यहुन्ना 14

परमेश्‍वर झ़ांऊ पउंच़णा री बाट

1“तुमारौ ज़िऊ भौरी दु:खी ना हुआ। परमेश्‍वरा माथै विश्वास छ़ाड़ौ और मुं माथै भी विश्वास छ़ाड़ौ। 2मैरै बाबा रै घौरा दी, रौइणा लै भौरी ज़ागाह सा, अगर नाईं औआ थी ता हाऊं तुमुलै बौल़ा थौ। कैलैकि हाऊं तुमुलै ज़ागाह त्यार कौरदै डेआऊ। 3ज़ेबी हाऊं डेइऔ तुमु कालै ज़ागाह त्यार कौरुलै, ता हाऊं तौंइऐ आशीयौ तुमु आपु काऐ निआंऊ ताकी ज़िऐ हाऊं रौउलै तिऐ तुमै भी रौआ। 4ज़िऐ हाऊं डिआऊ तुमै तिदली बाट ज़ाणाई।” 5थोमै तेसलै बोलौ, “ओ प्रभु, आमै नाईं ज़ाणदै तुमै केशी डिआई। ता बाट किणौ ज़ाणी?” 6यीशुऐ तेसलै बोलौ, “बाट, सौच़्च़ाई और सौदा री ज़िन्दगी हाऊं ऊ। मैरै बिणा कोई बाबा काऐ नाईं डेई बौल़दौ। 7अगर तुमुऐ हाऊं ज़ाणौ थौ, ता मैरौ बाब भी ज़ाणा थै। और आबै तेस ज़ाणाई, और सेऊ देखी भी गौ आ।” 8फिलिप्पुसै तेसलै बोलौ, “ओ प्रभु, बाब आमुकै देखाल़, एती ई आमुलै भौरी आ।” 9यीशुऐ तेसलै बोलौ, “ओ फिलिप्पुस, हाऊं एती दिना ओउलै तुमु आइलै ऊ, और का तू मुं नाईं ज़ाणदौ? ज़ुणिऐ हाऊं देखौ ऊ तिणीऐ बाब देखौ आ। तू कैलै बोलाई कि बाब आमुकै देखाल़? 10का तू विश्वास नाईं कौरदौ कि हाऊं बाबा दी ऊ और बाब मुंदी आ? एज़ी बुशै ज़ो हाऊं तुमुलै बोलाऊ, आपणी तौरफा कु नाईं बोलदौ, पर बाब मुंदी रौइऔ आपणै काम कौरा आ। 11मैरौ विश्वास कौरौ की हाऊं बाबा दी ऊ, और बाब मुंदी आ। नाईं ता हैरानी वाल़ै कामा री वज़ाह कु ज़ो मुइंऐ कौरै ई मैरौ विश्वास कौरौ।” 12“हाऊं तुमुलै सौच़्च़ौ-सौच़्च़ौ बोलाऊ कि ज़ुण मुं माथै विश्वास छ़ाड़ाई, एज़ौ काम ज़ेज़ौ हाऊं कौराऊ सै भी कौरा ई, पर एथकु भी बौड़ै काम कौरा ई, कैलैकि हाऊं बाबा काऐ डिआऊ। 13ज़ो कुछ़ तुमै मैरै नावां कौरी मांगा ई, तेस हाऊं कौराऊ, कि छ़ोहरु री तौरफा कु बाबा री बौड़ाई हुआ। 14अगर तुमै मुकु मैरै नावां कौरी कुछ़ मांगा लै, ता हाऊं तेस कौराऊ।”

पवित्र आत्मा रौ वायदौ

15“अगर तुमै मुकु प्यार कौरा ई, ता मैरौ हुकम मानौ। 16हाऊं बाबा कु औरज़ कौराऊ, और सेऊ तुमुलै एक औज़ौ मज़द कौरणै वाल़ौ दिया आ ताकी सेऊ सौदा तुमु आइलै रौआ। 17मतलब पवित्र आत्मा ज़ो लोगु सौच़्च़ाई भिलै निंया आ, ज़ास सण्सार नाईं अपणाउंदौ, कैलैकि सेऊ ना ता तेस देखदौ और ना तेस ज़ाणदौ। तुमै तेस ज़ाणाई, कैलैकि सेऊ तुमु आइलै रौआ आ, और सेऊ तुमु दी औआ।” 18“हाऊं तुमु एखुली नाईं छ़ाड़दौ। हाऊं तुमु काऐ आशाऊ। 19और थोड़ौ बौगत रौई गौ आ कि सण्सार मुं नाईं देखाल़ौ, पर तुमै मुं देखाल़ै। एथीलै कि हाऊं ज़िउंदौ ऊ, तुमै भी ज़िउंदै रौआ ई। 20सेज़ै दिनै ज़ेबी हाऊं तौंइऐ आशाऊ तुमै ज़ाणालै कि हाऊं आपणै बाबा दी ऊ, और तुमै मुंदी ई, और हाऊं तुमु दी। 21ज़ुण मैरै हुकम ई और तिऊं माना ई, सै मुं आइलै प्यार छ़ाड़ाई। और ज़ुण मुं आइलै प्यार छ़ाड़ाई तिऊं आइलै मैरौ बाब प्यार छ़ाड़ा, और हाऊं तेस आइलै प्यार छ़ाड़ाऊ और आपु तेस माथै पौगड़ौ औआ ऊ।” 22तिणी ई यहुदै ज़ुण इस्करियोती नाईं थौ, तेसकु पुछ़ौ, “ओ प्रभु, का हुऔ कि तू आपु आमु माथै पौगड़ौ कौरणौ च़ाहा ई और धौतरी रै लोगु माथै नाईं?” 23यीशुऐ तेसलै ज़वाब दैऔ, “अगर कुण मुकु प्यार कौरालौ ता सेऊ मैरौ वचन माना आ, और मैरौ बाब तेसकु प्यार कौरा, और आमै तेस काऐ आशी ई, और तेस आइलै रौई। 24ज़ुण मुं आइलै प्यार नाईं छ़ाड़ा लौ, सेऊ मैरौ वचन नाईं मानदौ। और ज़ेज़ौ वचन तुमै शुणाई सेऊ मैरौ नाईं पर बाबा रौ आ, ज़ुणिऐ हाऊं भेज़ौ ऊ।” 25“एज़ी बुशै मुंइऐ तुमु आइलै रौइऔ तुमुकै बोली ई। 26पर मज़दगार मतलब पवित्र आत्मा ज़ास बाब मैरै नावां कौरी भेज़ा आ, सेऊ तुमुकै सारी बुशै शिखावा, और ज़ो कुछ़ मुंइऐ तुमुलै बोलौ आ, सेऊ सब तुमुकै याद कौरावा आ। 27हाऊं तुमुलै शान्ति दिआऊ, सै शान्ति ज़ो मुकै आ। इऐ सेज़ी शान्ति नाईं ज़ो सण्सार तुमुलै दिया आ, तुमारौ ज़िऊ भौरी दु:खी ना च़ांई हुऔ।” 28तुमुऐ शुणौ कि मुंइऐ तुमुलै बोलौ, “हाऊं डिआऊ, और तुमु काऐ तौंइऐ आशाऊ।” अगर तुमै मुकु प्यार कौरा थै, ता एज़ी बुशा कु खुश औआ थै कि हाऊं बाबा काऐ डेआऊ, कैलैकि बाब मुकु बौड़ौ आ। 29और मुंइऐ आबै इऐ बुशै तुमुकै हुणै कु पैहलै तुमुकै बोली गौ कि ज़ेबी सेऊ हुआ, ता तुमै मुं माथै विश्वास कौरौ। 30मुकै आबै तुमु आइलै बुशु लाइणै रौ बौगत नाईं आ, कैलैकि इऐं धौतरी रौ मुख्यौ शैतान आशा आ। मुं माथै तेसरौ कोई हक्क नाईं। 31पर एऊ एथीलै हुआ आ ताकी सण्सार ज़ाणा कि हाऊं बाबा आइलै प्यार छ़ाड़ाऊ, और ज़िणौ बाबै मुलै हुकम दैऔ आ हाऊं तिणी ई कौराऊ। उठौ, इदरा कु डेई ई।

Currently Selected:

यहुन्ना 14: BFZ-NT

Highlight

Copy