प्रेरित 13

बरनबास और शाऊल भेज़णै

1अन्ताकिया इलाकै री कलिसिया दी कई भविष्यवक्ता और परचार कौरणै वाल़ै थै। ज़िणौ की बरनबास और शमौन ज़ुण काल़ौ थौ, और लुकियुस कुरेनी, और च़ोथै हिस्सै रौ राज़ौ हेरोदेसा रौ भाई मनाहेम, और शाऊल। 2ज़ेबी सै ब्रौता छ़ाड़ियौ प्रभु री आराधना कौरदै थै लागै औन्दै, ता पवित्र आत्मै बोलौ कि “मुकालै बरनबास और शाऊल अलग कौरौ ज़ेज़ी सेवा लै मुंइऐ इऐ चुने ई।” 3तैबै तिंउऐ ब्रौत और प्राथना कौरी और बरनबास और शाऊल परमेश्‍वरा रै सेवा रै कामा लै भेज़ै।

पतरसा रौ परचारा दी डेउणौ शुरु

4तैबै बरनाबास और शाऊल पवित्र आत्मा रै भेज़ै औन्दै अन्ताकिया इलाकै कु सिलुकिया नावां री ज़ागाह लै डेवै। तिदरु पाणी री बौड़ी किश्ती दी साइप्रस टापु लै डेवै। 5तिऐ सलमीस नावां री ज़ागाह दी पौउंच़िऔ, तिंउऐ परमेश्‍वरा रौ वचन यहुदिऊ री आराधनालय दी शुणाऔ। यहुन्ना भी तिउंरी मज़द कौरा थौ। 6सै तेस टापु सारै गांवा दी डेइयौ पाफुस नावां री ज़ागाह झ़ांऊ पौउंच़ै। तिऐ तिउंकै बार-यीशु नावां रौ एक यहुदी आदमी मिलौ, ज़ुण ज़ादु-टोनौ, और हुणै वाल़ी झ़ुठी बुशै बोला थौ। 7सेऊ सिरगियुस पौलुसा नावां रौ आफसरा आइलै थौ, सेऊ बुद्धिमान आदमी थौ। सिरगियुस पौलुसै बरनबास और शाऊल आपु काऐ औटाऐ कैलैकि सेऊ परमेश्‍वरा रौ वचन शुणनौ च़ाहा थौ। 8पर इलीमास नावां रै ज़ादु-टोन्है कौरणै वाल़ै, (एऊ बार-यीशु रौ असली नाऊं थौ) तिऊंरौ विरोध कौरीयौ आफसर यीशु माथै विश्वास कौरणै कु रोकणौ च़ाऔ। 9तैबै शाऊलै ज़ासरौ नाऊं पौलुस भी आ, पवित्र आत्मा कौरी भौरुइऔ इलीमास ज़ादु-टोणै कौरणै वाल़ै भिलै बौड़ै ध्याना कौरी देखौ और बोलौ, 10“ओ सारी बुराई और च़ालाकी कौरी भरुऔन्दै शैताना रै छ़ोहरु, आच़्छ़ै कामा रौ दुश्मना, का तू परमेश्‍वरा री सिधी बाट दारखी कौरणौ नाईं छ़ाड़दौ? 11आबै देख, प्रभु ताउंलै सौज़ा दैणै वाल़ौ आ। और तू कुछ़ बौगता झ़ांऊ शेड़ौ रौआ ई और सुरज नाईं देखदौ।” तेबी तेसरी आखी दी धुंधलौ और न्यारौ छ़ाई गौ, और सेऊ ओरु-पोरु तोपींदै लागौ ताकी कोई तेसरौ हाथ पाकड़ियौ हण्डावा। 12तैबै आफसरै ज़ो कुछ़ तिऐ हुऔ थौ तेस देखीयौ और प्रभु रै वचना शुणियौ हैरानी कौरीऐ प्रभु यीशु माथै विश्वास कियौ।

पिसिदिया रै अन्ताकिया दी

13पौलुस ओर तेसरै साथी पाफुसा इलाकै कु ज़हाज़ कौरीऐ पंफूलिया इलाकै रै पिरगा गांवा दी आशै। और यहुन्ना (मरकुस) तिऊं छ़ाड़ियौ यरुशलेमा लै वापिस आशौ। 14पिरगा कु औगांऊ बौड़ियौ सै पिसदिया रै नज़दीक अन्ताकिया इलाकै दी पौउंच़ै। और आरामा रै दिना दी आराधनालय दी डेइयौ बोशी गौऐ। 15मुसा रै नियम और पुराणै भविष्यवक्ता री किताबी कु पौड़णै बासिऐ आराधनालय रै मुख्यै लोगुऐ तिउंलै बोलौ, “ओ भाईओ, अगर तुमारै ज़िवा दी कुछ़ बूश आ लोगु कै बोलणै लै ता बोलौ।” 16तैबै पौलुसै खौड़ै हुइयौ और हाथा हिलाइयौ बोलौ, “ओ इस्राइली लोगुओ, और परमेश्‍वरा कु डौरणै वाल़े दुजी ज़ाती रै लोगुओ, शुणौ, 17इऊं इस्राइली लोगु रै परमेश्‍वरै आमारै नान-बुड़ु च़ुनी गौऐ, और ज़ेबी इऐ मिस्र देशा दी परदेशी हुइयौ रौआ थै, ता सै बौड़ाऐ। और आपणी शक्ति कौरीऐ सै तिदरु आज़ाद किऐ। 18हालांकी सै परमेश्‍वरा री बुशै भी नाईं माना थै, तैबै भी सेऊ कम सै कम चालिस साला झ़ांऊ शुनशान ज़ागाह दी तिऊं री देखभाल़ कौरदै थाकौ लागी, 19और कनान देशा री सात ज़ाती झ़ांगीयौ इस्राइली लोग तिऐ साड़ै च़ार शौ साला झ़ांऊ बौसाल़ै। 20तेथ बासिऐ शमुएल भविष्यवक्ता झ़ांऊ परमेश्‍वरै यहुदी लोगु मांझ़िऐ फैसलै कौरणै वाल़ै छ़ाड़ै। 21ज़ेबी शमुएल तिऊंरौ मुख्यौ थौ तेबी तिंउऐ एक राज़ौ मांगौ। तैबै परमेश्‍वरै बिन्यामिना रै वंशा कु चालिस साला झ़ांऊ एक आदमी, मतलब कीशा रौ छ़ोहरु शाऊल तिऊं माथै राज़ौ चाणौ। 22तैबै सेऊ अलग कौरीयौ दाऊद राज़ौ चाणौ। ज़ेथरै बारै दी तिणीऐ गवाही देई, कि मुकै एक आदमी, यिशै रौ छ़ोहरु दाऊद, मैरै ज़िवा ज़िणौ मिली गौ आ। एऊ मेरी सारी मौरज़ी पुरी कौरा आ। 23तेसी रै वंशा कु परमेश्‍वरै आपणौ वायदौ कियौ औन्दौ इस्राइला कै एक छ़ुटकारै दैणै वाल़ौ, मतलब यीशु भेज़ौ आ। 24ज़ासरै आशणै कु पैहलै यहुन्नै सारै इस्राइलिऊ मांझ़िऐ मन बौदुल़णै रै बपतिस्मौ रै बारै दी परचार कियौ। 25ज़ेबी यहुन्ना आपणी सेवा पुरी कौरणै वाल़ौ थौ, ता तिणीऐ लोगु लै बोलौ कि तुमै मुं का सौमझ़ा ई? हाऊं मसीहा नाईं ऊ, पर देखौ मुं बासिऐ एक आशणै वाल़ौ आ, ज़ासरै हाऊं बुटा खोलणै रै लायक भी नाईं।” 26“अब्राहमा री सन्तान, ओ मैरै भाईओ, तुमै ज़ुण दुजी ज़ाती रै परमेश्‍वरा कु डौराई। तुमुकै इऐ छ़ुटकारै री खौबर भेज़ी औन्दी। 27यरुशलेमा दी रौइणै वाल़ै और तिंउरै स्याणेउऐ ना यीशु रवावौ और ना पुराणै भविष्यवक्ता री बुशै सौमझ़ी, ज़ो हर आरामा वाल़ै दिना दी पौड़ा ई, एथीलै सेऊ आरोपी चाणीऔ सै बुशै पुरी की। 28तिंउऐ झ़ांगणै लायक तेसदी कोई गलती नाईं देखी, तैबै भी पिलातुसा कु ज़ुण रोमी सरकारा रौ आफसर थौ औरज़ कौरी की एस पोरु झ़ांगौ। 29ज़ैबै तिंउऐ यीशु रै बारै दी लिखी ऐन्दी सारी बुशै पुरी की, ता सेऊ क्रुसा माथै कु धौनी उतारीयौ ओडाच़ी दी छ़ाड़ौ। 30पर परमेश्‍वरै सेऊ मौरै औन्दै मांझ़िया कु ज़िउंदौ कियौ, 31और यीशु तिउंकै ज़ुण तेस आइलै गलीला परदेशा कु यरुशलेम शहरा लै आशै थै, भौरी दिना झ़ांऊ आपणै च़ेलेऊ कै दिशौ। लोगु मांझ़िऐ आबै सै ई गवाह ई। 32आमै तुमुकै तेस वायदै रै बारै दी ज़ो नान-बुड़ु कु कियौ थौ, एज़ी खुश-खुशी री खौबरी शुणाई, 33कि परमेश्‍वरै यीशु मौउता कु ज़िउंदौ कौरीयौ, सेज़ौ वायदौ आमारै लोल़डेऊ लै पुरौ कियौ आ। ज़िणौ भजन संहिता री किताबी दी दुजै पाठा दी आ लिखौ औन्दौ कि ‘तू मैरौ छ़ोहरु ई।’ आज़ मुंइऐ ताऊं लै जनम दैऔ आ। 34और तेसरै इणै मौरणै बासिऐ ज़िउंदै हुणै रै बारै दी भी, कि सेऊ केबी ना शौड़दौ, परमेश्‍वरै इणौ बोलौ, हाऊं दाऊदा माथा री पवित्र और केबी ना खातम हुणै वाल़ी आशीष तुमु माथै कौराऊ। 35एथीलै दाऊदै एक औज़ौ भजना दी भी बोलौ, ‘कि तू आपणै पवित्र आदमी शड़नै नाईं दैंदौ।’ 36कैलैकि दाऊद ता परमेश्‍वरा री मौरज़ी कौरीऐ आपणै बौगता दी सेवा कौरीयौ सौदा लै मौरी गौ, और आपणै नान-बुड़ु मांझ़िऐ मिली गौ, और शौड़ी भी गौऔ। एथीई कौरी आमै ज़ाणी की दाऊदै इऐ बूश आपणै बारै दी नाईं बोलौ। 37पर दाऊदै यीशु रै बारै दी बोलौ आ, ज़ो परमेश्‍वरै ज़िउंदौ कियौ आ सेऊ नाईं शौड़ौ। 38एथीलै, ‘ओ भाईओ, तुमै सौमझ़ौ कि यीशु रै ज़ौरिऐ पापा कु माफी पाइणै री खुश-खुशी री खौबरी तुमुलै देई ऐन्दी।’ 39और ज़ेज़ी बुशा दी तुमै मुसा रै नियमा रै ज़ौरिऐ बेकसूर नाईं बौणा थै, तिऊं सौभी दी हरेक विश्वास कौरणै वाल़ौ यीशु रै ज़ौरिऐ बेकसूर बौणा आ।” 40एथीलै खौबरदार रौएऊ, इणौ ना च़ांई हुऔ कि ज़ो पुराणै भविष्यवक्ता री किताबी दी लिखौ औन्दौ, सेऊ तुमु माथै पौड़ा: (घौटा) 41ओ “बुराई कौरणै वाल़ेउओ, देखौ, और हैरान हुऔ, और मौरौ। कैलैकि हाऊं तुमारै दिना दी एक काम कौराऊ, इणौ काम कि अगर कुण तुमु मांझ़िया कु तेसरी बुशै भी ला लौ, ता तुमै केबी विश्वास ना कौरा।” 42तैबै पौलुस और बरनबास आराधनालय कु बाइरै आशणै बासिऐ लोग तिऊंकु औरज़ कौरदै लागै कि दुजै आरामा वाल़ै दिना दी इऐ बुशै आमुकै औज़ौ शुणाएऊ। 43ज़ैबै आराधनालय रै लोग उठी गौऐ ता यहुदी और यहुदी गुटा रै आशै औन्दै भौगत मांझ़िया कु भौरी लोग पौलुस और बरनबासा पिछ़ु डेई गौऐ। और तिंउऐ सै लोग सौमझ़ाऐ कि परमेश्‍वरा री दया दी सौदा बौणी रौएऊ। 44दुजै आरामा रै दिना दी इलाकै रै सारै लोग परमेश्‍वरा रै वचन शुणना लै दोअती कौट्ठै हुई गौऐ। 45पर यहुदी मुख्यै लोग भीड़ा रै लोगु देखीयौ रोशा कौरीऐ भौरुई गौऐ, और पौलुसा री बुराई कौरदै लागै। 46तैबै पौलुस और बरनबासै बिण डौरी तिउंलै बोलौ, “ज़ुरुरी थौ कि पेहलै परमेश्‍वरा रौ वचन तुमुकै शुणाइया। अगर तुमै नाईं शुणदै और आपणौ ज़िऊ सौदा री ज़िन्दगी रै लायक नाईं सौमझ़दै, ता आमै दुजी ज़ाती रै लोगु भिलै मुड़ी (और तिउंकै परमेश्‍वरा रौ वचन शुणाई)।” 47कैलैकि प्रभुऐ आमुकै इणौ हुकम दैऔ आ “मुंइऐ तुमै दुजी ज़ाती लै प्याशै चाणेई, ताकी दुनिया रै कुणै-कुणै झ़ांऊ सौभी लोगु रौ छ़ुटकारौ औलौ।” 48इणै शुणियौ दुजी ज़ाती रै लोग खुश हुऐ, और परमेश्‍वरा रै वचना री बौड़ाई कौरदै लागै। ज़ेती लोग सौदा री ज़िन्दगी पाइणै वाल़ै थै, तिऊं सौभीऐ तेबी विश्वास कियौ। 49तैबै परमेश्‍वरा रौ वचन सारै देशा दी फैलदै लागौ। 50पर यहुदी लोगु रै मुख्यै उंच़ी ज़ाती री भौगत छ़ेउड़ी और इलाकै रै कुछ़ स्याणै लोग आपणै वंशा किऐ, तिऊंकु पौलुस और बरनबासा रौ विरोध कौराइयौ सै आपणै इलाकै कु बाइरै गौड़ाऐ। 51तैबै पौलुसै और बरनबासै तिऊं काऐ आपणी चैपली री धूड़ झ़ाड़ीयौ इणौ देखाऔ कि परमेश्‍वरै सै आपणी नौज़री कु दूर कौरी गौऐ और तिदरु निकल़ियौ इकुनियुमा गांवा लै डेवै। 52च़ेलै खुशी कौरीऐ और पवित्र आत्मा कौरी भौरिंदै थाकै लागी।

Currently Selected:

प्रेरित 13: BFZ-NT

Highlight

Copy