Luka 2

Gûciarwa kwa Jesû

(Mat 1.18-25)

1Mîthenyarî îo, Agusito ûrîa warî mûthamaki wa Roma, nîwathanire atî andû onthe mathiî magetarithie. 2Gwîtarithia gûkû kwa mbere gwekirwe vîndî îrîa Kuirinio aarî mûnene wa vûrûri wa Sîria. 3Kwoguo andû onthe nîmaathiîre kwîyandîkithia wa mûndû akîthiî îtûûrarî rîa rîake.

4Josefu nîwaumire îtûûrarî rîa Nazarethi vûrûrirî wa Galili na akîthiî îtûûrarî rîa Bethilehemu vûrûrirî wa Judea, kûrîa mûthamaki Daudi aaciarîrwe. Josefu aathire kûu nîûndû aarî wa nyomba na wa mbarî ya Daudi. 5Kwoguo nîwathiîre kuo kwîyandîkithia marî na Mariamu, mwîrîtu ûrîa eerîrîte atî nîakûmûvikia. Vîndî îo Mariamu aarî îvu. 6Na vîndî îrîa maarî kûu Bethilehemu kavinda ka Mariamu ga kûgîa mwana, nîgaakinyire. 7Nake nîwarikithathire mwana wa kavîcî akîmûrigica na cuka na akîmûmamia mûvaratîrî nîûndû gûtiarî na vandû mangîavurûkire kûu mûkawarî.

Arîthi na araika

8Nakuo kûu vûrûrirî kwarî na arîthi mekaraga ûtukû mûgima marî nja marangîrîte ng'ondu ciao. 9Mûraika wa Mwathani nîwamaumîrîre wa rîmwe. Naguo riiri wa Mwathani nîwamatherere mîena yonthe, nao makîmaka mûno. 10Nake mûraika ûcio nîwamerire atîrî, “Tigani kûmaka! Nie nîmûretere ûvoro mwaro na wa gîkeno kînene kûrî andû onthe, 11nîûndû ûtukû wa ûmûnthî îtûûrarî rîa Daudi nîmûciarîrîtwe mûvonokia na nîke Kristû Mwathani. 12Naguo ûvoro ûcio mûkaaûmenya na njîra ta îno: mûkoona gakenge karigicîrîtue cuka na kamamîte mûvaratîrî.”

13Na wa rîmwe gîkundi kînene Kîam araika a îgûrû nîkîaumîrire kîrî vamwe na mûraika ûcio na gîgîkumia Ngai gîkiugaga atîrî:

14“Ngai ûrîa ûrî Îgûrû Mûno arokumua,

na thayû ûrogîa gûkû nthî,

kûrî andû arîa mamûkenagia!”

15Rîrîa araika acio maatigire arîthi na magîcoka îgûrû, arîthi nîmeeranire atîrî, “Tigani tûthiî Bethilehemu nîguo tûkeyonere maûndû marîa mekîka mau Mwathani atûmenyithia.”

16Nao arîthi nîmaathiîre maviûvîte na makîthîrîria Mariamu, Josefu na makîona gakenge kamamîte mûvaratîrî. 17Nao makoona, nîmaavecanire ûvoro ûrîa mûraika aameerîte ûkegiî. 18Andû onthe arîa meegwire maûndû marîa arîthi acio maaugaga wîgiî gakenge kau, nîmaamakire mûno. 19Nake Mariamu nîwekarire akîririkanaga maûndû mama monthe na ageciragia mûno ûvoro wamo. 20Arîthi nîmaacokire kûrî ng'ondu ciao makîgoocaga na magîkumagia Ngai nîûndû wa maûndû monthe marîa meeguîte na makoona. Maûndû mau monthe maatuîkîkire wata ûrîa arîthi meerîtwe nî mûraika.

Jesû nîwatuîrîrwe rîîtwa

21 # Ala 12.3; Luka 1.31 Rîrîa mûthenya wa kanana wakinyire, mwana ûcio nîwaruire na agîtuîrîrwa rîîtwa Jesû. Rîîtwa rîîrî nî rîrîa mûraika aaugîte atuîrîrwe wa na mbere ya ng'ina amûgîe îvu.

Jesû nîwavirirwe hekarûrî

22 # Ala 12.6-8 Naguo mûthenya nîwakinyire wa Josefu na Mariamu matherue vuva wa gûciara, wata ûrîa Watho wa Musa ugîte. Kwoguo nîmaavirire Jesû Jerusalemu nîguo makamûvecane kûrî Mwathani. 23#Ntha 13.2,12 Meekire ûguo kûringana na ûrîa kwandîkîtwe Wathorî wa Mwathani atî: “Îrikithathi rîonthe rîa kamwana nîrîkaavecanwa kûrî Mwathani.” 24Wana rîngî maathiîte kuo nîguo makarutîre Ngai îgongoona, wata ûrîa Watho wa Mwathani wathanîte atî mûndû nwa arute îgongoona rîa macîa maîrî kana rîa ndutuura igîrî.

25Vîndî îo kwarî na mûndû ûmwe wetagwa Simioni na watûûraga Jerusalemu. Mûndû ûcio nîwatûûrîte arî mûthingu, atîîte Ngai mûno na etererete kavinda karîa Ngai angîguîra Isiraeli ntha amavonokie. Nake Roho Mûtheru aarî vamwe nake. 26Roho ûcio nîwamûmenyithîtie atî ke ndagaakua atonete Mesaya ûrîa weranîrîtwe nî Mwathani. 27Simioni nîwathiîre hekarûrî atongoretue nî Roho Mûtheru. Na rîrîa Josefu na Mariamu maavirire Jesû kûu nîguo mavingie ûrîa Watho waugîte, 28Simioni nîwecukirie mwana ûcio njararî ciake na agîcokeria Ngai ngatho akiugaga atîrî,

29“Rîu Mwathani nîûvingîtie kîîranîro gîaku,

îtîkîria ndungata yaku îthiî na thayû.

30Nîûndû metho makwa nîmonete ûvonokanio waku,

31ûrîa we ûvarîrîtie andû onthe makîonaga:

32 # Isa 42.6; 49.6; 52.10 Nî ûtheri wa kûguûrîria andû a ndûrîrî wendi waku,

na riiri kûrî andû aku a Isiraeli.”

33Nake îthe wana ng'ina wa Jesû nîmaamakire nîûndû wa maûndû marîa Simioni aaririe megiî Jesû. 34Simioni nîwamarathimire, agîcoka akîîra Mariamu ng'ina wa Jesû atîrî, “Ngai athuurîte mwana ûyû nîguo acûkangie na avonokie andû eengî arîa marî vûrûrirî wa Isiraeli. Mwana ûyû akeethîrwa arî kîmenyithia kîrîa andû eengî makaaria maûndû macûku make, 35nîguo nthitho ciao iguûrue. Nakîo kîeva gîkariî ta rûviû rwa njûra rûrî rûnoore nîgîkaamunda ngoro.”

36Na wa kûu hekarûrî kwarî na mûndûmûka mûkûrû wa ndigwa na aarî mûrathi. Nake eetagwa Ana, mwarî wa Fanueli na aarî wa mûvîrîga wa Asheri. Ana ndarî na mûthuuri nîûndû kuuma aavika, eekaranirie na mûthuuri wake kavinda ka mîaka mûgwanja tu. Vîndî îo aarî na ûkûrû wa mîaka mîrongo înana na îna.#2.36 Vîndî îo aarî na ûkûrû wa mîaka mîrongo înana na îna: Mandîko mamwe maugaga ‘Vîndî îo Ana aarî mûndûmûka wa ndigwa na aarî na mîaka mîrongo înana na îna.’ 37Ana nîwathiîcaga hekarûrî mûthenya wana ûtukû na akathaithaga Ngai mûno na njîra ya kûmûvoya na kwînyerekia. 38Na îthaarî wa rîu, Ana nîwakinyire na agîcokeria Ngai ngatho. Ana nîwaririe ûvoro wîgiî mwana ûcio kûrî andû arîa maatûûrîte metererete Ngai akûre Jerusalemu.

Josefu na Mariamu nîmaacokire îtûûrarî rîa Nazarethi

39 # Mat 2.23 Rîrîa Josefu na Mariamu maarîkirie gwîka maûndû monthe marîa maathîtwe nî Watho wa Mwathani, nîmaacokire îtûûrarî rîao rîa Nazarethi, vûrûrirî wa Galili. 40Nake mwana ûcio nîwakûrire na akîgîa na vinya; na nîwecûrîtwe nî ûûgî na wega wa Ngai warî îgûrû rîake.

Jesû nîwavirirwe hekarûrî

41 # Ntha 12.1-27; Gûco 16.1-8 Wa mwaka wa mwaka, aciari a Jesû nîmaathiîcaga Jerusalemu kîrugorî Kîam pasaka. 42Na vîndî îrîa Jesû aakinyirie ûkûrû wa mîaka îkûmi na îîrî, Josefu na Mariamu nîmaathiîre Jerusalemu wata ûrîa maamenyerete gwîka. 43Nakîo kîrugo Kîamthira andû nîmaambîrîrie kwînûka, nwatî kamwana tî Jesû nîgaatigirwe Jerusalemu aciari ake matakûmenya. 44Aciari ake meeciragia atî Jesû aarî gîkundirî Kîam andû arîa engî. Nîmaathiîre rûgendo rwa mûthenya mûgima, vuvarî nîmaambîrîrie kûmûcaria gatagatîrî ka andû ao wana ka arata ao. 45Nake aatura, nîmaacokire nginya Jerusalemu makîmûcaragia. 46Vuva wa mîthenya îthatû, nîmaamwîthîrîrie hekarûrî ekarîte nthî vamwe na arimû a Ayahudi. Nake nîwathikîrîrîtie arimû acio na akamaûragia ciûria. 47Nao andû onthe arîa meegwire ciugo ciake nîmaamakire mûno nîûndû wa ûrîa aacokagia ciûria arî na ûûgî mwîngî. 48Rîrîa aciari ake maamwonire nîmaamakire. Nake ng'ina nîwamwîrire atîrî, “Mûvîcîwa, ûtwîke ûguo nîkî? Nie na aguo twîthîrîtwe na kîeva kîîngî tûgîgûcaria.”

49Nake Jesû nîwamacokerie atîrî, “Nîndûî kîratûmîte mûnjarie? Nîkwa mûtarecî atî nie nîmbagîrîrwe nî kwîthîrwa nîrî nyombarî ya vava?”

50Nwatî ng'ina na îthe matiataûkîrwa nî ûrîa aameerire.

51Jesû nîwacokire Nazarethi arî vamwe na aciari ake, na nîwekaranagia nao akîmaathîkagîra. Nake ng'ina nîwaigaga maûndû mau monthe ngororî yake. 52#1Sam 2.26; Nthi 3.4 Nake Jesû nîwakûrire arî na ûûgî na vinya wa mwîrî na akîendagwa nî Ngai wa vamwe na andû.

Currently Selected:

Luka 2: KKB

Highlight

Copy