मत्ती 26

यीशु रै बिरोधा दी यीशु पाकुड़ना लै च़ाल

(मरकुस 14:1-2; लुका 22:1-2; यहुन्ना 11:45-53)

1ज़ैबै यीशुऐ सब बुशै बोली एरी ता आपणै च़ेलेऊ लै बोलदै लागौ, 2“तुमै ज़ाणाई कि दुई दिनै बासिऐ फसह रौ साज़ौ आ, और आदमी रौ छ़ोहरु क्रुसा माथै च़ड़ाउणा लै पकड़ावा ई।” 3तैबै बौड़ै याजकु और प्रजा रै स्याणै लोग काइफा नावां रै परधान याजका रै खौल़ै दी कौठै हुऐ, 4और आपु मांझ़िऐ चौपड़िंदै लागै कि यीशु च़लाकी कौरीऐ पाकड़ियौ पोरु झ़ांगी। 5पर सै बोला थै, “साज़ै रै दिना दी नाईं पाकुड़दै, किऐ इणौ ना च़ांई हुऔ कि भीड़ा रै लोग मौच़ावा लै हालौ।”

बैतनिय्याह दी यीशु रोटी खांदै

(मरकुस 14:3-9; यहुन्ना 12:1-8)

6ज़ेबी यीशु बेतनियाह दी शमौन कोढ़ी रै घौरा दी थौ, 7ता एक छ़ेउड़ी संगमरमरा री शीशी दी भौरी किमत्ती तेल आणियौ यीशु काऐ आशी, और ज़ैबै यीशु रोटी खांदै थै बोशौ औन्दौ ता सेऊ तेल यीशु रै मुंडा तौल़ै पेरौ। 8इणै देखिऔ यीशु रै च़ेलै रोशुऐ और बोलदै लागै, “इयौ मैहंगौ तेल बर्बाद कैलै कियौ औलौ? 9एस तेल ता आच़्छ़ै दामा दी बेच़ीयौ एथरै रुपाऐ गरीब लोगु दी बांडणै च़ांई थै।” 10इणौ ज़ाणीऔ यीशुऐ तिउंलै बोलौ, “तुमै इऐं छ़ेउड़ी लै कैलै रोशिआई? इऐं छ़ेउड़ीऐ मेरी भौलाई लै कियौ आ। 11गरीब लोग ता तुमु आइलै सौदा रौआ ई, पर हाऊं तुमु आइलै सौदा नाईं रौइंदौ। 12इऐं छ़ेउड़ीऐ मैरै मुंडा दी खुश्बुदार तेल पेरौ आ, सेऊ मैरै दबाउणा लै कियौ आ। 13हाऊं तुमुलै सौच़्च़ौ बोलाऊ, ‘पुरी धौतरी दी ज़िऐ-ज़िऐ परमेश्‍वरा रै खुशी री खौबर शुणावा लै, तिऐ-तिऐ इऐं छ़ेउड़ी रै कामा री बुशै भी हुआई।’ ”

यहुदा इस्करियोती रौ विश्वासघात

(मरकुस 14:10-11; लुका 22:3-6)

14तैबै यहुदा इस्करियोतीऐ, ज़ो बारह च़ेलेऊ मांझ़िआ कु एक थौ, सेऊ बौड़ै याजकु काऐ डेइयौ बोलदै लागौ, 15“अगर हाऊं यीशु तुमारै हाथा दी पकड़वाऊ लै ता तुमै का दिआई?” तिंउऐ तेसलै तीस च़ांदी रै सिक्कै तोलीयौ देई गौऐ। 16और सेऊ तेबी कु यीशु पकड़ाउणा री ताकी दी रौ।

च़ेलेऊ आइलै आखरी बार साज़ै री रोटी खाणी

(मरकुस 14:12-21; लुका 22:7-13,21-23; यहुन्ना 13:21-30)

17तैबै बिणा संज़ेड़ै री रोटी रै पैहलै दिनै, च़ेलै यीशु काऐ आशीयौ पुछ़दै लागै, “तुमै किऐ च़ाहा ई कि आमै फसह रै साज़ै री रोटी रौ इन्तज़ाम कौरी?” 18यीशुऐ तिउंलै बोलौ, “शहरा दी फलाणै आदमी काऐ डेइयौ तेसलै बोलौ, गुरुजी बोलाई कि मैरौ बौगत नज़दीक आ। हाऊं आपणै च़ेलै आइलै तैरै घौरा दी फसह रौ साज़ौ मौनाऊं।” 19तैबै च़ेलेउऐ यीशु रौ हुकम मानौ और फसह रै साज़ै री रोटी त्यार की। 20ज़ेबी ब्याल़ हुई ता यीशु बारह च़ेलेऊ आइलै रोटी खान्दै बोशौ। 21ज़ेबी सै रोटी खान्दै लागै औन्दै थै ता यीशुऐ तिउंलै बोलौ, “हाऊं तुमुलै सौच़्च़ौ बोलाऔ कि तुमु मांझ़िऐ एक आ ज़ो मुं पकड़ावा ई।” 22इणौ शुणियौ सै भौरी परेशान हुऐ, और हर एक यीशु कु पुछ़दै लागै, “ओ गुरुजी, का सेऊ हाऊं ऊ?” 23यीशुऐ ज़वाब दैऔ, “ज़ुणिऐ मुं आइलै थाल़ी दी हाथ पाऔ आ, सेऊ ई मुं पकड़ावा। 24आदमी रौ छ़ोहरु ता ज़िणौ तेसरै बारै दी लिखी औन्दौ आ, मैरौ मौरणौ ता इणी भी आ। पर तेस आदमी लै फिटकार आ ज़ासरै ज़ौरिऐ आदमी रौ छ़ोहरु पकड़वाइआ तेस आदमी लै तैबै आच़्छ़ौ थौ कि तेसरौ ज़नमा ना हुआ थौ।” 25तैबै यीशु पकड़ाउणै वाल़ै यहुदै बोलौ, “ओ गुरुजी, का सेऊ हाऊं ऊ?” यीशुऐ तेसलै बोलौ, “ओ ताइंऐ मानी गौ।”

प्रभु भोज़

(मरकुस 14:22-26; लुका 22:14-20; 1 कुरि. 11:23-25)

26ज़ेबी सै रोटी खान्दै थै लागै औन्दै ता यीशुऐ रोटी च़ुंगी, और परमेश्‍वरा रौ धन्यबाद कौरीयौ चोड़ी और च़ेलेऊ लै देइयौ बोलौ, “नियौं, खाऔ। इयौ मैरौ ज़िसम आ।” 27तैबै यीशुऐ अंगुरा रौ खोरु च़ुंगियौ परमेश्‍वरा रौ धन्यबाद कियौ, और तिउंलै देइयौ बोलौ, “तुमै सब एथकु पिऔ, 28कैलैकि एस अंगुरा रौ रस तुमै मैरौ लोऊ सौमझ़ौ ज़ो भौरी लोगु तिंउरै पापा री सौज़ा कु बौच़ाउणा लै बौइणै वाल़ौ आ। मैरै मौरणै कु परमेश्‍वर लोगु आइलै एक नौंवौ रिश्तै रौ वायदौ पाकौ कौरा आ। 29हाऊं तुमुलै सौच़्च़ौ बोलाऊ कि अंगुरा रौ एऊ रस सेज़ै दिना झ़ांऊ केबी नाईं पिंदौ, ज़ेबी झ़ांऊ तुमु आइलै आपणै बाबा रै राज़ा दी नौउंऔ नाईं पिऊ।” 30तैबै सै भजन गाइयौ जैतूना री पहाड़ी माथै डै।

पतरसा रै मुकुरना री भविष्यवाणी

(मरकुस 14:27-31; लुका 22:31-34; यहुन्ना 13:36-38)

31तैबै यीशुऐ तिउंलै बोलौ, “तुमै सारै आज़ राची मैरै बारै दी ठोकर खाआ ई, कैलैकि लिखौ औन्दौ आ: ‘हाऊं भेराल़ड़ु झ़ांगाऊ, और शाल़ा री भेरी ओरु-पोरु भागा ई।’ 32पर हाऊं ज़िउंदौ हुइयौ तुमु कु औगाड़िऐ गलीला लै डेआऊ।” 33एथ माथै पतरसै यीशु लै बोलौ, “अगर सारै विश्वासा दी डगमगा लै, पर मैरौ विश्वास केबी नाईं डगमगाउंदौ।” 34यीशुऐ तेसलै बोलौ, “हाऊं ताउंलै सौच़्च़ौ बोलाऊ कि आज़ राची कुखड़ै रै बाशणै कु पैहलै, आपणै मुंआ कु चिआ बारै बोलाई कि तू मुं नाईं ज़ाणदौ।” 35पतरसै यीशु लै बोलौ, “च़ाऊ मुं ताऊं आइलै मौरणौ भी जा लौ, तैबै भी हाऊं केबी ना बोलदौ कि हाऊं तुमु नाईं ज़ाणदौ।” और सारै च़ेलै इणौ लागै बोलदै।

गतसमनी दी प्राथना

(मरकुस 14:32-42; लुका 22:39-46)

36तैबै यीशु आपणै च़ेलै आइलै गतसमनी नाऊं री ज़ागाह दी आशौ और आपणै च़ेलै लै बोलदै लागौ, “तुमै इदै बोशी रौएऊ, ज़ेबी झ़ांऊ हाऊं प्राथना कौरुलै।” 37यीशुऐ पतरस और जबदी रै दुई छ़ोहरु आपु आइलै निऐं, और यीशु भौरी दुखी और घबराउंदै लागौ। 38तैबै यीशुऐ तिउंलै बोलौ, “मैरौ मन भौरी दुखी आ, इदरा झ़ांऊ कि मैरै प्राण डेउंदै ई लागै औन्दै। तुमै इदै ई रुकौ और मुं आइलै उज़ीई रौएऊ।” 39तैबै यीशु आगुड़ै डेइयौ धौनी ज़मीना माथै मुंडा लाइयौ पौड़ौ, और प्राथना कौरदै लागौ, “ओ मैरौ बाब, अगर तू च़ाहा ई एस दुखा रौ खोरु पोरु टाल़, तैबै भी ज़िणौ हाऊं च़ाहा ऊ तिणौ नाईं, पर ज़िणौ तू च़ाहा ई तिणी च़ांई हुऔ।” 40तैबै यीशु आपणै च़ेलेऊ काऐ आशीयौ देखै ता सै थै सुतै औन्दै तैबै यीशुऐ पतरसा लै बोलौ, “का तुमै एकी घौड़ीयै भी ना उज़ीई रौई बौल़ै? 41उज़ीई रौएऊ, और प्राथना कौरदै रौऔ कि तुमै मुसीबता दी नाईं च़ांई पौड़ै।” 42तैबै यीशुऐ दुजी बारै डेइयौ इणी प्राथना कौरी, “ओ मैरौ बाब, अगर एऊ मैरै पिऐ बिणा नाईं टौल़ी सौकौ ता तेरी इच़्छ़ा च़ांई पुरी हुई।” 43तैबै यीशु दुजी बारै आशौ तेबी भी सै सुतै औन्दै थै, कैलैकि तिउंकै भौरी नीज थी लागी औन्दी। 44तिऊं छ़ाड़ियौ यीशु औज़ौ चीजी बारै प्राथना कौरना लै डैऔ। 45तैबै यीशुऐ च़ेलेऊ काऐ आशीयौ बोलौ, “आबै सुती रौएऊ, और आराम कौरौ: देखौ सेऊ बौगत आशी ऐरौ आ, और आदमी रौ छ़ोहरु पापी लोगु रै हाथा दी पकड़ाइया सा। 46उठौ! औगांऊ हाण्डौ। देखौ, मुं पकड़ाउणै वाल़ौ आशी गौ आ।”

यीशु धोखै दी पाकुड़नौ

(मरकुस 14:43-50; लुका 22:47-53; यहुन्ना 18:3-12)

47यीशु इणौ बोलदै थौ लागौ औन्दौ कि यहुदा ज़ो बारह च़ेलेऊ मांझ़िऊ कु एक थौ सेऊ आशौ, और तेस आइलै एक भौरी भीड़ भी थी ज़ासकै तलवारै और डिंगै थै। सै भीड़ बौड़ै याजक, यहुदा शास्त्री और स्याणै लोगुऐ भेज़ी औन्दी थी, यीशु पाकुड़णालै। 48यहुदै पैहलै बोलौ औन्दौ थौ कि, “ज़ास हाऊं खोबीयाउलौ सेऊ ई आ। तेस पाकड़ेउ।” 49और सेऊ खरकच़ार यीशु काऐ आशौ और बोलौ, “ओ गुरुजी, ढाल!” और यीशु भौरी खोबीयाऔ।

बौड़ी खुंबल़ी काऐ यीशु

(मरकुस 14:53-65; लुका 22:54-55,63-71; यहुन्ना 18:13,14,19-24)

50यीशुऐ तेसलै बोलौ, “ओ गोश्टण, ज़ेज़ै कामा लै तू आशौ थौ, तेस कर।” तैबै तिऊं लोगुऐ आगुड़ै आशीयौ यीशु पाकड़ौ। 51यीशु रै च़ेलेऊ मांझ़िऐ कु एकीऐ आपणी तलवार गाड़ी और परधान याजका रै नुकरा रौ कौन्थु पोरु पा काटौ। 52तैबै यीशुऐ तेसलै बोलौ, “आपणी तलवार म्याणा दी छ़ाड़ कैलैकि ज़ो तलवार च़लावा ई सै सारै तलवारा कौरै नाश हुआई। 53का तू नाईं ज़ाणदौ कि हाऊं आपणै बाबा कु औरज़ कौरी सौका ऊ, और सौ सौरगदूता री बारह पल़टणा कु भौरी मुं काऐ इबी भेज़ी सौका? 54पर पवित्रशास्त्रा री सै बुशै कि इणौ ई हुणौ ज़ुरुरी आ, किणै कौरी पुरी हुआई?” 55सेज़ै बौगतै यीशुऐ भीड़ा रै लोगु लै बोलौ, “का तुमै तलवारी और डिंगै कौरीऐ ई आशै औन्दै। का तुमै मुं डाकु सौमझ़ा ई? हाऊं हर दीन परमेश्‍वरा रै घौरा दी बोशियौ तुमुलै शिक्षा दिआ थौ, और तुमुऐ हाऊं नाईं पाकड़ौ। 56पर एऊ सब एथीलै हुऔ आ ताकी पुराणै भविष्यवक्ता रौ सेऊ वचन पुरौ हुआ।” तैबै सारै च़ेलै तेस छ़ाड़ियौ भागी गौऐ। 57तैबै तिंउऐ यीशु पाकड़ियौ परधान याजका रै घौरा दी नियौं। तिऐ सारै शास्त्री और स्याणै लोग कौठै थै हुऐ औन्दै। 58पतरस यीशु पिछ़ु दूर-दूर आण्डियौ परधान याजका रै गौड़ै झ़ांऊ डैऔ, पतरस तिऐ च़ोउकीदारु काऐ बोशियौ आगी तापदै लागौ। 59बौड़ै याजक और सारै यहुदी फैसलै कौरणै वाल़ी खुंबल़ी रै लोग च़ाहा थै कि कोई यीशु रै विरोधा दी गवाही दिआ थै, 60पर भौरी लोग यीशु रै विरोधा दी गवाही दैंदै लागै पर तिउंरी बुशै आपु मांझ़िऐ नाईं मिला थी। बासिऐ दुई ज़ौणै गवाही दैंदै आशै, 61और बोलदै लागै, “आमुऐ शुणौ ई कि इयौ यीशु बोला कि हाऊं परमेश्‍वरा रौ घौर ढाल़ी सौका ऊ और चिया दिना दी चाणाऊ।” 62तैबै परधान याजकै खौड़ै हुइयौ यीशु लै बोलौ, “का तू कोई ज़वाब नाईं दैंदौ? इऐ लोग तैरै बारै दी का गवाही दिआई? 63पर यीशु च़ुटुक थाकौ।” तैबै परधान याजकै यीशु लै बोलौ, “हाऊं ताउंलै ज़िउंदै परमेश्‍वरा री कसम दिआऊ कि अगर तू परमेश्‍वरा रौ छ़ोहरु मसीह ई, ता आमुलै बोल।” 64यीशुऐ तेसलै बोलौ, “ताइंऐ आपु ई बोली गौ। पर हाऊं तुमुलै इणौ भी बोलाऊ कि इबी कु तुमै आदमी रौ छ़ोहरु ज़ो सौभी कु शक्ति वाल़ै परमेश्‍वरा री सुल़टी भिलै बोशा, और सौरगा रै बादल़ा माथै आशदै देखा ई।” 65एथ माथै परधान याजकै आपणै जुड़कै च़िरै और बोलौ, “इणीऐ परमेश्‍वरा री बुराई कौरी आ, आबै आमुकै कासी री गवाही री ज़ुरत नाईं? शुणौ, तुमुऐ इबी एज़ी बुराई शुणी आ!” 66तुमै का सुंच़ाई? सारै लोग बोलदै लागै, “यीशु लै मौरणै री सौज़ा च़ांई मिली।” 67तैबै तिंउऐ यीशु रै मुंआ दी थुकौ और यीशु पिटदै लागै, दुजै लोगुऐ यीशु दी थापै लाई और बोलदै लागै, 68“ओ मसीह, अगर तू भविष्यवक्ता ई ता बोल ताउंदी कुणिऐ लाई?”

पतरसा रौ इनकार

(मरकुस 14:66-72; लुका 22:56-62; यहुन्ना 18:15-18,25-27)

69पतरस बाइरी भिलै खौल़ै दी थौ बोशौ औन्दौ तैबै बौड़ै याजकु री एक नुकराण तेस कई आशी और तेसलै बोलौ, “तू भी तेस यीशु गलीली आइलै थौ।” 70तिणीऐ सौभी काऐ इणौ बोलीयौ इनकार कियौ, “हाऊं नाईं ज़ाणदौ तू का ई लागी औन्दी बौल़दै।” 71ज़ेबी पतरस बाइरै डैऔ, ता दुजी नुकराणिऐ पतरस देखीयौ तिऊं लोगु लै बोलौ ज़ो तिऐ थै, “इयौ भी ता यीशु नासरी आइलै थौ।” 72पतरस कसम खाइयौ औज़ौ मुकरौ “हाऊं तेस आदमी नाईं ज़ाणदौ।” 73दख बौगता बासिऐ तिऐ ज़ो लोग खौड़ै थै, तिंउऐ पतरसा लै बोलौ, “पाकौ तू भी तिऊं मांझ़िआ कु एक ई, कैलैकि तेरी बोली तैरौ राज़ खोला सा।” 74तैबै पतरस कसमा खांदै लागौ। “हाऊं तेस आदमी बिल्कुल भी नाईं ज़ाणदौ।” और खरकच़ार कुखड़ौ बाशौ। 75तैबै पतरसा कै सै बुशै याद आशी गोई ज़ो यीशुऐ तेसलै बोली थी: “कुखड़ै रै बाशणै कु पैहलै चिया बारै तू मैरौ इनकार कौरा ई।” और सेऊ बाइरै डेइयौ डीकरी-डीकरीयौ लेरदै लागौ।

Currently Selected:

मत्ती 26: BFZ-NT

Highlight

Copy