ପ୍ରେରିତ 21
21
ପାଉଲ ଜିରୁସାଲାମ୍ତୁ ସନିକା
1ୱାରିଙ୍ଗ୍ ପୋକ୍ତି ୱେନ୍କା ମାପ୍ ଆବେଣାନ୍ ସର୍ହାପ୍ । ଏରୁସାରି ନାସି ମାପ୍ କୋସ୍ତୁ ଇତାପ୍ । ମାରିନାଣ୍ତିଙ୍ଗ୍ ରୋଡସ୍ ପାଡ଼ି ସିଜି ପାତାରାଦୁ ସର୍ହାପ୍ । 2ଆବେଣାନ୍ ପିନିସିଆଦୁ ସଲ୍ସିମାନି ଉନ୍ଣ୍ତ୍ରି ଜାହାଜ୍ ଏକ୍ସି ସର୍ହାପ୍ । 3ତାନିୱେନ୍କା ସାଇପ୍ରସ୍ ତର୍ଜିମାନି ଉନ୍ଣ୍ତ୍ରି ବାଡିଦୁ ଇତାପ୍ । ଆବେଣାନ୍ ତାନି ଡେବିରି ତରିନ୍ ସିଜି ମାପ୍ ସିରିଆଦୁ ସର୍ହାପ୍ । ମାପ୍ ସୋର ଗାଡ଼୍ତୁ ଜାହାଜ୍ତାନ୍ ରେତାପ୍, ଇରିଙ୍ଗ୍ ଇୟା ଜାହାଜ୍ତାନ୍ ସାମାନ୍ପତର୍ ରେପ୍ନିକା ମାର୍ହାତ୍ । 4ଆବେ ମାପ୍ ଏସ ବିସ୍ବାସିରିଙ୍ଗ୍ ସୁଡ଼୍ଜି ୱାରି ୱାଲେ ଉନ୍ଣ୍ତ୍ରି ସାତା ତେବାତାପ୍ । ପବିତ୍ର ଆତ୍ମାଦି ଆଦେସ୍ ପୟ୍ଜି ୱାର୍ ପାଉଲ୍ତିଙ୍ଗ୍ ଜିରୁସାଲାମ୍ତୁ ସନ୍ଡ୍ରେଙ୍ଗ୍ଁ ତେବାକିତାର୍ । 5ମାତର୍ ୱାରି ୱାଲେ ଉନ୍ଣ୍ତ୍ରି ସାତା ତେବାତି ୱେନ୍କା ମାପ୍ ୱାରିଙ୍ଗ୍ ଡ଼ିସ୍ସି ନିଜେଦି ସାରିଦୁ ସର୍ହାପ୍ । ମାଙ୍ଗିଁ ଡ଼ିସ୍ତେଙ୍ଗ୍ ଇଜି ୱାର୍ ୱିଜେରେ ନିଜେଦି ଆଡ଼୍ସିକ୍ ମାରି କଡ଼ରି ୱାଲେ ଗାଡ଼୍ ଆତ୍ରେ ମାନି ସାମ୍ଦୁର୍ ପାଡ଼ି ସାନ୍ଦି ୱାତାର୍ । ଆବେ ମାପ୍ ୱିଜେରେ ମେଣ୍ତେଙ୍ଗ୍ ଗଟ୍କିଜି ପାର୍ତନା କିତାପ୍ । 6ତାନିୱେନ୍କା ମାପ୍ ୱାରିଙ୍ଗ୍ଁ ପୋକ୍ସି, ଜାହାଜ୍ତୁ ଏକ୍ତାପ୍, ୱାର୍ ଇନ୍ଡ୍ର ଡ଼େସି ସର୍ହାର୍ ।
7ମାପ୍ ସୋର ଗାଡ଼୍ତାନ୍ ଏରୁ ନାସି ୱିଜ୍ଜି ପତଲମାଇଦୁ ଇତାପ୍, ଆବେ ବିସ୍ବାସ୍ତି ତଡ଼ାନ୍କାଙ୍ଗ୍ ମାଡ଼ିସ୍କିଜି ୱାରିୱାଲେ ଉନ୍ଣ୍ତ୍ରି ଦିନ୍ ତେବାତାପ୍ । 8#ପ୍ରେରିତ ୬:୫; ୮:୫.ମାରିନାଣ୍ତିଙ୍ଗ୍ ମାପ୍ ଆୟା ବାଡି ଡ଼ିସ୍ସି କାଇସରିଆଦୁ ଇତାପ୍ । ଆବେ ମାପ୍ ପ୍ରଚାର୍କିନି ପିଲିପିତି ଇଲ୍ତୁ ତେବାତାପ୍, ଜିରୁସାଲାମ୍ତୁ ସେବକ ୱାଜା ବାସେଆତି ମାନି ସାତ୍ ଲୋକା ଲୋଇ ୱାନ୍ ଅରେନ୍ ମାର୍ହାନ୍ । 9ୱାନି ନାଲ୍ଗି ପେଡ଼ିଆଇ ଆଇଲିକ୍ ମାପୁରୁଦି ବାକ୍ୟ ୱେର୍ସି ମାର୍ହେ । 10#ପ୍ରେରିତ ୧୧:୨୮.ମାପ୍ ଆବେ ନାଣ୍ତ ଦିନ୍ ତେବାତି ୱେନ୍କା, ଜିହୁଦା ଦେସ୍ତାନ୍ ଆଗାବ ଦର୍ତି ଅରେନ୍ ବାବବାଦି ଆବେ ୱାତାନ୍ । 11ୱାନ୍ ମା ଲାକ୍ତୁ ୱାଜି ପାଉଲ୍ତି ଜୁକିଦୁ ତରାନି ନାସୁ ଅତାନ୍, ଆବେଟ୍ ୱାନ୍ ନିଜେଦି କିୟୁ ମାରି କାଲୁ ତର୍ସି ଇର୍ହାନ୍, “ପବିତ୍ର ଆତ୍ମା ନାଙ୍ଗିଁ ଜାଣେକିଜିନାତ୍ ଜେ, ଇୟା ଜୁକି ତରାତି ଅଦିକାରିଙ୍ଗ୍ ଜିରୁସାଲାମ୍ତୁ ଜିହୁଦି ଲୋକୁ ଇୟାୱାଜା ତର୍ସି ୱାନିଙ୍ଗ୍ ଅଣଜିହୁଦି ଲୋକା କିୟୁଦୁ ସର୍ପେ କିନାର୍ ।”
12ଇକା ୱେନ୍ଜି ମାପ୍ ମାରି ଆୟା ବାଡିଦୁ ମାନି ଆଇକାର୍ ପାଉଲ୍ତିଙ୍ଗ୍ ଜିରୁସାଲାମ୍ତୁ ସଲ୍ଇ ଉଣ୍ତିଙ୍ଗ୍ ବାତିଙ୍ଗ୍ ମାଲିତାପ୍ । 13ମାତର୍ ପାଉଲ ଇର୍ହାନ୍, “ମିର୍ ଇୟା ଇନିକା କିଜିନିଦେର୍, ଏନ୍ଦା ଇୟାୱାଜା ଆଡ଼୍ବାଜି ନା ଜିବନ୍ତିଙ୍ଗ୍ ରୁକ୍ସିନିଦେର୍ ? ଜିରୁସାଲାମ୍ତୁ କେବଲ୍ ତରାୟ୍ ଆଦେଙ୍ଗ୍ ସିଲେ, ମାତର୍ ପ୍ରବୁ ଜିସୁ ଉଣ୍ତିଙ୍ଗ୍ ସାଦେଙ୍ଗ୍ଁ ଇଜି ବା ନାନ୍ ତିଆର୍ ମାନା ।”
14ମାପ୍ ୱାନିଙ୍ଗ୍ ବୁଜା କିଦେଙ୍ଗ୍ ଆଟ୍ଏଜି ଆବେଟାନ୍ ସୁପ୍ଆଜି ଇର୍ହାପ୍, “ପ୍ରବୁଦି ବଦା ପୁରା ଆପିତ୍ ।”
15ଆବେ ଏସ ସମୟ ତେବାତି ୱେନ୍କା ମାପ୍ ମା ସାମାନ୍ ପତ୍ର ରସ୍ସି ଜିରୁସାଲାମ୍ ତରିନ୍ ସର୍ହାପ୍ । 16କାଇସରିଆଦି ଏସ ସିସୁର୍ ନି କୁପ୍ରଦି ମନାସୋନ ଦର୍ତି ଅରେନ୍ ବିସ୍ବାସି ବା ମା ୱାଲେ ୱାତାନ୍ । ମନାସୋନଦି ଇଲୁତୁ ମାପ୍ ତେବାନି ବ୍ୟବସ୍ଥା ଆତାମାର୍ହାତ୍ ।
ଜାକୁବଦି ୱାଲେ ପାଉଲତି ବେଟ୍ଆନିକା
17ଜିରୁସାଲାମ୍ତୁ ବିସ୍ବାସ୍ତି ତଡ଼ାନ୍କୁ ୱେଡ଼ିକାଦାନ୍ ମାଙ୍ଗିଁ କୁକ୍ତାର୍ । 18ମାରିନାଣ୍ତିଙ୍ଗ୍ଁ ପାଉଲ ମା ୱାଲେ ଜାକୁବଙ୍ଗ୍ ସୁଡ଼୍ଦେଙ୍ଗ୍ ସର୍ହାନ୍; ମଣ୍ତଲି ୱିଜୁ ନେତାର୍ ଆବେ ଉଣ୍ତାତା ମାର୍ହାର୍ । 19ପାଉଲ ୱାରିଙ୍ଗ୍ ମାଡ଼ିସ୍କିଜି ୱାନି ସେବା ପାଣିଦାନ୍ ମାପୁରୁ ଅଣଜିହୁଦି ଲୋକା ଲୋଇ ଆମାକା ଆମାକା କିତାମାର୍ହାନ୍; ତାନି ଉନ୍ଣ୍ତ୍ରି ପୁରା ମାଟା ସିତାନ୍ । 20ୱାନି ମାଟା ୱେର୍ଇ ୱେନ୍କା ୱାର୍ ୱିଜେରେ ମାପୁରୁଦି ଦନ୍ୟବାଦ୍ କିତାର୍ । ତାନି ୱେନ୍କା ୱାର୍ ଇର୍ହାର୍, “ତଡ଼ାନ୍ ପାଉଲ, ନିନ୍ ସୁଡ଼୍ଜିନି, ଏଣ୍ତେସ୍ ଇଲେଇ ହାଜାର୍ ହାଜାର୍ ଜିହୁଦି ଲୋକୁ ପ୍ରବୁ ଜିସୁମାନୁ ବିସ୍ବାସ୍ କିଜିନାର୍ ମାରି ୱାର୍ ନିୟମ୍ ଉଣ୍ତିଙ୍ଗ୍ ବା ବିସ୍ବାସ୍ତାନ୍ ତେବାତାମାନାର୍ । 21ୱାର୍ କାବୁର୍ ପୟ୍ତାମାନାର୍ ଜେ, ନିନ୍ ଅଣଜିହୁଦି ଲୋକା ଦେସ୍ତୁ ବାସାଜି ମାନି ଜିହୁଦି ଲୋକାଙ୍ଗ୍ ମୋସାଦି ନିୟମ୍ ଡ଼ିସ୍ତେଙ୍ଗ୍ଁ, ୱାରି କଡ଼ରିଙ୍ଗ୍ ସୁନ୍ନତ କିଇ ଉଣ୍ତିଙ୍ଗ୍ ମାରି ଜିହୁଦି ରିତିନିତି ମାନାଇ ଉଣ୍ତିଙ୍ଗ୍ ସିକିୟା ସିଜିନି । 22ନିନ୍ ଇବେ ୱାତିମାନି ଇଜି ୱାର୍ ସତେନେ ୱେନାର୍ । ଆର୍ତିଙ୍ଗ୍ଁ ଇନିକା କିଦେଙ୍ଗ୍ ଆନାତ୍ ? 23ମାପ୍ ବଦାକିଜିନାପ୍, ନିନ୍ ଉନ୍ଣ୍ତ୍ରି ପାଣି କିଆ । ଇବେମାନି ନାଲ୍ଏର୍ ଲୋକୁ ଉନ୍ଣ୍ତ୍ରି ଅପାତାମାନାର୍ । 24ୱାରି ୱାଲେ ସାଙ୍ଗ୍ଆ । ନେଗେନ୍କିନି ବିଦି ମାନାନିମାନୁ ୱାରି ୱାଲେ ମିସାଜି ୱାରି କାର୍ସୁ କିଆ । ତାନିୱେନ୍କା ୱାର୍ ନିଜେ ନିଜେଦି ତାଲା ଟାଙ୍ଗୁଁରୁ କିନାର୍ । ଇବେଟ୍ତାନ୍ ଜଣା ପଡ଼ାନାତ୍ ଜେ, ନି ବିସୟ୍ତାନ୍ ୱେଙ୍ଗିଁତି ମାନି ଇନି ମାଟା ସତ୍ ସିଲେ, ମାତର୍ ନିନ୍ ମସାଦି ନିୟମ୍ ଇସାବ୍ତାନ୍ ଜିଜିନି । 25#ପ୍ରେରିତ ୧୫:୨୯.ମାତର୍ ଏମେ ଅଣଜିହୁଦି ଲୋକୁ ବିସ୍ବାସ୍ ଆତାମାନାର୍, ୱାରି ଲାକ୍ତୁ ମାପ୍ ଉନ୍ଣ୍ତ୍ରି ଆକୁ ରାସ୍ସି ସିକିୟା ସିତାମାନାପ୍ ଜେ, ମା ମାଟାଦି ଇସାବ୍ତାନ୍ ୱାର୍ ଦିୟାମ୍କା ଲାକ୍ତୁ ପୁଜାସିତିମାନି କାଦି ଉଣୁଏର୍, ନେତେର୍ ଉଣୁଏର୍, କକ୍ଲା ପିଡ଼ିସି ସାପିସ୍କିତିମାନି ପସୁଦି କାଣ୍ତା ତିନ୍ଏର୍ ମାରି ଦାରିପାଣିଦାନ୍ ଆକତେବାଦୁ ।”
26ମାରିନାଣ୍ତିଙ୍ଗ୍ଁ ପାଉଲ ୱାତିମାର୍ଇ ନାଲ୍ଏରି ୱାଲେ ନେଗେନ୍କିନି ବିଦି ମାନାତାର୍ । ୱେନ୍କା ୱାନ୍ ମନ୍ଦିର୍ତୁ ସଲ୍ସି ନେଗେନ୍କିନି ପାଣି ଏସାଙ୍ଗ୍ଁ ୱିଜ୍ନାତ୍ ମାରି ଆମା ୱେଡ଼ାଦୁ ପୁଜାସିନିକା ମାନାତ୍, ଆକା ୱେର୍ତା ସିତାନ୍ ।
ପାଉଲ ମନ୍ଦିର୍ ଲୋଇ ତରାୟ୍ଆତାନ୍
27ନେଗେନ୍କିନି ପାଣିଦି ସାତ୍ ଦିନ୍ ୱିଜିତି ୱେନ୍କା ଆସିଆ ରାଜିଦି ଏସ ଜିହୁଦି ଲୋକୁ ମନ୍ଦିର୍ତୁ ପାଉଲ୍ତିଙ୍ଗ୍ ସୁଡ଼ୁତାର୍ । ୱାର୍ ଆବେ ଉଣ୍ତାତିମାର୍ଇ ଲୋକାଙ୍ଗ୍ ଏଗ୍ରିସ୍ କିଜି ପାଉଲ୍ତିଙ୍ଗ୍ଁ ଆସ୍ତାର୍ । 28ୱାର୍ ଆଉଲି ଆଜି ଇର୍ହାର୍, “ଏ ଇସ୍ରାଏଲ୍ତି ଲୋକୁ, ମାଙ୍ଗିଁ ସାକା କିଦୁ ! ଇୟା ଲୋକୁ ସାରିବେଡ଼୍ତି ସଲ୍ସି ଇସ୍ରାଏଲ୍ତି ଲୋକା ବିରୁଦ୍ତାନ୍, ମସାଦି ନିୟମ୍ ନି ଇୟା ମନ୍ଦିର୍ ବିରଦ୍ତାନ୍ ସିକିୟା ସିଜିନାନ୍ । ମାରି ଇଲେଇ ୱାନ୍ ଏସ ଅଣଜିହୁଦି ଲୋକାଙ୍ଗ୍ ମନ୍ଦିର୍ ଲୋଇ ତାସି ଇୟା ପବିତ୍ର ବାଡିଦିଙ୍ଗ୍ଁ ତାଗ୍ଇକା କିଜିନାନ୍ ।” 29#ପ୍ରେରିତ ୨୦:୪.ୱାର୍ ଗାଡ଼୍ତୁ ଏପିସସ୍ତି ତ୍ରପିମଦିଙ୍ଗ୍ଁ ପାଉଲତି ୱାଲେ ସୁଡ଼ୁତିମାରିଙ୍ଗ୍ଁ ଅଡ଼୍ବିତାର୍ ଜେ, ପାଉଲ ୱାନିଙ୍ଗ୍ ମନ୍ଦିର୍ତୁ ଅତାମାନାନ୍ ।
30ୱିଜୁ ଗାଡ଼୍ତୁ ଜାଟି ନିଙ୍ଗିଁତାତ୍ । ଲୋକୁ ପାଉଲ୍ତିଙ୍ଗ୍ଁ ମନ୍ଦିର୍ ଆତ୍ରେ ଇର୍ସି ତାତାର୍ । ମନ୍ଦିର୍ତି ସେର୍ଲେଙ୍ଗ୍ ୱିଜୁ କେର୍ତା ଡ଼ିସ୍ତାର୍ । 31ରିସାଆତି ଲୋକୁ ୱିଜେରେ ପାଉଲ୍ତିଙ୍ଗ୍ଁ ଡାକ୍ତେଙ୍ଗ୍ଁ ଇଜି ଉପାୟ୍ କିତାର୍, ଏସ୍ତିୱାଲେ ୱିଜୁ ଜିରୁସାଲାମ୍ତୁ ଜାଟି ଜଗଡ଼ା ଆଜିନାତ୍ ଇଜି ରୋମିୟ ସନ୍ୟରି ନେତା କାବୁର୍ ୱେର୍ଆନ୍ । 32ନାସ୍ତିୱାଲେ ନେତା ଏସ ସେନାପତି ନି ସନ୍ୟରିଙ୍ଗ୍ଁ ଅସି ଜାଟି ଜଗଡ଼ା ଆନି ବାଡିଦୁ ଇତାନ୍ । ଲୋକୁ ସନ୍ୟରି ନେତେଙ୍ଗ୍ଁ ନି ସନ୍ୟରିଙ୍ଗ୍ଁ ସୁଡ଼୍ଜି ପାଉଲ୍ତିଙ୍ଗ୍ଁ ମାରି ମାଡ୍ ଡାକ୍ଏନ୍ଣ୍ତା ଡ଼ିସ୍ତାସିତାର୍ । 33ସନ୍ୟରି ନେତା ପାଉଲତିଙ୍ଗ୍ଁ ଆସ୍ସି ୱାନିଙ୍ଗ୍ଁ ରୁଣ୍ତି ସିକ୍ଣି ଦାନ୍ ତର୍ତେଙ୍ଗ୍ଁ ଇଜି ଆଦେସ୍ ସିତାନ୍ । ୱେନ୍କା ୱାନ୍ ୱେନ୍ବାତାନ୍, “ଇୟା ଲୋକୁ ଏନ୍ ମାରି ୱାନ୍ ଇନିକା କିତାମାନାନ୍ ?” 34ଲୋକୁ ଗଲି ଲୋଇ ଏନ୍ ଏସ ରକମ୍ତି ମାଟା ଇଜି ଆଉଲି ଆତାର୍ । ଇୟାୱାଜା ଅସାନ୍ତି ଆତାତ୍ଜେ, ସନ୍ୟରି ନେତା ସତ୍ ମାଟା ଇନିକା, ଇନିକାବା ନେସ୍ତେଙ୍ଗ୍ ଆଟ୍ଏତାନ୍ । ଆବେଟ୍ ୱାନ୍ ପାଉଲତିଙ୍ଗ୍ଁ ସନ୍ୟର୍ତେବାନି ବାଡି ଲୋଇ ଅତେଙ୍ଗ୍ଁ ଇଜି ସନ୍ୟରିଙ୍ଗ୍ ଆଦେସ୍ ସିତାନ୍ । 35ୱାର୍ ୱାନିଙ୍ଗ୍ଁ ଅସି ସନ୍ୟର୍ତେବାନି ବାଡିଦି ପାଉଚ୍କୁ ଲାକ୍ତୁ ଇନି ୱେଡ଼ାଦୁ ୱାନିଙ୍ଗ୍ଁ କେର୍ବାଜି ତେବାଜିମାନି ଲୋକୁ ନିସା ରିସା ଆତାର୍ ଜେ ସନ୍ୟର୍ ପାଉଲ୍ତିଙ୍ଗ୍ଁ ପିଣ୍ତ୍ତା ଅତାର୍ । 36ଲୋକୁ ୱିଜେରେ ୱାନି ୱେନ୍କା ୱେନ୍କା ୱାଜି ଆଉଲି ଆଜି ଇଜିମାର୍ହାର୍, “ୱାନିଙ୍ଗ୍ଁ ଡାକ୍ଦୁ ।”
ପାଉଲ ନିଜେଦି ତରିଟାନ୍ ମାଟା ଆଙ୍ଗିଁତାନ୍
37ସନ୍ୟର୍ ପାଉଲତିଙ୍ଗ୍ଁ ସନ୍ୟର ତେବାନି ବାଡି ଲୋଇ ଅନି ୱାଲେ ୱାନ୍ ସନ୍ୟରି ନେତେଙ୍ଗ୍ଁ ଇର୍ହାନ୍ : “ନାନୁ ନିଙ୍ଗିଁ ଏସ ମାଟା ଇନ୍ଡ୍ରେଙ୍ଗ୍ଁ ଆଟ୍ନାନ୍ ନୋ ?”
ସନ୍ୟରି ନେତା ୱେନ୍ବାତାନ୍, “ନିନୁ ତୋ ଗ୍ରିକ୍ ୱାର୍ଗିଜିନି । 38ଆର୍ତିଙ୍ଗ୍ଁ ଏସ ଦିନ୍ ଆଗ୍ଡ଼ି ମିସର୍ ଏମେ ଲୋକୁ ଜୁଦ୍ କିଜି ଚାରି ହାଜାର୍ ଜୁଦ୍ ସାମାନ୍ ଆସ୍ତି କାଙ୍ଗାଁର୍ଆଙ୍ଗ୍ ଅସି ମରୁବୁମିଦୁ ଇତା ମାର୍ହାନ୍, ନିନୁ ତୋ ଆୟା ଲୋକୁ ସିଲେ ?”
39ପାଉଲ ଇର୍ହାନ୍, “ସିଲିସିଆଦି ତାର୍ସସ୍ତୁ ଜନମ୍ ଆତିମାନି ନାନୁ ଅରେନ୍ ଜିହୁଦି, ଉନ୍ଡ୍ରି ପେରି ଗାଡ଼୍ତି ଲୋକୁ । ଇୟା ଲୋକାଙ୍ଗ୍ ବୁଜାକିଜି ଇନ୍ଡ୍ରେଙ୍ଗ୍ଁ ଇଜି ଦୟା କିଜି ନାଙ୍ଗିଁ ସାରି ସିଦା ।
40“ସନ୍ୟରି ନେତା ୱାନିଙ୍ଗ୍ଁ ସାରି ସିତାନ୍ଆକା ପାଉଲ ପାଉଚ୍ ମୁସ୍କୁ ନିଲ୍ସି ଲୋକାଙ୍ଗ୍ ଆଲେଜ ମାନ୍ଡ୍ରେଙ୍ଗ୍ଁ ଇଜି କିୟୁ ପେର୍ଜି ଜୁଟ୍ସି ୱେର୍ତାନ୍ । ୱାର୍ ଆଲେତି ୱେନ୍କା ପାଉଲ ଏବ୍ରି ଭାସାଦାନ୍ ଇର୍ହାନ୍ :
Currently Selected:
ପ୍ରେରିତ 21: NTKoo20
Highlight
Share
Copy
Want to have your highlights saved across all your devices? Sign up or sign in
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020
