗାଇ ଆତାମାନାତ୍, ଆକା ତରାଇଆନାତ୍ ମାରି ୱିଜୁ ମାର୍ଗିତି ମାଟା ୱେଙ୍ଗ୍ଁନାତ୍ । 27ନାନ୍ ମିଙ୍ଗିଁ ଆମାକା ସିକାଟି ସମୟ୍ତୁ ଇଜିନା, ଆକା ତାଲାୱେଡ଼ାଦି ସମୟତୁ ୱେକ୍ତୁ ମାରି ଆମାକା ମାର୍ଗିଜି ୱେର୍ଇମାନିଦେର୍, ଆକା ଇଲୁ ସାତ୍ ମୁସ୍କୁରାନ୍ ପ୍ରଚାର୍ କିଦୁ । 28ଏମେକାର୍ କେବଲ୍ ମି ମେନ୍ଦଲ୍ତିଙ୍ଗ୍ ନାସ୍ଟୁକିନାନ୍, ମାତର୍ ମି ଆତ୍ମାଦିଙ୍ଗ୍ ଇନି କେତି କିଦେଙ୍ଗ୍ ଆଟ୍ଏନ୍, ୱାରିଙ୍ଗ୍ ତିଲାମାଟ୍ । ମାତର୍ ଏମେ ମାପୁରୁ ମି ମେନ୍ଧଲ୍ ନି ଆତ୍ମା ରୁଣ୍ତିୱାନିକାଙ୍ଗ୍ ନରକଦୁ ଦଂସ କିଦେଙ୍ଗ୍ ଆଟ୍ନାନ୍, ୱାନିଙ୍ଗ୍ ତିଲାଦୁ । 29ଡାବୁଙ୍ଗୁଁ ସିଜି ରୁଣ୍ତି ସାଡ଼ାପୋଟିଙ୍ଗ୍ କଣ୍ତେଙ୍ଗ୍ ଆଟ୍ନିଦେର୍, ମାତର୍ ମି ବୁବାଦି ସାରି ପୁଟ୍ଏତିଙ୍ଗ୍ ଉନ୍ଡ୍ରି ସାଡ଼ା ପଟି ଆଡ୍ଗି ଆର୍ଏତ୍ । 30ମାରି ମି ତାଲାଦି କୁକୁଟି ବା ୱିଜୁ ଲେକିସ୍ କିଆୟ୍ଆତାମାନାତ୍ । 31ତିଲାମାଟ୍, ନାଣ୍ତ ସାଡ଼ାପୋଟିଙ୍ଗାଁ ମାଣ୍କୁ ମି ଦାରା ନାଣ୍ତ ।
କ୍ରିସ୍ତଙ୍ଗ୍ ମାନାନିକା ନି ମାନାଇକା
(ଲୁକ ୧୨:୮-୯)
32“ଏନ୍ଆପିନ୍ ଲୋକା ଆଗିଡ଼ି ନାଙ୍ଗିଁ ମାନାନାର୍, ନାନ୍ ବା ମୁସ୍କୁପୁର୍ତି ବୁବା ଆଗ୍ଡ଼ି ୱାରିଙ୍ଗ୍ ନାଦି ଇଜି ନାନ୍ ମାନାନା । 33#୨ ତିମତି ୨:୧୨.ମାତର୍ ଏନ୍ ଆତ୍ରେ ନାଙ୍ଗିଁ ମାନାଏନ୍, ୱାନିଙ୍ଗ୍ ନାନ୍ ବା ନା ମୁସ୍କୁପୁର୍ତି ବୁବା ଆଗ୍ଡ଼ି ମାନାଏ ।
ସାନ୍ତି ସିଲେ, ମାତର୍ କାଣ୍ତା
(ଲୁକ ୧୨:୫୧-୫୩; ୧୪:୨୬-୨୭)
34“ନାନ୍ ଦୁନିଆଦୁ ସାନ୍ତି ସିଦେଙ୍ଗ୍ ୱାତାମାନା ଇଜି ଅଡ଼୍ବିମାଟ୍ । ସିଲେ, ନାନ୍ ସାନ୍ତି ତାତେଙ୍ଗ୍ ରେଏ, ମାତର୍ କୁଡ଼ାମ୍ ଆସ୍ସି ୱାତାମାନା । 35ଇରିଙ୍ଗ୍ ନାନ୍ ମାରିସି ବିରଦ୍ତାନ୍ ବୁବାସି, ବୁବାସି ବିରଦ୍ତାନ୍ ମାରିସି ମାରି ଗାଡ଼୍ସି ବିରୁଦ୍ତାନ୍ ଆଇସି, ଆଇସି ବିରଦ୍ତାନ୍ ଗାଡ଼୍ସି, ମାରି ମିମ୍ସି ୱାଲେ କଡ଼େସିଦି ବିରୁଦ୍ ଗଟେକିଦେଙ୍ଗ୍ ୱାତାମାନା । 36ନିଜେଦି ଇଲ୍ତି ଲୋକୁ ନିଜେଦି ସାତ୍ରୁଆନାର୍ ।
37“ଏନ୍ ବୁବାସି ନି ଆଇସିଙ୍ଗ୍ ନା ମାଣ୍କୁ ନାଣ୍ତ ଜିବନ୍ନୋନାନ୍, ୱାନ୍ ନା ସିସୁ ଆଦେଙ୍ଗ୍ ଜଗ୍ ସିଲେନ୍, ମାରି ଏନ୍ କଡ଼ଦିଙ୍ଗ୍ ନି ଆଇଲିଦିଙ୍ଗ୍ ନା ମାଣ୍କୁ ନାଣ୍ତ ଜିବନ୍ନୋନାନ୍, ୱାନ୍ ନା ସିସୁ ଆଦେଙ୍ଗ୍ ଜଗ୍ ସିଲେନ୍ । 38#ମାତିଉ ୧୬:୨୪; ମାର୍କ ୮:୩୪; ଲୁକ ୯:୨୩.ଏନ୍ ନା ଉଣ୍ତିଙ୍ଗ୍ ଦୁକ୍ ନି ସାନିକା ବଦା କିଜିନା ୱେନ୍କା ରେଏନ୍, ୱାନ୍ ନା ସିସୁ ଆଦେଙ୍ଗ୍ ଜଗ୍ ସିଲେନ୍ । 39#ମାତିଉ ୧୬:୨୫; ମାର୍କ ୮:୩୫; ଲୁକ ୯:୨୪; ୧୭:୩୩; ୧୨:୨୫.ଏନ୍ ନିଜେଦି ଜିବନ୍ତିଙ୍ଗ୍ ରକିୟା କିଦେଙ୍ଗ୍ ବଦାକିନାନ୍, ୱାନ୍ ଆକା ଆରାକିନାନ୍, ମାତର୍ ଏନ୍ ନା ଉଣ୍ତିଙ୍ଗ୍ ନିଜେଦି ଜିବନ୍ ସିନାନ୍, ୱାନ୍ ସତେଦାନ୍ ଆକା ରକିୟା କିନାନ୍ ।
ପୁରସ୍କାର୍
(ମାର୍କ ୯:୪୧)
40 #
ଲୁକ ୧୦:୧୬; ଜୋହନ ୧୩:୨୦;
ମାର୍କ ୯:୩୭; ଲୁକ ୯:୪୮. “ଏନ୍ ମିଙ୍ଗିଁ ମାନାନାନ୍, ୱାନ୍ ନାଙ୍ଗିଁ ମାନାନାନ୍, ମାରି ନାଙ୍ଗିଁ ଏନ୍ ମାନାନାନ୍, ୱାନ୍ ନାନ୍ ପକ୍ତିୱାନିଙ୍ଗ୍ ମାନାନାନ୍ । 41ଏନ୍ ବାବବାଦିରିଙ୍ଗ୍ ମାପୁରୁଦି କାବୁର୍ ସିନିକାନ୍ ଇଜି ମାନାନାନ୍, ୱାନ୍ ଆୟା ବାବବାଦିରି ପୁରସ୍କାର୍ ପୟ୍ନାନ୍ । ମାରି ଏନ୍ ଦାର୍ମୁ ଲୋକାଙ୍ଗ୍ ଦାର୍ମୁଦିକାନ୍ ଇଜି ମାନାନାନ୍, ୱାନ୍ ଦାର୍ମୁ ଲୋକ୍ତି ପୁରସ୍କାର୍ ପୟ୍ନାନ୍ । 42ମାରି ଏନ୍ ଇୟା ଇସ୍ରି ଲୋକ୍ ମାଣ୍କୁ ଅରେନ୍ୱାନିଙ୍ଗ୍ ନା ସିସୁ ଇଜି କେବଲ୍ ଗିନା ଏର୍ ଉଣ୍ତେଙ୍ଗ୍ ସିନାନ୍, ନାନ୍ ମିଙ୍ଗିଁ ସତ୍ ଇଜିନା, ଆୟାଉଣ୍ତିଙ୍ଗ୍ ୱାନ୍ ନା ସିସୁ, ସତେନେ ପୁରସ୍କାର୍ ପୟ୍ନାନ୍ ।”
Currently Selected:
ମାତିଉ 10: NTKoo20
Highlight
Share
Copy
Want to have your highlights saved across all your devices? Sign up or sign in
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020
