लुका 9

बारह च़ेलै भेज़णै

(मत्ती 10:5-15; मरकुस 6:7-13)

1एकी दिनै यीशुऐ आपणै च़ुनै औन्दै बारह च़ेलै आपु काऐ औटाऐ, तिउंकै बुरी आत्माऐं गाड़ने और बिमारीऊ च़ांगी कौरणै री शक्ति और हक्क दैऔ। 2तैबै यीशुऐ सै, परमेश्‍वरा रै राज़ा रौ परचार कौरना लै, और बिमार लोगु च़ांगै कौरना लै भेज़ै। 3यीशु च़ाहा थौ कि च़ेलै आपणी ज़ुरता रै बारै दी च़िन्ता ना कौरा। एज़ै कारण च़ेलेऊ लै यीशुऐ बोलौ, “बाटा लै आपुकै कुछ़ ना निएऊ, ना डिंगौ, ना बैग, ना रोटी और ना पैसै, ना दुई-दुई कुरतै। 4ज़ेज़ै घौरा दी तुमैं डिआलै सेज़ै घौरा दी रौइणौ, ज़ेबी झ़ांऊ तुमै सेज़ै गांवा दी ई। 5ज़ो लोग तुमु नाईं माना लै तैबै तिराकु निकल़ियौ आपणी चैपली री धूड़ भी पोरु झाड़ै ऊ। इणै देखीयौ सै सौमझ़ा ई कि परमेश्‍वर तिउंलै ज़ुरुर सौज़ा दिया आ।” कैलैकि तिंउऐ परमेश्‍वरा री शिक्षा नाईं शुणी। 6तेथ बासिऐ सै बारह च़ेलै अलग-अलग गांवा दी डेइयौ खुशी री खौबर शुणाउवा थै और हर ज़ागाह दी लोगु च़ांगै कौरदै लागै।

हेरोदेसा री परेशानी

(मत्ती 14:1-12; मरकुस 6:14-29)

7इणै शुणियौ हेरोदेस ज़ो सेज़ै देशा रै च़ोथै हिसै रौ आफसर थौ, घौबरा ई गौ कैलैकि कुछ़ लोग बोला थै कि यहुन्ना ज़िउंदौ हुई गौ आ। 8और कुछ़ लोग बोला थै इणौ कि एलियाह भविष्यवक्ता पौगड़ौ हुई गौ आ, और कुछ़ बोला थै कि पुराणै ज़मानै रै भविष्यवक्ता मांझ़िया कु कुण ज़िउंदौ हुई गौ आ। 9पर हेरोदेसै बोलौ, कि यहुन्ना रौ ता मुंइऐ मूंड कौटाऔ आ, आबै इयौ कुण आ ज़ासरै बारै दी हाऊं इणी बुशै शुणाऊ? तैबै हेरोदेस यीशु देखणौ च़ाहा थौ।

पांज़ हज़ार पूरषा लै रोटी खिलाउणी

(मत्ती 14:13-21; मरकुस 6:30-44; यहुन्ना 6:1-14)

10तैबै भेज़ै औन्दै प्रेरितुऐ वापिस आशीयौ ज़ो कुछ़ तिंउऐ कियौ थौ यीशु काऐ बोलौ, और यीशुऐ सै बैतसैदा इलाकै दी निऐं। 11इणै देखीयौ भीड़ यीशु पिछ़ु च़ाल पौड़ी और यीशु खुशी कौरी तिऊं लोगु कु मिलौ और तिऊं आइलै परमेश्‍वरा रै राज़ा री बुशै लाइंदै लागौ, तैबै ज़ुण ठीक हुणौ च़ाहा थै यीशुऐ सै च़ांगै किऐ। 12ज़ैबै ब्याल़ हुई गोई तैबै सै बारह रै बारह यीशु काऐ आशीयौ बोलौ कि “इऐ ज़ागाह शुनशान आ तुमै इऊं लोगु नीज़ुका रै बस्ती और गांवा दी छ़ाड़ौ ताकी इऐ लोग आपु कालै रौइणै रौ और खाणै रौ इन्तज़ाम कौरा।” 13यीशुऐ च़ेलेऊ लै बोलौ, “तुमै दैऔ इऊं लै खाणा लै।” तिंउऐ बोलौ आमुकै पांज़ रोटी और दुई माच़्छ़ी छ़ाड़ियौ कुछ़ा ना आसतौ पर अगर आमै इऊं सौभी लोगु लै नाज़ खरीदिऔ आणुलै तैबै हुई सौका, 14भीड़ा रै लोगु मांझ़िऐ कम सै कम पांज़ हज़ार ता मर्द थै। तैबै यीशुऐ आपणै च़ेलेउलै बोलौ, “इऊं लोगु धौनी बोशाल़ौ पचास पचासा री पांगती दी।” 15च़ेलेउऐ तिणी कियौ और सारै लोग बोशाल़ी गौऐ। 16तैबै यीशुऐ सै पांज़ रोटी और दुई माच़्छ़ी आपणै हाथा दी की और सौरगा भिलै देखीयौ परमेश्‍वरा रौ धन्यबाद देइयौ आशीष मांगी और रोटी च़ेलेऊ कै देई और च़ेलै लागै लोगु कै बांटदै। 17तैबै सारै लोगुऐ पेटा भौरीऔ रोटी खाई। तेती माथै भी च़ेलेउऐ बौच़ै औन्दै रोटी और माच़्छ़ी रै बारह छ़ाबडै भौरै।

पतरसा रौ यीशु “मसीह” मानणौ

(मत्ती 16:13-20; मरकुस 8:27-30)

18एकी दिनै यीशु भीड़ा रै लोगु छ़ाड़ियौ एखुलै दी प्राथना कौरदै डैऔ, और यीशु रै च़ेलै भी थै यीशु आइलै तैबै यीशुऐ च़ेलेऊ कु पुछ़ौ, “लोग मैरै बारै दी का बोलाई कि हाऊं कुण ऊ?” 19तिंउऐ ज़वाब दैऔ, “कुछ़ बोलाई इणौ कि यहुन्ना बपतिस्मौ दैणै वाल़ौ ज़िउंदौ हुई गौ आ, और कुछ़ बोलाई एलियाह भविष्यवक्ता, और कुछ़ बोलाई इणौ कि पुराणै ज़मानै रै भविष्यवक्ता मांझ़िऐ कु एक भविष्यवक्ता ज़िउंदौ हुई गौ आ।” 20यीशुऐ तिऊंकु पुछ़ौ, “तुमै का सौमझ़ा ई मुं (मैरै बारै दी)?” पतरसै ज़वाब दैऔ, “तुमै परमेश्‍वरा री तौरफा कु भेज़ै औन्दै मसीहा ई।” 21तैबै यीशुऐ तिउंकै च़ितलाऔ कि, एथरै बारै दी कासी आइलै ना बोलेऊ।

आपणी मौउता रै बारै दी यीशु री भविष्यवाणी

(मत्ती 16:21-23; मरकुस 8:31-33)

22और यीशुऐ तौंइऐ बोलौ, “कैलैकि, आदमी रै छ़ोहरुऐ भौरी दुःख उठाउणै। ई। यहुदी स्याणै लोग, बौड़ै याजक, और शास्त्री मुं नाईं मानदै, मेरी इज़्ज़त नाईं कौरदै। और मुं पोरु झ़ांगाई पर हाऊं चिजै दिनै ज़िउंदौ हुआ ऊ।”

यीशु पिछ़ु आण्डणै रौ मतलब

(मत्ती 16:24-28; मरकुस 8:34; 9:1)

23तैबै यीशुऐ सारै लोगु लै बोलौ, “अगर कुण मुं पिछ़ु हाण्डणौ च़ाहा, (मैरौ च़ेलौ बौणनौ च़ाहा लौ) सेऊ आपणी इच़्छ़ा पोरु छ़ाड़ा लौ” और आपणौ क्रूस च़ुंगियौ हर रोज़ मुं पिछ़ु हाण्डा लौ। 24कैलैकि ज़ुण-कुण आपणौ प्राण बौच़ाउणौ च़ाहा लौ तेसलै परमेश्‍वरा आइलै सौदा री ज़िन्दगी नाईं मिलदी, पर ज़ो मुकालै तयार औलौ तेसलै परमेश्‍वरा आइलै सौदा री ज़िन्दगी मिला आ। 25लोग पुरै सण्सार पाई बल़ा ई, पर एथरौ का फाइदौ आ आपणौ प्राण खोआ लै पोरु? 26ज़ो मेरी ताईं और मेरी शिक्षा री ताईं शर्मिया लौ, ता ज़ेबी हाऊं आदमी रौ छ़ोहरु आपणी, बाबा री और, पवित्र दूतु री शाना देखाइयौ आशु लै, तैबै हाऊं भी शर्मिया ऊ। 27पर, “हाऊं तुमुलै सौच़्च़ौ बोलाऊ कि इदै इऊं खौड़ै लोगु मांझ़िऐ कु कुछ़ आदमी तेबी झ़ाऊं ना मौरा लै ज़ेबी झ़ाऊं आपणी ज़िन्दगी दी ना देखा लै कि परमेश्‍वर शक्ति भौलौ राज़ कौरना लै आशौ आ।”

यीशु रौ रूप बौबल़िणौ

(मत्ती 17:1-8; मरकुस 9:2-8)

28इऊं बुशेऊ कु आठा दिना बासिऐ यीशुऐ पतरस, यहुन्ना और याकूब आपु आइलै निंएउ प्राथना कौरना लै एकी धारा माथै डैऔ। 29ज़ैबै यीशु प्राथना कौरदै लागौ, तैबै प्राथना कौरदै-कौरदै यीशु रै मुआं रौ रूप बौदल़ुई गौ, और यीशु रै जुड़कै उज़ल़ै हुइयौ च़मकदै लागै। 30और तिंआ ताकै तिऐ यहुदी लोगु रै पुराणै ज़मानै रै दुई भविष्यवक्ता भी पौगड़ौ हुऐ ज़ासरै नाऊं मुसा और एलियाह थै, सै दुई थै लागै औन्दै यीशु आइलै बुशै लाइंदै। 31सै शाना कौरीऐ दिशै, और यीशु रै मौरणै री बुशै लाइंदै थै लागै औन्दै ज़ो यरुशलेम दी हुणै वाल़ौ थौ यीशु आइलै। 32पर पतरस और तेसरै साथी थै गहरी निजा दी सुतै औन्दै, ज़ैबै सै च़ेलै आच़्छ़ै कौरीऐ थौरकै तैबै तिंउऐ यीशु री महिमा और सै दुई आदमी देखै ज़ुण यीशु आइलै खौड़ै थै। 33ज़ैबै सै दुई भविष्यवक्ता यीशु काऐ कु डेउंदै लागै, तैबै पतरसै यीशु लै बोलौ, “ओ गुरुजी, आमारौ इदै रौइणौ भौलौ आ, आबै आमै इदै चीन ताम्बु चाणी, एक ताऊं कालै, एक मुसा कालै और एक एलियाह कालै।” सेऊ नाईं ज़ाणा थौ कि हाऊं का बोलदै ऊ लागौ औन्दौ 34ज़ेबी सेऊ बोलदै थौ लागौ औन्दौ, तेबी ई सौरगा दी बादल कौठै हुऐ और सै बादल़ा दी घेरुई गौऐ तैबै सै च़ेलै डौरी गौऐ। 35तैबै बादल़ा मांझ़िऐ कु एक हाक शुणुई कि, “एऊ मैरौ गौरतौ छ़ोहरु आ, और मैरौ च़ुनौ औन्दौ आ एसरी शुणौ। 36ज़िणी तिऊं च़ेलेऊ कै इऐ हाक शुणुई तेत बासिऐ तिंउऐ यीशु एखुली देखौ, तैबै सै च़ेलै च़ुटुकच़ार थाकै और ज़ो कुछ़ तिंउऐ तिऐ देखौ थौ सै बूश तिंउऐ सेज़ै दिना दी कासी आइलै ना लाई।”

बुरी आत्मा वाल़ौ छ़ोहरु च़ांगौ कौरणौ

(मत्ती 17:14-18; मरकुस 9:14-27)

37दुजै दिनै ज़ैबै यीशु और तेसरै च़ेलै पहाड़ी माथा कु तौल़ै आशै तैबै भौरी लोगु री भीड़ यीशु कु मिली। 38तियें भीड़ा मांझ़िऐ कु एक आदमी राड़ै मारीयौ थौ बोलदै लागौ औन्दौ कि, “ओ गुरु हाऊं ताऊं कु औरज़ कौराऊ कि मैरै छ़ोहरु माथै दया कर कैलैकि सेऊ मैरौ एकलौतौ छ़ोहरु आ।” 39एक बुरी आत्मा तेस छ़ोहरु पाकड़ा सा और सेऊ छ़ोहरु किचराल़ी मारा आ, सै बुरी आत्मा तेस इणौ मेका सा कि तेसरै मुंआ दी शेफै पा आशा ई बासिऐ तेस मेकीयौ और फैंच़ीयौ बौड़ी मुश्कल़ा कौरीऐ पोरु छ़ाड़ा सा। 40मुंइऐ तैरै च़ेलेऊ कु औरज़ की थी कि इऐं बुरी आत्मा पोरु गाड़ौ, पर सै नाईं गाड़ी बौल़ै। 41तैबै यीशुऐ बोलौ, “का कौरुलै, तुमुकै मुं माथै इबी झ़ांऊ विश्वास नाईं आसतौ? तुमारौ मन ता भौरी काठौ आ, हाऊं केबी झ़ांऊ रौआऊ तुमु आइलै और केबी झ़ांऊ सहन कौराऊ? आपणौ छ़ोहरु इदै आण।” 42ज़ेबी सेऊ आदमी आपणै छ़ोहरु आणियौ आशदै लागौ, तेबी ई बुरी आत्मै सेऊ छ़ोहरु धौनी लोटाल़ौ और मेकौ पर यीशुऐ सै बुरी आत्मा डांटी और छ़ोहरु तेबी च़ांगौ कौरीयौ तेसरै बाबा कै सौंभाल़ौ। बिमार मांऊ च़ांगौ कियौ।

आपणै मौरणै रै बारै दी यीशु री भविष्यवाणी

(मत्ती 17:22-23; मरकुस 9:30-32)

43तैबै सारै लोग परमेश्‍वरा रै एज़ै बौड़ै शक्ति वाल़ै कामा देखीयौ हैरान हुऐ, ज़ैबै सारै लोग यीशु रै कामा देखीयौ हैरान थै, तैबै यीशुऐ आपणै च़ेलेऊ लै बोलौ, 44तुमै इऊं बुशेऊ दी कौन्थु लाऔ कैलैकि आदमी रौ छ़ोहरु लोगु रै हाथा दी पौकड़ाइणै वाल़ौ आ। 45पर च़ेलै एज़ी बूश नाईं सौमझ़ा थै, और इऐ बुशै तिऊंकु च़ोरुई औन्दी थी ताकी सै ना सौमझ़ा, और च़ेलै इऊं बुशु रै बारै दी यीशु कु पुछ़णा लै डौरा थै।

सारेऊ कु बौड़ौ कुण?

(मत्ती 18:1-5; मरकुस 9:33-37)

46तैबै यीशु मसीह रै च़ेलै आपु मांझ़िऐ बोलिंदै लागै कि आमु मांझ़िऐ बौड़ौ कुण आ? 47यीशुऐ तिंउरै मौना रै विच़ार सौमझ़ी गौऐ, यीशुऐ एक छ़ोहरु आणियौ आपु काऐ खौड़ौ कियौ। 48और च़ेलेऊ लै बोलौ, “ज़ो एस ज़िणौ छ़ोहरु मैरै नावां कौरी अपणावा ई सै मुं अपणावा ई, और ज़ुण कुण मुं अपणावा ई सै मैरौ बाब ज़ुणिऐ हाऊं भेज़ोऊ तेस अपणावा ई। कैलैकि तुमु मांझ़िऐ ज़ुण सारेऊ कु छ़ोटौ बौणा लौ सेऊ बौड़ौ हुआ सा।”

ज़ो बिरोधा दी नाईं सेऊ हक्‍का दी आ

(मरकुस 9:38-40)

49तैबै यहुन्ना नावां रै च़ेलेऊ यीशु लै बोलौ, “ओ गुरुजी, आमुऐ एक आदमी देखौ आ ज़ुण तुमारै नावां कौरीऐ बुरी आत्मा गाड़दै थौ लागौ औन्दौ। आमुऐ कौरी तेसलै मौना। कैलैकि सेऊ तुमारै च़ुनै औन्दै च़ेलेऊ मांझ़िऐ कु नाईं थौ।” 50यीशुऐ तेसलै बोलौ, “तेस आदमी लै मौना नाईं कौरौ कैलैकि ज़ुण आमारै विरोधा ई नाईं आसतौ सेऊ आमारै हक्‍का दी आ।” 51ज़ैबै यीशु रै सौरगा लै डेउणै रै दीन नज़दीक आशदै लागै, तैबै यीशुऐ यरुशलेमा लै डेउणै रौ विच़ार पाकौ की गौ आ। 52डेउणै कु पैहलै यीशुऐ सामरी इलाकै दी ज़ो गाऊं थै तिऊं गांवा दी आपणै दूत भेज़ै कि सै यीशु कालै ज़ागाह तयार कौरा। 53पर तिऊं गांवा रै लोगुऐ सै वापिस भेज़ै। कैलैकि यीशु यरुशलेम लै थौ डेउंदै लागौ औन्दौ। 54ज़ैबै तेसरै च़ेलै याकुबै और यहुन्नै इणौ शुणौ, तैबै तिंउऐ यीशु लै बोलौ, “ओ प्रभु” आमुलै हुकम दै कि आमै सौरगा कु आग बरसाइयौ इऊं लोगु पोरु ज़ाल़ी। 55पर यीशु तिऊं भिलै मुड़ै और सै डांटै और बोलौ, “तुमै नाईं ज़ाणदै कि तुमै किणी आत्मा रै सा। कैलैकि आदमी रौ छ़ोहरु लोगु रै प्राण नाश कौरदै नाईं बल्कि बौच़ाउणा लै आ आशौ औन्दौ। 56तैबै सै तिदरु दुजै गांवा बाटीऐ निकल़ी गौऐ।”

यीशु रौ च़ेलौ बौणनै रौ मतलब

(मत्ती 8:19-22)

57ज़ैबै सै बाटा दी डेउंदै थै लागै औन्दै, तैबै कुणिऐ यीशु लै बोलौ, “तुमै च़ाऊ ज़ियै भी डेवा लै हाऊं तुमु पिछ़ु आशाऊ।” 58पर यीशुऐ तेसलै ज़वाब दैऔ, “शालटा, रै ता रौइणा लै डौई हुआई और च़िड़ु-च़िटकेरु रै रौइणा लै कोल़ै हुआई, पर आदमी रौ छ़ोहरु हुइयौ भी मुकै सुतणा लै आपणौ घौर नाईं आसतौ।” 59यीशुऐ दुजै आदमी लै बोलौ, “आश मैरौ च़ेलौ बण, सेऊ आदमी राज़ी हुऔ, पर सेऊ बोलदै लागौ, ‘ओ प्रभु, मुं पैहलै डेउणै दै ताकी हाऊं ज़ेबी मैरौ बाब मौरा लौ ता तेसरौ किरया करम कौरु तैबै आशाऊ तुमु पिछ़ु।’ ” 60यीशुऐ तेसलै बोलौ, “ज़ुण आत्मा कु मौरै औन्दै ई तिऊं आपणै मुर्दै दाबणै दैऔ। तैरौ काम एज़ौ कि तू परमेश्‍वरा रै राज़ा रौ खुशी री खौबर शुणाऊ।” 61एकी आदमीऐ तौंइऐ बोलौ, “ओ प्रभु हाऊं ताऊं पिछ़ु आशाऊ पर पैहलै मुं डेउणै दै कि आपणै टौबरा कु इज़ाज़त निऊं लौ।” 62यीशुऐ तेसलै बोलौ, “ज़ो आदमी बाइंदी बारै हौल़ा री आड़ी माथै हाथ छ़ाड़ियौ पिछ़ाऊं देखा सेऊ परमेश्‍वरा रै राज़ा रै लायक नाईं आसतौ।”

Currently Selected:

लुका 9: BFZ-NT

Highlight

Copy