Luka 21

Mûvothi wa mûndûmûka wa ndigwa

(Mar 12.41-44)

1Jesû nîwaroririe na akîona itonga ikîrekia mûvothi wacio kathandûkûrî ka mûvothi. 2Nîwacokire akîona mûndûmûka wa ndigwa warî mûthîni mûno akîrekia tûtuururu twîrî. 3Nake nîwamerire atîrî, “Nîramwîra na ma atî mûndûmûka ûyû wa ndigwa na mûthîni, nîwarekia makîria ya acio engî onthe. 4Nîûndû acio engî mavotha matigari ma ûtonga wao, nwatî mûndûmûka ûyû wana arî mûthîni ûguo, arekia mûthithû wake wonthe.”

Jesû nîwaririe ûvoro wîgiî kwomomorwa kwa hekarû

(Mat 24.1-2; Mar 13.1-2)

5Arutwa amwe nîmaaragia ûvoro wîgiî hekarû na makiugaga ûrîa yonekanaga îgemetue na mathiga ma goro wa vamwe na indo nthaka irîa andû maavecanîte nîûndû wa gûtîîa Ngai. Nake Jesû nîwamerire atîrî, 6“Maûndû mama monthe mûrona vîndî nîgakinya îrîa ava vakethîrwa vatarî wana îthiga rîmwe rîrî îgûrû rîa rîrîa rîngî; mathiga monthe nîmakoomomorwa.”

Mathîna na mînyamaaro

(Mat 24.3-14; Mar 13.3-13)

7Arutwa nîmaamûririe atîrî, “Mwarimû, maûndû mama mageekîka rî? Na nîndûî gîgaatwonia atî maûndû mama marî vakuvî gwîkîka?”

8Jesû nîwamerire atîrî, “Îîmenyagîrîreni mûtikavîtithue. Nîûndû andû eengî nîmagaaûka makîvûthagîra rîîtwa rîakwa na makiugaga atîrî, ‘Nie nînie Kristû!’ na ‘Îvinda nîrîkinyu!’ Nwatî mue mûtikamarûmîrîre. 9Rîrîa mûkeegua ûvoro wa mbaara kana mbûkanîrîro mûtigetigîre, nîûndû maûndû mau nwa nginya mambe mekîke nwatî ûguo tî kuga atî îvinda rîrî vakuvî.”

10Jesû nîwacokire akîmeera atîrî, “Andû a vûrûri ûmwe nîmakaarûa na andû a vûrûri ûrîa wîngî, nao andû a ûthamaki ûmwe marûe na andû a ûthamaki ûrîa wîngî. 11Kûndû kwîngî nîgûkaagîa na ithingithia inene, yûra, na mîrimû na kûgîe na maûndû ma kûmakania na ma kûgegania kuuma îgûrû. 12Nwatî mbere ya maûndû mama monthe mekîke, mue nîmûkaanyitwa na mûnyarirwe. Nîmûkaanenganîrwa nîguo mûcirithîrue mavoerorî na mwikue njeera na mûcoke mûvirwe mbere ya athamaki na aathani nîûndû wakwa. 13Gaka gakethîrwa karî kamweke kenyu ga kûvunjia Ûvoro Mwaro. 14#Luka 12.11-12 Tuani ciira mbere na mûtigetange mûgîîciria ûrîa mûgacokia mûgîcirithua. 15Nîûndû nie nîngaamûva mîario na ûûgî ûrîa gûtarî nthû yenyu wana îmwe îngîvota kûregana naguo kana gûûkararia. 16Mue nîmûkaanenganîrwa nî aciari enyu, nî aa mûrwanyûkwe, nî andû a mûciî wenyu, wana nî arata enyu na amwe gatagatîrî kenyu maûragwe. 17Andû onthe nîmakaamûmena nîûndû wa rîîtwa rîakwa. 18Nwatî gûtirî rûcuîrî wana rûmwe rwa ciongo cienyu rûkaaûra. 19Ûmîrîriani na nîmûkaavonokia mîoyo yenyu.

Jesû nîwaririe ûvoro wîgiî kwomomorwa kwa îtûûra rîa Jerusalemu

(Mat 24.15-21; Mar 13.14-19)

20“Vîndî îrîa mûkoona îtûûra rîa Jerusalemu rîthiûrûrûkîrîtue nî athigari, nîmûkaamenya atî îvinda rîarîo rîa kwomomorwa rîrî vakuvî. 21Vîndî îo andû arîa makeethîrwa marî Judea nîmakaaûra mathiî irîmarî, na arîa makeethîrwa marî îtûûrarî, nîmakaauma kuo, nao arîa makeethîrwa marî nja ya îtûûra, matikanagerie kûrîtonya. 22#Hos 9.7 Nîûndû mîthenya îo nîo îkethîrwa îrî ya kûverithania nîguo maûndû monthe marîa Mandîko Matheru maugîte mavinge. 23Na kaî aka arîa makeethîrwa marî îvu kana makîongithia nîmakeethîrwa na thîna-î! Nîgûkaagîa na kîeva kînene gûkû nthî na marakara ma Ngai nîmagaakinyîra andû aya. 24Andû amwe nîmakaaûragwa na mviû na engî nîmagaatavwa na mavirwe mavûrûrirî monthe. Nao andû a ndûrîrî nîmakaaverithia andû a Jerusalemu nginya rîrîa kavinda ka andû a ndûrîrî ga kwathana gakaathira.

Gûka kwa Mûrû wa Mûndû

(Mat 24.29-31; Mar 13.24-27)

25 # Isa 13.10; Ezek 32.7; Joe 2.31; Kûguû 6.12-13 “Nîgûkaagîa na marûûri riûarî, mwerirî na njatarî. Nakuo gûkû nthî, andû a mavûrûri monthe nîmagaata mwîvoko na metigîre marurumî ma îria na makûmbî ma manjî. 26Andû nîmakaagirîka nîûndû wa guoya vîndî îrîa makeethîrwa metererete kwona ûrîa nthî yonthe îgekara, nîûndû mavinya monthe ma îgûrû nîmakenyenyua. 27#Dan 7.13; Kûguû 1.7 Nake Mûrû wa Mûndû nîagaacoka onekane agîûka arî îtuurî na arî na vinya na riiri. 28Vîndî îrîa maûndû mama makaambîrîria gwîkîka, mûkaarûngama na mûkîrîrie ciongo cienyu na îgûrû, nîûndû ûvonokio wenyu ûkeethîrwa ûrî vakuvî.”

Kûthoma kuumana na mûtî wa mûkûyû

(Mat 24.32-35; Mar 13.28-31)

29Jesû nîwacokire akîva arutwa ake ngerekano îno: “Ta îcirieni ûvoro wîgiî mûtî wa mûkûyû na mîtî îrîa îngî yonthe. 30Rîrîa mwona mathangû ma mîtî îo mambîrîria kuuma, mue nîmûmenyaga atî vîndî ya mbura îrî vakuvî. 31Rîrîa mûkoona maûndû mama mambîrîria gwîkîka, nîmûkaamenya atî Ûthamaki wa Ngai ûrî vakuvî.

32“Nîramwîra na ma atî, rûciaro rûrû rûtingîthira maûndû mama monthe matarî mavingu. 33Îgûrû na nthî nîikaathira, nwatî ciugo ciakwa itikaathira.”

Vata wa kwîmenyerera

34“Îîmenyerereni! Mûtigetîkîre gûtûmîra mavinda menyu monthe na kûrîa mûno na kûnyua na kûthînîka mûno mûgîîciria mûno ûvoro wîgiî maûndû ma gûkû nthî. Mweka ûguo mûkethîrîrua nî mûthenya ûcio mûtevarîrîtie, 35wata ûrîa mbîa îthagîrîrua nî mûtego îtevarîrîtie. Nîûndû mûthenya ûcio ûgaaûka kûrî andû onthe arîa matûûraga gûkû nthî. 36Îkaragani mwîvarîrîtie vingo cionthe na mûkîvoyaga, nîguo mûgîe na vinya wa kûmîrîria maûndû monthe marîa marî vakuvî gwîkîka, na mûgîe vinya wa kûrûngama mbere ya Mûrû wa Mûndû.”

37Wa mûthenya, wa mûthenya, Jesû nîwathomithanagia hekarûrî, na gwatuka akathiî kûraara kîrîmarî Kîam mîtî ya Mîtamaiyû. 38Wa kîraûko tene andû onthe nîmaathiîcaga hekarûrî kûmûthikîrîria.

Currently Selected:

Luka 21: KKB

Highlight

Copy