Luka 4

Jesû nîwagerirue

(Mat 4.1-11; Mar 1.12-13)

1Jesû nîwaumire rûnjîrî rwa Jorodani ecûrîtwe nî Roho Mûtheru. Roho ûcio nîwamûtongoririe akîmûvira werûrî, 2kûrîa aagerirue nî Ngoma îvinda rîa mîthenya mîrongo îna. Mîthenya îo yonthe Jesû ndaarî mûrîu kîndû, kwoguo rîrîa mîthenya îo yathirire nîwavûtire.

3Nayo Ngoma nîyacokire îkîmwîra atîrî, “Ethîrwa nama we nîwe Mûriû wa Ngai, atha îthiga rîîrî rîtuîke mûgate.”

4 # Gûco 8.3 Nwatî Jesû nîwamîcokerie atîrî, “Mandîko maugîte atîrî, ‘Twa mûgate wonga ûngîtûûria mûndû mwoyo!’ ”

5Ngoma nîyacokire agîtongoria Jesû akîmûvira vandû îgûrû. Na kavinda ta ga kûvucia kwa riitho ngoma nîyonirie Jesû mothamaki monthe ma nthî, 6na îkîmwîra atîrî, “Nie nîngûkûva wathani wa kwatha mothamaki mama monthe wana riiri wamo, nîûndû nîmvetwe mo, na nwamve mûndû wa wonthe ûrîa nîngîenda. 7Mothamaki mama monthe nîmagûtuîka maku wona wandurîria maru na ûngooce.” 8#Gûco 6.13 Nake Jesû nîwacokerie ngoma îo atîrî, “Mandîko maugîte atîrî, ‘Goocaga Mwathani Ngai waku na ûmûtungatagîre wake wenga!’ ”

9Wana rîngî ngoma nîyatongoririe Jesû îkîmûvira Jerusalemu na îkîmûtwîthia kathûrûmûndû ga hekarû na îkîmwîra atîrî, “Ethîrwa we nîwe Mûriû wa Ngai, îîvarûkie kuuma ava, 10#Tha 91.11 nîûndû mandîko maugîte atîrî, ‘Ngai nîakaatha araika ake nîguo makûgitîre.’ Wana rîngî mandîko maugîte atîrî, 11#Tha 91.12 ‘Araika nîmagaakwanîrîria na njara ciao nîguo kûgûrû gwaku gûtikathumûrwe nî îthiga.’ ”

12 # Gûco 6.16 Nwatî Jesû nîwacokerie ngoma atîrî, “Mandîko wa mau nwamo maugîte atîrî, ‘Ndûkagerie Mwathani Ngai waku.’ ”

13Rîrîa Ngoma yarîkirie kûgeria Jesû na njîra cionthe, nîyambire kûmûtiganîria.

Jesû nîwambîrîrie wîra wake vûrûrirî wa Galili

(Mat 4.12-17; Mar 1.14-15)

14Jesû nîwacokire vûrûrirî wa Galili arî na vinya wa Roho Mûtheru. Nayo ngumo yake nîyatambire vûrûrirî wonthe. 15Nake Jesû nîwathomithanagia arî mavoerorî na andû onthe nîmaamûkumagia.

Jesû nîwaregirwe Nazarethi

(Mat 13.53-58; Mar 6.1-6)

16Jesû nîwathiîre îtûûrarî rîa Nazarethi kûrîa aarereretwe. Naguo mûthenya wa thavatû wakinya, wa ta mûtugo, Jesû nîwathiîre na agîtonya îvoerorî. Na rîrîa aarûngamire nîguo athome, 17nîwanengererue îvuku rîa mûrathi Isaia, na akîguûria vandû varîa vandîkîtwe atîrî,

18 # Isa 61.1-2 “Roho wa Ngai ûrî vamwe nanie,

nîûndû nîamvakîte maguta,

nîguo ngavunjîrie andû arîa athîni Ûvoro Mwaro.

Nîandûmîte nthiî nganîrîre atî andû arîa moveetwe nî makûrekererua,

atumumu nîmagûcoka kwona,

na njoke manîrîre atî andû arîa mavinyîrîrîtue nîmagûtethûrwa,

19na atî îvinda nîrîkinyu rîrîa Mwathani akûvonokia andû ake.”

20Jesû nîwakunîkire îvuku na akîrînenganîra kûrî ndungata na agîcoka agîkara nthî. Nao andû onthe arîa maarî îvoerorî nîmaamûroririe na vinya. 21Nake nîwamerire atîrî, “Mandîko mama mwegua makîthomwa nîmavinga ûmûnthî ûyû.”

22Andû onthe nîmaakenirue mûno nîke na makîmaka, nîûndû wa mîario mîaro îrîa aaragia. Nao nîmaambîrîrie kûrania atîrî, “Na kinthî ûyû tî mûvîcî wa Josefu?”

23Nake Jesû nîwerire andû acio atîrî, “Nie ndirî na nganja atî nîmûkûngwetera nthimo îrîa yugaga atîrî, ‘Ndagîtarî, amba wîthondeke we mwene.’ Wana rîngî nîmbîcî nîmûkûmbîra mbîke gûkû îtûûrarî rîetû maûndû marîa mwegwire atî nînekire îtûûrarî rîa Kaperinaumu. 24#Joh 4.44 Na ma nîramwîra atîrî, ‘Mûrathi ndetîkîrîkaga kwao.’ ”

25 # 1Atha 17.1 Jesû nîwerire andû acio atîrî, “Taririkanani ûrîa gwekîkire vîndî ya Elija, rîrîa gwekarire mîaka îthatû na nuthu gûtakuura mbura, na gûkîgîa yûra rînene mûno vûrûrirî wonthe wa Isiraeli. Nîramwîra na ma atî kwarî na aka eengî a ndigwa, 26#1Atha 17.8-16 nwatî Elija ndaatûmwa kûrî o. Elija aatûmirwe tu kûrî mûndûmûka ûmwe wa ndigwa. Mûndûmûka ûcio eekaraga îtûûrarî rîa Zerefatha vûrûrirî wa Sidoni. 27#2Atha 5.1-14 Wana vîndî ya mûrathi Elisha, kwarî na andû eengî maarwarîte mûrimû mûcûku wa ngothi, vûrûrirî wa Isiraeli nwatî gûtirî wana ûmwe wao watherirue tiga Naamani ûrîa warî Mûsîria.”

28Rîrîa andû onthe arîa maarî îvoerorî meegwire ûguo, nîmaarakarire mûno. 29Nao nîmaaûkîrire na makîmûrutûrûra makîmûvira kîrîmarî îgûrû, varîa îtûûra rîu rîao rîatumîtwe. Andû acio meendaga kûmûvarûkia kuuma kîrîmarî îgûrû, 30nwatî Jesû nîwavîtûkîrîre gatagatîrî kao na akîîthiîra.

Mûndû ûrîa warî na ngoma

(Mar 1.21-28)

31Jesû nîwacokire akîthiî Kaperinaumu, îtûûrarî rîrîa rîarî vûrûrirî wa Galili. Nake nîwathomithirie andû arî îvoerorî mûthenya wa thavatû. 32#Mat 7.28-29 Nao andû onthe nîmaamakirue nî ndûmîrîri yake, nîûndû aaragia arî na wathani. 33Na wa kûu îvoerorî kwarî na mûndû warî na ngoma. Nake nîwaugîrîrie atîrî, 34“Ûrenda atîa natue we Jesû wa Nazarethi? Ûkîte gûtûthiria? Nie nîngwîcî we ûrî û. We ûrî ûrîa mûtheru wa Ngai!”

35Nwatî Jesû nîwamûkaanirie akîmwîra atîrî, “Kira na ume kûrî ke!” Nayo ngoma îo yarîkia gûtungumania mûndû ûcio vau nthî mbere ya andû acio onthe, nîyaumire kûrî ke îtakûmûgera ngero wana îrîkû.

36Nao andû onthe nîmaamakire na makîrana atîrî, “Mûndû ûyû angîvota kwaria ûguo atîa? Nîûndû arî na vinya na ûvoti wa kwatha ngoma ciume kûrî mûndû.” 37Nayo ngumo ya Jesû nîyatambire matûûrarî monthe marîa maarî vakuvî.

Jesû nîwavonirie andû eengî

(Mat 8.14-17; Mar 1.29-34)

38Jesû nîwaumire îvoerorî na akîthiî mûciî kwa Simoni. Vîndî îo, ng'ina wa mûka wa Simoni aarî mûrwaru mûrimû wa kûviûva mwîrî. Nao andû a mûciî ûcio nîmaamenyithirie Jesû ûvoro wake. 39Jesû nîwakuvîvîrie mûndûmûka ûcio, na aamûroria, akîatha mûrimû ûcio ume kûrî ke, na ûkiuma. Nake mûndûmûka ûcio nîwaûkîrire wa rîmwe na akîambîrîria kûmatungatîra.

40Na rîrîa riûa rîathûaga, andû onthe arîa maarî na andû arwaru mîrimû mwanya mwanya, nîmaamavirire kûrî Jesû. Nake Jesû nîwaigîrîre andû acio onthe njara na akîmavonia. 41Nacio ngoma nîciaumire kûrî andû eengî arîa maarî vo ikîanagîrîra atîrî, “We nîwe Mûriû wa Ngai!”

Nake Jesû nîwakaanirie ngoma icio na ndaciîtîkîria imwanîrîre wana ethîrwa cio nî ciamwîcî atî ke nîke Mesaya.

Jesû nîwavunjîrie andû îvoerorî

(Mar 1.35-39)

42Kîraûko gwakîa, Jesû nîwaumire kûu mûciî ûcio na akîthiî kûndû gûtaarî andû. Nao andû nîmaathiîre kûmûcaria. Na vîndî îrîa maamwonire nîmaageririe kûmûrigîrîria nîguo ndakaume kuo. 43Nake Jesû nîwamerire atîrî, “Nwa nginya nie mvunjîrie andû Ûvoro Mwaro wa Ûthamaki wa Ngai, matûûrarî marîa mengî wa namo, nîûndû ûguo nîguo Ngai aandûmire mbûke mbîke.”

44Kwoguo Jesû nîwavunjirie ûvoro ûyû mavoerorî vûrûri wonthe wa Judea.#4.44 Vûrûri wonthe wa Judea: Mandîko mamwe ma tene maugaga ‘Galili.’

Currently Selected:

Luka 4: KKB

Highlight

Copy