ଜୋହନ 13
13
ଜିସୁ ୱାନି ସିସୁରି ପାଦାମ୍କୁ ନର୍ତାନ୍
1ନିସ୍ତାର୍ ପଣ୍ତୟ୍ ଆନି ଆଗ୍ଡ଼ିରି ନାଣ୍ଡିଙ୍ଗ୍ ଜିସୁ ଇୟା ଦୁନିଆଦାନ୍ ବୁବା ଲାକ୍ତୁ ନିଜେ ସନି ସମୟ୍ ଇଗାୱାନିକା ନେସ୍ସି, ଦୁନିଆଦୁ ମାନି ନିଜେଦି ଏମେ ଲୋକାଙ୍ଗ୍ ୱାନ୍ ଜିବନ୍ ନଜି ୱାଜିମାର୍ହାନ୍, ୱାରି ଉଣ୍ତିଙ୍ଗ୍ ନାଣ୍ତ ଜିବନ୍ନୋନିକା ତର୍ତାନ୍ ।
2ଜିସୁ ନି ୱାନି ସିସୁର୍ ଏସ୍ତିୱାଲେ ନାଡ଼ାଦି ବଜିଦୁ ବାସ୍ତାମାର୍ହାର୍ । ଏସ୍ତିୱାଲେ ସୟତାନ୍ ସିମୋନ ମାରିସି ଇସ୍କାରିୟୋତିୟ ଜିହୁଦାଦି ଜିବନ୍ତୁ ଜିସୁଙ୍ଗୁଁ ସାତ୍ରୁରି କିୟୁଦୁ ସର୍ପେ କିଦେଙ୍ଗ୍ ଇଜି ବଦା କିତାୱିସ୍ତା ମାର୍ହାନ୍ । 3ନାସ୍ତିୱାଲେ ବୁବା ଜେ ୱିଜୁ ଜିସୁଦି କିୟୁଦୁ ୱିଜୁ ସାକ୍ତି ସର୍ପେ କିତାମାନାନ୍ ମାରି ୱାନ୍ ଜେ ମାପୁରୁ ମାଣାନ୍ ୱାତାମାନାନ୍, ମାରି ମାପୁରୁମାନୁ ସଲ୍ସିନାନ୍, ଇକା ନେସ୍ତାମାର୍ହାନ । 4ଆବେଟ୍ ଜିସୁ ୱାନ୍ ଉଣି ମାଣାନ୍ ନିଙ୍ଗିଁତାନ୍ନୋ ନିଜେଦି ମୁସ୍କୁରି ଆଙ୍ଗିଁ କୁତ୍ସି ଉଣ୍ତ୍ରି ପାସିଆ ଅସି ନିଜେଦି ଜୁକିଦୁ ତରାତାନ୍ । 5ୱେନ୍କା ୱାନ୍ ନକିଦୁ ଏର୍ ୱାକ୍ତାନ୍, ମାରି ସିସୁରି ପାଦାମ୍କୁ ନର୍ଜିସିଜି ନିଜେଦି ଜୁକିଦୁ ତରାତିମାର୍ଇ ପାସିଆଦାନ୍ ତେଲ୍ଦେଙ୍ଗ୍ ଆସ୍ତାନ୍ । 6ଜିସୁ ସିମୋନ୍ ପିତର୍ ଲାକ୍ତୁ ୱାତାନ୍; ଏନ୍ ୱାନିଙ୍ଗ୍ ଇର୍ହାନ୍, “ପ୍ରବୁ, ନିନ୍ ନା ପାଦାମ୍କୁ ନର୍ବିସ୍କିଜି ସିଜିନି ?”
7ଜିସୁ ୱାନିଙ୍ଗ୍ ଇର୍ହାନ୍, “ନାନ୍ ଏମେକା କିଜିନା, ଆକା ନିନ୍ ଇଲେ ନେସ୍ଏଜିନି, ମାତର୍ ୱେନ୍କା ନେସ୍ନି ।”
8ପିତର୍ ଜିସୁଙ୍ଗୁଁ ଇର୍ହାନ୍, “ନିନ୍ ମୁଡ଼ୁକେ ଏସ୍କାଙ୍ଗ୍ବା ନା ପାଦାମ୍କୁ ନର୍ଜ ସିଇ ।”
ଜିସୁ ୱାନିଙ୍ଗ୍ ଇର୍ହାନ୍, “ଜଦି ନାନ୍ ନି ପାଦାମ୍ ନର୍ଏ, ଆରିଙ୍ଗ୍ ନା ସିସୁ ଆଦେଙ୍ଗ୍ ଆଟ୍ଇ ।”
9ସିମୋନ ପିତର୍ ୱାନିଙ୍ଗ୍ ଇର୍ହାନ୍, “ଏ ପ୍ରବୁ, ନିନ୍ କେବଲ୍ ନା ପାଦାମ୍କୁ ସିଲେ ନା କିୟୁ ନି ତାଲା ବା ନର୍ଜ ସିଦା ।”
10ଜିସୁ ୱାନିଙ୍ଗ୍ ଇର୍ହାନ୍, ଏନ୍ ଏରୁ ଇବାତାମାନାନ୍, ୱାନି ପାଦାମ୍କୁ ନର୍ଦେଙ୍ଗ୍ ଡ଼ିସ୍ତିଙ୍ଗ୍ ମାରି ଇନିକା ଦର୍କାର୍ ସିଲେ, ୱାନ୍ ସତ୍ନେ ନରାତାମାନ୍ନାନ୍; ମିର୍ ୱିଜେରେ ବା ନରାତିମାନିଦେର୍, କେବଲ୍ ଅରେନ୍ ସିଲେ । 11ମାତର୍ ଏନ୍ ୱାନିଙ୍ଗ୍ ସାତ୍ରୁରି କିୟୁଦୁ ସର୍ପେ କିନ୍ନାନ୍, ଜିସୁ ୱାନିଙ୍ଗ୍ ନେସ୍ତାମାର୍ହାନ୍, ଆୟାଉଣ୍ତିଙ୍ଗ୍ ୱାନ୍ ଇର୍ହାନ୍, କେବଲ୍ ଅରେନ୍ୱାନିଙ୍ଗ୍ ଡ଼ିସ୍ତିଙ୍ଗ୍ ମିର୍ ୱିଜିଦେର୍ ନର୍ୟାଆତିମାନିଦେର୍ ।
12 #
ଲୁକ ୨୨:୨୭. ତାନେୱେନ୍କା ଜିସୁ ୱାରି ପାଦାମ୍କୁ ନର୍ଜି ନିଜେଦି ଆଙ୍ଗିଁ ଆରାଜି ମାରିଡ଼େସି ନିଜେଦି ବାଡିଦୁ ବାସ୍ତି ୱେନ୍କା ୱାରିଙ୍ଗ୍ ୱେନ୍ବାତାନ୍, ନାନ୍ ମି ଉଣ୍ତିଙ୍ଗ୍ ଇନିକା କିତାମାନା, ଆକା ଇନିକା ମିର୍ ନେସ୍ତିମାନିଦେର୍ ? 13ମିର୍ ନାଙ୍ଗିଁ ଗୁରୁ ନି ପ୍ରବୁ ଇଜି କୁକ୍ସିନିଦେର୍, ମାରି ଆକା ସତ୍ ଇଜିନିଦେର୍; ଇରିଙ୍ଗ୍ ନାନ୍ ତୋ ଆୟାକାନ୍ । 14ମାରି, ପ୍ରବୁ ନି ଗୁରୁ ଜେ ନାନ୍ ମାପୁରୁ, ନାନ୍ ଜଦି ମି ପାଦାମ୍କୁ ନର୍ତାସିତାମାନା, ଆରିଙ୍ଗ୍ ମିର୍ ବା ନିଜେ ନିଜେଦି ପାଦାମ୍କୁ ନରାନିକା ମାନାତ୍ । 15ଇରିଙ୍ଗ୍ ମି ଉଣ୍ତିଙ୍ଗ୍ ନାନ୍ ଏଣ୍ତେସ୍ କିତାମାନା, ମିର୍ ବା ଆୟାୱାଜା କିଦୁ, ଇୟାଉଣ୍ତିଙ୍ଗ୍ ନାନ୍ ମିଙ୍ଗିଁ ଉନ୍ଡ୍ରି ସାରି ତର୍ତାମାନା । 16#ମାତିଉ ୧୦:୨୪; ଲୁକ ୬:୪୦; ଜୋହନ ୧୫:୨୦.ସତ୍ ସତ୍ନେ ନାନ୍ ମିଙ୍ଗିଁ ଇଜିନା, ସାକର୍ ନିଜେଦି ମାଲିକ୍ମାଣ୍କୁ ପେରିକାନ୍ ଆଏନ୍, ମାରି କାବୁର୍ ଅନିକାନ୍ ପକ୍ତିମାନି ମାଲିକ୍ତି ମାଣାନ୍ ପେରିକାର୍ ସିଲେ । 17ଜଦି ମିର୍ ଇୟାୱିଜୁ ନେସ୍ତୁ, ଆରିଙ୍ଗ୍ ଆୟାୱାଜା କିତିଙ୍ଗ୍ ମିର୍ ଦନ୍ୟ ।
18ମି ୱିଜେରି ବିସୟ୍ତାନ୍ ନାନ୍ ଇୟା ମାଟା ଇନ୍ଏଜିନା । ନାନ୍ ଏମେୱାରିଙ୍ଗ୍ ଆସ୍କିତାମାନା, ୱାରିଙ୍ଗ୍ ନାନ୍ ନେସ୍ନା । ମାତର୍ ଦାର୍ମୁସାସ୍ତ୍ରଦି ଇୟା ମାଟା ସତେନେ ପୁରା ଆନାତ୍, ଏନ୍ ନା କାଦିଦୁ ପିରିତାନ୍, ୱାନ୍ ନାଙ୍ଗିଁ ଲାତ୍ ଡାକ୍ତାନ୍ । 19ଇଲେଇ ଇକା ଗଟାନି ଆଗ୍ଡ଼ିରାନ୍ନେ ନାନ୍ ମିଙ୍ଗିଁ ଇୟା ମାଟା ୱେର୍ସିନା, ଏସ୍ତିୱାଲେ ଇକା ଗଟାନାତ୍, ମିର୍ ବିସ୍ବାସ୍ କିନିଦେର୍ ଜେ, ନାନ୍ ଆମାକାନ୍ ନାନ୍ ଆକାନ୍ । 20#ମାତିଉ ୧୦:୪୦; ମାର୍କ ୯:୩୭; ଲୁକ ୯:୪୮; ୧୦:୧୬.ସତ୍ ସତ୍ନେ ନାନ୍ ମିଙ୍ଗିଁ ୱେର୍ସିନା, ନାଙ୍ଗିଁ ପୋକ୍ତାତିମାନି ଲୋକ୍ତିଙ୍ଗ୍ ଏନ୍ ମାନାନାର୍, ୱାନ୍ ନାଙ୍ଗିଁ ମାନାନାର୍ ମାରି ଏନ୍ ନାଙ୍ଗିଁ ମାନାନାର୍, ୱାନ୍ ନା ପୋକ୍ତାତିମାନି ମାଲିକ୍ତିଙ୍ଗ୍ ବା ମାନାନାର୍ ।
ଜିସୁ ୱାନି ବିସ୍ବାସ୍ତୁ ବିସ୍ ସିନି ଲୋକ୍ତି ବିସୟ୍ତାନ୍ ଇର୍ହାନ୍
(ମାତିଉ ୨୬:୨୦-୨୫; ମାର୍କ ୧୪:୧୭-୨୧; ଲୁକ ୨୨:୨୧-୨୩)
21ଜିସୁ ଇୟାୱିଜୁ ମାଟା ଇର୍ହି ୱେନ୍କା ଆତ୍ମାଦୁ ଦୁଃକ୍କିତାନ୍ ମାରି ୱିଜେରି ଆଗ୍ଡ଼ି ସାକ୍ୟ ସିଜି ଇର୍ହାନ୍, “ସତ୍ ସତ୍ନେ ନାନ୍ ମିଙ୍ଗିଁ ଇଜିନା, ମି ମାଣ୍କୁ ଅରେନ୍ ନାଙ୍ଗିଁ ସାତ୍ରୁରି କିୟୁଦୁ ସର୍ପେ କିନାନ୍ ।”
22ଜିସୁ ଏ ବିସୟ୍ତାନ୍ ଇର୍ହାନ୍, ଆୟା ବିସୟ୍ତାନ୍ ବୁଜାଦେଙ୍ଗ୍ ଆଟ୍ଏଜି ସିସୁର୍ ନିଜେ ନିଜେଦି ମାନୁ ବେସ୍ସିସାଦେଙ୍ଗ୍ ଆସ୍ତାର୍ । 23ଜିସୁଦି ସିସୁରି ଲୋଇରାନ୍ ଅରେନ୍ ଆମାୱାନିଙ୍ଗ୍ ଜିସୁ ଜିବନ୍ନୋଜି ମାର୍ହାନ୍, ୱାନ୍ ଜିସୁଦି ଲାକ୍ତୁ ବାସ୍ତା ମାର୍ହାନ୍ । 24ମାରି, ସିମୋନ ପିତର୍ ୱାନିଙ୍ଗ୍ ଜୁଟ୍ସି ଇର୍ହାନ୍, ୱାନ୍ ଏ ବିସୟ୍ତାନ୍ ୱେର୍ସିନାନ୍, ଆକା ୱେନ୍ବାଆ ।
25ୱାନ୍ ଆୟାୱାଜା ବାସ୍ସି ମାନ୍ଞ୍ଜି ଜିସୁଦି ବକାଦୁ ଗେକାଜିବାସ୍ସି ୱାନିଙ୍ଗ୍ ୱେନ୍ବାତାନ୍, ପ୍ରବୁ, ଆୟାକାନ୍ ଏନ୍ ? 26ଆରିଙ୍ଗ୍ ଜିସୁ ଇର୍ହାନ୍, ଆମାୱାନି ଉଣ୍ତିଙ୍ଗ୍ ନାନ୍ ଇୟା ରୁଟି କାଣ୍ତେକ୍ ମୁଡ଼ୁକୁନା ମାରି ଆମାୱାନିଙ୍ଗ୍ ସିନା, ଆୟାକାନ୍ ୱାନ୍ । ଆବେନୁ ୱାନ୍ ଆୟା ରୁଟିକାଣ୍ତେକ୍ତିଙ୍ଗ୍ ମୁଡୁକ୍ସି ଆକା ଅସି ସିମୋନ ଇସ୍କାରିୟୋତିୟତି ମାରିସି ଜିହୁଦାଦିଙ୍ଗ୍ ସିତାନ୍ । 27ଆୟା ରୁଟି କାଣ୍ତେକ୍ ପୟ୍ତି ୱେନ୍କା ସୟତାନ୍ ୱାନି ମାନୁ ଡ଼ୁଗିତାତ୍ । ଆବେଟ୍ ଜିସୁ ୱାନିଙ୍ଗ୍ ଇର୍ହାନ୍, ଆମାକା କିଦେଙ୍ଗ୍ ସଲ୍ସିନି, ଆକା ଦାପେର୍ କିଆ । 28ମାତର୍ ୱାନ୍ ଇନି ବିସୟ୍ତାନ୍ ୱାନିଙ୍ଗ୍ ଇୟା ମାଟା ଇର୍ହାମାର୍ହାନ୍, ଆକା ବଜିଦୁ ବାସ୍ତିମାର୍ଇକାର୍ ଏନ୍ ନେସ୍ଏତାର୍ । 29ଇରିଙ୍ଗ୍ ଜିହୁଦା ଲାକ୍ତୁ ଡାବୁଙ୍ଗ୍ଆସ୍ନି ମଣି ମାର୍ହାତ୍ଆକା, ପଣ୍ତୟ୍ତି ଉଣ୍ତିଙ୍ଗ୍ ଇନି ଇନିକା ଦର୍କାର୍, ଆକା କଡ଼୍ଦେଙ୍ଗ୍ ମାରି ସିଲିସାତିୱାରିଙ୍ଗ୍ ଏସ ଦାନ୍ କିଦେଙ୍ଗ୍ ଜିସୁ ୱାନିଙ୍ଗ୍ ଇର୍ହାନ୍ ଇଜି ଏନ୍ ଏନ୍ ଅଡ଼୍ବିତାର୍ ।
30ଜିହୁଦା ରୁଟି କାଣ୍ତେକ୍ ଲସ୍ତାନ୍ନୋ, ୱାନ୍ ଆୟାଦାର୍ପେ ସତାସର୍ହାନ୍, ନାସ୍ତିୱାଲେ ନାଡ଼ାଆତା ମାର୍ହାତ୍ ।
ପୁନି ମାଟା
31ଜିହୁଦା ସତିସର୍ଇ ୱେନ୍କା ଜିସୁ ଇର୍ହାନ୍, “ଇଲେଇ ମନୁସ୍ୟପୁତ୍ରଦି ଦନ୍ୟବାଦ୍ ତରିତାତ୍ ମାରି ୱାନିମାଣାନ୍ ମାପୁରୁଦି ଗୌରବ୍ ବା ତରାତାତ୍ । 32ଜଦି ମାପୁରୁ ମନୁସ୍ୟପୁତ୍ର ମାଣାନ୍ ଗୌରବ୍ ଆନାନ୍, ମାପୁରୁ ନିଜେଦି ଦନ୍ୟବାଦଦୁ ମନୁସ୍ୟପୁତ୍ରଙ୍ଗ୍ ଦନ୍ୟବାଦ୍ କିନ୍ନାନ୍ । ଦାପ୍ରେନେ ୱାନ୍ ଇକା କିଦେଙ୍ଗ୍ ସଲ୍ସିନାନ୍ ।” 33#ଜୋହନ ୭:୩୪.ଜିସୁ ଇର୍ହାନ୍, ନା କଡ଼ର୍, ନାନ୍ ମାରି ସାଣେକ୍ତିଙ୍ଗ୍ ମି ୱାଲେ ମାନା । ମିର୍ ନାଙ୍ଗିଁ ପୟ୍ନିଦେର୍; ମାରି ନାନ୍ ଏମେ ବାଡିଦୁ ସଲ୍ସିନା, ମିର୍ ଆୟା ବାଡିଦୁ ସନ୍ଡ଼୍ରେଙ୍ଗ୍ ଆଟ୍ଇଦେର୍, ଇକା ନାନ୍ ଏଣ୍ତେସ୍ ଜିହୁଦି ନେତାରିଙ୍ଗ୍ ଇର୍ଆମାର୍ହା, ଆୟାୱାଜା ଇଲେଇ ମିଙ୍ଗିଁ ବା ୱେର୍ସିନା । 34#ଜୋହନ ୧୫:୧୨,୧୭; ୧ ଜୋହନ ୩:୨୩; ୨ ଜୋହନ ୧:୫.ମିର୍ ନିଜେନିଜେଦିଙ୍ଗ୍ ଜିବନ୍ନୋଜିସାଦୁ, ଇୟା ପୁନି ମାଟା ନାନ୍ ମିଙ୍ଗିଁ ସିଜିନା; ନାନ୍ ଏଣ୍ତେସ୍ ମିଙ୍ଗିଁ ଜିବନ୍ନୋତାମାନା, ମିର୍ ବା ଆୟାୱାଜା ନିଜେନିଜେଦିଙ୍ଗ୍ ଜିବନ୍ନୋନିକା ମାନାତ୍ । 35ଜଦି ମିର୍ ନିଜେନିଜେଦିଙ୍ଗ୍ ଉଣ୍ତିଙ୍ଗ୍ ଜିବନ୍ନୋନିଦେର୍, ଆରିଙ୍ଗ୍ ମିର୍ ଜେ ନା ସିସୁର୍, ଇକା ୱିଜେରେ ନେସ୍ନାର୍ ।
ଜିସୁ ଇର୍ହାନ୍ ପିତର୍ ନାଙ୍ଗିଁ ମାନାଏନ୍
(ମାତିଉ ୨୬:୩୧-୩୫; ମାର୍କ ୧୪:୨୭-୩୧; ଲୁକ ୨୨:୩୧-୩୪)
36ସିମୋନ ପିତର୍ ଜିସୁଙ୍ଗୁଁ ୱେନ୍ବାତାନ୍, “ପ୍ରବୁ, ନିନ୍ ଏମେମାନୁ ସଲ୍ସିନି ?” ଜିସୁ ଇର୍ହାନ୍, ନାନ୍ ଏମେମାନୁ ସଲ୍ସିନା,
ନିନ୍ ଇଲେଇ ନା ୱେନ୍କା ୱେନ୍କା ଆବେନୁ ସନ୍ଡ଼୍ରେଙ୍ଗ୍ ଆଟ୍ଇ, ମାତର୍ ୱେନ୍କା ସନି ।
37ପିତର୍ ୱାନିଙ୍ଗ୍ ୱେନ୍ବାତାନ୍, “ପ୍ରବୁ, ନାନ୍ ଇଲେଇ ଏନ୍ଧା ନି ୱେନ୍କା ୱେନ୍କା ସନ୍ଡ଼୍ରେଙ୍ଗ୍ ଆଟ୍ଏ ? ନାନ୍ ନି ଉଣ୍ତିଙ୍ଗ୍ ନିଜେଦି ଜିବନ୍ ସିଦେଙ୍ଗ୍ ବା ରାଜି ।”
38ଜିସୁ ଇର୍ହାନ୍, “ନିନ୍ ଇନିକା ନା ଉଣ୍ତିଙ୍ଗ୍ ନିଜେଦି ଜିବନ୍ ସିନି ? ସତ୍ ସତ୍ନେ ନାନ୍ ମିଙ୍ଗିଁ ୱେର୍ସିନା, କରୁ କେଡ଼ିଇ ଆଗ୍ଡ଼ିନେ ନିନ୍ ନାଙ୍ଗିଁ ମୁଜା ନେସେଏ ଇଜି ଇନି ।”
Currently Selected:
ଜୋହନ 13: NTKoo20
Highlight
Share
Copy
Want to have your highlights saved across all your devices? Sign up or sign in
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020
