लूका 2

यीशु उन जनम

(मत्ती १:१८-२५)

1आ दिनगोळ दा रोम इन राजा औगुस्तुस उन दी टु आग्या होळ्त कि पुरा रोमन साम्राज्य अन्द लॉकुर्द हेसुर नोंदणी माळकु आगुल. 2ईद पयला जनगणना आ समय आत, याग सरकारी अधिकारी क्विरिनियुस हेसुर इन मंळसा सीरिया हेसुर इन नगर इन शासक ईरोन, 3सप्पा लॉकुर हेसुर लिखसुसोर साटी तान तान नगर इक होटोदुर.

4इदुरसाटी यूसुफ भी दाऊद उन घराना नव ईरोन, इदुरसाटी गलील इन नासरत नगर टु यहूदिया दा दाऊद उन नगर बैतलहम इक होदुन, 5कि तान हिंग्स मरियम इन सांगुळ जो व्हाट्या दी ईरोर हेसुर लिखसुसुल. 6आंदुर्द अल ईरा समय दा मरियम इन चिग्द हाळोद दिन पुरा आदव, 7अदिक मरियम तान पयला चिग्द उक हाळदुर अदिक आ चिग्द उक कपळा दा लपटुसकु चरनी दा ईटदुर; यतिकी आंदुर साटी सरई दा जागा ईला ईरोद.

स्वर्गदूतगोळ द्वारा चरवाहगोळी बातणी

8अदिक आ प्रदेश दा यास चरवाहगोळ ईरोर, जो ईळ्लक इक मैदान दा ईतकु तान तान झुण्ड इन पहरा कोळतोगोर. 9अदिक प्रभु उन ऊंद स्वर्गदूत आंदुर हात्‍ती बंदकु नीदरेदुन, अदिक प्रभु उन तेज आंदुर्द नाकु दी चमकुस्त, अदिक आंदुर हापाळ अंजेदुर. 10आग स्वर्गदूत आंदुर से अंदुन, “अंजबाळी; यतिकी, ना नीमी हापाळ खुशी इन खुशखबरी केळ्सतीन जो सप्पा लॉकुर साटी ईत्‍तीत, 11कि ईंद दाऊद उन नगर दा नीम साटी ऊंद उद्धारकर्ता पैदा आग्यान, अदिक ईवा मसीह प्रभु हुन. 12अदिक इदुर्द नीम साटी ईद चिन्ह आद कि नीव ऊंद पार उक कपळा दा लपटुसकु अदिक चरनी दा बिदकु नोळीर.”

13आग अचानक आ स्वर्गदूत उन सांगुळ स्वर्गदूतगोळ्द दल परमेश्वर उन स्तुति माळतेला अदिक ईद अनतेला कांळ्सदव,

14“आकाश दा परमेश्वर उन महिमा

अदिक पृथ्वी मा आ मंळसागोळ देल यार से आव प्रसन्न आन, शांती आगुल.”

15याग स्वर्गदूत आंदुर हात्‍ती टु स्वर्ग दी होटोदुर, रा चरवाहगोळ आपस दा अंदुर, “बरी, नाव बैतलहम होगकु ई मात जो आग्याव, अदिक यारी प्रभु नाम मा प्रगट माळ्यान, नोळाती.”

16अदिक आंदुर तुरन्त होगकु मरियम अदिक यूसुफ उन हात्‍ती होदुर, अदिक आ चिग्द उक चरनी दा बिदकु नोळदुर. 17ईद नोळकु चरवाहागोळ आ मात इक प्रगट माळ बुटुर, जो ई चिग्द उन बारा दा आंदुर से अंदकु आगीत, 18अदिक सप्पा लॉकुर आ मातगोळी केळकु जो चरवाहगोळ आंदुर से अंदुर आश्चर्य माळदुर. 19लेकीन मरियम ई सप्पा मातगोळी तान दिल दा ईटकु मन दा विचार माळतेला ईत्‍तुर. 20चरवाहगोळ ह्यांग स्वर्गदूतगोळ हेळीदुर सब येनारा हांग अच केळकु अदिक नोळकु परमेश्वर उन महिमा अदिक स्तुति माळतेला होटोदुर.

यीशु उन हेसुर ईट्टोद

21 # लूका १:३१ ह्यांग येठ्ठ दिन पुरा आदव अदिक आऊन खतना अन्द समय बत्‍त, रा आऊन हेसुर यीशु ईटकु आत जो स्वर्गदूत आऊन मोय इन गर्भ दा बरोद से पयला अंदिदुन.

मंदिर दा यीशु उन अर्पण

22याग आंदुर यीशु उक अंदुर, मूसा इजाजत कोटान कि ऊंद मंळसा छोळ चिट्ठी लिख्सकु तान हिंग्स उक तलाक कोळ सकतान. व्यवस्था अन्द अनुसार यूसुफ अदिक मरियम इन तान खुद इन शुद्ध आगव दिन पुरा आदव, रा आंदुर यीशु उक यरूशलेम दा ओतुर कि प्रभु उन मुंद अर्पण माळुल, 23ह्यांग कि प्रभु उन व्यवस्था अन्द किताब दा लिख्सकु आद: “हर ऊंद पयला पार परमेश्वर उन साटी पवित्र ठहरूस्यान.” 24अदिक प्रभु उन व्यवस्था अन्द वचन इन अनुसार आंदुर: “फंडकी इन ऊंद ज्वाळा, या कबूतर इन येढ्ढ पाड्डगोळ” तंदकु बली येरसुल.

25यरूशलेम दा शमौन हेसुर ईनव ऊंद मंळसा ईरोन, अदिक आ मंळसा न्यायी अदिक भक्त ईरोन; अदिक इस्त्राएल इन लॉकुरी ऊळसावाळा अन्द हादी कायोन, अदिक पवित्र आत्मा आऊन मा ईरोद. 26अदिक पवित्र आत्मा अन्द द्वारा आऊन बारा दा वादा माळकु आगीत कि यागासताका नी प्रभु उन प्रगट मसीह अक नोळ कोमाल, आगासताका नी सायतीदील. 27शिमिओन पवित्र आत्मा अन्द प्रेरणा देल मंदिर दा बंदुन; अदिक याग मोय अदिक आप्प व्यवस्था अन्द विधी इक पुरा माळोर साटी चिग्द यीशु उक मंदिर दा तंदुर, 28आग आव यीशु उक क्वारा दा हुळदुन अदिक परमेश्वर उक धन्यवाद माळकु अंदुन:

29“हे प्रभु, ईग तान दास उक नी जो वादा माळीद अदुर अनुसार

शांती देल सायगोळ,

30यतिकी नान कण्णगोळ नीन उद्धार इक नोळ कोंडाद,

31यदरी नी सप्पा प्रदेश इन लॉकुर्द मुंद तयार माळ्या,

32कि आव अन्य गैरयहूदीगोळी सच्चाई प्रगट माळावाळा प्रकाश कोळोर साटी ज्योति,

अदिक नीन निजी जात इस्त्राएल इन साटी महिमा आगुल.”

33आऊन आप्प अदिक मोय आ मातगोळ देल जो शिमिओन अनतोगोन, आश्चर्य माळतोगोर. 34आग शमौन आंदरी आशीष कोटकु यीशु उन मोय मरियम से अंदुन, “नोळ, ई पार उक इस्त्राएल दा हापाळ मुंदुर्द बिळोद, अदिक येळोद साटी, अदिक ऊंद हिंग चमत्कार आगोर साटी ठहरूसकु आग्याद, यार्द विरोध दा मातगोळ हेळकु आदाव. 35इदुर देल हापाळ लॉकुर मन दा विचार प्रगट आदव उलटा नीन दिल भी दुखगोळ देल तुमकु आदीत.”

36आशेर इन गोत्र दा टु हन्नाह हेसुर इन फनूएल उन पोर ऊंद भविष्यवक्तागित ईरोर. आक हापाळ हाळामुंड ईरोर, अदिक मदा आगदुर बाद्दा येळ वर्ष तान गांड्ड उन सांगुळ ईत्‍तुर बाद्दा आकिन गांड्ड सोतोगिदुन.

37ईग आक चौर्‍यासी वर्ष टु रांड्या ईरोर: अदिक आक मंदिर इक ईला बिळतोगोर, लेकीन ईळ्लक-हागुल उपास अदिक प्रार्थना माळ माळकु स्यावा दा हतकु ईरतोगोर. 38अदिक आक आ घळी अल बंदकु प्रभु उन धन्यवाद माळली कुरतुर, अदिक आ सप्पा मुंदुर से, जो यरूशलेम इन लॉकुर्द छुटकारा अन्द हादी कायतोगोर, आ चिग्द उन बारा दा मातगोळ हेळली कुरतुर.

यीशु उन नासरत नगर दा वापस बरोद

39 # मत्ती २:२३ याग आंदुर प्रभु उन व्यवस्था अन्द अनुसार सब येनारा पुरा माळ कोंडुर रा गलील दा तान नगर नासरत इक होटोदुर. 40अदिक आ चिग्द वाढ़ुस्त, अदिक बलवन्त आग्त, अदिक बुद्धी देल परिपुर्ण आग्त होदुन; अदिक परमेश्वर उन अनुग्रह आऊन मा ईरोद.

यीशु मंदिर दा

41यीशु उन मोय अदिक आप्प हर वर्ष फसह अन्द हाब्ब दा यरूशलेम होगतोगोर. 42याग यीशु हन्नेळ वर्ष ईनव आदुन, रा आंदुर हाब्ब इन रीति इन अनुसार यरूशलेम इक होदुर. 43याग आंदुर आ दिनगोळी पुरा माळकु वापस बरली आदुर, रा स्याण पार यीशु यरूशलेम दा ईतोदुन; अदिक ई मात आऊन मोय अदिक आप्प उक मालूम ईला ईरोद. 44आंदुर ईद सम्सकु कि आव दुसरा यात्रीगोळ सांगुळ इतिदान, ऊंद रोज इन हादी नळदोदुर: अदिक आऊक तान कुटुम्बगोळ अदिक जान पयचान वाळेर्द हात्‍ती ढुंढ्सली कुरतुर. 45पर याग आव सिकिदील, रा ढुंढ्सत-ढुंढ्सत मात्‍त यरूशलेम इक होटोदुर, 46अदिक मुर दिन इन बाद्दा आंदुर आऊक मंदिर दा उपदेश कोळावाळेर्द न्याड्या दा कुर्त, अदिक आंदुर केळ्त, अदिक आंदुर से प्रश्न माळतेला नोळदुर. 47यास आऊन केळतोगोर, आंदुर सप्पा आऊन समझ अदिक आऊन उत्‍तरगोळ देल चकित ईरोर. 48आग आंदुर आऊक नोळकु चकित आदुर अदिक आऊन मोय आऊन से अंदुर, “हे पारा, नी नाम से येती हिंग व्यवहार माळ्द? नोळ, नीन आप्प अदिक ना व्याकुल आगकु नीनी ढुंढसेव?”

49यीशु आंदुर से अंदुन, “नीव नानी येती ढुंढ्सीर? येन नीव ईला जान्सीर कि नानी तान आप्प उन भवन दा ईरोद जरूरी आद?” 50लेकीन जो मात आव आंदुर से अंदुन, आंदरी आ मात समसिदिल.

51आग यीशु आंदुर सांगुळ होदुन, अदिक नासरत नगर दा बंदुन, अदिक आंदुर बस दा ईत्‍तुन; अदिक आऊन मोय ई सप्पा मातगोळ तान मन दा ईटदुर. 52अदिक यीशु बुद्धी अदिक मय देल डील-डोल, अदिक परमेश्वर अदिक मंळसा अन्द अनुग्रह दा वाळुसली कुरतुन.

Currently Selected:

लूका 2: NTHaa20

Highlight

Copy