ଲୁକ 21
21
ରାଣ୍ତି ଆଇମା ଦାନ୍ ସିନିକା
(ମାର୍କ ୧୨:୪୧-୪୪)
1ଇୟା ୱେନ୍କା ଜିସୁ ସାରିବେଡ଼୍ତି ସୁଡ଼୍ଜି ଏସୋ ମାଜନ୍ ଲୋକୁ ମନ୍ଦିର୍ତି ଡାବୁଙ୍ଗୁଁ ସିନି ପେଡ଼ାଦୁ ମାପୁରୁଦି ଉଣ୍ତିଙ୍ଗ୍ ଦାନ୍ ସିନିକା ସୁଡ଼ୁତାନ୍ । 2ମାରି, ୱାନ୍ ଅରେତ୍ କାକୁର୍ତି ରାଣ୍ତି ଆଇମା ଆୟା ପେଡ଼ାଦୁ ରୁନ୍ ଟାକେଙ୍ଗ୍ଁ ସିନିକା ସୁଡ଼୍ଜି ୱେର୍ତାର୍, 3ନାନ୍ ମିଙ୍ଗିଁ ସତ୍ ଇଜିନା, ଇୟା କାକୁର୍ତି ରାଣ୍ତି ଆଇମା ୱିଜେରିଙ୍ଗ୍ ନାଣ୍ତ ସିତାମାନାତ୍ । 4ଇରିଙ୍ଗ୍ ଇକାର୍ ୱିଜେରେ ପେଡ଼ାଦୁ ନିଜେ ନିଜେଦି ଆମାକା ୱାରିଙ୍ଗ୍ ଦର୍କାର୍ ସିଲେତ୍ ଆୟା ଡାବୁଙ୍ଗୁଁ ଦାନ୍ ସିତାମାନାର୍, ମାତର୍ ଇକାତ୍ ନିଜେ ଜିଦେଙ୍ଗ୍ ଆମାକା ୱିଜୁ ତାନେମାନୁ ମାର୍ଆତ୍, ଆକା ୱିଜୁ ସିତାତ୍ ।
ମନ୍ଦିର୍ତି ଦଂସ ବିସୟ୍ତାନ୍ ଇର୍ହାନ୍
(ମାତିଉ ୨୪:୧-୨; ମାର୍କ ୧୩:୧-୨)
5ମାରି, ଏସୋ ସିସୁର୍ ମନ୍ଦିର୍ ବିସୟ୍ତାନ୍ ୱାର୍ଗି ସାଜିମାର୍ଆର୍ । ୱାର୍ ଇଜିମାର୍ଆର୍, ଇକା ଉଣ୍ତ୍ରିନେଗି ମନ୍ଦିର୍ । ଇକା ନେଗି କାଲ୍କାଣ୍ ତିଆର୍ ଆତାମାନାତ୍ । ସୁଡ଼ୁଦୁ ମାପୁରୁଙ୍ଗୁଁ ସିତିମାନି ନେଗି ନେଗି ବିସୟ୍ ସିତାମାନାର୍ । 6ଜିସୁ ଇର୍ଆନ୍, “ମିର୍ ଆମାୱିଜୁ ଇବେ ସୁଡ଼ୁଜିନିଦେର୍, ଦିନ୍ୱାନାତ୍, ଏସ୍ତିୱାଲେ ଉଣ୍ତ୍ରି କାଲୁ ମାରି ଉନ୍ଡ୍ରି କାଲୁ ମୁସ୍କୁ ତେବାଏତ୍ ୱିଜୁ କାଲ୍କୁ ଗୁଣ୍ତ୍ ଗୁଣ୍ତା ଆନେ ।”
ଦୁକ୍ ନି ନିଦା
(ମାତିଉ ୨୪:୩-୧୪; ମାର୍କ ୧୩:୩-୧୩)
7ଆବେଟ୍ ସିସୁର୍ ଜିସୁଙ୍ଗୁଁ ୱେନ୍ବାତାର୍, “ଏ ଗୁରୁ, ଆରିଙ୍ଗ୍ ଇୟାୱିଜୁ ଏସାଙ୍ଗ୍ ଗଟାନାତ୍ ? ମାରି, ଏମେ ଦିନ୍ତୁ ଇୟାୱିଜୁ ଗଟ୍ନା ଇଗାୱାନାତ୍, ଆୟାଦିନ୍ତି ସିନା ଇନିକା ?”
8ଆବେଟ୍ ଜିସୁ ୱାରିଙ୍ଗ୍ ଇର୍ଆନ୍, “ଜାଗାର୍ତା, ମିର୍ ଏଣ୍ତେସ୍ ବାୟା ଆମାଟ୍; ଇରିଙ୍ଗ୍ ଏସୋ ଲୋକୁ ନା ଦର୍ତାନ୍ ୱାଜି, ନାନ୍ ଜିସୁ ମାରି ଦିନ୍ ଇଗା ୱାତାତ୍ ଇଜି ଇନାର୍; ୱାରି ୱେନ୍କା ସଲ୍ମାଟ୍ । 9ମାତର୍ ମିର୍ ଏସ୍ତିୱାଲେ ଜୁଦ୍ ମାରି ଲୋକୁ ଡାକ୍ସିସାନି ଆଉଲି ୱେନିଦେର୍, ନାସ୍ତିୱାଲେ ତିଲାମାଟ୍; ଇରିଙ୍ଗ୍ ଇୟାୱିଜୁ ସତେନେ ଆଗ୍ଡ଼ି ଗଟାନାତ୍, ମାତର୍ ଆୟାଦାପ୍ରେ ଜୁଗ୍ ସେସ୍ ଆଏଦେ ।”
10ଆବେଟ୍ ୱାନ୍ ୱାରିଙ୍ଗ୍ ଇର୍ଆନ୍, “ଜାତି ବିରଦ୍ତାନ୍ ଜାତି ଲୋକା ଲୋଇ ଜୁଦ୍ କିନାର୍ ମାରି ଦେସ୍ ବିରଦ୍ତାନ୍ ଦେସ୍ ଲୋଇ ଜୁଦ୍ କିନାର୍, 11ମାରି ନାଣ୍ତ ବୁମିକମ୍ପ ଆନାତ୍ ମାରି ବାଡି ବାଡିଆଙ୍ଗାଁ ମର୍ଡି ଆନାତ୍ ମାରି ଲୋକାଙ୍ଗ୍ ଉଣିକା ପୁଟ୍ଏତ୍, ମାରି ବାଦଡ଼୍ତୁ ବୟ୍ଙ୍କାର୍ ତର୍ନାତ୍ ମାରି ପେରି ପେରି ସିନେଙ୍ଗ୍ ତରାନେ । 12ମାତର୍ ଇୟାୱିଜୁ ଗଟାନି ଆଗ୍ଡ଼ି ଲୋକୁ ମିଙ୍ଗିଁ ଆସ୍ନାର୍ ମାରି ପାର୍ତନା ଇଲୁଦୁ ମାରି ଜଇଲ୍ତୁ ମିଙ୍ଗିଁ ପୋକ୍ସି କାସ୍ଟୁ ସିନାର୍, ମାରି ନା ଦରତି ଉଣ୍ତିଙ୍ଗ୍ ମିଙ୍ଗିଁ ରାଜା ନି ସାସନ୍କିନି ଲୋକା ଆଗ୍ଡ଼ି ଅନାର୍; 13ମାତର୍ ଇକା ମିଙ୍ଗିଁ ନା ବିସୟ୍ତାନ୍ ଲୋକାଙ୍ଗ୍ ନେଗିକାବୁର୍ ସାକି ସିଦେଙ୍ଗ୍ ଇଜି ସାରି ପୟ୍ନିଦେର୍ । 14#ଲୁକ ୧୨:୧୧,୧୨.ମାରି ନିଜେଦି ତରିଟାନ୍ ଇନିକା ଇନ୍ଡ୍ରେଙ୍ଗ୍ ଆନାତ୍, ଆୟା ବିସୟ୍ତାନ୍ ଆଗ୍ଡ଼ିରାନ୍ ସିନ୍ତା କିଇ ନିଜେ ନିଜେଦି ମୋନ୍ତୁ ତିର୍ କିଦୁ । 15ଇରିଙ୍ଗ୍ ନାନ୍ ମିଙ୍ଗିଁ ଇୟାୱାଜା ମାଟା ନି ବୁଦି ସିନା ଜେ, ମି ୱିଜୁ ସାତ୍ରୁ ଲୋକୁ ଆବେ ଆଙ୍ଗ୍ଦେଙ୍ଗ୍ ଆଟ୍ଏର୍ । 16ମାତର୍ ମିଙ୍ଗିଁ ମି ବୁବାୟାୟା, ତଡ଼ାନ୍, ନିଜେଦି ଲୋକୁ ମାରି ସାମ୍ନ୍ଦିବନ୍ଦୁର୍ ସାତ୍ରୁରି କିୟୁଦୁ ସର୍ପେ କିନାସିନାର୍, ମାରି ମି ଲୋଇ ଲୋକୁ ଏଙ୍ଗ୍ ଏଙ୍ଗ୍ କାତ୍ନାର୍, 17ମାରି ନାବାନ୍ ମିର୍ ବିସ୍ବାସ୍ କିତିମାନି ଉଣ୍ତିଙ୍ଗ୍ ଲୋକୁ କାଡ଼୍ନାର୍ । 18ମାତର୍ ମି ତାଲାଦି କୁକୁଟି ବା ନାସ୍ଟୁ ଆଏତ୍ । 19ମିର୍ ସାସ୍ତାନ୍ ତେବାତିଙ୍ଗ୍ ନିଜେ ନିଜେଦିଙ୍ଗ୍ ରକିୟା କିଦେଙ୍ଗ୍ ଆଟ୍ନିଦେର୍ ।”
ଜିରୁସାଲାମ୍ ଦଂସ ଆନି ମାଟା ଇର୍ଆନ୍
(ମାତିଉ ୨୪:୧୫-୨୧; ମାର୍କ ୧୩:୧୪-୧୯)
20ମାତର୍ ମିର୍ ଏସ୍ତିୱାଲେ ଜିରୁସାଲାମ୍ତିଙ୍ଗ୍ ସନ୍ୟର୍ ସାରିବେଡ଼୍ତି କାପ୍କିନିମାନିକା ସୁଣିଦେର୍, ଆୟାୱାଲେ ଆକା ୱିର୍ଜି ସନି ଦିନ୍ ଜେ ଇଗା ୱାତାତ୍, ଇକା ମିର୍ ନେସ୍ତୁ । 21ନାସ୍ତିୱାଲେ ଆମାଲୋକ୍ ୱିଜେରେ ଜିହୁଦା ଗାଡ଼୍ତୁ ମାନାର୍, ୱାର୍ ଗରନ୍ ମୁସ୍କୁ ଉରୁକ୍ସି ସଲିର୍; ମାରି, ଏର୍ ଗାଡ଼୍କାଙ୍ଗ୍ ତେବାନାର୍, ଏଣ୍ତେସ୍ବା ୱାର୍ ଗାଡ଼୍ ଡ଼ିସ୍ସି ସଲିର୍; ମାରି, ଏର୍ ଇସ୍ରିନାର୍କାଙ୍ଗ୍ ତେବାନାର୍, ଏଣ୍ତେସ୍ବା ୱାର୍ ଗାଡ଼୍ତୁ ଡ଼ୁଗ୍ମାକିର୍; 22ଇରିଙ୍ଗ୍ ରାସାତିମାନି ବିସୟୱିଜୁ ପୁରା ଆନି ଉଣ୍ତିଙ୍ଗ୍ ଆକା ୱିଜୁ ଦଣ୍ତତି ଦିନ୍ ଆନାତ୍ । 23ଆୟା ସମୟତୁ ପଟାଦୁମାନି ଆଇମାଲୋକ୍ ମାରି ଇସ୍ରି କଡ଼ରିଙ୍ଗ୍ ଆସ୍ସି ପାଲ୍ ଉଟ୍ପିସ୍କିଜିମାନି ଆଇସିକା ଅବସ୍ତା ଏସ ତାଗ୍ଇକା ଆନାତ୍, ୱାକ୍ ନାଣ୍ତ ଦୁଃକ୍ ପୟ୍ନେ ! ଇରିଙ୍ଗ୍ ଦେସ୍ତୁ ନାଣ୍ତ ଦୁଃକ୍କାସ୍ଟୁ ୱାନାତ୍ ମାରି ମାପୁରୁଦି ଦଣ୍ଡ୍ ଇୟା ଜାତି ମୁସ୍କୁ ୱାନାତ୍ । 24ମାରି ୱାର୍ କୁଡ଼ାମ୍କାଣ୍ ସାନାର୍ ମାରି ତର୍ଆୟ୍ ଆଜି ଆଇଜାତିଦି ଲୋଇ ପୋକ୍ନାର୍, ମାରି ଅଣଜିହୁଦି ଲୋକା ଦିନ୍ ୱିଜ୍ଇ ସାନ୍ଦି ଜିରୁସାଲାମ୍ ୱାରି କାଲ୍କୁ ଆଡ୍ଗି ତେବାନାତ୍ ।
ମନୁସ୍ୟପୁତ୍ର ମାରିଡ଼େସି ୱାନିକା
(ମାତିଉ ୨୪:୨୯-୩୧; ମାର୍କ ୧୩:୨୪-୨୭)
25 #
ପ୍ରକାଶିତ ୬:୧୨,୧୩. “ମାରି ୱେଡ଼ା, ଲେଞ୍ଜୁ ନି ସୁକେଙ୍ଗାଁଙ୍ଗ୍ ସିନେଙ୍ଗ୍ ତରାନେ, ମାରି ଦୁନିଆଦୁ ଜାତିଦି ଲୋକା ଲୋଇ ବାଦା ୱାନାତ୍; ସାମ୍ଦୁରୁ ମାରି ଏରୁଗାତିସ୍ୱାନି ଆଉଲିଦିଙ୍ଗ୍ ୱାର୍ ବାୟାବେମ୍ରି ଆନାର୍ । 26ମାରି ଦୁନିଆଦି ମୁସ୍କୁ ୱାଜିମାନି ଗଟନା ୱିଜୁଦିଙ୍ଗ୍ କାପ୍କିଜି ଲୋକୁ ୱିଜେରେ ମୁର୍ସା ଆନାର୍, ଇରିଙ୍ଗ୍ ବାଦଡ଼୍ତି ସାକ୍ତିୱିଜୁ ଦୁଙ୍ଗ୍ନେ ସନେ । 27#ପ୍ରକାଶିତ ୧:୭.ନାସ୍ତିୱାଲେ ଲୋକୁ ମନୁସ୍ୟପୁତ୍ରଦିଙ୍ଗ୍ ନାଣ୍ତ ସାକ୍ତିଦାନ୍ ମାରି ନାଣ୍ତ ମହିମାଦି ୱାଲେ ବାଦଡ଼୍ତାନ୍ ୱାନିକା ସୁଣାର୍ । 28ମାତର୍ ଇୟାୱିଜୁ ଗଟେନେଙ୍ଗ୍ ଆରାମ୍ଆତିଙ୍ଗ୍ ମିର୍ ମୁସ୍କୁ ସୁଡ଼ୁଦୁ ମାରି ତାଲା ପେର୍ଦୁ, ଏଣ୍ତେସ୍କି ମି ରକିୟା ପଇନିକା ଲାକ୍ତୁ ଇଗା ୱାତାତ୍ନି ।”
ତଗା ମାରାନ୍ତାନ୍ ଅଜାନିକା
(ମାତିଉ ୨୪:୩୨-୩୫; ମାର୍କ ୧୩:୨୮-୩୧)
29ମାରି, ଜିସୁ ୱାରିଙ୍ଗ୍ ଉଣ୍ତ୍ରି କାତା ଇର୍ଆନ୍, “ତଗା ମାରାନ୍, ମାରି ଆଇ ୱିଜୁ ମାରାକା ବିସୟ୍ତାନ୍ ଅଡ଼୍ବିଦୁ । 30ଏସ୍ତିୱାଲେ ଆୟା ମାରାକା ଆକ୍ ପୁନାକାୟ୍ନେ, ନାସ୍ତିୱାଲେ ମିର୍ ଆକା ସୁଡ଼ୁଜି ଜେଟାପ୍ ଲେଞ୍ଜୁ ଇଗା ୱାତାତ୍ନି ଇଜି ନିଜେନିଜେ ନେସ୍ନିଦେର୍ । 31ଆୟାୱାଜା ମିର୍ ବା ଇୟାୱିଜୁ ଗଟନା ସୁଡ଼ୁତିଙ୍ଗ୍ ମାପୁରୁଦି ରାଜି ଜେ ଇଗା ୱାତାତ୍, ଇକା ନେସ୍ତୁ ।
32“ନାନ୍ ମିଙ୍ଗିଁ ସତ୍ ଇଜିନା, ଇୟାୱିଜୁ ଗଟେଆଇ ସାନ୍ଦି ଇୟା ଦିନ୍ତି ଲୋକୁ ଏଣ୍ତେସ୍ ୱିଜ୍ଏର୍ । 33ବାଦଡ଼୍ ନି ଦୁନିଆ ୱିଜ୍ନାତ୍, ମାତର୍ ନା ବାକ୍ୟୱିଜୁ ଏସାଙ୍ଗ୍ ବା ୱିଜ୍ଏତ୍ ।
ଜାଗାର୍ତା ମାନ୍ଡ଼୍ରୁ
34“ମାତର୍ ମିର୍ ନିଜେ ନିଜେଦି ବିସୟ୍ତାନ୍ ଜାଗାର୍ତା ମାଡ୍ରୁ, ଏସ୍ତିୱାଲେ ମି ଜିବନ୍ ନାଣ୍ତ ୱେଡ଼ିକାଦୁ ପୁରା ତେବାନାତ୍ ମାରି କାଡ଼ୁଉଣ୍ଜିସସ୍ତେଙ୍ଗ୍, ମାରି ଜିନି ବିସୟ୍ତାନ୍ ସିନ୍ତାଦାନ୍ ଦୁଃକ୍ ୱାନାତ୍, ମାରି ଆୟାନାଣ୍ତିଙ୍ଗ୍ ଦାପ୍ରେ ମି ମୁସ୍କୁ ୱାନା ଆର୍ନାତ୍; 35ଇରିଙ୍ଗ୍ ଆକା ଜାଡ଼ିଦି ୱାଜା ୱିଜୁ ଦେସ୍ଦୁନିଆଦି ୱିଜୁ ଲୋକା ମୁସ୍କୁ ୱାନାତ୍ । 36ମାତର୍ ମିର୍ ଏଣ୍ତେସ୍କି ଇୟାୱିଜୁ ୱାଜିନିଆଗ୍ଡ଼ି ଗଟ୍ନାଦାନ୍ ରକିୟା ପୟ୍ଦେଙ୍ଗ୍ ମାରି ମନୁସ୍ୟପୁତ୍ରଦି ଲାକ୍ତୁ ନିନ୍ଡ୍ରେଙ୍ଗ୍ ଡାଟ୍ ଆଦୁ, ଇୟାଉଣ୍ତିଙ୍ଗ୍ ଦିନାମି ପାର୍ତନା କିଜି ଜାଗାର୍ତା ମାଡ୍ରୁ ।”
37 #
ଲୁକ ୧୯:୪୭. ଜିସୁ ୱିଜୁଦିନ୍ ମନ୍ଦିର୍ତୁ ସିକିୟା ସିଜିମାର୍ହାନ୍, ମାରି ୱିଜୁ ନାଡ଼ା ସହସି ସଲ୍ସି ଜିତ ଗରନ୍ତୁ ତେବାଜି ମାର୍ହାନ୍ । 38ମାରି, ୱିଜେରେ ଲୋକୁ ମନ୍ଦିର୍ତୁ ୱାନି ସିକିୟା ୱେନ୍ଡ୍ରେଙ୍ଗ୍ ଇଜି ସାଲ୍ଦି ୱାନି ଲାକ୍ତୁ ୱାଜି ମାର୍ହାର୍ ।
Currently Selected:
ଲୁକ 21: NTKoo20
Highlight
Share
Copy
Want to have your highlights saved across all your devices? Sign up or sign in
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020
