लुका 15

औच़ी औन्दी भेरी रौ औनैणौ

(मत्ती 18:12-14)

1भौरी सारै मामलै निणै वाल़ै और पापी लोग यीशु काऐ आशा थै तेसरी बुशै शुणदै। 2पर फरीसी और यहुदी शास्त्रिउ आपु मांझ़िऐ घुणमुणांदै लागै, “कि एऊ ता पापी लोगु आइलै मिला और रोटी भी खा सा।” 3तैबै यीशुऐ तिउंलै एज़ौ औनैणौ दैऔ, 4“तुमु मांझ़िऐ इणौ कुण आ ज़ासरी शौ भेरी औली और तिऊं मांझ़िया कु एक औच़ा ली पोरु, तैबै तिऊं बाकी बौच़ी ऐन्दी नड़ीनवे भेरी तिऐ शुनशान ज़ागाह दी छ़ाड़ियौ तिऐं औच़ी ऐन्दी नड़ीनवे भेरी तेबी झ़ांऊ ना लोड़ा लौ ज़ेबी झ़ांऊ सै ओरु ना मिला? 5और ज़ेबी सै औच़ी ऐन्दी भेर ओरु मिला आ तैबै सेऊ भेराल़डु तिऐं भेर खुशी कौरीऐ आपणै काछ़ा माथै च़ुंगा सा। 6और आपणै घौरा कै आशीयौ आपणै गोश्टण और पड़ोसिऊ औटाइयौ तिउंलै बोला मुं आइलै खुशी मौनाऔ, कैलैकि मेरी औच़ी ऐन्दी भेर मिली गोई आ। 7हाऊं तुमुलै बोलाऊ इणी ई सौरगा दी भी तिऊं बाकी धौर्मी छ़ाड़ियौ ज़ासकै पापा कु मन बौदुल़णै री ज़ुरत नाईं आसती, पर मन बौदुल़णै वाल़ै एक पापी लै इणी खुशी हुणी आ।”

औच़ै औन्दै सिक्कै रौ औनैणौ

8“या कुण छ़ेउड़ी इणी आ ज़ासकै च़ांदी रै दस सिक्कै औलै, और तिऊं मांझ़िया कु एक औच़ा लौ पोरु, और सै छ़ेउड़ी तेस डौलर लम्पा ज़ाल़ियौ और घौरा दी एज़ियौ और लोड़ीयौ ज़ेबी झ़ांऊ सेऊ मिला नाईं लौ का तेबी झ़ांऊ तेस नाईं लोड़दी? 9और ज़ेबी सेऊ डौलर मिला लौ तैबै सै छ़ेउड़ी आपणी सहेलीऊ और आपणी पड़ोसिऊ औटाइयौ तिऊं लै बोला आ! मुं आइलै खुशी मौनाऔ, ‘कैलैकि मैरौ औच़ौ औन्दौ डौलर मिली गौ आ।’ 10हाऊं तुमुलै बोलाऊ कि इणी ई खुशी एक पापी रै मन बौदुल़णै कु परमेश्‍वरा रै सौरगदूता रै सामनै हुआ सा।”

औच़ौ औन्दौ छ़ोहरु

11यीशुऐ तौंइऐ एक औनैणै देइयौ बोलौ, “एकी आदमी रै दुई छ़ोहरु थै। 12तिऊं मांझ़िऐ कु छ़ोटै छ़ोहरुऐ आपणै बाबा लै बोलौ, ‘ओ बाब ज़बीन-ज़यदादा दी ज़ो मैरौ हिस्सौ आ, तेस मुकै इबी दैऔ’ तैबै तेसरै बाबै तिउंकै ज़बीन-ज़यदाद बांटी। 13कुछ़ दिना बासिऐ तिणी छ़ोटै छ़ोहरुऐ आपणी सारी धन-ज़यदाद कौठै की और दूर देशा लै डैऔ। तिऐ तिणीऐ आपणी ज़यदाद बुरै कामा दी खौर्च़ की। 14ज़ेबी तिणीऐ आपणी सारी धन-ज़यदाद खौर्च़ की एरी। तेबी तेस देशा दी बौड़ौ काल़ पौड़ौ और सेऊ छ़ोहरु कंगाल बौणौ तेसकै खाणा लै कुछ़ भी नाईं थौ। 15तैबै सेऊ तेस देशा रै एकी ज़िमदारा रै काऐ डैऔ, तिऐ तिणी ज़िमदारै सेऊ आपणै डोखरै दी सुंगरु च़ारदै लाऔ। 16सेऊ भौरी भुखौ थौ और च़ाहा थौ की ज़ेज़ौ चापण इऐ सुंगुर खा ई, सेज़ै चापणा खाइयौ आपणौ पेट भौरु, और तेसलै कोइयौ कुछ़ा ना दिआ थै। 17ज़ैबै सेऊ छ़ोहरु होशी-बाशी दी आशौ। तैबै बोलदै लागौ, ‘कि मैरै बाबा रै केती मज़दूर ई ज़ो पेटा भौरीयौ रोटी खा ई, पर हाऊं इदै भुखौ मौरदै लागौ औन्दौ।’ 18आबै हाऊं उठीयौ आपणै बाबा काऐ डिआऊ, और बोलाऊ, ‘ओ बाब मुंइऐ परमेश्‍वरा रै खिलाफ और तुमारी नौज़रीऐ पाप कियौ आ, 19आबै हाऊं इणै जोगी नाईं रौ कि तुमै मुलै छ़ोहरु बोला, मुं तुमै आपु काऐ एक मज़दुरा बाशीऐ छ़ाड़ौ।’ 20तैबै सेऊ तेस देशा छ़ाड़ियौ आपणै बाबा भिलै च़ाल पौड़ौ सेऊ औज़ौ आपणै घौरा कु दख दुडड़ै थौ कि तेसरै बाबै सेऊ आपणौ छ़ोहरु दुरा कु देखौ और तेसरी आखी भौरुई। तेस छ़ोहरु फेट मारीयौ डैऔ, तेसदी घीण लाई और सेऊ खोबीयाऔ। 21तिणी छ़ोहरुऐ आपणै बाबा लै बोलौ, ‘ओ बाब, मुंइऐ परमेश्‍वरा रै खिलाफ और तुमारी नौज़रीऐ पाप कियौ आ, आबै हाऊं इणै जोगी नाईं रौ कि तुमै मुलै आपणौ छ़ोहरु बोला।’ 22पर तेसरै बाबै आपणै नुकरु लै बोलौ फेटी आच़्छ़ै-आच़्छ़ै जुड़कै आणौ और एसकै भिड़ाऔ और एसरै हाथा दी कांगणी और लाता दी बूट लाऔ। 23और धाचै औन्दै पशु मांझ़िया कु एक काटौ ताकी आमै खाइयौ खुशी मौनाई लै। 24कैलैकि मैरौ एऊ छ़ोहरु मौरी गौ थौ। आबै ज़िउंदौ हुई गौ आ, औच़ी गौ थौ आबै मिली गौ आ। तैबै सै खुशी मौनाउंदै लागै। 25पर तेसरौ ज़ेठौ छ़ोहरु थौ डोखरै दी, ज़ेबी सेऊ वापिस आपणै घौरा रै नज़दीक पौउंच़ौ, ता तेसकै गाइणौ बज़ाउणौ और नाच़णौ शुणुऔ। 26तैबै तिणीऐ एक नुकुर औटाइयौ तेसकु पुछ़ौ, ‘भितै का सा औन्दै लागौ औन्दौ?’ 27तिणी नुकरै तेसलै बोलौ, ‘तैरौ भाईटु वापिस आशी गौ आ।’ और तैरै बाबै तेसरै आशणै री खुशी दी बौड़ी धाम आ देई ऐन्दी, कैलैकि तैरौ भाई भौलौ-च़ांगौ वापिस आशौ आ। 28इणै शुणियौ तेसरै भौरी रोश आशै, और सेऊ भितरै डेउणौ नाईं च़ाहा थौ, तैबै तेसरौ बाब बाइरै आशीयौ तेस मौनाउंदै लागौ। 29तिणीऐ आपणै बाबा लै ज़वाब देइयौ बोलौ, ‘देखौ हाऊं एती बौरशा ओउलै तुमारी सेवा कौरदै ऊ लागौ औन्दौ, मुंइऐ केबी भी तुमारौ हुकम नाईं टाल़ी। तैबै भी तुमुऐ मुलै केबी एक बाकरी रौ च़ेल़टु भी ना दैऔ, कि हाऊं आपणै गोश्टणु आइलै खुशी मौनाऊं।’ 30पर ज़ेबी तुमारौ इयौ छ़ोहरु ज़ुणिऐ तुमारी ज़यदाद गान्दै कामा दी खौर्च़ की, वापिस आशौ आ ता तेसलै तुमुऐ धाचौ औन्दौ पशु पा कौटाऔ आ। 31तेसरै बाबै तेसलै बोलौ, ‘छ़ोहरु आ तू ता सौदा मुंई आइलै ई, ज़ो कुछ़ मैरौ आ, सेऊ सारौ तैरौ आ। 32पर आबै च़ांई आमुऐ खुशी मौनाउंणी कैलैकि एऊ तैरौ भाई मौरी गौ थौ आबै ज़िउंदौ हुई गौ आ, औच़ी गौ थौ आबै मिली गौ आ।’ ”

Currently Selected:

लुका 15: BFZ-NT

Highlight

Copy