Kîam 7
7
Mwîcûro wa manjî
1Ngai-Mûnene nîwerire Nuhu atîrî, “Tonya thabinarî mûrî na andû aku onthe. Nie nîmonete atî we ûrî mûndû mûthingu gûkû nthî yonthe. 2We nîûtonya thabinarî na nyamû irîa itarî mûgiro njamba mûgwanja na nga mûgwanja. Nacio nyamû irîa irî mûgiro ûtonyie njamba îmwe na nga îmwe. 3Ûcoke ûtonyie iconi mûgwanja cia njamba na iconi mûgwanja cia nga. Nîwîka ûguo nîguo mbeû ya nyamû cionthe na iconi cionthe ndîkathire na igaaciarana rîngî gûkû nthî. 4Mîthenya mûgwanja kuuma rîu nîngurithia mbura gûkû nthî matukû mîrongo îna mûthenya na ûtukû. Ngeeka ûguo nîguo nthirie ciûmbe cionthe irîa naûmbire irî mwoyo.” 5Nake Nuhu nîwekire maûndû monthe marîa aathirwe nî Ngai-Mûnene eke. 6Nuhu aarî na ûkûrû wa mîaka magana matandatû vîndî îrîa manjî meecûrire nthî.
7 #
Mat 24.38-39; Luka 17.27 Ke na mûka, anake ake na aka ao, nîmaatonyire thabinarî nîguo maûrîre mwîcûro wa manjî. 8Nuhu nîwatonyirie thabinarî nyamû cionthe na iconi, irîa ntheru na irîa irî mûgiro na tûnyamû tuonthe tûrîa tûtambaga gûkû nthî, 9igîrî igîrî, ya njamba na ya nga wata ûrîa Ngai aamwathîte. 10Na mîthenya mûgwanja yavîtûka, mbura ya kîvovoto nîyaurire.
11 #
2Pet 3.6
Mûthenya wa îkûmi na mûgwanja mweri wa kaîrî, Nuhu arî na ûkûrû wa mîaka magana matandatû (600) ithima cia manjî monthe marîa marî rungu rwa nthî nîciavingûkire. Wana cio ivingo cionthe cia manjî ma îgûrû, nîciavingûkire. 12Nîkwaurire mbura nthî mîthenya mîrongo îna mûthenya na ûtukû. 13Mûthenya wa ûcio Nuhu na mûka, wa vamwe na anake ake Shemu, Hamu na Jafethi na aka ao athatû, nîmaatonyire thabinarî. 14Nao nîmaatonyire vamwe na nyamû cia mîthemba yonthe nini na nene, irîa irîthagua mîciî, na cia kîthaka, wana iconi cia mîthemba yonthe. 15Nuhu nîwatonyire thabinarî vamwe na nyamû cionthe irîa ciatûûraga mwoyo nga na njamba, 16wata ûrîa Ngai aathanîte. Ngai-Mûnene nîwavingire mîrango ya thabina Nuhu atonya.
17Manjî nîmecûrire nthî kavinda ka mîthenya mîrongo îna, manjî nîmengîvire na magîûkîrîria thabina îkîerera. 18Manjî nwa maathiîre na mbere gwîcûra nayo thabina îkîerera îgûrû rîamo. 19Namo nîmecûrire nthî nginya magîkunîkîra irîma cionthe irîa ciarî ndaca; 20nîmaathiîre na mbere na gwîcûra nginya makîthîrwa marî ta mita mûgwanja îgûrû rîa irîma. 21Ciûmbe cionthe cia nthî irîa ciarî mwoyo nîciakwire. Nacio ciarî; iconi cionthe, nyamû cionthe na andû onthe. 22Kîndû kîonthe Kîamrî nthî na Kîamvevaga nîgîakuire. 23Ngai-Mûnene nîwathiririe ciûmbe cionthe irîa ciarî mwoyo gûkû nthî. Nîwathiririe andû, nyamû na iconi. Nuhu, andû arîa maarî nake thabinarî vamwe na nyamû nîo maavonokire. 24Manjî meekarire mîthenya îgana rîmwe rîa mîrongo îtano matavûîte.
Currently Selected:
Kîam 7: KKB
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019