ଜୋହନ 12
12
ଜିସୁ ବେତନିଆଦୁ ଅବିସେକ୍ ଆତାନ୍
(ମାତିଉ ୨୬:୬-୧୩; ମାର୍କ ୧୪:୩-୯)
1ଇୟା ୱେନ୍କା ଜିସୁ ନିସ୍ତାର୍ ପଣ୍ତୟ୍ତି ସଅ ଦିନ୍ ଆଗ୍ଡ଼ି ବେତନିୟାଦୁ ସର୍ହାନ୍; ଏମେ ଲାଜାର୍ତିଙ୍ଗ୍ ୱାନ୍ ସାତିମାଣ୍କୁ ନିକ୍ତା ମାର୍ହାନ୍, ଆବେନୁ ୱାନି ଇଲୁ ମାର୍ହାତ୍ । 2ଆବେଟ୍ ୱାର୍ ୱାନି ଉଣ୍ତିଙ୍ଗ୍ ଆୟା ବାଡିଦୁ ଉଣ୍ତ୍ରି ନାଡ଼ା ବଜି ତିଆର୍ କିତାର୍; ମାର୍ତା ସେବା କିଜିମାର୍ହାତ୍, ମାରି ଏମେକାର୍ ୱାନିୱାଲେ ବଜିଦୁ ବାସ୍ତାମାର୍ହାର୍, ଲାଜାର୍ ୱାରି ଲୋଇ ଅରେନ୍ ମାର୍ହାନ୍ । 3#ଲୁକ ୭:୩୭,୩୮.ନାସ୍ତିୱାଲେ ମରିୟମ୍ ଅଦାକାୟା ନାଣ୍ତ ନେଗି ଦାରାଦି ବାସ୍ନା ମାରାତାନ୍ ତିଆର୍ ଆତି ନିୟୁ ଅସି ଜିସୁଦି ପାଦାମ୍ତୁ ଆକା ୱାକ୍ସି ନିଜେଦି କୁକୁଟିଦାନ୍ ୱାନି ପାଦାମ୍କୁ ତେଲ୍ତାସିତାତ୍, ମାରି ନିୟୁଦି ବାସ୍ନାଦାନ୍ ଇଲୁ ଗାମ୍ରିସ୍ତାତ୍ । 4ମାତର୍ ଜିସୁଦି ସିସୁର୍ ଲୋଇ ଇସ୍କାରିୟୋତିୟ ଜିହୁଦା ଦର୍ତି ଏମେ ସିସୁ ୱାନିଙ୍ଗ୍ ସାତ୍ରୁରି କିୟୁଦୁ ସେର୍ପ୍ତେଙ୍ଗ୍ ସଲ୍ସିମାର୍ହାନ୍, ୱାନ୍ ଇର୍ହାନ୍, 5ଇୟା ନିୟୁ ତିନିସ ୱେଣ୍ତି ଡାବୁଙ୍ଗାଁଙ୍ଗ୍ ପର୍ଜି ଏନ୍ଦା କାକୁର୍ତି ଲୋକାଙ୍ଗ୍ ସିଏତାର୍ ? 6ୱାନ୍ ଜେ କାକୁର୍ତି ଲୋକାଙ୍ଗ୍ ଉଣ୍ତିଙ୍ଗ୍ ସିନ୍ତା କିଜିମାର୍ହାନ୍ ଇଜି ଇକା ଇର୍ହାନ୍, ଆକା ସିଲେ, ମାତର୍ ୱାନ୍ ଅରେନ୍ ଡଙ୍ଗାଁର୍ଏନ୍, ମାରି ୱାନି ଲାକ୍ତୁ ଡାବୁଙ୍ଗୁଁ ମଣି ମାର୍ହାତ୍ଆକା, ଆବେନ୍ ଆମା ଆମାକା ଇଡ୍ଜି ମାର୍ହାର୍, ଆକା ୱାନ୍ ଡଙ୍ଗାଁକିଜି ଅସିମାର୍ହାନ୍ ।
7ମାତର୍ ଜିସୁ ଇର୍ହାନ୍, “ତେନିଙ୍ଗ୍ ଡ଼ିସ୍ସୋ ସିଦୁ, ତାନେଙ୍ଗ୍ ଆମାକା ମାନାତ୍, ନା ମାଡ଼ାଦିଙ୍ଗ୍ ମୁସ୍ନି ନାଣ୍ତିରି ଉଣ୍ତିଙ୍ଗ୍ ୱାଦ୍ ଇକା ଇଡ୍ଦେଙ୍ଗ୍ ଆଟ୍ନାତ୍ । 8କାକୁର୍ତି ଲୋକ୍ ତୋ ୱିଜୁଦିନ୍ ମି ଲାକ୍ତୁ ମାନାର୍, ମାତର୍ ନାନ୍ ୱିଜୁଦିନ୍ ମି ଲାକ୍ତୁ ତେବାଏ ।”
ଲାଜାର୍ତି ବିରଦ୍ତାନ୍ ଉପାୟ୍କିତାର୍
9ନାସ୍ତିୱାଲେ ନାଣ୍ତ ଜିହୁଦି ଲୋକୁ ଜିସୁ ବେତନିଆଦୁ ମାନାନ୍ ଇଜି ନେସ୍ତେଙ୍ଗ୍ ଆଟ୍ସି ଆବ୍କା ଜିସୁଦି ଉଣ୍ତିଙ୍ଗ୍ ସିଲେ, ମାତର୍ ଏମେ ଲାଜାର୍ତିଙ୍ଗ୍ ୱାନ୍ ସାତିମାଣାନ୍ ନିକ୍ତାମାର୍ହାନ୍, ୱାନିଙ୍ଗ୍ ସୁଡ଼ୁଦେଙ୍ଗ୍ ବା ୱାତାର୍ । 10ମାତର୍ ଲାଜାର୍ତିଙ୍ଗ୍ ବା ଡାକ୍ତେଙ୍ଗ୍ଁ ଇଜି ପେରି ଜାଜକର୍ ଉପାୟ୍ କିତାର୍, 11ଇରିଙ୍ଗ୍ ୱାନି ଉଣ୍ତିଙ୍ଗ୍ ଜିହୁଦିର୍ ଲୋଇ ନାଣ୍ତ ଲୋକୁ ୱାରିଙ୍ଗ୍ ଡ଼ିସ୍ସିମାର୍ହାର୍ ମାରି ଜିସୁମାନୁ ସଲ୍ସି ବିସ୍ବାସ୍ କିଜିମାର୍ହାର୍ ।
ଜିସୁ ଜିଣାଜି ଜିରୁସାଲାମ୍ତୁ ଡ଼ୁଗିତାନ୍
(ମାତିଉ ୨୧:୧-୧୧; ମାର୍କ ୧୧:୧-୧୧; ଲୁକ ୧୯:୨୮-୪୦)
12ମାର୍ନାଣ୍ଡିଙ୍ଗ୍ ନିସ୍ତାର୍ ପଣ୍ତୟ୍ତୁ ୱାତିମାର୍ଇ ନାଣ୍ତ ଲୋକୁ ଜିସୁ ଜିରୁସାଲାମ୍ତୁ ୱାଜିନାନ୍ ଇଜି ୱେର୍ଆର୍ । 13ଆୟାଉଣ୍ତିଙ୍ଗ୍ ୱାର୍ କାଜିରି କମେଙ୍ଗ୍ ଆସ୍ସି ୱାନିଙ୍ଗ୍ ବେଟ୍ଆଦେଙ୍ଗ୍ ଇଜି ସତାସର୍ହାର୍ ମାରି ନାଣ୍ତ ଆଉଲି ଆଜି ଇନ୍ଡ୍ରେଙ୍ଗ୍ ଆସ୍ତାର୍, ହୋଶାନା । ପ୍ରବୁଦି ଦର୍ତାନ୍ ଏନ୍ ୱାଜିନାନ୍, ୱାନ୍ ଦନ୍ୟ; ଦନ୍ୟ ଇସ୍ରାଏଲ୍ତି ରାଜା ।
14ମାରି, ଜିସୁ ଉଣ୍ତ୍ରି ଗଦପିଲା ମୁସ୍କୁ ବାସ୍ତା ୱାତାନ୍, ଏଣ୍ତେସ୍ ଇକା ଦାର୍ମୁ ସାସ୍ତ୍ରଦୁ ରାସାତାମାନାତ୍,
15ଏ ସିୟୋନ୍ତି ଆଇଲିକ୍, “ତିଲାମା;
ସୁଡୁଆ, ନି ରାଜା ୱାଜିନାନ୍,
ୱାନ୍ ଗଦପିଲା ମୁସ୍କୁ ବାସ୍ତାନ୍ନୋ ୱାଜିନାନ୍ ।”
16ୱାନି ସିସୁର୍ ପାର୍ତୁମ୍ତୁ ଇୟାୱିଜୁ ବିସୟ୍ ବୁଜାଏତାର୍, ମାତର୍ ଜିସୁ ଦନ୍ୟବାଦ୍ ପୟ୍ତି ୱେନ୍କା ଇୟାୱିଜୁ ଜେ ୱାନି ବିସୟ୍ତାନ୍ ଦାର୍ମୁସାସ୍ତ୍ରଦୁ ରାସାତାମାର୍ହାତ୍, ମାରି ୱାନି ଉଣ୍ତିଙ୍ଗ୍ ୱାର୍ ଜେ ଇୟାୱିଜୁ କିତାମାର୍ହାର୍, ଆକା ୱାର୍ ଏତ୍ କିତାର୍ ।
17ମାରି, ଜିସୁ ଲାଜାର୍ତିଙ୍ଗ୍ ଦୁକିଦାନ୍ କୁକ୍ସି ସାତିମାଣାନ୍ ନିକ୍ତିୱାଲେ ଆମା ଲୋକ୍ଡର୍ ୱାନିୱାଲେ ମାର୍ହାର୍, ୱାର୍ ଆୟା ଗଟନା ବିସୟ୍ତାନ୍ ସାକି ସିଦେଙ୍ଗ୍ ଆସ୍ତାର୍ । 18ଇୟାଉଣ୍ତିଙ୍ଗ୍ ବା ଲୋକୁ ୱିଜେରେ ୱାନିଙ୍ଗ୍ ମିସାଦେଙ୍ଗ୍ ସର୍ହାମାର୍ହାର୍, ଇରିଙ୍ଗ୍ ୱାନ୍ ଇୟା କାବାଆନି ପାଣି କିତାମାନାନ୍ ଇଜି ୱାର୍ ୱେର୍ଆମାର୍ହାର୍ । 19ଆବେଟ୍ ପାରୁସିର୍ ତାମେ ତାମେମାନୁ ୱାର୍ଗିଜି ସାତାର୍, “ସୁଡ଼ୁଜିନିଦେର୍ ତୋ, ମାଡ୍ ଇନିକା କିଦେଙ୍ଗ୍ ଆଟ୍ଇଜିନିକା; ସୁଡ଼ୁଦୁ, ଦୁନିଆୱିଜୁ ତାନି ୱେନ୍କା ସର୍ହାତ୍ନି ।”
ଏସୋ ଗ୍ରିକ୍ ଲୋକୁ ଜିସୁଙ୍ଗୁଁ ପୟ୍ତାର୍
20ପଣ୍ତୟ୍ ସମୟ୍ତୁ ଉପାସନା କିଦେଙ୍ଗ୍ ଇଜି ଜିରୁସାଲାମ୍ତୁ ୱାତି ମାର୍ଇ ଲୋକା ଲୋଇ ଏସୋ ଗ୍ରିକ୍ ଲୋକୁ ମାର୍ହାର୍ । 21ୱାର୍ ଗାଲିଲିଦି ବେତ୍ସାଇଦାଦୁ ତେବାନି ପିଲିପ୍ତି ଲାକ୍ତୁ ୱାଜି ୱାନିଙ୍ଗ୍ ମାଡ଼ିସ୍ କିଜି ଇର୍ହାର୍, “ଆଜ୍ଞା, ଜିସୁଙ୍ଗୁଁ ସୁଡ଼ୁଦେଙ୍ଗ୍ ମା ବଦା ।”
22ପିଲିପ୍ ସଲ୍ସି ଆନ୍ଦ୍ରିୟତିଙ୍ଗ୍ ଇର୍ହାନ୍, ମାରି ଆନ୍ଦ୍ରିୟ ନି ପିଲିପ୍ ସଲସି ଜିସୁଙ୍ଗୁଁ ଇର୍ହାର୍ । 23ଜିସୁ ୱାରିଙ୍ଗ୍ ଇର୍ହାନ୍, ମନୁସ୍ୟପୁତ୍ର ଦନ୍ୟବାଦ୍ ପୟ୍ଦେଙ୍ଗ୍ ଇଜି ସମୟ ଇଗା ୱାତାମାନାତ୍ । 24ସତ୍ ସତ୍ ନାନ୍ ମିଙ୍ଗିଁ ଇଜିନା, ଗଦ୍ମୁପାଡ଼ୁ ଜଦି ସିକ୍ଲାଦୁ ଆର୍ଜି ସାଏତ୍, ଆରିଙ୍ଗ୍ ଆକା ଉଡ୍ରେନେ ତେବାନାତ୍, ମାତର୍ ଜଦି ସାନାତ୍, ନାଣ୍ତ ପାଡ଼ୁ ଆସ୍ନାତ୍ । 25#ମାତିଉ ୧୦:୩୯; ୧୬:୨୫; ମାର୍କ ୮:୩୫; ଲୁକ ୯:୨୪; ୧୭:୩୩.ଏନ୍ ନିଜେଦି ଜିବନ୍ତିଙ୍ଗ୍ ନାଣ୍ତ ଜିବନ୍ନୋନାନ୍, ୱାନ୍ ଆକା ଆରାକିନାନ୍, ମାରି ଏନ୍ ନିଜେଦି ଜିବନ୍ତିଙ୍ଗ୍ ଇୟା ଦୁନିଆଦୁ କାଡ଼୍ନାନ୍, ୱାନ୍ ଆକା ଏସ୍କାଙ୍ଗ୍ୱିଜ୍ଇ ଜିବନ୍ ଉଣ୍ତିଙ୍ଗ୍ ରକିୟା କିନାନ୍ । 26ଏନ୍ ନା ସେବା କିଦେଙ୍ଗ୍ ବଦାକିନାନ୍, ଆରିଙ୍ଗ୍ ୱାନ୍ ନା ୱାଲେ ରାପିନ୍; ମାରି; ନାନ୍ ଏମେନ୍ ମାନା, ନା ସେବାକିନିକାନ୍ ବା ଆବେ ତେବାନାନ୍; ଏନ୍ ଏସାଙ୍ଗ୍ ନା ସେବା କିନାନ୍, ଆରିଙ୍ଗ୍ ନା ବୁବା ୱାନିଙ୍ଗ୍ ମାନାନାନ୍ ।
ଜିସୁ ନିଜେଦି ସାନି ବିସୟ୍ତାନ୍ ୱେର୍ତାନ୍
27ଇଲେଇ ନା ଜିବନ୍ ଦୁକ୍ଦୁକ୍ ଆଜିନାତ୍, ମାରି ନାନ୍ ଇନିକା କିନା ? ବୁବା, ନାଙ୍ଗିଁ ଇୟା ସମୟ୍ତାନ୍ ରକିୟା କିଆ ? ମାତର୍ ଇୟାଉଣ୍ତିଙ୍ଗ୍ ତୋ ନାନ୍ ୱାତାମାନା । ଏଣ୍ତେସ୍ ଦୁକ୍ବଗାନି ସମୟକୁ କାସ୍ଟୁ ଆଦେଙ୍ଗ୍ ପକାତାମାନା । 28“ବୁବା, ନିନ୍ ଦର୍ ଦନ୍ୟବାଦ୍ କିଆ । ଆବେଟ୍ ବାଦଡ଼ତାନ୍ ଇୟା ବଲ୍ ୱାତାତ୍ ମାପ୍ ଆକା ମହିମାନିତ କିତାମାନାପ୍, ମାରିଡ଼େସି ମହିମାନିତ କିନାପ୍ ।”
29ଆଦେଙ୍ଗ୍ ଲାକ୍ତୁ ନିର୍ଇ ମାର୍ଇ ଲୋକୁ ୱିଜେରେ ଇକା ୱେନ୍ଜି ବାଦଡ଼୍ ଡିଡ଼ିତାତ୍ ଇଜି ଇର୍ହାର୍; ଆଇକାର୍ ଇର୍ହାର୍, “ଅରେନ୍ ଦୁତ୍ ୱେନିଙ୍ଗ୍ ମାଟା ଇର୍ହାମାନାନ୍ ।”
30ଜିସୁ ୱାରିଙ୍ଗ୍ ଇର୍ହାନ୍, ନା ଉଣ୍ତିଙ୍ଗ୍ ଇୟା ବଲ୍ ଆଏତ୍, ମାତର୍ ମି ଉଣ୍ତିଙ୍ଗ୍ ଆତାମାନାତ୍ । 31ଇଲେଇ ଇୟା ଦୁନିଆଦୁ ବିସାର୍ ଇଗା ୱାତାତ୍; ଇଲେଇ ଇୟା ଦୁନିଆଦି ବିସାର୍ପତିଙ୍ଗ୍ ଆତ୍ରେ ପକାନାନ୍ । 32ମାରି, ନାନ୍ ଏସ୍ତିୱାଲେ ଦୁନିଆଦାନ୍ ମୁସ୍କୁ ପେରାଇଆନା, ନାସ୍ତିୱାଲେ ୱିଜେରିଙ୍ଗ୍ ଟାଣିସ୍ କିନା । 33ୱାନ୍ ଏଣ୍ତେସ୍ ସାଦେଙ୍ଗ୍ ସଲ୍ସିନାନ୍, ଆୟା ସିନା ସିଜି ଇକା ଇର୍ହାନ୍ ।
34ଆବେଟ୍ ଲୋକୁ ୱିଜେରେ ଇର୍ହାର୍, “ମସିହ ୱିଜୁଦିନ୍ ତେବାନାନ୍ ଇଜି ନିୟମ୍ତାନ୍ ମାପ୍ ୱେର୍ଆମାନାପ୍, ଆରିଙ୍ଗ୍ ମନୁସ୍ୟପୁତ୍ର ମୁସ୍କୁ ପେରାନାନ୍ ଇଜି ମିର୍ ଏଣ୍ତେସ୍ ଇଜିନିଦେର୍ ? ଇୟା ମନୁସ୍ୟପୁତ୍ର ଏନ୍ ?”
35ଆବେଟ୍ ଜିସୁ ୱାରିଙ୍ଗ୍ ଇର୍ହାନ୍, “ମାରି ଅଡ଼ପ୍ ସମୟ ମାତର୍ ଜାୟ୍ ମିବାନୁ ମାନାତ୍ । ସିକାଟି ଏଣ୍ତେସ୍ ମି ଡ଼ିଙ୍ଗ୍ଏତ୍, ଇୟାଉଣ୍ତିଙ୍ଗ୍ ମି ଲାକ୍ତୁ ଜାୟ୍ ମାନାପ୍ ମାନାପ୍ ବୁଲାସାଲା କିଦୁ; ଏନ୍ ସିକାଟିଦୁ ବୁଲାସାଲା କିନାନ୍, ୱାନ୍ ଏମେ ସଲ୍ସିନାନ୍, ଆକା ୱାନ୍ ନେସ୍ଏପ୍ । 36ମିର୍ ଏଣ୍ତେସ୍ ଜାୟ୍ତି କଡ଼ର୍ ଆଦୁ, ଆୟାଉଣ୍ତିଙ୍ଗ୍ ଜାୟ୍ ମି ଲାକ୍ତୁ ମାନାପ୍ ମାନାପ୍ ଜାୟ୍ତୁ ବିସ୍ବାସ୍ କିଦୁ । ଜିସୁ ଇୟାୱିଜୁ ମାଟା ଇନ୍ଜି ୱାରିମାଣାନ୍ ସଲ୍ସି ମାର୍ଗିଜି ତେବାତାନ୍ ।”
ଲୋକା ଅବିସ୍ବାସ୍
37ଜଦିବା ଜିସୁ ତାମେ ଆଗ୍ଡ଼ି ନିସା କାବାଆନି ପାଣି କିତାମାର୍ହାନ୍, ଆବେବା ୱାର୍ ୱାନିବାନୁ ବିସ୍ବାସ୍ କିଏତାର୍, 38ଏଣ୍ତେସ୍ ଜିସାଇୟ ବାବବାଦି ମାଣ୍କୁ ରାସାତି ବାକ୍ୟ ସତ୍ ଆନାତ୍ ।
“ଏ ପ୍ରବୁ, ଏନ୍ ମା ନେଗିକାବୁର୍ ମାଟା ବିସ୍ବାସ୍ କିତାମାନାନ୍ ?
ମାରି ପ୍ରବୁଦି ସାକ୍ତି ଏମେୱାନି ଲାକ୍ତୁ ତର୍ତାନ୍ ?”
39ଇୟାଉଣ୍ତିଙ୍ଗ୍ ୱାର୍ ବିସ୍ବାସ୍ କିଦେଙ୍ଗ୍ ଆଟ୍ଏଜିମାର୍ହାର୍, ଇରିଙ୍ଗ୍ ଜିସାଇୟ ମାରି ଇର୍ହାମାନାନ୍ ।
40“ମାପୁରୁ ୱାରି କାଣୁକୁ କାଣା କିତାମାନାନ୍,
ମାରି ୱାରି ଜିବନ୍ତିଙ୍ଗ୍ ଆଟ୍ୱା କିତାମାନାନ୍,
ଏଣ୍ତେସ୍ ୱାର୍ କାଣ୍କାଙ୍ଗ୍ଁ ସୁଡ଼ୁଏର୍
ମାରି ଜିବନ୍ତୁ ବୁଜାଏର୍,
ମାରିଡ଼େସି ନାବାନୁ ରେଏର୍,
ମାରି ମାପ୍ ୱାରିଙ୍ଗ୍ ନେଗେଣ୍ତ୍ କିଏପ୍ ।”
41ଜିସାୟ ଇୟାୱିଜୁ ଇର୍ହାନ୍, “ଇରିଙ୍ଗ୍ ୱାନ୍ ଜିସୁଦି ମହିମା ସୁଡ଼ୁତାନ୍ ମାରି ୱାନି ବିସୟ୍ତାନ୍ ଇର୍ହାନ୍ ।”
42ଆବେ ଜିହୁଦି ନେତାର୍ ଲୋଇ ବା ନାଣ୍ତଲୋକ୍ ଜିସୁମାନୁ ବିସ୍ବାସ୍ କିତାର୍, ମାତର୍ ଆନାତ୍ସୁଗି ଏସ୍ତିୱାଲେ ପାର୍ତନା ଇଲ୍ତାନ୍ ସପ୍ନାର୍, ଇୟାଉଣ୍ତିଙ୍ଗ୍ ପାରୁସିରିଙ୍ଗ୍ ତିଲାଜି ଆକା ନାମ୍ଏଜି ମାର୍ହାର୍ । 43ଇରିଙ୍ଗ୍ ୱାର୍ ଗୌରବ୍ ମାପୁରୁଦି ୱେଡ଼ିକାକିନି ବାଦଲୁ ଲୋକାଙ୍ଗ୍ ୱେଡ଼ିକା ବଦା କିତାର୍ ।
ଜିସୁ ମାଟାଦି ବିସାର୍
44ଜିସୁ ଆଉଲି ଆଜି ଇର୍ହାନ୍, “ଏନ୍ ନାବାନ୍ ବିସ୍ବାସ୍ କିନାନ୍, ୱାନ୍ କେବଲ୍ ନାବାନ୍ ବିସ୍ବାସ୍ କିଏନ୍, ମାତର୍ ନା ପକ୍ତିୱାନିମାନୁ ବିସ୍ବାସ୍ କିନାନ୍ । 45ମାରି, ଏନ୍ ନାଙ୍ଗିଁ ସୁଡ଼ୁତାମାନାନ୍, ୱାନ୍ ନାଙ୍ଗିଁ ପକ୍ତିୱାନିଙ୍ଗ୍ ସୁଡ଼ୁତାମାନାନ୍ । 46ଇୟାଉଣ୍ତିଙ୍ଗ୍ ନାନ୍ ଦୁନିଆଦି ଜାୟ୍ଆଜି ୱାତାମାନା, ଏନ୍ ନାବାନ୍ ବିସ୍ବାସ୍ କିନାନ୍, ୱାନ୍ ଏଣ୍ତେସ୍ ସିକାଟିଦୁ ବାସାଏନ୍ । 47ଏନ୍ ଜଦି ନା ବାକ୍ୟ ୱେନ୍ଜି ମାନାଏନ୍, ଆରିଙ୍ଗ୍ ନାନ୍ ୱାନି ବିସାର୍ କିଏ; ଇରିଙ୍ଗ୍ ନାନ୍ ଦୁନିଆଦି ବିସାର୍ କିଦେଙ୍ଗ୍ ରେଏନ୍ଣ୍ତା ମାତର୍ ଦୁନିଆଦିଙ୍ଗ୍ ରକିୟା କିଦେଙ୍ଗ୍ ୱାତାମାନା । 48ଏନ୍ ନାଙ୍ଗିଁ ଡ଼ିସ୍ସି ନା ମାଟା ମାନାଏନ୍, ନା ୱେୟୁଦି ବାକ୍ୟ ୱାନି ବିସାର୍କିନିକାତ୍ ଆନାତ୍ । ଆୟା ବାକ୍ୟ ୱିଜ୍ନି ଦିନ୍ତୁ ୱାନି ବିସାର୍ କିନାତ୍ । 49ଇୟା ମାଟା ସତ୍, ଇରିଙ୍ଗ୍ ନାନ୍ ନା ନିଜେଦି ଅଦିକାର୍ତାନ୍ ଇନିକା ଇନ୍ଏ, ମାତର୍ ନାନ୍ ଇନିକା ଇନା ମାରି ଇନିକା ୱେକ୍ନା, ଆକା ନାଙ୍ଗିଁ ପକ୍ତିମାନି ବୁବା ନାଙ୍ଗିଁ ମାଟା ସିତାମାନାନ୍ । 50ମାରି ନାନ୍ ନେସ୍ନା, ୱାନି ଆଦେସ୍ ଏସ୍କାଙ୍ଗ୍ୱିଜ୍ଇ ଜିବନ୍ ସିନାତ୍ । ନା ବୁବା ନାଙ୍ଗିଁ ଆମାକା ଇନ୍ଡ୍ରେଙ୍ଗ୍ ଆଦେସ୍ ସିତାମାନାନ୍, କେବଲ୍ ନାସ ନାନ୍ ଇଜିନା ।”
Currently Selected:
ଜୋହନ 12: NTKoo20
Highlight
Share
Copy
Want to have your highlights saved across all your devices? Sign up or sign in
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020
