लुका 22

यीशु रै बिरोधा दी यीशु पाकुड़ना लै च़ाल

(मत्ती 26:1-5; मरकुस 14:1-2; यहुन्ना 11:45-53)

1बिण संज़ेड़ै री रोटी रौ साज़ौ, ज़ेथरी शुरुआत फसह रै साज़ै कु औआ थी, सेऊ साज़ौ नज़दीक आशी गौ आ। 2सेज़ै बौगतै बौड़ै याजक लोग और यहुदी शास्त्री यीशु पाकुड़नै और झ़ांगणै रौ मौकौ लोड़दै थै लागै औन्दै, पर सै लोगु कु डौरा थै।

यहुदा रौ विश्वासघात

3तैबै शैतान यहुदा भितै आशौ, ज़ासलै इस्करियोती बोला थै और सेऊ यीशु रै बारह च़ेलेऊ मांझ़िऐ कु एक थौ। 4सेऊ बौड़ै याजकु और परमेश्‍वरा रै घौरा रै च़ोकीदारु रै मुख्यै काऐ डैऔ। ताकी यीशु पाकुड़नै रै तरीका रै बारै दी चौपड़ा। 5सै भौरी खुश हुऐ, और तेसलै इनाम दैणै रौ वायदौ भी कियौ। 6यहुदा सेज़ी बुशा लै तैयार हुई गौ, और तेबी कु सेऊ यीशु पकड़ाउणा री ताकी दी रौ, कि ज़ेबी यीशु काऐ भौरी भीड़ ना औली, सेज़ै बौगतै सेऊ, यीशु पौकड़ाई बौल़ा।

च़ेलेऊ आइलै आखरी बार साज़ै री रोटी खाणी

(मत्ती 26:17-25; मरकुस 14:12-21; यहुन्ना 13:21-30)

7तैबै बिणा संज़ेड़ै री रोटी रै साज़ै रौ दीन आशौ ज़ेबी यहुदी लोगु रै हर टबर फसह रै साज़ै दी गाबड़ु री बौल़ी च़ड़ावा थै। 8यीशुऐ पतरस और यहुन्ना इणै बोलीयौ भेज़ै कि, “डैऔ आमारै फसह रै साज़ै री रोटी खाणै रौ इन्तज़ाम कौरौ।” 9च़ेलेउऐ यीशु कु पुछ़ौ, “गुरुजी तुमै कियै च़ाहा ई कि आमै फसह रै साज़ै री रोटी रौ इन्तज़ाम कौरी?” 10यीशुऐ तिउंलै बोलौ, “देखौ शहरा दी पौउंच़िऔ तुमुकै एक आदमी मिला काछ़ा माथै पाणी री बोटलोई कौरी डेउंदै लागौ औन्दौ, ज़ेज़ै घौरा दी सेऊ डिआलौ, तुमै भी तेस पिछ़ु सेज़ै घौरा दी डेवेऊ।” 11और तेस घौरा रै स्याणै लै बोलेऊ। “गुरु ताउंलै इणौ बोला कि मुकालै तैयार कियौ औन्दौ कौमरौ केज़ौ आ? ज़ियै हाऊं आपणै च़ेलेऊ आइलै फसह रै साज़ै री रोटी खाऊ।” 12तैबै सेऊ तुमुकै माथली मंज़ली दी सज़ाऔ औन्दौ कौमरौ देखाल़ा, तिऐ तुमै फसह री रोटी रौ इन्तज़ाम कौरेऊ। 13तैबै ज़िणौ यीशुऐ तिउंलै बोलौ थौ, तिऊं च़ेलेउऐ तिऐ डेइयौ तिणौ देखौ, और तिंउऐ तिऐ फसह रै साज़ै री रोटी तैयार की।

प्रभु भोज़

(मत्ती 26:26-30; मरकुस 14:22-26; 1 कुरि. 11:23-25)

14ज़ेबी रोटी खाणै रौ बौगत आशौ ता यीशु आपणै बारह च़ेलेऊ आइलै रोटी खान्दै बोशौ। यीशु च़ेलेऊ आइलै आखरी बारै रोटी खाआ 15तैबै यीशुऐ तिउंलै बोलौ, “मेरी बौड़ी इच़्छ़ा थी कि हाऊं दुःख भोगणे और मौरणै कु पैहलै तुमु आइलै बोशियौ एज़ै फसह रै साज़ै री रोटी खाऊ।” 16कैलैकि हाऊं तुमुलै बोलाऊ, “कि ज़ेबी झ़ांऊ इऐ बुशै परमेश्‍वरा रै राज़्य दी पुरी नाईं औआ ली, तेबी झ़ांऊ हाऊं इऐं फसह री रोटी दुजी बारै केबी ना खान्दौ।” 17तैबै यीशुऐ अंगुरा रै रसा रौ खोरु च़ुंगौ और परमेश्‍वरा रौ धन्यबाद की इयौ, आपणै च़ेलेऊ लै देइयौ बोलौ एस आपु मांझ़िऐ बांटौ। 18कैलैकि हाऊं तुमुलै बोलाऊ कि ज़ेबी झ़ांऊ परमेश्‍वरा रौ राज़ नाईं आशा लौ तेबी झ़ांऊ हाऊं अंगुरा रौ रस केबी ना पिन्दौ। 19तैबै यीशुऐ रोटी च़ुंगी और परमेश्‍वरा रौ धन्यबाद कौरीयौ चोड़ी और इणै बोलीयौ आपणै च़ेलेऊ कै देई कि, “इयौ मैरौ ज़िसम आ ज़ो तुमुलै दैऔ औन्दौ,। मुं याद कौरना लै इणौ कौरेऊ।” 20इणै कौरीऐ रोटी खाइयौ यीशुऐ अंगुरा रै रसा रौ खोरु भी इणै बोलीयौ दैऔ, “एस अंगुरा रौ रस तुमै मैरौ लोऊ सौमझ़ौ ज़ो भौरी लोगु तिंउरै पापा कु बौच़ाउणा लै बौइणै वाल़ौ आ। मैरै मौरणै कु परमेश्‍वर लोगु आइलै एक नौऐं रिश्तै रौ वायदौ पाकौ कौरा आ। 21पर देखौ मुं पौकड़ाउणै वाल़ौ इदै आ आमु आइलै रोटी खान्दै लागौ औन्दौ। 22कैलैकि हाऊं ज़ुण परमेश्‍वरा री तौरफा कु भेज़ौ औन्दौ ऊ मैरौ मौरणौ ता इणी भी आ, ज़िणौ पवित्रशास्त्रा दी आ लिखौ औन्दौ। पर फिटकार आ तेस आदमी लै ज़ुण मुं पकड़ावा आ। 23तैबै सै च़ेलै आपु मांझ़िऐ एकी दुजै कु पुछ़दै लागै कि आमु मांझ़िऐ कुण औलौ ज़ुण इणै काम कौरा?”

बौड़ौ कुण आ? एथ माथी वाद-विवाद कौरणौ

24तैबै तिऊंरौ झ़ौगड़ौ भी हुऔ कि आमु मांझ़िऐ कु बौड़ौ कुण आ? 25यीशुऐ तिउंलै बोलौ, “दुजी ज़ाती रै राज़ै आपणै लोगु माथै राज़ कौरा ई, और तिऊं माथै हक्क छ़ाड़ाई, और सै तिउंलै फाइदै वाल़ौ बोलाई।” 26पर तुमै इणौ ना बोलेऊ, ज़ुण तुमु मांझ़िऐ बौड़ौ आ तिणीऐ छ़ोटौ बौणनी, और ज़ुण आ परधान तिणीऐ बौणनी सेवा कौरणै वाल़ौ। 27कैलैकि बौड़ौ कुण आ सेऊ ज़ुण रोटी खान्दै आ बोशौ औन्दौ या सेऊ ज़ुण तिउंरी सेवा कौरदै आ लागौ औन्दौ? का सेऊ नाईं ज़ुण रोटी खान्दै आ बोशौ औन्दौ? और हाऊं तुमु मांझ़िऐ सेवा कौरणै वाल़ै ज़िणौ ऊ। 28और तुमै भी मुं आइलै परखणै रै बौगतै दी सौदा रौऐ ई। 29ज़िणौ मैरै बाबै परमेश्‍वरै मुकालै राज़ दैऔ औन्दौ तिणी हाऊं भी तुमु कालै राज़ दिआऊ। 30ताकी तुमै मैरै राज़ा दी मुं आइलै बोशियौ खा पिआ लै और राज़गादी माथै बोशियौ इस्राइला रै बारह गोत्रा रै लोगु रौ फैसलौ कौरा।

पतरसा रै मुकुरना री भविष्यवाणी

(मत्ती 26:31-35; मरकुस 14:27-31; यहुन्ना 13:36-38)

31प्रभुऐ बोलौ, “शमौन! ओ शमौन, देख शैतानै तुमै गीऊं बाशी छ़ांटणा लै मुकु मांगी गौऐ। 32पर मुंइऐ तैरै बारै दी परमेश्‍वरा कु औरज़ कौरी एरी आ ताकी तैरौ मुं माथै विश्वास खातम ना हुआ। और ज़ेबी तू पौरखणै बासिऐ, वापिस आशा लौ तेबी आपणै भाईऊ भी विश्वासा दी मज़बूत कौरा।” 33शमौनै यीशु लै बोलौ, “प्रभु हाऊं ताऊं आइलै ज़ेला ई डेउणा लै और मौरणा लै भी तैयार ऊ। 34यीशुऐ शमौन पतरसा लै बोलौ, ‘हाऊं ताऊं लै बोलाऊ कि आज़ राची कुखड़ै रै बाशणे कु पैहलै आपणै मुंआ कु चिआ बारै बोलाई कि तू मुं नाईं ज़ाणदौ।’ ”

बटुऔ, झ़ोल़ी, और तलवार

35तैबै यीशुऐ आपणै च़ेलेऊ कु पुछ़ा, “ज़ेबी मुंइऐ तुमै बिण बटुऐ, बिण झ़ोल़ै, और बिण बुटै खुशी री खौबर शुणाउणा लै भेज़ै थै का तुमुलै केज़ी च़िज़ा री कामी हुई आ?” च़ेलेउऐ बोलौ! “केज़ी च़िज़ा री नाईं।” 36यीशुऐ तिउंलै बोलौ, “पर आबै ज़ासकै बटुऔ औलौ सेऊ आपुकै निआंलौ, झ़ोल़ौ भी निऔं, और ज़ासकै तलवार नाईं औली सेऊ आपणै जुड़कै बेच़ीयौ खरीदा लौ। 37कैलैकि हाऊं तुमुलै बोलाऊ, ‘ज़ो पवित्रशास्त्रा दी आ लिखौ औन्दौ। कि सेऊ बुरै लोगु आइलै गिणुऔ औन्दौ सेऊ मुलै पुरौ हुणौ ज़ुरुरी आ, कैलैकि मैरै बारै दी लिखी ऐन्दी बुशै सौच़्च़ी पुरी औणै वाल़ी आ।’ 38च़ेलेउऐ बोलौ, ‘देख इदै दुई तलवारी ई, यीशुऐ बोलौ मोकती ई।’ ”

जैतूना री टिरा माथी यीशु री प्राथना

(मत्ती 26:36-46; मरकुस 14:32-42)

39तैबै यीशु तेस कौमरै कु निकल़ियौ रोज़कै ज़िणौ जैतून नावां री पहाड़ी माथै डैऔ, और तेसरै च़ेलै भी तेस आइलै च़ाल पौड़ै। 40तिऐ पौउंच़िऔ यीशुऐ आपणै च़ेलेऊ लै बोलौ, “प्राथना कौरदै थाकौ लागी ताकी तुमै मुसीबता दी ना पौड़ा” 41सेऊ च़ेलेऊ कु तकरीबन तीस मिटर दूर डैऔ और धौनी घुंडै माथै टेकियौ प्राथना कौरदै लागौ, 42“ओ बाब, अगर तू च़ाहा ई ता, मुकाऐ कु एस दुखा रौ खोरु पोरु निऊं। तैबै भी मेरी नाईं तुमारी मौरज़ी पुरी च़ांई हुई।” 43तैबै सौरगा कु एक दूत पौगड़ौ हुऔ, और तिणीऐ यीशु लै शक्ति देई। 44यीशु भौरी दुखी हुइयौ प्राथना कौरदै लागौ, यीशु रै ज़िवा रौ दुःख एती बौड़ी गौ कि तेसरौ पसिनौ मानौ लोऊ रै टिपु बौणीयौ ज़मीना माथै पौड़दै लागौ। 45तैबै यीशु प्राथना कौरीयौ उठौ और आपणै च़ेलेऊ काऐ आशौ पर निराशा री वज़ाह कु यीशुऐ सै च़ेलै सुतै औन्दै देखै। 46यीशुऐ तिउंलै बोलौ, “तुमै कैलै ई सुतदै लागै औन्दै? ‘उठौ और प्राथना कौरौ’ नाईं ता मुसीबता ई पौड़ा ई।”

यीशु धोखै दी पाकुड़नौ

(मत्ती 26:47-56; मरकुस 14:43-50; यहुन्ना 18:3-12)

47ज़ेबी यीशु प्राथना रै बारै दी थौ बोलदै लागौ औन्दौ, तेबी लोगु री बौड़ी भीड़ तिऐ पौउंच़ी गोई। तिऊं बारह च़ेलेऊ मांझ़िया कु एक च़ेलौ ज़ासरौ नाऊं यहुदा थौ, तिऐं भीड़ा कु औगाड़ी-औगाड़िऐ थौ आण्डदै लागौ औन्दौ। यहुदा यीशु खोबीयाऊंदै यीशु काऐ आशौ। 48यीशुऐ तेसलै बोलौ, “ओ यहुदा का तू खोबु देइयौ आदमी रौ छ़ोहरु पौकड़ावा ई?” 49यीशु रै साथीऊ ऐ ज़ैबै देखौ कि का हुणै वाल़ौ आ, यीशु लै बोलौ “का आमै तलवार च़लाउलै? 50तिऊं मांझ़िऐ कु एकीऐ परधान याजका रै नुकरा दी तलवारी री लाई और तेसरौ सुल़टौ कौन्थु काटौ।” 51तेथ माथै यीशुऐ बोलौ, “बस आबै नाईं कौरौ इणौ और यीशुऐ तेस नुकरा रौ कौन्थु छ़ुंऔ और च़ांगौ कियौ। 52तैबै यीशुऐ बौड़ै याजकु और परमेश्‍वरा रै घौरा रै च़ोकीदारु रै मुख्यै और स्याणेऊ लै बोलौ, ज़ुण यीशु पाकुड़दै थै आशै औन्दै, का तुमै डाकु सौमझ़ियौ तलवारी और डिंगै कौरीऐ ई मुं पाकुड़दै आशै औन्दै? 53ज़ेबी हाऊं परमेश्‍वरा रै घौरा दी हर दिना दी तुमु आइलै थौ तेबी ता तुमुऐ हाऊं पाकड़ौ नाईं। पर एज़ौ तुमारौ बौगत आ, और नयारै रौ हक्क आ।”

पतरसा रौ इनकार

(मत्ती 26:57-68; मरकुस 14:53-54,66-72; यहुन्ना 18:13-14,19-24)

54तैबै तिंउऐ यीशु पाकड़ियौ परधान याजका रै घौरै निऔं। और पतरस यीशु पिछ़ु दूर-दूर थौ आण्डदै लागौ औन्दौ। 55च़ोकीदारुऐ याजका रै गौड़ा दी आग ज़ाल़ी और फिदीआलै बोशी गौऐ, पतरस भी तिऊं मांझ़िऐ आशीयौ बोशी गौ। 56एकी नुकराणिऐ आगी रै प्याशै दी पतरस देखौ और तेसलै बोलौ, “एऊ भी ता यीशु आइलै साथाई थौ।” 57पर पतरसै तिंआलै इणै बोलीयौ इनकार कियौ, “ओ बौइण हाऊं ता एस नाईं ज़ाणदौ।” 58थोड़ै बौगता बासिऐ तौंइऐ एकी आदमीऐ पतरसा देखीयौ बोलौ, “तू भी ता तिऊं मांझ़िया कु ई।” पतरसै बोलौ, “ओ भाई, हाऊं नाईं ऊ।” 59करीब एकी घन्टै बासिऐ तौंइऐ एक आदमी काठै कौरीऐ बोलदै लागौ, “एऊ भी ज़रूर यीशु आइलै थौ, कैलैकि एऊ गलीली आ।” 60पतरसै बोलौ, “ओ भाई, हाऊं नाईं ज़ाणदौ कि तू का ई बोलदै लागौ औन्दौ।” और सेऊ बोलदै ई थौ लागौ औन्दौ कि तेबी कुखड़ौ बाशौ। 61तैबै प्रभु यीशुऐ पतरसा भिलै मुड़ियौ देखौ और पतरसा कै सै बुशै याद आशी गोई, ज़ो यीशुऐ पतरसा लै बोली थी कि, “आज़ कुखड़ै रै बाशणै कु पैहलै चिया बारै तू मैरौ इनकार कौरा ई।” 62सेऊ बाइरै डेइयौ डीकरी-डीकरीयौ लेरदै लागौ।

यीशु री बेइज़्ज़ती

(मत्ती 26:67-68; मरकुस 14:65)

63आबै ज़ुणी च़ोकीदारुऐ यीशु पाकड़ौ औन्दौ थौ, सै यीशु री मज़ाका उड़ाइयौ यीशु पिटदै लागै। 64और यीशु री आखी माथै हाथा लाइयौ पुछ़दै लागै कि, “भविष्यवाणी कौरीयौ बोल कि ताऊं दी कुणिऐ लाई आ।” 65और तिंउऐ यीशु री भौरी बुराई की और यीशु रै विरोधा ई भौरी बुशै बोली।

बौड़ी खुंबल़ी रै सामनै यीशु

(मत्ती 26:59-66; मरकुस 14:55-64; यहुन्ना 18:19-24)

66ज़ैबै दुजौ दीन हुऔ तैबै लोगु रै स्याणै, बौड़ै याजक और यहुदी शास्त्री कौठै हुऐ और यीशु आपणी खुंबल़ी दी आणियौ तेसकु पुछ़दै लागै, 67“अगर तू मसीहा ई ता आमु आइलै बोल।” यीशुऐ तिउंलै बोलौ, “अगर हाऊं तुमु आइलै बोलु लै ता तुमै विश्वास नाईं कौरदै।” 68और अगर पुछ़ुलै, ता तुमुऐ ज़वाब ना दैणौ। 69पर इबी कु आदमी रौ छ़ोहरु ज़ो सौभी कु शक्ति वाल़ौ आ, परमेश्‍वरा री सुल़टी भिलै बोशी थाका सा। 70एज़ी बुशा माथै सारेऊ ऐ बोलौ, “तैबै का तू परमेश्‍वरा रौ छ़ोहरु ई?” यीशुऐ तिउंलै बोलौ, “तुमै ठीक ई बोलाई कैलैकि हाऊं परमेश्‍वरा रौ छ़ोहरु ऊ।” 71तैबै तिंउऐ बोलौ, “आमुकै आबै तौंइऐ गवाही री ज़ुरत नाईं आसती कैलैकि आमुऐ आपु ई एसरै मुआं कु बोलदै शुणी गौ आ।”

Currently Selected:

लुका 22: BFZ-NT

Highlight

Copy