लूका 4
4
आळी दा यीशु उन परीक्षा
(मत्ती ४:१-११; मरकुस १:१२,१३)
1बाक यीशु पवित्र आत्मा देल परिपुर्ण आगकु यरदन गांगा टु वापस बंदुन. 2अदिक चालीस दिन ताका आत्मा अन्द कल्सदुर देल सुनसान जागा दा टेटाळतेला ईत्तुन; अदिक शैतान आऊन परीक्षा माळतेला ईत्त. आ दिनगोळ दा यीशु येनु तंदिदील, अदिक याग अव दिन पुरा आदव, रा आऊक हसु हत.
3आग शैतान यीशु उक अंदुन, “अगर नी परमेश्वर उन पार हुय, रा ई कल्ल देल अन, कि रोट्टी आगेगुल.”
4यीशु आ शैतान उक उत्तर कोट्टुन, “शास्त्र दा लिख्सकु आद: मंळसा सिर्फ रोट्टी देल अच जित्ता ईरतीदील.”
5बाक शैतान यीशु उक ऊंद हापाळ ऊँचा पहाळी मा ओईत अदिक आऊक घळी तिमुर दा दुनिया अन्द सप्पा राज्य तोर्स बुळ्त, 6अदिक आग शैतान यीशु से अंत, “ना ई सप्पा अधिकार, अदिक सप्पा वैभव ना नीनी कोट बुळाईन, यतिकी अद नानी सोपस्कु आग्याद: अदिक ना यारी चाहासतीन आऊक कोट बुळतीन. 7इदुरसाटी अगर नी बांगकु नानी प्रणाम माळ्या, रा ई सप्पा अपमान आगेदीत.”
8यीशु आ शैतान उक उत्तर कोट्टुन, “शास्त्र दा लिख्सकु आद, ‘नी तान प्रभु परमेश्वर उन भक्ति माळ; सिर्फ आऊंदा उपासना माळ.’”
9आग आ शैतान यीशु उक यरूशलेम दा वोतकु मंदिर इन स्यांडा मा नीदरूस्त, अदिक आऊन से अंत, “अगर नी परमेश्वर उन पार हुय, रा तान तान इक ईल टु ल्यालमा केळ्दबुळ. 10यतिकी शास्त्र दा लिख्सकु आद: ‘आव नीन बारा दा तान स्वर्गदूतगोळी आग्या कोट्टान, कि आंदुर नीन रक्षा माळुल.’ 11अदिक हिंग भी अंदकु आग्याद, ‘आंदुर नीनी तुरन्त तान कयगोळ दा नेगु कोंडार, ताकी नीन कालगोळी कल्ल देल ठेस हतबाळुल.’”
12यीशु आऊक उत्तर कोट्टुन, “शास्त्र दा ईद भी लिख्सकु आद: ‘नी तान प्रभु परमेश्वर उन परीक्षा माळबाळ.’”
13याग शैतान सप्पा परीक्षा माळकोम्त, आग थ्वाळासा समय इन साटी आऊन हात्ती टु होटोत.
गलील दा यीशु उन स्यावा-कार्य अन्द सुरूवात
(मत्ती ४:१२-१७; मरकुस १:१४,१५)
14बाक यीशु आत्मा अन्द सामर्थ्य देल तुमकु मात्त गलील दा बंदुन, अदिक आऊन चर्चा आसपास इन सप्पा प्रदेश दा फैलुसेत. 15यीशु आंदुर्द यहूदी लॉकुर्द सभागृहगोळ दा उपदेश कोळतेला ईत्तुन, अदिक सप्पा मुंदुर आऊन बळाई माळतोगोर.
नासरत दा यीशु उन अपमान
(मत्ती १३:५३-५८; मरकुस ६:१-६)
16बाक यीशु नासरत नगर दा बंदुन, यल आव स्याण टु धोड्डेव आगीदुन; अदिक तान रीति इन अनुसार आराम इन दिन यहूदी लॉकुर्द सभागृह दा होगकु वाचुसोर साटी नीदुरदुन. 17अदिक यशायाह भविष्यवक्ता अन्द किताब आऊक कोटकु आत, अदिक आव किताब खोल्सकु, अद जागा तेगदुन यल हिंग लिख्सकु ईरोद:
18“प्रभु उन आत्मा नान मा ईळ्दाद,
इदुरसाटी कि आव कंगालगोळी खुशखबरी केळसोर साटी आव नान अभिषेक माळ्यान,
अदिक नानी इदुरसाटी कळ्यान कि बंदीगोळी छुटकारा अन्द घोषणा अदिक कुढ्ढगोळी नोळोद खुशखबरी प्रचार माळाईन
अदिक दलितगोळी बिळसुसाईन,
19अदिक परमेश्वर उन कृपा दृष्टी इन वर्ष इन घोषणा माळाईन.”
20आग आव किताब बंद माळकु सेवक उन कयगोळ दा कोट बुट्टुन अदिक कुर्तोदुन; अदिक यहूदी लॉकुर्द सभागृह अन्द सप्पा लॉकुर आऊक तार कोटकु नोळोर. 21आग आव आंदुर से अनली कुरतुन, “ईंदल्या अच ईद लेखा ना वाचुसदिन अदिक नीम केळदुर देल पुरा आग्याद.”
22सप्पा लॉकुर आऊन वाहवाही माळदुर, अदिक जो अनुग्रह नव मातगोळ आऊन बाय दा टु होळतोगोव, आ मातगोळ देल अचम्भित आदुर; अदिक अनली कुरतुर, “येन ईव यूसुफ उन पार आलच?”
23यीशु आंदुर से अंदुन, “नीव नान बारा दा ई उदाहरण अंदीर कि ‘हे वैद्य, पयले तान तान इक वळ्लीद माळ! नाव केळेव कि जो येनारा नी कफरनहूम दा माळ्या, अद ईल तान नगर दा भी माळ.’” 24#यूहन्ना ४:४४अदिक आव अंदुन, “ना नीम से खरा माताळतीन यावारा भी भविष्यवक्ता अक तान द्याश दा मान सम्मान सिकाल.”
25लेकीन ना नीम से जो खरा आद अद माताळतीन कि एलिय्याह अन्द दिनगोळ दा याग साळे मुर वर्ष ताका आकाश बंद ईरोद ईल ताका सूखा बित्त अदिक इस्त्राएल द्याश दा भयंकर अकाल बित्त, रा इस्त्राएल दा हापाळ सा रांड्यागितेर ईरोर. 26“लेकीन एलिय्याह अक आंदुर दा टु यारदारा मंळसा अन्द हात्ती कळुकु आगीदील, सिर्फ सैदा अन्द सारफत नगर दा ऊंद रांड्यागित इन हात्ती आऊक कळुकु आगीत. 27अदिक एलीशा भविष्यवक्ता अन्द काल दा इस्त्राएल दा ईरतोगोर आंदुर हापाळ लॉकुर कोढ़ इन बिमारी देल ईरोर, लेकीन सीरिया नव ईरावाळा नामान सीरियाई इक बिटकु सप्पा मुंदरी शुद्ध माळकु आत.”
28ईव मातगोळ केळतेला अच यास यहूदी लॉकुर्द सभागृह दा ईरोर, सप्पा लॉकुर सिट्ट दा बंदुर, 29अदिक आंदुर यदकु आऊक ऊरा दा टु व्हार्या तेगदुर, अदिक यात्ता पहाळी मा आऊन ऊर बसुस्कु ईरोद, अदुर्द स्यांडा मा ओतुर कि आऊक अल टु ल्यालमा भीळ सक्केव. 30लेकीन आव आंदुर न्याड्या दा टु होटकु होटोदुन.
दुष्टआत्माग्रस्त मंळसा अक चंगा माळोद
(मरकुस १:२१-२८)
31बाक यीशु गलील इन कफरनहूम नगर इक होटोदुन; अदिक आराम इन दिन लॉकुरी उपदेश कोळोन. 32#मत्ती ७:२८,२९आंदुर आऊन उपदेश देल सट्ट आगेदुर यतिकी आऊन वचन अधिकार देल माताळव. 33यहूदी लॉकुर्द सभागृह दा ऊंद मंळसा ईरोन, यारदा दुष्टआत्मा ईरोद आ दुष्टआत्मा जो परमेश्वर उन मुंद अशुध्द ठहरूसतद, आव धोळ्द शब्द देल चिल्ळासली कुरतुन, 34“हे यीशु नासरी, नामी नीन से येन क्याल्सा? येन नी नामी नाश माळली बंद्या? ना नीनी जान्सतीन नी याव हुय? नी परमेश्वर उन पवित्र जन हुय!”
35यीशु आऊक दनकुसकु अंदुन, “सुंगा ईर, अदिक आऊन दा टु होटबुळ!” आग दुष्टआत्मा आऊक न्याड्या दा पटकुसकु बिना हानि पोहचुस्त आऊन दा टु होट्ट बुळ्त.
36इदुर मा सप्पा लॉकुर इक अचम्भा आत, अदिक आंदुर आपस दा मातचीत माळकु अनली कुरतुर, “ईद ह्यांग वचन हुन? यतिकी आव अधिकार अदिक सामर्थ्य इन सांगुळ अशुध्द आत्मागोळी आग्या कोळतान, अदिक आ दुष्टआत्मा आत्मागोळ होट बुळताव.” 37ई प्रकार देल नाकु दिशा दी यीशु उन चर्चा आगली कुरतव.
यीशु उन हापाळ लॉकुरी चंगा माळोद
(मत्ती ८:१४-१७; मरकुस १:२९-३४)
38यीशु यहूदी लॉकुर्द सभागृह दा टु यदकु शमौन उन मान्नी होदुन. शमौन उन आत्त ज्वर इन बिमारी देल बिदकु ईरोर, अदिक आंदुर आकिन साटी यीशु उक विनती माळदुर. 39यीशु आकिन हात्ती नीदुरकु मय इक दनकुसदुन अदिक मय ईळदोदव, अदिक आक तुरन्त यदकु आंदुर्द स्यावा-पानी माळली कुरतुर.
40द्यावगान होती, याता-याता मान्या लॉकुर अलग अलग प्रकार इन बिमारीगोळ देल बिदकु ईरोर, आंदुर सब आंदरी आऊन हात्ती तंदुर, अदिक यीशु ऊंद ऊंद मा कय ईटकु आंदरी चंगा माळदुन. 41अदिक दुष्टआत्मागोळ भी चिल्ळासव अदिक ईद अनतेला कि, “नी परमेश्वर उन पार हुय,”
हापाळ मुंदुर दा टु होट बुट्टव. पर यीशु अवरी दनकुसदुन अदिक माताळ गोटीदील, यतिकी आ अशुध्द आत्मागोळ जानसव कि आव मसीह हुन.
यीशु उन यहूदी लॉकुर्द सभागृहगोळ दा प्रचार माळोद
(मरकुस १:३५-३९)
42याग व्हातुर आत रा यीशु होटकु ऊंद सुनसान जागा दा होटोदुन, अदिक भीळ इन भीळ आऊक ढुंढ्सतेला आऊन हात्ती बत्त, अदिक यीशु उक रोक्सली कुरतुर कि आव आंदरी बिटकु होगबाळुल. 43लेकीन यीशु आंदुर से अंदुन, “नानी दुसरा नगरगोळ दा भी परमेश्वर उन राज्य इन खुशखबरी केळसोद जरूरी आद, यतिकी नानी इदुर्दा साटी कळुकु आग्याद.”
44अदिक यीशु गलील इन प्रदेश दा अदिक सप्पा यहूदीगोळ्द यहूदी लॉकुर्द सभागृहगोळ दा प्रचार माळतेला ईत्तुन.
Currently Selected:
लूका 4: NTHaa20
Highlight
Share
Copy
Want to have your highlights saved across all your devices? Sign up or sign in
The New Testament in Holiya Language © The Word for the World International and Holiya Translation Samithi, Kudwa, Gondia, Maharashtra 2020
