Ciîko 2

Gûka kwa Roho Mûtheru

1 # Ala 23.15-21; Gûco 16.9-11 Na rîrîa mûthenya wa Pentekosto wakinyire, arîa onthe metîkîtie Jesû maagomanîte vamwe Jerusalemu. 2Wa rîmwe nîkwagîre mûgambo mûnene umîte îgûrû wagambaga ta rûvuvo rwavurutanaga na vinya, na ûgîcûra nyomba yonthe kûu meekarîte. 3Nao nîkwaumîrire kîndû Kîamvuana ta nînîmbî cia mwaki nacio ikîvutia wa mûndû warî nyombarî îo. 4Nao onthe nîmecûrirwe nî Roho Mûtheru, na makîambîrîria kwaria na nthiomi ciîngî wata ûrîa Roho ûcio aamavotithirie kwaria.

5Kûu Jerusalemu nîgwatûûraga Ayahudi maaumîte mavûrûri monthe ma nthî. Andû acio maarî avoi Ngai. 6Rîrîa meegwire mûgambo ûcio, andû eengî nîmaagomanire vamwe. Nao onthe nîmaamakire nîûndû wa mûndû nîweguire atûmwa makîaria na nthiomi cia kûrîa mûndû aumîte. 7Nîmaamakire mûno nginya makiugîrîria atîrî, “Anga aya onthe makwaria ûû tî a Galili! 8Ûguo nî atîa atî tuonthe nîtûregua makîaria na nthiomi cia kûrîa tumîte? 9Tue tumîte kûndû mwanya, kuuma Parithia, Amede na Aelamu, kuuma Mesopotamia, Judea, Kapadokia, na kuuma Ponto, Asia na 10Furegia na Pamufilia, kuuma Misiri na kuuma vûrûri wa Lîbia kûrîa gûkuvî na Kurene. Amwe etû twî a kuuma Roma, 11Ayahudi wana andû arîa magarûrûkîte magacoka gûtuîka a kûrûmîrîra Kîyahudi. Nao arîa engî etû nî a kuuma Kurene na Arabia. Nwatî tuonthe nîtûregua andû acio makîaria na nthiomi cietû, marerana ûvoro wa maûndû manene marîa Ngai ekîte!” 12Nîûndû wa ûrîa maamakîte na magatanganîrua nîmekarire makîûranagia atîrî, “Ûndû ûyû nî atîa?”

13Nwatî arîa engî nao makîmathekerera makîmeeraga atî, nî kûrîwa marîtwe nî ndivei ya kûvivwa warîo.

Ndûmîrîri ya Petero

14Nake Petero marî vamwe na atûmwa arîa engî îkûmi na ûmwe nîwarûngamire na akîîra kîrîndî na mûgambo mûnene atîrî, “Mue andû aya tûtûûraga namue gûkû Judea, wa namue muonthe mûtûûraga Jerusalemu, ta nthikîrîriani. Tigani nîmwîre ûrîa kûrî. 15Andû aya tîkwa marîtwe ta ûguo mûreciria nîûndû nî thaa ithatû tu cia kîraûko. 16Nwatî ûyû nî ûndû ûrîa warathirwe nî mûrathi Joeli vîndî îrîa aaugire atîrî:

17 # Joe 2.28-32 ‘Ngai augîte atî: Mîthenyarî ya mûthiia,

nie nîngetîrîria andû onthe Roho wakwa.

Ariû na aarî enyu nîmakaanîrîra ndûmîrîri yakwa kûrî andû;

anake enyu na erîtu enyu nîmakoona cioneki,

nao andû enyu arîa akûrû,

nîmakaarota iroto.

18Îni, nginya kûrî ndungata ciakwa cia arûme na cia aka,

nîngaairekeria Roho wakwa mîthenyarî îo,

nacio nîikaanîrîra ndûmîrîri yakwa.

19Nie nîngaaringa ciama matuurî îgûrû,

na monanie morirû gûkû nthî.

Nîgûkaagîa nthakame, mwaki na ndogo ndumanu.

20Riûa nîrîkaagarûrûka rîtuîke nduma,

naguo mweri nîûkaagarûrûka ûtunîve ta nthakame,

mbere ya Mûthenya wa Mwathani ûkinye,

mûthenya ûcio ûkethîrwa ûrî mûnene na ûrî na riiri.

21Na mûndû wa wonthe ûgeeta Mwathani akîenda ûtethio nîakaavonokua.’

22“Mue Aisiraeli aya, tathikîrîriani ciugo ino! Jesû wa Nazarethi aarî mûndû warî wa mwanya. Wathani wake wa ûngai nîwonanirue waro kûrî mue na njîra ya morirû na ciama irîa Ngai aaringire na njîra yake. Mue ene nîmwîcî ûguo nîûndû ûndû ûcio nîwekîkire gûkû gatagatîrî kenyu. 23#Mat 27.35; Mar 15.24; Luka 23.33; Joh 19.18 Kûringana na mûvango wake ke mwene, Ngai nîwatuîte atî Jesû nîakanenganîrwa kûrî mue. Namue nîmwamûragire na njîra ya gwîtîkîria evia mamwambe mûtharavarî îgûrû. 24#Mat 28.5-6; Mar 16.6; Luka 24.5 Nwatî Ngai nîwariûkirie Jesû na akîmwovora ûrûrûrî wa gîkuû, nîûndû gûtingîavotekire atûûre ovetwe nîkîo. 25#Tha 16.8-11 Nîûndû Daudi nîwaririe ûvoro ûmwîgiî akiuga atîrî:

‘Nie nîmonaga Mwathani arî mbere yakwa mavinda monthe;

ke arî vakuvî nanie na ndingîona thîna.

26Kwoguo nie nîrîmûcanjamûku,

na nîraria ngenete.

Nwatî wana ethîrwa nîngaakua,

nie nîrî na mwîrîgîrîro,

27nîûndû we ndûkaandiganîria kwa arîa akuû;

we ndûgetîkîra ûrîa waku mwîvokeku oorere mbîrîrarî.

28We nîûmenyithîtie njîra ya mwoyo,

na nîûndû wa kwîthîrwa nîrî vamwe nawe nie nîmbîcûrîtwe nî gîkeno.’

29“Ariû na aarî a Îthe wetû, nie nwa nginya nîmwîre nyûmîrîrîtie, ûvoro wîgiî Mûthamaki Daudi ûrîa warî îthe wetû wa tene. Ke nîwakwire na akîthikwa. Na nginya mûthenya ûyû wa ûmûnthî, mbîrîra yake îrî gûkû gwetû. 30#Tha 132.11; 2Sam 7.12-13 Ke aarî mûrathi na nîwecî kîrîa Ngai aamwîrîrîte. Ngai nîwevîtîte atî ke nîagaatûma ûmwe wa njiarwa cia Daudi atuîke mûthamaki wata ûrîa Daudi aarî. 31Daudi nîwecî ûndû ûyû wana mbere ya ûtuîkîke. Kwoguo ke nîwaririe ûvoro wîgiî kûriûka kwa Mesaya vîndî îrîa aaugire atîrî:

‘Ke ndaatiganîrua kwa arîa akuû;

na mwîrî wake ndworera mbîrîrarî.’

32Ngai nîwariûkirie Jesû ûyû na tue tuonthe tûrî aira a ûma ûyû. 33Jesû nîwanenevirue na rîu ekaraga mwena wa ûrîo wa Ngai Îthe wake. Nake Ngai Nîwamûvere Roho Mûtheru wata ûrîa aamwîrîrîte. Kwoguo Jesû nîatwîtîrîrîtie Roho ûcio. Ûndû ûyû mûrona na mûregua nî kîveo Kîam Roho ûrîa Jesû atwîtîrîrîtie. 34#Tha 110.1 Daudi tîke waunûkirie îgûrû; nwatî ke nîwaugire atîrî:

‘Mwathani nîwerire Mwathi wakwa atîrî:

Îkara nthî mwena wakwa wa ûrîo

35nginya rîrîa ngaatûma nthû ciaku ituîke gaturwa ka magûrû maku.’

36“Kwoguo mue andû onthe a Isiraeli nwa nginya mûmenye na ma atî Jesû ûyû ûrîa mue mwambire mûtharavarî îgûrû, nîke Ngai atuîte Mwathani na Mesaya!”

37Rîrîa andû acio meegwire ûguo, nîmaathînîkire mûno na makîûria Petero na atûmwa acio engî atîrî, “Ariû na aarî a Îthe wetû, tue rîu nîtwîka atîa?”

38Nake Petero nîwamerire atîrî, “Mûndû wa wonthe gatagatîrî kenyu nwanginya erire mevia make na avatithue na rîîtwa rîa Jesû Kristû, nîguo overwe mevia make. Namue nîmûkwamûkîra Roho Mûtheru arî kîveo kuuma kûrî Ngai. 39Ngai nîweranîre kîîranîro gîkî kûrî mue, kûrî ciana cienyu na kûrî andû onthe arîa marî kûraca, na kûrî andû onthe arîa Mwathani Ngai wetû etaga kûrî ke.”

40Petero nîwamaarîrie na akîmathaitha na ciugo nyîngî akîmeeraga atîrî, “Îîvonokieni kuuma îverarî rîrîa rîgûka kûrî andû a rûciaro rûrû rwaganu!” 41Kwoguo andû arîa metîkîîre ndûmîrîri îrîa Petero aamaveere, nîmaavatithirue. Mûthenya ûcio andû ngiri ta ithatû nîmoongererekire gîkundirî Kîam etîkia.

42Nao nîmeekarire marî evokeku kûrî kîrîra Kîam atûmwa, na ngwatanîrorî ciao, na kûrî ngwatanîro cia kwenyûrana mûgate na kûvoya marî vamwe.

Mûtûûrîre gatagatîrî ka etîkia

43Nacio ciama nyîngî nîciaringirwe na morirû makîonekana na njîra ya atûmwa. Na nîûndû wa ûguo andû onthe nîmeetigîre Ngai. 44#Ciîko 4.32-35 Nao etîkia onthe nîmaathiîre na mbere kûgwatanîra makîgaanaga indo ciao marî vamwe. 45Mavinda na mavinda etîkia nîmeendagia ithaka wana indo ciao na makagaania mbeca icio kûringana na ûrîa wa mûndû aavataraga. 46Na wa mûthenya wa mûthenya etîkia nîmaatûnganaga vamwe hekarûrî. Nîmaarîcanagîra marî vamwe kwao mîciî makenete na marî na ûtaana. 47Nîmaakumagia Ngai na nîmeendetwe nî andû onthe. Na wa mûthenya wa mûthenya Mwathani nîwongagîrîra gîkundirî Kîam etîkia andû arîa ke aavonokagia.

Petero nîwavonirie mûndû warî kîonje

Currently Selected:

Ciîko 2: KKB

Highlight

Copy