ପ୍ରେରିତ 15
15
ଜିରୁସାଲାମ୍ତୁ କ୍ରିସ୍ଟାନ୍ ମିଟିଙ୍ଗ୍ଁ
1ଜିହୁଦାଦାନ୍ ଏସ ଲୋକୁ ଆଣ୍ଟିୟକଦୁ ୱାଜି, ମୋସାଦି ନିୟମ ଇସାବ୍ତାନ୍ ୱାର୍ ସୁନ୍ନତ ଆଏତିଙ୍ଗ୍ଁ ରକିୟା ପୟ୍ଦେଙ୍ଗ୍ଁ ଆଟ୍ଏର୍ ଇଜି ବିସ୍ବାସ୍ତି ତଡ଼ାନ୍କାଙ୍ଗ୍ ସିକିୟା ସିତାର୍ । 2ଇୟା ବିସୟ୍ତାନ୍ ୱାରି ୱାଲେ ପାଉଲ ନି ବର୍ଣ୍ଣବା ନାଣ୍ତ ଆସ୍ସିସାତାର୍ ଆକା, ଇକା ତିର୍ ଆତାତ୍ଜେ, ପାଉଲ, ବର୍ଣ୍ଣବା ମାରି ଆଣ୍ଟିୟକଦି ମାରି ଏସ ଲୋକୁ ଜିରୁସାଲାମ୍ତୁ ସଲ୍ସି ପ୍ରେରିତ ସିସୁର୍ ନି ମଣ୍ତଲିଦି ନେତାର୍ରି ୱାଲେ ଇୟା ବିସୟ୍ତାନ୍ ୱାର୍ଗିଜିସାନାର୍ ।
3ମଣ୍ତଲି ୱାରି ସନି ସୁବିଦା କିଜି ପକ୍ତାତ୍ ମାରି ୱାର୍ ପିନିସିଆ ନି ସମିରୋଣ ସିଜି ସନି ୱାଲେ ଅଣଜିହୁଦି ଲୋକୁ ଏଣ୍ତେସ୍ ମନ୍ ଡ଼େପ୍ସି ଦାର୍ମୁଲୋକୁ ଆତାମାନାର୍, ଆୟା ବିସୟ୍ ୱେର୍ତାର୍; ଇୟା କାବୁର୍ ୱେନ୍ଜି ବିସ୍ବାସ୍ତି ତଡ଼ାନ୍କୁ ନାଣ୍ତ ୱେଡ଼ିକା ଆତାର୍ । 4ୱାର୍ ଜିରୁସାଲାମ୍ତୁ ଇତି ୱେନ୍କା ମଣ୍ତଲି, ପ୍ରେରିତ ସିସୁର୍ ମାରି ମଣ୍ତଲିଦି ନେତାର୍ ୱାରିଙ୍ଗ୍ଁ କୁକ୍ତାର୍ । ମାପୁରୁ ୱାରି ମାଣାନ୍ କିତିମାନି ପାଣି ବିସୟ୍ତାନ୍ ପାଉଲ ନି ବର୍ଣ୍ଣବା ୱାରିଙ୍ଗ୍ଁ ୱେର୍ତାର୍ । 5ମାତର୍ ପାରୁସିର୍ ଇସାବ୍ତାନ୍ ଜିନି ଏସ ବିସ୍ବାସିର୍ ନିଲ୍ସି ଇର୍ହାର୍, “ଅଣଜିହୁଦି ଲୋକୁ ସୁନ୍ନତ ଆନିକା ମାନାତ୍ ମାରି ମୋସାଦି ନିୟମ୍ ମାନାଦେଙ୍ଗ୍ ଇଜି ୱାରିଙ୍ଗ୍ଁ ଇନିକା ନେଗେତ୍ ।”
6ଇୟା ବିସୟ୍ ୱାର୍ଗିଦେଙ୍ଗ୍ଁ ଇଜି ପ୍ରେରିତ ସିସୁର୍ ମାରି ମଣ୍ତଲିଦି ନେତାର୍ ଉଣ୍ତାତାର୍ । 7ନାଣ୍ତ ସମୟ ୱାର୍ଗିତି ୱେନ୍କା ପିତର ନିଲ୍ଜି ଇର୍ହାନ୍, “ତଡ଼ାନ୍କୁ ନି ତାଙ୍ଗିଁକ୍, ମିର୍ ନେସ୍ନିଦେର୍ ଜେ ନାଣ୍ତ ଆଗ୍ଡ଼ିରାନ୍ ମାପୁରୁ ଅଣଜିହୁଦି ଲୋକୁ ଲାକ୍ତୁ ସୁସମାଚାର୍ ପ୍ରଚାର୍ କିଜି ଆୟାଉଣ୍ତିଙ୍ଗ୍ ୱାରି ବିସ୍ବାସ୍ କିବିସ୍ କିଦେଙ୍ଗ୍ଁ ଇଜି ମି ମାଣ୍କୁ ନାଙ୍ଗିଁ ବାସେ କିତାମାର୍ହାର୍ । 8#ପ୍ରେରିତ ୧୦:୪୪; ୨:୪.ମାରି ୱିଜେରି ମନ୍ତି ଚିନ୍ତା ନେସ୍ସିମାନି ମନ୍ତୁବାସାନି ମାପୁରୁ ମାଙ୍ଗିଁ ଏଣ୍ତେସ୍ ପବିତ୍ର ଆତ୍ମା ସିତା ମାନାନ୍, ଅଣଜିହୁଦି ଲୋକାଙ୍ଗ୍ ବା ଟିକ୍ ଆୟାୱାଜା ଦାନ୍ ସିଜି ୱାରିଙ୍ଗ୍ଁ ସାକି ମାନାନ୍ । 9ୱାରିଦି ନି ମା ଲୋଇ ୱାନ୍ ଇନିକା ଅଲଗା ଇଡ୍ଏନ୍ । ୱାରି ବିସ୍ବାସ୍ ଉଣ୍ତିଙ୍ଗ୍ଁ ୱାନ୍ ୱାରି ପାପ୍ କେମା କିତାମାନାନ୍ । 10ଆର୍ତିଙ୍ଗ୍ଁ ଏମେ ବଜୁ ପିଣ୍ତ୍ଦେଙ୍ଗ୍ଁ ଇଜି ମା ଡକ୍ରାଦାଦା ନି ମାପ୍ ସାସ୍ କିଦେଙ୍ଗ୍ଁ ଆଟ୍ଏତାପ୍, ମିର୍ ଇଲେଇ ବିସ୍ବାସିରି ମେପିଦୁ ଆକା ଲାଦେ କିଜି ଏନ୍ଦା ମାପୁରୁଙ୍ଗ୍ଁ ପରିକା କିଦେଙ୍ଗ୍ ବଦାକିଜିନିଦେର୍ ? 11ସିଲେ, ଇକା ଟିକ୍ ସିଲେ । ୱାର୍ ଏମେ ବିସ୍ବାସ୍ କିଜି ରକିୟା ପୟ୍ତାମାନାର୍, ମାପ୍ ବା ଟିକ୍ ଆୟାୱାଜା ବିସ୍ବାସ୍ କିଜି ପ୍ରବୁ ଜିସୁଦି ଦୟା ଦାନ୍ ପରିତ୍ରାଣ ପୟ୍ତାମାନାପ୍ ।”
12ପାଉଲ ନି ବର୍ଣ୍ଣବାଦି ମାଣାନ୍ ଅଣଜିହୁଦି ଲୋକା ଲୋଇ ମାପୁରୁ ଏମେ ୱିଜୁ ନାଣ୍ତ କାବାଆନି ପାଣି ନି କାବାଆନି ବିସୟ୍ କିତାମାର୍ହାନ୍, ୱାରିମାଣ୍କୁ ତାନେ ମାଟା ୱେନ୍ଜି ଦଲତି ୱିଜେରେ ଆଲେତା ତେବାତାର୍ । 13ୱାର୍ ଇର୍ହି ୱିସ୍ତି ୱେନ୍କା ଜାକୁବ ଇର୍ହାନ୍, “ଏ ତଡ଼ାନ୍କୁ ନି ତାଙ୍ଗିଁକି, ନା ମାଟା ୱେନ୍ଡ୍ରୁ ! 14ମାପୁରୁ ଏଣ୍ତେସ୍ ଦୟା କିଜି ଅଣଜିହୁଦି ଲୋକା ଲୋଇ ଏସ ଲୋକାଙ୍ଗ୍ ୱାରି ଉଣ୍ତିଙ୍ଗ୍ଁ ବାସେ କିତାମାନାନ୍, ସିମୋନ ଆୟା ମାଟା ବୁଜାକିଜି ୱେର୍ତାନ୍ । 15ବାବବାଦିରି ବାକ୍ୟ ତେନିଙ୍ଗ୍ଁ ପୁରାଦାନ୍ ମାନାଜିନାତ୍ । ସାସ୍ତ୍ରଦୁ ରାସାତାମାନାତ୍;
16“ପ୍ରବୁ ଇନାନ୍, ତେନି ୱେନ୍କା ନାନ୍ ଡ଼େସି ୱାନା
ମାରି ଦାଉଦତି ରାଜିଦି ମାରିଡ଼େସି ରକିୟା କିନା ।
ନାନ୍ ୱାନି ଦଂସଆତି ଗୁଡ଼ା ୱିଜୁ
ମାରିଡ଼େସି ତିଆର୍ କିଜି ତାନିଙ୍ଗ୍ ମାରି ଉଣ୍ତ୍ରି ଦେବା ସାକ୍ତି କିନା ।
17ୱିଜୁ ଲୋକୁ ନା ଲାକ୍ତୁ ୱାନାର୍,
ଏମେ ଅଣଜିହୁଦି ଲୋକାଙ୍ଗ୍ଁ ନାନ୍ ନିଜେଦିକା କିଦେଙ୍ଗ୍ଁ ଇଜି କୁକ୍ତାମାନା, ୱାର୍ ୱିଜେରେ ନାନ୍ଦି ଇଜି ମାନାନାର୍ ।
18ପ୍ରବୁ ଇୟା ମାଟା ଇର୍ହାମାନାନ୍, ପୁର୍ବେକାଡ଼ାଦୁ ଇୟା ମାଟା ୱାନ୍ ୱେର୍ତା ମାର୍ହାନ୍ ।”
19“ନା ବିଚାର୍ ଇକା,” ଜାକୁବ ମାରି ବା ଇର୍ହାନ୍, ଏମେ ଅଣଜିହୁଦି ଲୋକୁ ମାପୁରୁଦି ଲାକ୍ତୁ ୱାତାମାନାର୍, ମାଡ୍ ୱାରିଙ୍ଗ୍ଁ ମାରି ବାଦା କିଏଟ୍ । 20ମାତର୍ ୱାର୍ ଏଣ୍ତେସ୍ ଦିୟାମ୍କାଙ୍ଗ୍ଁ ପୁଜାସିତିମାନି ଇନି ଅସୁଚି କାଦି ଉଣୁଏର୍, ଦାରିପାଣି କିନି ପାପ୍ତାନ୍ ତେବାନାର୍, କକ୍ଲା ସିପ୍ସି ଡାକ୍ତିମାନି ଜାତୁଦି ନେତେର୍ ନି କାଣ୍ତା ତିନ୍ଏର୍ ଇୟାୱିଜୁ ବିସୟ୍ତାନ୍ ସିକିୟା ସିଜି ୱାରି ଲାକ୍ତୁ ଉଣ୍ତ୍ରି ଆକୁ ରାସ୍ନାଟ୍ । 21ଇରିଙ୍ଗ୍ଁ ନାଣ୍ତଦିନ୍ ଆସ୍ସି ୱିଜୁ ରମ୍ନିଦିନ୍ତୁ ପାର୍ତନାକିନି ଇଲ୍କାଙ୍ଗ୍ ମୋସାଦି ନିୟମ୍ ପଡ଼ା ଆଜିନାତ୍ ମାରି ୱିଜୁ ଗାଡ଼୍କାଙ୍ଗ୍ଁ ୱାନି ବାକ୍ୟ ପ୍ରଚାର୍ ଆଜିନାତ୍ ।
ଅଣଜିହୁଦି ବିସ୍ବାସିରି ଲାକ୍ତୁ ଆକୁ
22ୱେନ୍କା ପ୍ରେରିତ ସିସୁର୍ ନି ମଣ୍ତଲିଦି ନେତାର୍ ମାରି ମଣ୍ତଲିଦି ୱିଜେରେ, ଦଲତି ଏସ ଲୋକାଙ୍ଗ୍ ବାସେକିଜି ପାଉଲ ନି ବର୍ଣ୍ଣବାଦି ୱାଲେ ୱାରିଙ୍ଗ୍ଁ ଆଣ୍ଟିୟକଦୁ ପକ୍ତେଙ୍ଗ୍ଁ ଇଜି ତିର୍ କିତାର୍ । ବର୍ସବା ଦର୍ତି ଜିହୁଦା ନି ସିଲା ବିସ୍ବାସ୍ତି ତଡ଼ାନ୍କା ଲୋଇ ସନ୍ମାନ୍ ପୟ୍ତାର୍ । 23ବିସ୍ବାସିର୍ ରାସାତିମାନି ଆକୁଦିଙ୍ଗ୍ ଇୟା ରିଏରି କିୟୁଦୁ ପକ୍ତାର୍ ।
“ଆଣ୍ଟିୟକ, ସିରିଆ ମାରି କିଲିକିୟାଦି ଅଣଜିହୁଦିରି ମାଣ୍କୁ ୱାତିମାନି ତଡ଼ାନ୍କୁ ପ୍ରେରିତ ସିସୁର୍ ମାରି ମଣ୍ତଲିଦି ନେତାର୍ ମାଡ଼ିସ୍ କିଜିନାର୍ । 24ମାପ୍ ୱେନ୍ଜିନାପ୍ ଜେ, ମା ଦଲ୍ତାନ୍ ଏସ ଲୋକୁ ମି ଲାକ୍ତୁ ସଲ୍ସି ଆମାକା ଇର୍ହାମାନାର୍, ଆବେଣ୍କୁ ୱାର୍ ମି ମନ୍ତିଙ୍ଗ୍ ଗାବ୍ରା ନି ତରବର୍ କିତାମାନାର୍ । ମାତର୍ ଇୟା ବିସୟ୍ତାନ୍ ମାପ୍ ୱାରିଙ୍ଗ୍ଁ ଇନି ସିକିୟା ସିଏପ୍ । 25ଆଦେଙ୍ଗ୍ ମାପ୍ ୱିଜେପେ ଉନ୍ଣ୍ତ୍ରି ମାଟା ଆଜି ଏସ ଲୋକ କାବୁର୍ ସିନିୱାରିଙ୍ଗ୍ଁ ବାସେ କିଜି ମି ଲାକ୍ତୁ ପକ୍ତେଙ୍ଗ୍ଁ ଇଜି ଆସ୍କିତାମାନାପ୍ । ୱାର୍ ମା ଲାଡ୍ତି ତଡ଼ାନ୍ ବର୍ଣ୍ଣବା ନି ପାଉଲତି ୱାଲେ ସନାର୍ । 26ଇୟା ତଡ଼୍କୁ ପ୍ରବୁ ଜିସୁ କ୍ରିସ୍ତଦି ସେବାଦୁ ନିଜେଦି ଜିବନ୍ତିଙ୍ଗ୍ଁ ସିତା ମାନାର୍ । 27ମାପ୍ ଜିହୁଦା ନି ସିଲେଙ୍ଗ୍ଁ ମି ଲାକ୍ତୁ ପକ୍ସିନାପ୍ । ମାପ୍ ଆମାକା ରାସ୍ସିନାପ୍, ୱାର୍ ନିଜେ ଆକା ମିଙ୍ଗିଁ ଇନାର୍ । 28ଏସ ଦରକାର୍ ମାନି ନିୟମ୍ ଡ଼ିସ୍ତିଙ୍ଗ୍ଁ ମି ମୁସ୍କୁ ମାରି ଇନି ବଜୁ ତିଗ୍ଇ ଉଣ୍ତିଙ୍ଗ୍ ମାପ୍ ପବିତ୍ର ଆତ୍ମାଦି ମାଣାନ୍ ସିକିୟା ପୟ୍ତାମାନାପ୍ । 29ଆୟା ଏସ ନିୟମ ଆତାତ୍; ଦିୟାମ୍କା ଉଦେସ୍ତାନ୍ ପୁଜାସିତିମାନି ଇନି କାଦି ଉଣ୍ମାଟ୍, ନେତେର୍ ତିନ୍ମାଟ୍, କକ୍ଲାଦିଙ୍ଗ୍ ପିଡ଼୍ସି ଡାକ୍ତିମାନି ଇନି ଜାତୁଦି କାଣ୍ତା ତିନ୍ମାଟ୍ ମାରି ଦାରିପାଣିଦାନ୍ ବନ୍ଦ୍ ଆନାତ୍ । ଇୟାୱିଜୁ ପାଣି କିଇ ଉଣ୍ତିଙ୍ଗ୍ଁ ଜାଗାର୍ତା ମାରିଙ୍ଗ୍ଁ, ମି ନେଗିକା ଆନାତ୍ । ମା ମାଟା ଆସ୍ତୁ ।”
30ଆମା କାବୁର୍ ସିନିୱାରିଙ୍ଗ୍ଁ ପକ୍ତାମାର୍ହାର୍, ୱାର୍ ଆଣ୍ଟିୟକଦୁ ସଲ୍ସି ବିସ୍ବାସିରି ୱିଜୁ ଦଲ୍ତିଙ୍ଗ୍ଁ ଉଣ୍ତା କିଜି ଇୟା ସିଟି ସିତାର୍ । 31ଆବେଣି ବିସ୍ବାସିର୍ ସିଟିଦି ୱେଡ଼ିକାଦି କାବୁର୍ ପଡ଼ାଜି ୱେଡ଼ିକାଦୁ ପୁରା ଆତାର୍ । 32ଜିହୁଦା ନି ସିଲା ନିଜେ ବାବବାଦି ମାର୍ହାର୍ ମାରି ୱାର୍ ଆଣ୍ଟିୟକଦି ବିସ୍ବାସିରିଙ୍ଗ୍ଁ ନାଣ୍ତ ବେଡ଼ା ସାନ୍ଦି ୱାର୍ଜି ତଡ଼ାନ୍କାରି ବିସ୍ବାସ୍ତିଙ୍ଗ୍ଁ ଡାଟ୍ କିତାର୍ । 33ଆବେ ଏସ ଦିନ୍ ତେବାତି ୱେନ୍କା ଏମେକାର୍ ୱାରିଙ୍ଗ୍ଁ ପକ୍ତାମାର୍ହାର୍, ୱାରି ଲାକ୍ତୁ ଡ଼େସିସନ୍ଡ୍ରେଙ୍ଗ୍ ଇଜି ବିସ୍ବାସ୍ତି ତଡ଼ାନ୍କୁ ୱାରିଙ୍ଗ୍ଁ ସାନ୍ତିଦାନ୍ ପକ୍ତାର୍ । 34ମାତର୍ ସିଲା ଆବେନୁ ମାନିକା ନେଗେନ୍ ଇଜି ଅଡ଼୍ବିତାତ୍ ।
35ପାଉଲ ନି ବର୍ଣ୍ଣବା ଆଣ୍ଟିୟକଦୁ ଏସ ଦିନ୍ ତେବାଜି ନାଣ୍ତ ଲୋକା ୱାଲେ ମିସାବିଡ଼ା ଆଜି ପ୍ରବୁଦି ବାକ୍ୟ ପ୍ରଚାର୍ କିତାର୍ ମାରି ସିକିୟା ସିତାର୍ ।
ପାଉଲ ନି ବର୍ଣ୍ଣବା ୱେର୍ଏ ଆତାର୍
36ଏସ ଦିନ୍ ୱେନ୍କା ପାଉଲ ବର୍ଣ୍ଣବାଦିଙ୍ଗ୍ଁ ଇର୍ହାନ୍, “ସନାଟ୍, ମାଡ୍ ଡ଼େସିସନାଟ୍, ୱିଜୁ ଗାଡ଼୍କାଙ୍ଗ୍ଁ ଏମେ ତଡ଼ାନ୍କାଙ୍ଗ୍ ପ୍ରବୁଦି ବାକ୍ୟ ଏଣ୍ତେସ୍ ୱେନିସ୍ କିତିମାର୍ହିକା, ତଡ଼ାନ୍କାଙ୍ଗ୍ ମିସାନାଟ୍ ମାରି ୱାର୍ ଏଣ୍ତେସ୍ ମାନାର୍, ବୁଜାନାଟ୍ । 37ବର୍ଣ୍ଣବା ୱାରି ୱାଲେ ଜୋହନ ଦର୍ତି ମାର୍କଙ୍ଗ୍ଁ ଅତେଙ୍ଗ୍ଁ ଇଜି ବଦାକିତା ମାର୍ହାନ୍, 38ମାତର୍ ପାଉଲ ୱାନିଙ୍ଗ୍ଁ ଅତେଙ୍ଗ୍ ଟିକ୍ ଅଡ଼୍ବିଏତାନ୍; ଇରିଙ୍ଗ୍ଁ ୱାନ୍ ଆଗ୍ଡ଼ି ପ୍ରଚାର୍ କିଦେଙ୍ଗ୍ ସନି ପାଣିଦୁ ୱିଜ୍ନି ସାନ୍ଦି ୱାରି ୱାଲେ ତେବାଏନ୍ଣ୍ତା ୱାରିଙ୍ଗ୍ଁ ପାମ୍ଫିଲିଆଦୁ ଡ଼ିସ୍ସି ସର୍ହାମାର୍ହାନ୍ । 39ଇୟା ବିସୟ୍ତାନ୍ ନାଣ୍ତ ଆସ୍ସିସାତାର୍ ମାରି ୱାର୍ ୱେର୍ଏ ଆତାର୍ । ବର୍ଣ୍ଣବା ମାର୍କଙ୍ଗ୍ଁ ଆସ୍ସି ସାଇପ୍ରସ୍ତୁ ଏରୁ ସାରିଦୁ ସର୍ହାନ୍ ।” 40ମାତର୍ ପାଉଲ ସିଲେଙ୍ଗ୍ଁ ଆସ୍କିତାନ୍ ମାରି ବିସ୍ବାସ୍ତି ତଡ଼ାନ୍କା ମାଣାନ୍ ପ୍ରବୁଦି ଦୟାଦାନ୍ ସର୍ପେ ଆଜି ସର୍ହାର୍ । 41ୱାନ୍ ମଣ୍ତଲିଆଙ୍ଗ୍ଁ ସାକ୍ତିକିବିସ୍ କିଜି ସିରିଆ ନି ସିଲିସିଆ ବା ସିଜି ସର୍ହାର୍ ।
Currently Selected:
ପ୍ରେରିତ 15: NTKoo20
Highlight
Share
Copy
Want to have your highlights saved across all your devices? Sign up or sign in
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020
