प्रेरितगोळ 11

पतरस उन यरूशलेम इन मंडली अक तान क्याल्सागोळ बारा दा हेळोद

1बाक प्रेरितगोळ अदिक विश्वासी वार्टुर जो यहूदिया दा ईरोर केळदुर कि गैरयहूदीगोळ भी परमेश्वर उन वचन मान्स कोंडार. 2इदुरसाटी याग पतरस यरूशलेम दा बंदुन, रा यहूदी विश्वासी खतना माळ्द लॉकुर आऊन से झगळा माळली कुरतुर, 3“नी खतना ईला माळ्द गैरयहूदी लॉकुर मान्या होगकु आंदुर सांगुळ तिंद.” 4आग पतरस आंदरी सुरूवात टु येन येन आत अद सप्पा हेळदुन:

5“ना याफा नगर दा प्रार्थना माळीन, आग ऊंद दर्शन नोळदीन कि ऊंद वस्तु, धोळ्द चादर इन घाई नाकु क्वाना टु लटकुस्द, आकाश टु ईळुकु नान हात्‍ती बत्‍त. 6याग ना अदुर मा ध्यान माळदीन, रा अदुर्दा पृथ्वी इन नाक कालवाळा पालतु पशुगोळ अदिक वनपशु अदिक रेंगसावाळा जन्तु अदिक आकाश इन पक्षी नोळदीन; 7अदिक ईद शब्द भी केळदीन, ‘हे पतरस येळ, कोन्न अदिक तिन!’ 8लेकीन ना अंदीन, ‘ईला प्रभु, ईला; यतिकी यातोदु अपवित्र या अशुध्द भोजन नान बाय दा यागलु होगीदील.’ 9इदुर उत्‍तर दा आकाश टु दुसरा घन आवाज आत, ‘जो येनारा परमेश्वर शुद्ध ठहरूस्यान, अदरी अशुध्द अनबाळ.’ 10मुर घन हांगा आत; आग सप्पा येनारा बाक आकाश मा जेडुकु आगेत. 11अदिक नोळी, तुरन्त मुर मंळसा जो कैसरिया टु नान हात्‍ती कळुकु आगीदुर, आ मान्या यल नाव ईरेव, बंदकु निदुरदुर. 12आग आत्मा नान से आंदुर सांगुळ बिना संकोच देल आगली हेळ्त, अदिक याफा दा टु आर विश्वासी वार्टुर भी नान सांगुळ कैसरिया बंदुर; अदिक नाव कुरनेलियुस उन मान्या होदेव. 13कुरनेलियुस नामी हेळदुन, कि आव ऊंद स्वर्गदूत उक तान मान्या निदुरकु नोळदुन, याव आऊन से अंदुन, ‘याफा दा यातारा मंळसा अक कळुकु शमौन उक जो पतरस कहलुस्तान, कारसुस बुळ. 14आव नीम से हिंग मातगोळी अंदान, यार द्वारा नीनी अदिक अपमान सप्पा परिवार इक उद्धार सिक्‍कीत.’ 15याग ना मातगोळी हेळली कुरतीन, रा पवित्र आत्मा आंदुर मा अदा रीति देल ईळुत याता रीति देल सुरूवात दा नाम मा ईळदीत. 16#प्रेरितगोळ १:५आग नानी प्रभु उन अद वचन याद बत्‍त; जो आव अंदिदुन, ‘बपतिस्मा कोळावाळा यूहन्ना रा नीर देल बपतिस्मा कोट्टुन, लेकीन नीमी पवित्र आत्मा देल बपतिस्मा सिक्‍कीत.’ 17इदुरसाटी याग परमेश्वर गैरयहूदीगोळी भी अदा दान कोट्टुन, जो नामी प्रभु यीशु मसीह मा विश्वास माळदुर देल सिक्‍कीत; रा ना याव ईरीन जो परमेश्वर उक रोक्स सकीन?”

18ईद केळकु आंदुर अपमान माळोद बंद माळकु, अदिक परमेश्वर उन बळाई माळकु अनली कुरतुर, “आग रा परमेश्वर गैरयहूदीगोळी भी जीवन इन साटी मन तिर्गुसोद दान कोटान.”

अन्ताकिया अन्द मंडली

19 # प्रेरितगोळ ८:१-४ विश्वासीगोळ दा टु थ्वाळासा लॉकुर आ दुख इन मारा देल जो स्तिफनुस उन मृत्यु उन समय दा बिदीत, तितर बितर आगेगीदुर, आंदुर वयाळ्त-वयाळ्त फिनीकी अदिक साइप्रस अदिक अन्ताकिया दा बंदुर; लेकीन यहूदीगोळी बिटकु यारीकु वचन ईला केळ्सतोगोर. 20लेकीन आंदुर दा टु थ्वाळासा साइप्रस निवासी अदिक कुरेनी ईरोर, जो अन्ताकिया दा बंदकु गैरयहूदीगोळी भी प्रभु यीशु उन खुशखबरी इन मातगोळी केळ्सली कुरतुर. 21प्रभु उन सामर्थ्य आंदुर सांगुळ ईरोद, अदिक हापाळ लॉकुर विश्वास माळकु प्रभु उन दी तिर्गदुर.

22याग आंदुर चर्चा यरूशलेम इन मंडली अन्द केळदुर दा बत्‍त, रा आंदुर बरनबास उक अन्ताकिया कळुदुर. 23याग आव अल पोहचुसदुन अदिक नोळदुन कि परमेश्वर लॉकुरी ह्यांग आशिषीत माळ्यान, अदिक आव खुश आदुन अदिक आंदुर से विनती माळदुन कि तान सप्पा मन इन सांगुळ पुरा सच्चाई देल अदिक विश्वासयोग्य प्रभु उन सांगुळ बन्सकु ईरी. 24बरनबास ऊंद वळ्लेव मंळसा ईरोन, अदिक पवित्र आत्मा अदिक विश्वास देल परिपुर्ण ईरोन; अदिक अन्य हापाळ सा लॉकुर प्रभु दा बंदकु मिलुसदुर.

25आग आव शाऊल उक नोळोर साटी तरसुस नगर इक होटोदुन. 26याग आव आऊन से मिलुसदुन रा आऊक अन्ताकिया तंदुन; अदिक हिंग आत कि आंदुर ऊंद वर्ष ताका मंडली अन्द सांगुळ सिकोर अदिक हापाळ सा लॉकुरी उपदेश कोळतेला ईत्‍तुर; अदिक सब से पयले अन्ताकिया दा ईदा चेलागोळी मसीह अंदकु आत.

27अवा दिनगोळ दा थ्वाळासा भविष्यवक्ता यरूशलेम टु अन्ताकिया बंदुर. 28#प्रेरितगोळ २१:१०आंदुर दा टु अगबुस हेसुर इन ऊंद मंळसा निदुरकु आत्मा अन्द अगुवाई दा भविष्यवाणी माळदुन कि सप्पा दुनिया दा धोळ्द अकाल बिद्दीत. अद अकाल क्लौदियुस उन समय दा बित्‍त. 29आग चेलागोळ निर्णय माळदुर कि हर ऊंद तान तान पूंजी इन अनुसार यहूदिया दा ईरावाळेर विश्वासी वार्टुर मदत अन्द साटी येनारा कळुल. 30आंदुर हांगा माळदुर; अदिक बरनबास अदिक शाऊल उन कय मंडली अन्द स्याणागोळ हात्‍ती थ्वाळासा पैस्या कळुदुर.

Currently Selected:

प्रेरितगोळ 11: NTHaa20

Highlight

Copy