यहुन्ना 9

ज़नमा रै शेड़ै रौ औनैणौ

1यीशुऐ डेउंदी बारै एक आदमी देखौ ज़ुण ज़नमा कु शेड़ौ थौ। 2तेसरै च़ेलेउऐ तेसकु पुछ़ौ, “ओ गुरु, कुणिऐ पाप किऔ थौ कि एऊ शेड़ौ पैदौ हुऔ, इणी आदमीऐ या एसरै मां-बाबै?” 3यीशुऐ ज़वाब दैऔ, “ना ता इणीऐ पाप किऔ थौ, ना ता एसरै मां-बाबै, पर एऊ एथीलै हुऔ कि परमेश्‍वरा रै काम एसदी पौगड़ौ हुआ।” 4“ज़ुणिऐ हाऊं भेज़ौ औन्दौ ऊ, आमै तेसरै काम दीन ई दिना दी कौरणै ज़ुरुरी ई। सै राच आशणै वाल़ी आ ज़ेथदी कोई काम नाईं कौरी बौल़दै। 5ज़ेबी झ़ांऊ हाऊं धौतरी दी ऊ तेबी झ़ांऊ हाऊं धौतरी रौ प्याशौ ऊ।” 6इणौ बोलीयौ तिणीऐ ज़मीना दी थुकौ। और तेस थुका कौरी माटौ सीनौ किऔ, और सेऊ माटौ तेस शेड़ै री आखी दी लाइऔ, 7तेसलै बोलौ, “डेऊ, शिलोमा रै कुंऐ दी आखी धोऊ” (शिलोह रौ मतलब आ “भेज़ौ औन्दौ”)। तिणीऐ डेइऔ आखी धोई, और देखदै हुइयौ वापिस आशौ। 8तैबै तेसरै पड़ोसी और ज़ुणिऐ सेऊ भीखा मांगदै देखौ थौ, बोलदै लागै, “का एऊ सेऊ नाईं, ज़ुण बोशियौ भीख मांगा थौ?” 9कुछ़ लोगुऐ बोलौ, “एऊ सेऊ ऊ आ।” दुजेउऐ बोलौ, “नाईं, पर तेसी ज़िणौ कुण ओर आ।” तिणीऐ बोलौ, हाऊं सेऊ ऊ। 10तैबै सै तेसकु पुछ़दै लागै, “तू देखदै किणै कौरी लागौ ई?” 11तिणीऐ ज़वाब दैऔ, “यीशु नावां रै एकी आदमीऐ माटौ सीनौ किऔ, और मेरी आखी दी लाइऔ बोलौ, ‘शिलोह रै कुंऐ दी डेइऔ धोऊ,’ तैबै हाऊं डैऔ और आखी धोई और देखदै लागौ।” 12तिंउऐ तेसकु पुछ़ौ, “सेऊ किऐ आ? तिणीऐ बोलौ, हाऊं नाईं ज़ाणदौ।”

फरीसीउ रै ज़ौरिऐ च़ंगाई रै बारै दी खोज़ खुशी री खौबर

13लोगुऐ सेऊ ज़ुण पैहलै शेड़ौ थौ फरीसीउ काऐ नीं गौ। 14ज़ेज़ै दिनै यीशुऐ माटौ सीनौ कौरीयौ तेसरी आखी खोली थी, सेऊ आरामा रौ दीन थौ। 15तैबै फरीसीउऐ भी तेसकु पुछ़ौ कि तू देखदै किणै कौरी लागौ ई। तिणीऐ तिउंलै बोलौ, “तिणीऐ मेरी आखी दी माटौ लाऔ, तैबै मुंइऐ आखी धोई ई, आबै देखाऊ ऊ।” 16एथ माथै कुछ़ फरीसी लोग बोलदै लागै, “एऊ आदमी परमेश्‍वरा री तौरफा कु नाईं, कैलैकि सेऊ आरामा रौ दीन नाईं मानदौ।” दुजेउऐ बोलौ, “पापी आदमी इणै निशाण किणै कौरीऐ देखाल़ी बौल़ा आ?” और तिऊं मांझ़िऐ फूट पौड़ी गोई। 17तिंउऐ तेस शेड़ै आदमी लै तौंइऐ बोलौ, “तिणीऐ तेरी आखी खोली गोई। तू तेसरै बारै दी का बोलाई?” तिणीऐ बोलौ, “सेऊ भविष्यक्ता आ।”

18पर यहुदी मुख्यै कै विश्वास नाईं हुऔ कि सेऊ शेड़ौ थौ और आबै देखा आ, ज़ेबी झ़ांऊ तिंउऐ तेसरै, ज़ासरी आखी खुली गोई थी, मां-बाब औटाइयौ 19तिऊंकु पुछ़ौ, “का एऊ तुमारौ छ़ोहरु आ, ज़ासलै तुमै बोलाई कि शेड़ौ पैदौ हुऔ थौ? तैबै आबै एऊ किणौ देखी बौल़ा आ?” 20तेसरै मां-बाबै ज़वाब दैऔ, “आमै ता ज़ाणी कि एऊ आमारौ छ़ोहरु आ, और शेड़ौ पैदौ हुऔ थौ। 21पर आमै इणौ नाईं ज़ाणदै कि आबै एऊ किणै कौरीऐ देखा आ, और ना इणौ ज़ाणदै कि कुणिऐ एसरी आखी ठीक की ई। एऊ स्याणौ आ। एसी कु पुछ़ौ। एऊ आपणै बारै दी आपु बोला आ।” 22एज़ी बुशै तेसरै मां-बाबै एथीलै बोली कैलैकि सै यहुदी मुख्यै कु डौरा थै, कैलैकि यहुदी मुख्यै कौट्ठै हुई गौऐ थै कि अगर कुण विश्वास कौरालौ कि एऊ मसीह आ, ता आराधनालय कु पोरु गाड़ी ई। 23एथीलै तेसरै मां-बाबै बोलौ, “एऊ स्याणौ आ, एसी कु पुछ़ौ।”

24तैबै तिंउऐ तेस आदमी कु ज़ो शेड़ौ थौ, दुजै बारै औटाइयौ तेसलै बोलौ, “सौच़्च़ौ बोलीयौ परमेश्‍वरा री बौड़ाई कर। आमै ता ज़ाणी कि सेऊ आदमी पापी आ।” 25तिणीऐ ज़वाब दैऔ, “हाऊं नाईं ज़ाणदौ कि सेऊ पापी आ कि नाईं। हाऊं एक ई बूश ज़ाणाऊ कि हाऊं शेड़ौ थौ और आबै देखाऊ।” 26तिंउऐ तेसलै तौंइऐ बोलौ, “तिणीऐ ताऊं आइलै का किऔ? और किणै कौरी तेरी आखी ठीक कौरी आ?” 27तिणीऐ तिउंलै बोलौ, “मुंइऐ ता तुमुलै बोली गौ आ, और तुमुऐ नाईं शुणौ। आबै दुजै बारै कैलै शुणनौ च़ाहा ई? का तुमै भी तेसरै च़ेलै हुणौ च़ाहा ई?” 28तैबै सै तेसलै बुरौ-भौलौ बोलीयौ बोलदै लागै, “तू ई तेसरौ च़ेलौ, आमै ता मुसा रै च़ेलै ई। 29आमै ज़ाणी कि परमेश्‍वरै मुसा आइलै बुशै लाई। पर एस आदमी नाईं ज़ाणदै कि एऊ केशी कु आशौ आ।” 30तिणीऐ तिऊं लै ज़वाब दैऔ, “एज़ी ता हैरानी री बूश आ कि तुमै नाईं ज़ाणदै कि सेऊ किदलौ आ, तैबै भी तिणीऐ मेरी आखी खोली गोई। 31आमै ज़ाणी कि परमेश्‍वर पापीऊ री नाईं शुणदौ, पर अगर कोई परमेश्‍वरा रौ भौगत आ और तेसरी मौरज़ी माथै हाण्डा आ, ता सेऊ तेसरी शुणा आ। 32ज़ेबी कु धौतरी चाणी आ तेबी ओउलै केबी भी आमुऐ नाईं शुणौ कि कुणिऐ पैदाइशी कु शेड़ै री आखी ठीक कौरी ई। 33अगर एऊ आदमी परमेश्‍वरा री तौरफा कु नाईं औलौ, ता कुछ़ भी नाईं कौरी बौल़ा थौ।” 34तिंउऐ तेसलै ज़वाब दैऔ, “तू ता बिल्कुल ई पापा दी पैदौ हुऔ ई, तू आमुलै का शिखावा ई?” और तिंउऐ सेऊ बाइरै गाड़ी गौ।

आत्मा कु शेड़ौ

35यीशुऐ शुणौ कि तिंउऐ सेऊ बाइरै गाड़ी गौ आ, और ज़ेबी सेऊ मिलौ ता तेसलै बोलौ, “का तू आदमी रै छ़ोहरु माथै विश्वास कौरा ई?” 36तिणीऐ ज़वाब दैऔ, “ओ प्रभु, सेऊ कुण आ, कि हाऊं तेस माथै विश्वास कौरु?” 37यीशुऐ तेसलै बोलौ, “ताइंऐ सेऊ देखौ भी आ, और ज़ुण ताऊं आइलै बुशै लाइंदै आ लागौ औन्दौ सेऊ आ।” 38तिणीऐ बोलौ, “ओ प्रभु, हाऊं ताऊं माथै विश्वास कौराऊ।” और तेसलै ढाल की ई। 39तैबै यीशुऐ बोलौ, “हाऊं एस धौतरी दी फैसलौ कौरदै ऊ आशौ औन्दौ ताकी ज़ुण नाईं देखदै सै देखा और ज़ुण देखा आ सै शेड़ै औआ।” 40ज़ुण फरीसी तेस आइलै थै तिंउऐ एज़ी बुशै शुणियौ तेसलै बोलौ, “का आमै भी शेड़ै ई?” 41यीशुऐ तिउंलै बोलौ, “अगर तुमै शेड़ै औलै ता पापी नाईं औआ थै पर आबै बोलाई कि आमै देखी ई, एथीलै तुमुलै माफी नाईं मिलदी।”

Currently Selected:

यहुन्ना 9: BFZ-NT

Highlight

Copy