लुका 23

पिलातुसा रै सामनै यीशु

(मत्ती 27:12; मरकुस 15:1-5; यहुन्ना 18:28-38)

1तैबै सारी खुंबल़ीउऐ उठीयौ यीशु पिलातुसा काऐ नींऔ ज़ो रोमी सरकारा रौ हाकीम थौ। 2सै तेबी यीशु माथै इलज़ाम लाइंदै लागै, कि “एऊ आदमी आमारै लोगु बहकाउंदै लागौ औन्दौ। और रोमी कैसरा कै मामलै दैणा लै मौना कौरा और आपुलै मसीहा, राज़ौ बोला।” 3पिलातुसै यीशु कु पुछ़ौ, “का तू यहुदी लोगु रौ राज़ौ ई?” यीशुऐ तेसलै ज़वाब दैऔ, “तू आपु ई बोलदै लागौ औन्दौ।” 4तैबै पिलातुसै बौड़ै याजकु और लोगु लै बोलौ, “मुकै एस आदमी दी केज़ी भी गौलती नाईं दिशदी।” 5पर सै खुंबल़ी रै लोग सौख्ती कौरी बोलदै लागै, “एऊ गलील परदेशा कु इदै झ़ांऊ और सारै यहुदिया देशा दी परचार कौरीयौ लोगु बहकाउंदै लागौ औन्दौ।” 6इणै शुणियौ पिलातुसै पुछ़ौ, “का एऊ आदमी गलीली आ?” 7ता इणै ज़ाणियौ कि एऊ हेरोदेसा रै परदेशा रौ आ तैबै सेऊ हेरोदेसा काऐ भेज़ी ऐरौ आ, कैलैकि हेरोदेस सेज़ै बौगतै यरुशलेम दी थौ।

हेरोदेसा रै सामनै यीशु

8हेरोदेस यीशु देखीयौ भौरी खुश हुऔ, कैलैकि तिणीऐ यीशु रै बारै दी शुणौ थौ सेऊ तेस और तेसरै च़मतकार देखणै च़ाहा थौ। 9हेरोदेस यीशु कु भौरी सवाल पुछ़दै थौ लागौ औन्दौ, पर यीशुऐ तेसलै कुछ़ भी ज़वाब नाईं दैऔ 10बौड़ै याजक और शास्त्री खौड़ै हुइयौ यीशु माथै तौना मौना कौरीऐ झ़ुठै आरोप थै लाइंदै लागै औन्दै। 11तैबै हेरोदेसै आपणै सिपाईउ आइलै यीशु री बेइज़्ज़ती की और मज़ाक उड़ाऔ, और च़ोगै-बोगै भिड़ाइयौ पिलातुसा काऐ बापिस भेज़ौ 12हेरोदेस और पिलातुस ज़ो पैहलै एकी दुजै रै दुश्मना थै, सेज़ै दिनै सै गोश्टण बौणी गोऐ।

पिलातुसा रै ज़ौरिऐ यीशु लै मौरणै री सौज़ा

(मत्ती 27:15-26; मरकुस 15:6-15; यहुन्ना 18:39; 19:16)

13पिलातुसै बौड़ै याजक, धौर्मा रै गुरु और सारै लोग आपु काऐ औटाऐ और तिउंलै बोलौ, 14“तुमुऐ एऊ आदमी बहकाउणै वाल़ौ चाणियौ मुकाऐ आणौ आ, और देखौ, मुंइऐ तुमु काऐ एऊ पुछ़ौ और पौरखौ, पर ज़ेज़ी बुशा रौ तुमै एस माथै आरोप ला ई सेज़ी बुशै रै बारै दी मुंइऐ कुछ़ भी ना देखौ।” 15और ना हेरोदेसै कैलैकि तिणीऐ एऊ यीशु मुकाऐ वापिस भेज़ी गौ आ, और देखौ इणीऐ कुछ़ भी नाईं कियौ कि हाऊं एसलै मौरणै री सौज़ा देऊ। 16एथीलै हाऊं एस कोड़ै लौआइयौ पोरु छ़ाड़ाऊ। 17पिलातुस साज़ै रै बौगतै तिऊं कालै एक कैदी छ़ाड़ना लै मज़बूर थौ और तादु बाटै साज़ौ नज़दीक थौ 18तैबै सारै मिलियौ ज़ोरै-ज़ोरै बोलदै लागै, “एसरौ काम खातम कौरौ आमु कालै बरअब्बा नावां रौ कैदी छ़ाड़ौ।” 19बरअब्बा यरुशलेम शहरा दी लोगु पिटाऊणै और लोऊ रै केसा दी कैदा दी थौ पाऔ औन्दौ। 20पर पिलातुस यीशु छ़ाड़ना री ताइंऐ भीड़ा रै लोग तौंइऐ सौमझ़ाऐ, 21पर भीड़ा रै लोग चिल्लांदै थाकै लागी और बोलदै लागै कि, “यीशु क्रुसा माथै चौड़ाऔ क्रुसा माथै।” 22पिलातुसै चीज़ी बारै तौंइऐ बोलौ। “कैलै इणीऐ का बुराई की आ? मुंइऐ झ़ांगणै रै हुकमा लायक केज़ी भी बूश एसदी नाईं देखी। एथीलै हाऊं एस पिटाइयौ पोरु छ़ाड़ाऊ।” 23पर सै ज़ोरै-ज़ोरै च़िल्लाइयौ पिछ़ै पौड़ी गोऐ कि एऊ क्रुसा माथै च़ांई च़ौड़ाउऔ। और तिऊंरौ चिल्लाणौ पिलातुसा माथै भारी पौड़ी गौ आ। 24और पिलातुसै हुकम दैऔ, ज़िणौ भीड़ लागी ऐन्दी बोलदै तिणौ कौरौ। 25तिणीऐ सेऊ आदमी ज़ो खून कौरणै और आदमी पिटाउणा रै केसा दी ज़ेला दी थौ पाऔ औन्दौ और ज़ो भीड़ा रै लोगुऐ मांगौ, सेऊ छ़ाड़ी गौ, और यीशु भीड़ा रै लोगु कै देई ऐरौ ज़िणौ सै च़ाहा थै।

यीशु रौ क्रुसा माथी च़ौड़ाउणौ

(मत्ती 27:32-44; मरकुस 15:21-32; यहुन्ना 19:17-27)

26ज़ैबै सै यीशु निंदै थै लागै औन्दै, तैबै तिऊं भीड़ा रै लोगुऐ एक शमौन नावां रौ आदमी पाकड़ौ ज़ुण कुरेन देशा रौ रौइणै वाल़ौ थौ, तेसकु क्रूस च़ुंगाऔ और बोलौ यीशु पिछ़ु हांड। 27लोगु री बौड़ी भीड़ यीशु पिछ़ु हुई गोई और तिऊं मांझ़िऐ भौरी छ़ेउड़ी भी थी, ज़ुण यीशु लै हिकड़ै पिटी-पिटीयौ लेरा थी। 28यीशुऐ तिऊं छ़ेउड़ी भिलै मुड़ियौ बोलौ, “ओ यरुशलेम री छ़ोटीयो, मुलै नाईं लेरौ, पर आपणेऊ लै और आपणै लोल़डेऊ लै लेरौ। 29कैलैकि देखौ, सै मुश्कल़ वाल़ै दीन आशणै वाल़ै ई ज़ेज़ै दिना दी लोग बोलालै, भौली सै मां ज़ासरै लोल़डै ना हुऐ, और ज़ासकै लोल़डै ना आसतै, और ज़ुणिऐ लोल़ड़ै नाईं धाचै-पाल़ै।” 30सेज़ै बौगतै “सै धारा टिरा लै बोलालै आमु माथै ढौल़ौ, और टिबु लै बोलालै आमु च़ोराऔ। 31कैलैकि ज़ैबै सै हौरै पेड़ा आइलै इणौ कौरा ई ता शुकै पेड़ा आइलै का कुछ़ ना कौरालै?” 32यीशु आइलै झ़ांगणा लै दुई आदमी ओर भी निऐं ज़ो भौरी गुनागार थै। 33ज़ैबै सै सेज़ी ज़ागाह दी पौउंच़ै ज़ेज़ी ज़ागाह लै खोपड़ी री ज़ागाह बोला थै, तिऐ यीशु और सै बुरै आदमी, एक यीशु री सुल़टी भिलै और दुजौ उल़टी भिलै क्रुसा माथै च़ौड़ाई गौऐ। 34तैबै यीशुऐ बोलौ, “ओ बाब इऊं माफ कर, कैलैकि इऐ नाईं ज़ाणदै कि इऐ का ई लागै औन्दै कौरदै।” और तिंउऐ पौर्च़ी पाइयौ यीशु रै जुड़कै बांटी गौऐ। 35लोग खौड़ै-खौड़ै देखदै थै लागै औन्दै, और धौर्मा रै गुरु भी मज़ाक कौरीयौ बोला थै। इणीऐ दुजै बौच़ाऐ ई, अगर एऊ परमेश्‍वरा रौ मसीहा, और च़ुनौ औन्दौ आ, ता आपु ता बौच़ियौ देख। 36और सिपाईउ ऐ भी नज़दीक डेइयौ यीशु रौ मज़ाक उड़ाऔ और पिणा लै कौड़ुऐ अंगुरा रौ रस दैऔ, और ज़ोरै औटाइयौ बोला थै, 37“अगर तू यहुदिया रौ राज़ौ ई, ता आपु ता बौच़।” 38और यीशु रै मुंडा माथै क्रुसा दी एक तौखती भी थी लाई ऐन्दी, ज़ेथदी इणौ थौ लिखौ औन्दौ, “एऊ यहुदिऊ रौ राज़ौ आ।”

मन बौदुल़णै वाल़ौ कुकर्मी

39ज़ुण दुई कैदी यीशु री उल़टी और सुल़टी भिलै थै क्रुसा माथै च़ौड़ाऐ औन्दै, तिऊं मांझ़िऐ कु एकीऐ यीशु री बेइज़्ज़ती कौरीयौ बोलौ, “का तू मसीह नाईं ई? आपु भी बौच़ और आमु भी बौच़ाऊ। 40एज़ी बुशा माथै दुजै कैदीयै तेसलै डांटियौ बोलौ, का तू परमेश्‍वरा कु भी ना डौरदौ? तू भी ता सेज़ी सौज़ा भुगतदै ता ई लागौ औन्दौ। 41और आमै ता नियमा कौरीऐ सौज़ा पाइंदै लागै औन्दै, आमुलै ता आपणै बुरै कामा री सौज़ा मिलदै लागी ऐन्दी, पर इणीऐ ता केज़ौ भी बुरौ काम नाईं कियौ।” 42तैबै तिणीऐ यीशु लै बोलौ, “ओ यीशु जी, ज़ेबी तू राज़ै बौणीयौ आशा लौ ता मैरौ ध्यान भी छ़ाड़ै।” 43यीशुऐ तेसलै बोलौ, “हाऊं ताउंलै सौच़्च़ौ बोलाऊ, कि आज़ ई तू मुं आइलै सौरगा दी औआ ई।”

यीशु रै प्राण छ़ाड़णै

(मत्ती 27:45-56; मरकुस 15:33-41; यहुन्ना 19:28-30)

44दुसकौ बौगत हुई गौ आ। बारह बाज़ै कु चिआ बाज़ै झ़ांऊ सारै देशा दी न्यारौ पौड़ी रौ। 45सुरजा रौ प्याशौ भी बन्द हुऔ, और परमेश्‍वरा रै घौरा रौ पौरदौ बिच़ा कु चिरुईयौ दुई भिलै हुऔ। 46तैबै यीशुऐ ज़ोरै बोलौ, “ओ बाब, हाऊं आपणी आत्मा तैरै हाथा दी सौम्भाल़ा ऊ।” एती बोलीयौ यीशुऐ आपणै प्राण छ़ाड़ै। 47ज़ैबै रोमी सिपाईउ रौ आफसर इणौ सारौ देखदै थौ लागौ औन्दौ तैबै तिणीऐ परमेश्‍वरा री बौड़ाई कौरीयौ बोलौ, “सौच़्च़ी एऊ आदमी धौर्मी थौ। 48भीड़ा रै सारै लोग ज़ो यीशु री क्रुसा री सौज़ा देखदै थै आशै औन्दै सै भौरी दुखी हुइयौ और आपणै हिकड़ै पिटीयौ आपणै घौरै डेई गौऐ।” 49पर यीशु रै ज़ाणनै वाल़ै ज़ास आइलै गलील परदेशा री छ़ेउड़ी भी थी आशी ऐन्दी, सै दूर खौड़ी हुईऔ इणौ सारौ कुछ़ थी देखदै लागी ऐन्दी।

यीशु ओडाच़ी दी छ़ाड़णौ

(मत्ती 27:57-61; मरकुस 15:42-47; यहुन्ना 19:38-42)

50तिऐ एक युसुफ नावां रौ आदमी थौ, सेऊ यहुदी फैसलै कौरणै वाल़ी खुंबल़ी रौ एक नेतौ थौ, सेऊ आच़्छ़ौ और धौर्मी थौ। 51सेऊ तिउंरी सलाह और इणै कामा कु राज़ी नाईं थौ। सेऊ यहुदिया रै इलाकै अरिमतिया रौ रौइणै वाल़ौ थौ, और सेऊ परमेश्‍वरा रै राज़ा आशणै री आशी दी थौ। 52सेऊ पिलातुसा काऐ डैऔ और किरया करम कौरना लै यीशु रौ मौड़ौ मांगौ। 53और युसुफै यीशु रौ मौड़ौ, क्रुसा कु उतारीयौ मखमला री च़ादरी दी मेटौ और एकी ओडाच़ी दी छ़ाड़ौ ज़ो ढोकै दी थी खोदियौ चाणी ऐन्दी तेथदी पैहलै कोई भी नाईं थौ छ़ाड़ौ औन्दौ। 54एज़ौ बौगत तैयारी रै आधै दिना बासिऐ रौ थौ और आरामा रौ दीन शुरु हुणै वाल़ौ थौ। 55तिऊं छ़ेउड़ीउऐ ज़ो यीशु रै पिछ़ाड़ी-पिछ़ाड़ीयै आशी थी तिंउऐ सै ओडाच़ी देखी और इणौ भी देखौ कि एऊ मौड़ौ किणै तरिकै कौरीऐ छ़ाड़ौ औन्दौ। 56तैबै सै छ़ेउड़ी आपणै घौरै वापिस डेई और यीशु रै मौड़ै दी लाइणा लै खुश्बुदार च़िज़ै और मैंहगै वाल़ौ तेल कियौ। पर ज़ैबै तिउंकै यीशु रै मौड़ै दी लाइणा लै सारी च़िज़ै तैयार हुई, तेथ बासिऐ आरामा रौ दीन शुरु हुई गौ आ। और तिंउऐ मुसा रै नियमा कौरीऐ पुरै दिना दी आराम कियौ।

Currently Selected:

लुका 23: BFZ-NT

Highlight

Copy