यहुन्ना 12

यीशु रै बांगणेऊ दी खुशबुदार तेल पाइणौ

(मत्ती 26:6-13; मरकुस 14:3-9)

1यीशु फसह रै साज़ै रै छ़ौ दीन पैहलै बैतनिय्याह गांवा दी आशौ ज़िऐ लाज़र ज़िउंदौ कियौ थौ, ज़ो यीशुऐ ज़िउंदौ कियौ थौ। 2तिऐ तिंउऐ तेसलै रोटी तैयार की। और मारथा थी सेवा कौरदै लागी ऐन्दी, और लाज़र तिऊं मांझ़िऐ एक थौ ज़ुण यीशु आइलै रोटी खान्दै थौ बोशौ औन्दौ। 3तैबै मरियमै जटामांसी रौ आधौ सेर भौरी किमत्ती खुश्बुदार तेल आणियौ यीशु री लाता माथै पाऔ, और आपणै बाल़ा कौरी तेसरै लात गुशै। और तेला री खुशबु कौरी घौर खुशबुदार हुई गौ। 4पर यीशु रै च़ेलेऊ मांझ़िआ कु यहुदा इस्करियोती नावां रौ एक च़ेलौ ज़ुण तेस पकड़ाउणौ च़ाहा थौ, बोलदै लागौ, 5“एऊ तेल चीन शौ दिनारा दी बेच़िऔ गरीबु लै कैलै ना दैऔ औलौ?” 6तिणीऐ एज़ी बूश एथकु ना बोली भी नाईं कि तेसकै गरीबु री झ़ौरी थी पर एथलै कि सेऊ च़ोर थौ, और तेसकै पैसेऊ रौ बैग हुआ थौ और तेथदी ज़ो कुछ़ पा थै, सेऊ गाड़ा थौ तेथकु पोरु। 7यीशुऐ बोलौ, “इऐं इणौ कौरणै दैऔ परेशान ना कौरौ, कैलैकि इऐ मैरै मौरणै रै दिना लै त्यारी कौरा आ। 8कैलैकि गरीब ता सौदा तुमु आइलै रौआ ई, पर हाऊं तुमु आइलै सौदा नाईं रौउंदौ।”

लाज़र झ़ांगणै रौ फैसलौ

9ज़ैबै यहुदिऊ री बौड़ी भीड़ा कै पौतौ लागी गौ कि सेऊ तिऐ आ, ता सै सिरफ यीशु री वज़ाह कु नाईं आशै पर एथलै भी कि लाज़र देखा, ज़ो यीशुऐ मौरै औन्दै मांझ़िआ कु ज़िउंदौ कियौ थौ। 10तैबै बौड़ै याजक लाज़र झ़ांगणै रै बारै दी आपु मांझ़िऐ चौपड़िंदै लागै। 11कैलैकि लाज़रा री वज़ाह कु कई यहुदी लोग तिऊं छ़ाड़ियौ डेई गौऐ और यीशु माथै विश्वास कियौ।

यरुशलेमा दी ज़ीत आशणी

12दुजै दिनै भौरी लोगुऐ ज़ो साज़ै दी थै आशै औन्दै, इणौ शुणियौ कि यीशु यरुशलेमा लै आ आशदै लागौ औन्दौ। 13तैबै तिंउऐ खज़ूरा री डाल़ी नींई और तेसकु मिलदै डेवै, और हाकै देइयौ बोलदै लागै, “होसाना! आशीष वाल़ौ आ इस्राइला रौ राज़ौ, ज़ो प्रभु रै नावां कौरी आशा आ।” 14ज़ेबी यीशु कै गादै रौ गौधेटु मिलौ। ता सेऊ तेस माथै बोशौ, ज़िणौ लिखौ औन्दौ आ,

15“ओ यरुशलेमा रै लोगुओ, नाईं डौरौ। देखौ, तुमारौ राज़ौ गौधेटु माथै बोशियौ आ आशदै लागौ औन्दौ।” 16यीशु रै च़ेलै पैहलै ता एज़ी बुशै नाईं सौमझ़ै, पर ज़ेबी यीशु री महिमा पौगड़ौ हुई ता तिउंकै याद आशी कि एज़ी बुशै तेसरै बारै दी थी लिखी ऐन्दी और लोगुऐ तेस आइलै तिणौ बरताव किऔ थौ। 17तैबै भीड़ा रै तिऊं लोगुऐ एकी दुज़ेऊ लै बोलौ, “ज़ुण लोग तेस आइलै थै ज़ेबी तिणीऐ लाज़र ओडाच़ी कु औटाइयौ मौरै औन्दै कु ज़िउंदौ किऔ थौ।” 18भौरी लोग यीशु कु मिलदै आशै कैलैकि तिंउऐ यीशु रै तेस हैरानी वाल़ै कामा रै बारै दी शुणौ थौ, 19तैबै फरीसीउऐ आपु मांझ़िऐ बोलौ, “सुंच़ौ ता सही, आमै कुछ़ नाईं कौरी बौल़द। देखौ, धौतरी रै लोग तेस पिछ़ु च़ाल पौड़ी गौऐ।”

युनानिऊ रौ यीशु लोड़णौ

20ज़ुण लोग तेस साज़ै दी आराधना कौरदै परमेश्‍वरा रै घौरा दी थै आशै औन्दै तिऊं मांझ़िआ कु कुछ़ युनानी थै। 21तिंउऐ गलील परदेशा रै बैतसैदा गांवा दी रौइणै वाल़ै फिलिप्पुस नावां रै आदमी काऐ आशीयौ तेसकु औरज़ की, “ओ फिलिप्पुस, आमै यीशु कु मिलणौ च़ांई।” 22फिलिप्पुसै आशीयौ आन्द्रियासा कै बोलौ, तैबै आन्द्रियास और फिलिप्पुसै डेइऔ यीशु कै बोलौ। 23एथ माथै यीशुऐ तिउंलै बोलौ, “सेज़ौ बौगत आशी गौ आ कि आदमी रै छ़ोहरु री बौड़ाई औआ।” 24हाऊं तुमुकै सौच़्च़ौ-सौच़्च़ौ बोलाऊ कि ज़ेबी झ़ांऊ गीऊं रौ दाणौ ज़मीना दी पौड़ीयौ मौरदौ नाईं, तेबी झ़ांऊ सेऊ एखुली रौआ आ। पर ज़ेबी मौरा आ, ता भौरी फल़ आणा आ। 25ज़ुण आपणै प्राण प्यारै सौमझ़ा आ, सेऊ तेस पोरु औरावा आ। और ज़ुण इऐं धौतरी दी आपणै प्राण प्यारै नाईं सौमझ़दौ, सेऊ सौदा री ज़िन्दगी झ़ांऊ तेस बौच़ावा आ। 26अगर कुण मेरी सेवा कौरा आ, ता तिणीऐ मैरौ च़ेलौ जा सा बौणनौ। और ज़िऐ हाऊं ऊ, तिऐ मैरौ च़ेलौ भी हुआ। अगर कुण मेरी सेवा कौरा, ता बाब तेसरी इज़्ज़त कौरा आ।

क्रुसा री मौउता रौ इशारौ

27“आबै मैरौ ज़िऊ बेचैन आ। एथीलै आबै हाऊं का बोलु? ‘ओ बाब, मुं एज़ै दु:खा रै बौगता कु बौच़ाऊ?’ कैलैकि हाऊं इऐं दुनिया दी एथीलै आशौ ऊ कि दु:ख उठाऊ।” 28“ओ बाब, आपणै नावां री बौड़ाई कर।” तैबै सौरगा कु एक हाक शुणुई, “कि मुंइऐ तेसरी बौड़ाई की आ, और औज़ौ भी कौराऊ।” 29तैबै ज़ुण लोग खौड़ै हुइयौ शुणदै थै लागै औन्दै तिंउऐ बोलौ कि सौरग गुड़ौ। ओरीउऐ बोलौ, “सौरगदूतै तेस आइलै बुशै लाई आ।” 30तेथ माथै यीशुऐ बोलौ, “एज़ी हाक मुलै नाईं, पर तुमुलै आशी आ। 31आबै परमेश्‍वर इऐं धौतरी रै लोगु रौ फैसलौ कौरा आ, आबै परमेश्‍वर तेस शैतान ज़ो धौतरी रै लोगु माथै राज़ कौरा आ, नाश कौरा आ। 32और हाऊं, अगर धौतरी कु उंच़ी ज़ागाह दी डेउलै। ता सारेऊ आपु काऐ आणाऊ।” 33इणै बोलीयौ यीशुऐ इणौ पौगड़ौ की गौ, कि सेऊ किणी मौउतिऐ मौरा आ। 34एथ माथै लोगुऐ यीशु लै बोलौ, “आमुऐ पवित्रशास्त्रा री एज़ी बूश शुणी आ कि मसीह सौदा लै ज़िवा, तैबै तू कैलै बोलाई कि आदमी रौ छ़ोहरु उंच़ै दी च़ड़ाउणौ ज़ुरुरी आ? एऊ आदमी रौ छ़ोहरु कुण आ?” 35यीशुऐ तिउंलै बोलौ, “प्याशौ आबै थोड़ी देरा झ़ांऊ तुमु मांझ़िऐ आ। ज़ेबी झ़ांऊ प्याशौ तुमु आइलै आ तेबी झ़ांऊ हाण्डदै थाकौ लागी, इणौ नां च़ांई हुऔ कि न्यारौ तुमु आशीयौ घेरा। ज़ुण न्यारै दी हाण्डा आ सेऊ नाईं ज़ाणदौ कि केशी डिआ। 36ज़ेबी झ़ांऊ प्याशौ तुमु आइलै आ, प्याशै माथै विश्वास कौरौ ताकी तुमै प्याशै री लोल़डै बौणा।” एज़ी बुशै बोलीयौ यीशु तिदरा कु डेई गौ और तिऊंकु च़ोरुई थाकौ।

यहुदिऊ रौ बिण विश्वासा दी बौणी रौइणौ

37यीशुऐ तिउंकै एतरै हैरानी वाल़ै काम देखाऐ, तैबै भी तिंउऐ तेस माथै विश्वास नाईं किऔ। 38एऊ एथीलै हुऔ ताकी यशायाह भविष्यवक्ता रौ वचन पुरौ हुआ ज़ो तिणीऐ बोलौ थौ, “ओ प्रभु, कुणिऐ आमारै खुशी री खौबरा माथै विश्वास कियौ आ? और परमेश्‍वरा री शक्ति कास दी पौगड़ी हुई आ?”

39एज़ी वज़ाह कु सै विश्वास नाईं कौरी बौल़ै, कैलैकि यशायाह भविष्यवक्तै इणौ भी बोलौ आ,

40“तिणीऐ तिउंरी आखी शेड़ी की, और तिऊंरौ ज़िऊ काठौ किऔ। केशी इणौ ना च़ांई हुऔ कि सै आखी कौरी देखा, और ज़िवा कौरी सौमझ़ा, और आपणौ ज़िऊ बौदल़ै, और हाऊं तिऊं च़ांगै कौरु।” 41यशायाह भविष्यवक्तै एज़ी बुशै एथकु बोली कि तिणीऐ यीशु री भविष्य दी हुणै वाल़ी महिमा देखी, और तिणीऐ तेसरै बारै दी बुशै लाई। 42तैबै भी यहुदी मुख्यै मांझ़िआ कु भौरीउऐ तेस माथै विश्वास किऔ, पर फरीसीउ री वज़ाह कु पौगड़ै दी नाईं माना थै, केशी इणौ ना च़ांई हुऔ कि सै आराधनालय कु बाइरै गाड़िया 43कैलैकि आदमी री तौरफा कु बौड़ाई तिउंकै, परमेश्‍वरा री तौरफा री बौड़ाई कु भौरी आच़्छ़ी लागा थी।

यीशु रौ वचन फैसलै री पौई

44यीशुऐ हाकै देइऔ बोलौ, “ज़ुण मुं माथै विश्वास कौरा आ, सेऊ मुं माथै नाईं पर मैरै भेज़णै वाल़ै परमेश्‍वरा माथै विश्वास कौरा आ। 45और ज़ुण मुं देखा आ, सेऊ मुं भेज़णै वाल़ौ देखा आ। 46हाऊं धौतरी माथै प्याशौ हुइयौ ऊ आशौ औन्दौ ताकी ज़ुण मुं माथै विश्वास कौरा सेऊ न्यारै दी ना रौआ। 47अगर कुण मेरी बुशै शुणियौ नाईं माना लौ, ता हाऊं तिऊं आरोपी नाईं चाणदौ। कैलैकि हाऊं धौतरी रै लोगु माथै आरोप लाइंदै नाईं, पर धौतरी रै लोगु रौ छ़ुटकारै कौरदै ऊ आशौ औन्दौ। 48ज़ुण मुं कुछ़ भी ना मानदौ और मेरी बुशै नाईं अपणाउंदौ तेसदी आरोप लाइणै वाल़ौ ता एक आ, मतलब, ज़ो वचन मुंइऐ बोलै ई, सै ई फैसलै रै दिना दी तेस माथै आरोप ला ई। 49कैलैकि मुंइऐ आपणी तौरफा कु बुशै नाईं बोली। पर बाबै ज़ुणिऐ हाऊं भेज़ौ ऊ तिणीऐ मुलै हुकम दैऔ आ, कि का बुशै लाऊ और का बोलु? 50और हाऊं ज़ाणाऊ कि तेसरौ हुकम ज़ो सौदा रौ ज़िन्दगी दिया आ। एथीलै हाऊं ज़ो कुछ़ बोलाऊ, तेस तिणी बोलाऊ ज़िणौ बाब मुलै बोला आ।”

Currently Selected:

यहुन्ना 12: BFZ-NT

Highlight

Copy