Mar 15

Jesû nîwavirirwe kûrî Pilato

(Mat 27.1-2,11-14; Luka 23.1-5; Joh 18.28-38)

1Kîraûko tene anene a athînjîri-Ngai nîmaagîre ndundu na athuuri, arimû a Watho, Kîamma kîonthe na makîrîkanîra ûrîa magwîka. Nao nîmoovire Jesû na makîmûvira kûrî Pilato. 2Nake Pilato nîwamûûririe atîrî,

“We nîwe mûthamaki wa Ayahudi?” Nake Jesû nîwamûcokerie atîrî, “Nîwe wauga guo!”

3Nao anene a athînjîri-Ngai nîmaathitangire Jesû na maûndû mengî, 4kwoguo Pilato nîwamûûririe rîngî atîrî, “Anga ndûgûcokia? Tathikîrîria maûndû mau monthe marakûthitanga namo!”

5Wana rîngî Jesû nîwaregire gûcokia wa naarî ûndû. Kwoguo Pilato nîwamakire mûno.

Jesû nîwatuîrîrwe kûûragwa

(Mat 27.15-26; Luka 23.13-25; Joh 18.39—19.16)

6Vîndî ya pasaka Pilato nîwamenyerete kûrekagîrîria mûndû ûmwe wa arîa meethagîrwa marî njeera, mûndû wa ûrîa andû mangîetirie. 7Na vîndî îo kwarî na mûndû ûmwe wetagwa Baraba wovetwe njeera vamwe na mîtoi îrîa yaûraganîte vîndî îrîa kwarî na mbaara ya kûregana na thirikari. 8Nakîo kîrîndî nîkîathiîre kûrî Pilato na gîkîmûûria eke ûrîa aamenyerete gwîka. 9Nake Pilato nîwamaûririe atîrî, “Nîmûkwenda nîmûrekerie mûthamaki wa Ayahudi?” 10Pilato nîwecî waro atî anene a athînjîri-Ngai maanenganîrîte Jesû kûrî ke nîûndû maarî na wîru.

11Kwoguo anene a athînjîri-Ngai nîmaaringîrîre kîrîndî kîre Pilato amarekerie Baraba. 12Nake Pilato nîwacokire akîmaûria rîngî atîrî, “Mûrenda mbîke atîa vi na mûndû ûyû mwîtaga mûthamaki wa Ayahudi?”

13Nao nîmaanîrîre atîrî, “Mwambithie mûtharavarî îgûrû.”

14Nake Pilato nîwamaûririe atîrî, “Nîmwambithia nîkî? Ekîte wîvia ûrîkû?”

Nwatî nîmaakîrîrîrie kugîrîria atîrî, “Mwambithie mûtharavarî îgûrû.”

15Na nîûndû Pilato nîwendaga gûkenia kîrîndî, nîwamarekerie Baraba. Nake Pilato nîwarivithirie Jesû ivoko na akîmûnenganîra akambwe.

Thigari nîcianyûrûririe Jesû

(Mat 27.27-31; Joh 19.2-3)

16Nao athigari nîmaavirire Jesû nyombarî ya mûnene na magîîta athigari arîa engî a mbûtû yao. 17Nîmaacokire makîmwîkîra nguo ya rangi ya njambarawe, makîthondeka nthûmbî ya mîgua na makîmwîkîra yo kîongorî gîake. 18Nao athigari nîmaambîrîrie kûmûkethia na kînyûrûri atîrî, “Wî mwaro Mûthamaki wa Ayahudi!” 19Nao nîmaamûrivire kîongo na rûthanju, makîmûtuîra mata na makîmûturîria maru takwa maramûgooca. 20Rîrîa maarîkirie kûmûnyûrûria, nîmaamûrutire nguo ya rangi ya njambarawe îrîa maamwîkîrîte na makîmûcokia nguo ciake. Nao nîmaamûrutire na nja makamwambe.

Kwambwa kwa Jesû

(Mat 27.32-44; Luka 23.26-43; Joh 19.17-27)

21 # Aro 16.13 Na marî njîrarî, nîmaatûnganire na mûndû wetagwa Simoni aumîte ya mîgûndarî na makîmûringîrîria akuuîre Jesû mûtharava. (Simoni aarî wa kuuma Kurene na aarî îthe wa Alekisanda na Rufasi.) 22Nao nîmaavirire Jesû vandû vetagwa Gologotha, na ûguo nî ta kuga. “Vandû va îvîndî rîa kîongo.” 23Nîmaaveere Jesû ndivei îtukanîtue na kîndû kîrûrû, nwatî akîrega kûmînyua. 24#Tha 22.18 Nîmaamwambire, makîgaania nguo ciake na magîciûthîra nîguo mamenye gîcunjî kîrîa wa mûndû akûthiî nakîo. 25Maamwambire thaa ithatû cia kîraûko. 26Nakîo kîmenyithia gîa kwonania gîtûmi Kîam ambwe, Kîamndîkîtwe atîrî, “Mûthamaki wa Ayahudi.” 27Nîmaacokire makîamba acuunani aîrî vamwe na Jesû, ûmwe mwena wake wa ûrîo na ûcio wîngî mwena wake wa ûmotho. [ 28#Isa 53.12 Namo mandîko marîa maugîte atî nîwataranîrue vamwe na imaramari, nîmaavingirue.]#15.28 Mandîko mamwe matirî 15.28.

29 # Tha 22.7; Tha 109.25; Mar 14.58; Joh 2.19 Nao andû arîa maavîtûkagîrîra vau nîmaamûrumaga na makamûnyûrûria makîmwîraga atîrî, “Oo! We nîûngîomomorire hekarû na ûmîtume rîngî na mîthenya îthatû, 30rîu îîtethûre na wîrute mûtharavarî.”

31Wana nginya anene a athînjîri-Ngai na arimû a Watho nîmaamûnyûrûririe makîranaga atîrî, “Nîaratethûraga arîa engî, nwatî ndangîîtethûra! 32Tiga twone Mesaya mûthamaki wa Isiraeli akîîruta kuuma mûtharavarî îgûrû na nîtûkûmwîtîkia.”

Wana nginya acunani arîa maambîtwe vamwe nake nîmaamûrumire.

Gûkua kwa Jesû

(Mat 27.45-56; Luka 23.44-49; Joh 19.28-30)

33Na thaa thita cia mûthenya ciakinya, vûrûri wonthe nîwagîre nduma nginya thaa kenda. 34#Tha 22.1 Na ciakinya thaa kenda Jesû nîwaugîrîrie atîrî, “Eloi, Eloi, lama, savakithani?” Na ûguo nî ta kuga, “Ngai wakwa, Ngai wakwa, wandiganîria nîkî?”

35Nao andû amwe arîa maarûngamîte vau mamwîgua, nîmaaugire atîrî, “Tegueni nîareta Elija.” 36#Tha 69.21 Na ûmwe gatagatîrî kao nîwavinyûrire agîoca civonji, na akîmîrinda ndiveirî îno ngagatu. Nîwacokire akîmîmundîrîra karûthanjurî na akîmûnengereria anyue akiugaga atîrî, “Etererani twone kana Elija nîagûka kûmûruta kuuma mûtharavarî.”

37Nake Jesû nîwanîrîre na mûgambo mûnene akînakua.

38 # Ntha 26.31-33 Vîndî wa îo gîtambaa gîa hekarû nîgîatûkanire maita maîrî, kuuma îgûrû nginya nthî. 39Nake mûnene ûmwe wa athigari îgana ûrîa warûngamîte vau mbere ya Jesû ona agîtuîkana nîwaugire atîrî, “Na ma mûndû ûyû ararî Mûriû wa Ngai.”

40 # Luka 8.2-3 Na vau vaarî na aka meeroragîria marî varaca. Gatagatîrî kao kwarî na Mariamu Mûmagidali, Salome na Mariamu ng'ina wa Josefu na Jakuvu ûrîa mûnini. 41Nao nîmaarûmagîrîra Jesû na makamûtungatagîra vîndî îrîa aarî Galili. Wana vaarî na aka engî eengî arîa maathiîte nake Jerusalemu.

Kûthikwa kwa Jesû

(Mat 27.57-61; Luka 23.50-56; Joh 19.38-42)

42Kwarî kîvwaî mûthenya wa kwîvarîria na nîguo mûthenya ûrîa wî mbere ya mûthenya wa thavatû. 43Josefu wa kuuma Arimathea nîwaûkire. Nake aarî mûthuuri mûtîîe wa Kîamma na watûûraga etererete gûka kwa Ûthamaki wa Ngai. Nake nîwathiîre kûrî Pilato na akîmûria amûve mwîrî wa Jesû. 44Pilato nîwamakire mûno rîrîa eegwire atî Jesû nî mûkuû. Na kwoguo nîwetire mûnene wa athigari îgana nîguo amûrie kana Jesû aarî mwîkaru kavinda karaca kuuma akua. 45Rîrîa eerirwe nî mûnene ûcio wa athigari îgana atî Jesû aarî mûkuû, nîwavere Josefu mwîrî wa Jesû. 46Nake Josefu nîwagûrire cuka, agîcurûria mwîrî ûcio, akîûrigica nayo, na akîwiga mbîrîrarî îrîa yacîtwe îthigarî. Nîwacokire akîvingiritia îthiga rînene nîguo rîkunîke mûromo wa mbîrîra îo. 47Nake Mariamu Mûmagidali na Mariamu ng'ina wa Josefu, nîmoonire varîa mwîrî wa Jesû waigirwe.

Currently Selected:

Mar 15: KKB

Highlight

Copy