LUKE 22
22
Ba rera go oka Jesu
(Math 26:1-5,14-16; Mar 14:1-2,10-11; Joh 11:45-53)
1 Jaana modiro wa senkgwe se se sa bedisiwang, o o bidiwang Tlolaganyo, wa bo o atamela. 2Mme ditlhogo tsa baperesiti le bakwadi ba senka ka fa ba ka mmolayang ka teng; gonne ba boifa batho.
Jutase o raela Jesu
(Math 26:14-16; Mar 14:10-11)
3Satane a tsena mo go Jutase yo o bidiwang Isekariote, e le mongwe wa ba ba 12. 4A ya a loganya le ditlhogo tsa baperesiti le dikgosana, ka fa o ka mo ba neelang ka teng. 5Mme ba itumela; ba golagana nae gore ba tlaa mo naya madi. 6A dumalana nabo; mme a batla lobaka lo o tlaa mo ba neelang ka lone, kwa bontsing jwa batho bo tlaa bong bo seyo teng.
Jesu o baakanyetsa go ja moletlo wa Tlolaganyo le barutwa ba gagwe
(Math 26:17-25; Mar 14:12-21; Joh 13:21-30)
7Ga fitlha letsatsi la senkgwe se se sa bedisiwang, le Tlolaganyo e nang le go tlhajwa ka lone. 8Mme a roma Petere le Johane a re: “Yang, lo re baakanyetse Tlolaganyo gore re e je.”
9Ba mo raya ba re: “O rata ra e baakanya kae?”
10A ba raya a re: “Bonang, e tlaa re lo sena go tsena mo motseng, lo tlaa kgatlhana le monna a rwele nkgwana ya metsi; lo mo sale morago, lo ye nae mo ntlong e o tsenang mo go yone. 11Lo reye mong wa ntlo, lo re: ‘Moruti o a go botsa a re: Ntlo ya bojelo ya baeng e kae e ke tlaa jelang Tlolaganyo mo go yone le barutwa ba me?’ 12O tlaa lo supetsa ntlwana e kgolwane e e kwa godimo, e e adilweng, lo baakanye teng.”
13Mme ba ya ba fitlhela go ntse jaaka a ba boleletse; mme ba baakanya Tlolaganyo.
Selalelo sa bofelo sa Morena
(Math 26:26-30; Mar 14:22-26; 1 Bakor 11:23-25)
14E rile nako e sena go fitlha, a dula le baaposetole ba ba 12 ba na nae. 15Mme a ba raya a re: “Ke tlhologeletswe ka tlhologelelo go ja Tlolaganyo e le lona ke ise ke swe. 16Gonne ke a lo raya, ga nketla ke tlhola ke e ja go tle go tsamaye e dirafale mo bogosing jwa Modimo.”
17Mme a tsaya senwelo, ya re a sena go leboga, a re: “Tsholang se, lo se hupalane; 18gonne ke a lo raya, ga nketla ke tlhola ke nwa loungo lwa mofine, go tle go tsamaye bogosi jwa Modimo bo tle pele.”
19A tsaya senkgwe, mme ya re a sena go leboga, a se ngathoganya, a se ba naya a re: “Se ke mmele wa me o o ntshediwang lona; dirang mo, lo nkgopole ka gone.” 20 Senwelo le sone, a se tsaya jalo, morago ga go sena go jewa, a re: “Senwelo se, ke kgolagano e ntšha mo mading a me, e bong a a tshololelwang lona.
21 “Mme, bonang, seatla sa yo o nkokang se na le nna mo lomating lwa bojelo. 22Gonne ruri Morwa Motho o tsamaya jaaka go ikaeletswe; mme go latlhega monna yo o okwang ke ene!”
23Ba simolola go botsanya gore, e ka nna ofe wa bone yo o ka dirang selo se.
Kgang ka ga yo mogolo
24 Le gone ga tsoga kgang mo go bone ya gore, ke ofe wa bone yo o kaiwang yo mogolo. 25 Mme a ba raya a re: “Dikgosi tsa Baditšhaba di dira ka bogoma mo go bone, le ba ba ba busang ba bidiwa Badiramolemo. 26 Mme lona, ga lo a nna jalo; ene yo e leng yo mogolo mo go lona, a a nne jaaka yo mmotlana; le yo e leng tlhogo, a a nne jaaka yo o direlang. 27 Gonne yo mogolo ke ofe? A ke yo o dutseng a ja, kgotsa ke yo o direlang? A ga se yo o dutseng a ja? Mme nna, ke ntse mo go lona jaaka yo o direlang.
28“Mme lona, ke lona ba ke ntseng ke na le lona mo ditekong tsa me; 29ke lo baya bogosi jaaka Rre a bo mpeile. 30 Gore lo je lo nwe fa lomating lwa me lwa bojelo, mo bogosing jwa me; mme lo tlaa dula mo ditulong tsa bogosi, lo atlhola ditso tse 12 tsa Iseraele.
Jesu o bolela fa Petere a tlaa mo itatola
(Math 26:31-35; Mar 14:27-31; Joh 13:36-38)
31“Simone, Simone, bona, Satane o lopile gore lo mo neelwe, gore a tle a lo fefere jaaka mabele; 32mme ke go rapeletse gore tumelo ya gago e se tlhaele; le wena o re o sena go sokologa, o tle o thatafatse bakaulengwe ba gago.”
33Mme a mo raya a re: “Morena, fa ke na nao ke iketleeditse go ya ntlong ya kgolegelo, le mo losong.”
34Mme a re: “Ke a go bolelela Petere, koko e tona ga e ketla e lela gompieno o ise o intatole gararo, o re ga o nkitse.”
Tlhagiso ka patana ya madi, kgetsana le tšhaka
35 Mme a ba raya a re: “E rile ke lo roma jale, lo se na patana ya madi, le fa e le kuana, le fa e le ditlhako, a lo ile lwa tlhoka sengwe?” Ba re: “Nnyaa.”
36A ba raya a re: “Mme jaanong, yo o nang le patana ya madi, a e tseye, le yone kuana; le yo o se nang tšhaka, a a rekise kobo ya gagwe, a reke nngwe. 37 Gonne ke a lo raya, selo se, se se kwadilweng, se na le go dirafala mo go nna, jaaka go twe: ‘O baletswe le batlodi;’ gonne dilo tse di kwadilweng ka ga me, di a dirafala.” 38Mme ba re: “Morena, bona, ditšhaka ke tse, di pedi.” Mme a ba raya a re: “Go lekanye.”
Jesu o rapela kwa Thoteng ya Lotlhware
(Math 26:36-46; Mar 14:32-42)
39A tswa, a ya kwa Thoteng ya Lotlhware jaaka a tlwaetse; barutwa ba gagwe le bone ba mo sala morago. 40Ya re a fitlha teng, a ba raya a re: “Rapelang, gore lo se tsene mo thaelong.”
41Mme a katogana nabo, e ka ne e le jaaka kwa lentswe le ka konopelwang teng; mme a khubama, a rapela 42a re: “Rra, fa e le go rata ga gago, tlosa senwelo se mo go nna; le fa go ntse jalo, e seng go rata ga me, mme a go rata ga gago go dirale.” 43Mme ga bonala moengele kwa go ene, a tswa legodimong, a mo thatafatsa. 44Mme ka a le mo tlalelong e e mahehe, a rapela ka tlhoafalo e kgolo; mme mofufutso wa gagwe wa nna jaaka marothodi a magolo a madi, a rothela fa fatshe.
45Ya re a khubamologa mo morapelong wa gagwe, a tla barutweng ba gagwe, mme a ba fitlhela ba robaditswe ke bohutsana, 46mme a ba raya a re: “Lo robaletseng? Tsogang, lo rapele gore lo se tsene mo thaelong.”
Jesu o a tshwarwa
(Math 26:47-56; Mar 14:43-50; Joh 18:3-11)
47Mme a re a sa ntse a bua, bonang, bontsi jwa batho, ba eteletswe pele ke mongwe yo o bidiwang Jutase, e le wa ba ba 12, a atamela Jesu go mo atla. 48Mme Jesu a mo raya a re: “Jutase, a o oka Morwa Motho ka katlo?”
49Ya re ba o nang nabo ba bona se se tlaa dirafalang, ba mo raya ba re: “Morena, a ke re reme ka tšhaka?” 50Mme mongwe wa bone a rema motlhanka wa moperesiti yo mogolo, a mo kgaola tsebe ya ka fa letsogong le legolo.
51Jesu a bua a re: “Iketleng! Go ntse!” Mme a ama tsebe ya gagwe, a e fodisa.
52Jesu a raya ditlhogo tsa baperesiti, le dikgosana tsa tempele, le bagolwane ba ba mo tshologetseng, a re: “A lo tsile ka ditšhaka le melamu jaaka e kete lo tshologetse senokwane? 53 E ne ya re ke sa ntse ke na le lona ka malatsi otlhe mo tempeleng, ga lo a ka lwa nkotlololela mabogo; mme lono ke lobaka lwa lona, le thata ya lefifi.”
Petere o itatola Jesu
(Math 26:57-58,69-75; Mar 14:53-54,66-72; Joh 18:12-18,25-27)
54Ba mo tshwara, ba mo goga, ba mo isa kwa ntlong ya moperesiti yo mogolo. Petere a mo latela ka go mo gwalalela. 55Ya re ba sena go gotsa molelo fa gare ga lolwapa, ba dutse mmogo, Petere a dula fa gare ga bone. 56Mme lelata lengwe ya re le mmona a dutse fa molelong, a mo leba thata a re: “Monna yo le ene o ne a nna nae.”
57Mme a itatola a re: “Mosadi, ga ke mo itse.”
58Ga feta lobakanyana, mme yo mongwe le ene a mmona a re: “Le wena o mongwe wa bone.” Mme Petere a re: “Monna, ga se nna.”
59Ga feta lobaka e ka ne e le lwa nako e le nngwe fela, mme yo mongwe a tlhomamisa thata a re: “Ammaaruri, monna yo le ene o ne a nna nae; ka e le Mogalilea.”
60Petere a re: “Monna, ga ke itse se o se buang.” Fela ka bonako a sa ntse a bua, koko e tona ya lela. 61Mme Morena a retologa, a leba Petere. Mme Petere a gakologelwa lefoko la Morena, jaaka a mo reile a re: “E tlaa re koko e tona e ise e lele gompieno, o tlaa bo o intatotse gararo.” 62Mme Petere a tswela kwa ntle, a lela mo go botlhoko.
Jesu o a sotlwa a ba a itewa
(Math 26:67-68; Mar 14:65)
63Banna ba ba tshwereng Jesu, ba mo sotla, ba mo itaaka. 64Ba mo fapa matlho ba re: “Bolela, e mang yo o go tlhantseng?” 65Le dilo tse dingwe di le dintsi ba di bua ka ga gagwe, ba mo kgala ka tsone.
Jesu o fa pele ga lekgotla
(Math 26:59-66; Mar 14:55-64; Joh 18:19-24)
66E rile bosa bo sena go sa, bagolwane ba batho, le ditlhogo tsa baperesiti, le bakwadi, ba phuthega, ba mo goga ba mo isa mo tshekong ya bone, ba re: 67“Fa o le ene Keresete re bolelele.” Mme a ba raya a re: “Fa ke lo bolelela ga lo ketla lo dumela; 68le gone fa ke lo botsa ga lo ketla lo mphetola. 69Go tloga fano jaana, Morwa Motho o tlaa dula ka fa letsogong le legolo la nonofo ya Modimo.”
70Ba bua botlhe ba re: “A o Morwa Modimo?” A ba raya a re: “Lona lwa re, ke nna ene.”
71Mme ba re: “Re sa ntse re dirang ka tshupo? Ka re mo ikutlwetse a bua ka molomo wa gagwe.”
Currently Selected:
LUKE 22: TSW08NO
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1992. Used with permission. All rights reserved.
