Ciîko 10

Petero na Korinelio

1Nakuo Kaisarea kwarî na mûndû ûmwe wetagwa Korinelio, warî mûnene wa athigari magana matandatû a mbûtû ya Roma îrîa yetagwa “Mbûtû ya Italia.” 2Ke aarî mûndû mwîtîkia Ngai mûno, na vamwe na andû onthe a mûciî wake nîmaagoocaga Ngai. Nake nîwavothagîra Ayahudi arîa maarî athîni arî na ûtaana na akavoyaga Ngai mavinda meengî. 3Na mûthenya ûmwe kîndû ta thaa kenda cia mûthenya, Korinelio nîwagîre na kîoneki. Nake nîwonire mûraika wa Ngai waro. Mûraika ûcio nîwamumîrîre na akîmwîra atîrî, “Korinelio!”

4Nake Korinelio nîwamûroririe amakîte mûno na akîmûria atîrî, “Nîndûî Mwathani?”

Nake mûraika ûcio nîwamûcokerie atîrî, “Ngai nîwegua mavoya maku. Ke nîwona atî we nîûvothagîra athîni na nîwakûririkana. 5Rîu tûma andû mathiî Jopa makagîre Simoni ûrîa wîtagwa Petero. 6Ke anyitîtwe ûgeni nî Simoni ûrîa ûthondekaga njûo na atûûraga rûtererî rwa îria.” 7Rîrîa mûraika ûcio warîrie Korinelio athiîre, Korinelio nîwetire ndungata ciake ciîrî na mûthigari ûmwe wetîkîtie Ngai mûno. Aametire kuuma gatagatîrî ka andû arîa maamûtungatagîra. 8Nake Korinelio nîwamerire maûndû monthe marîa meekîkîte na akîmatûma Jopa.

9Na kîndû ta thaa thita cia mûthenya ûcio warûmîrîrîte wa marî rûgendorî, nîmaakinyire vakuvî na Jopa, na Petero akîthiî nyomba îgûrû kûvoya. 10Nake nîwavûtire na akîenda kîndû gîa kûrîa. Nwatî vîndî îrîa irio ciavaaragîrua ke nîwagîre na kîoneki. 11Nîwonire îgûrû rîvingûkîte na kîndû gîkiuma îgûrû gîkariî ta cuka nene îkînyûrûrûkua nthî înyitîtwe mîthiia yayo îna. 12Nakîo Kîamrî na nyamû cia mîthemba yonthe; nyamû irîa irî nthakame ngiru mvevo, na iconi irîa ciûmbûkaga rîerarî. 13Naguo mûgambo nîwerire Petero atîrî, “Petero, ûkîra; ûthînje na ûrîe!”

14Nwatî Petero nîwaugire atîrî, “Naarî Mwathani! Nie ndianarîa kîndû kîrî na mûgiro kana gîtarî kîtheru.”

15Na riita rîa kaîrî mûgambo nîwamwîrire atîrî, “Kîrîa Ngai atheretie we ndwagîrîrwe nî kuga kîrî na mûgiro.” 16Ûndû ûcio wekîkire maita mathatû na kîndû kîu gîkariî ta cuka gîgîcokua îgûrû wa rîmwe.

17Na rîrîa Petero aamakîte akîrigwa nî ûrîa kîoneki kîu kîeendaga kuga, andû arîa Korinelio aatumîte nîmaamenyete varîa nyomba ya Simoni yarî na vîndî wa îo maarûngamîte kîvingorî. 18Nao nîmeetanire na makîûria atîrî, “Gûkû kûrî na mûndû ûnyitîtwe ûgeni wîtagwa Simoni Petero?”

19Rîrîa Petero eeciragia ûvoro wîgiî kîoneki kîu, Roho nîwamwîrire atîrî, “Ta thikîrîria! Kûrî na andû athatû maûka gûgûcaria. 20Ûkîra, ume nyomba îgûrû na ûthiîcanie nao ûtarî na nganja nîûndû nînie namatûma.” 21Kwoguo Petero nîwaumire nyomba îgûrû, akîthiî varîa andû acio maarî na akîmeera atîrî, “Nie nînie mûndû ûrîa mûracaria, mwaûka nîkî?”

22Nao nîmaamûcokerie atîrî, “Tue nîkwa tûtûmîrwe nî Korinelio ûrîa wîthagîrwa arî mûnene wa athigari îgana. Ke nî mûndû mûthingu, wîtigîrîte Ngai, na ûvetwe gîtîîo nî rûrîrî ruonthe rwa Ayahudi. Mûraika wa Ngai aramwîrire agûtûmanîre ûthiî gwake mûciî nîguo egue ûrîa we ûkuga.” 23Kwoguo Petero nîwamerire matonye kûu nyomba na akîmathaitha mararîrîre.

Na mûthenya ûcio wîngî, Petero nîwevarîrie na akîthiîcania nao; wa vamwe na etîkia amwe a kuuma Jopa. 24Mûthenya ûcio warûmîrîrîte, nîmaakinyire Kaisarea, kûrîa Korinelio aametererete arî vamwe na andû a mûciî wake na arîa maarî na ûraata mûnene mûno nake. 25Rîrîa Petero aatonyire kuo, Korinelio nîwamûtûngire, akîîgwîthia nthî magûrûrî make na akîmûgooca. 26Nwatî Petero nîwamûtethererie kûrûngama na akîmwîra atîrî, “Rûngama; Wa nanie nîrî mûndû.” 27Nake Petero wa akîaragia na Korinelio, nîwatonyire kûu nyomba na akîthîrîria andû eengî mûno macemanîtie kuo. 28Nîwamerire atîrî, “Mue andû aya nîmwîcî waro atî Ayahudi tî etîkîrie nî ndini yao matukane kana maceranîre na Andû a Ndûrîrî. Nwatî Ngai nîamonetie atî nie ndiagîrîrwe nî kuga mûndû wana ûrîkû atî arî na mûgiro kana atî tî mûtheru. 29Na kîu nîkîo kîratûmire mbûke ndakûrega vîndî îrîa we ûrandûmanîre. Rîu ta mbîra ûrandûmanîre nîkî.”

30Nake Korinelio nîwaugire atîrî, “Mîthenya îna mîthiru, nie nînavoyaga nîrî gwakwa nyomba mathaa ta mama thaa kenda cia mûthenya. Na wa rîmwe mûndû wekîrîte nguo yakengaga nîwarûngamire mbere yakwa, 31na akîmbîra atîrî, ‘Korinelio! Ngai nîwîguîte mavoya maku na atî we nîûvothagîra athîni. 32Tûma mûndû athiî Jopa akagîre Simoni ûrîa wîtagwa Petero. Ke anyitîtwe ûgeni nî Simoni ûrîa ûthondekaga njûo na ûtûûraga rûtererî rwa îria.’ 33Kwoguo nînaagûtûmanîre rîmwe, na we nîweka waro mûno nîûndû nîwaûka. Rîu tue tuonthe tûrî ava mbere ya Ngai tûthikîrîrîtie wa ûrîa wonthe we ûgûtwîra wathîtwe nî Mwathani.”

Mîario ya Petero

34 # Gûco 10.17 Petero nîwatumûrire kanyua na akiuga atîrî, “Rîu nie nînamenya na ma atî Ngai ndarî kîmenyano. 35Andû arîa magoocaga Ngai na mekaga ûrîa kwagîrîrîte, nîmetîkagîrwa nîke wana ethîrwa nî a rûrîrî rûrîkû. 36Mue nîmwîcî ndûmîrîri îrîa Ngai aatûmire kûrî andû a Isiraeli. Ndûmîrîri îo yarî Ûvoro Mwaro wa thayû. Ûvoro ûcio waûkire na njîra ya Jesû Kristû ûrîa arî ke Mwathani wa andû onthe. 37Mue nîmwîcî atî ûvoro ûcio nîwavunjirue Judea kuonthe wambîrîrîtie Galili vuva wa Johana kûvunjîria andû ûvoro wîgiî ûvatithio. 38Mue nîmwîcî ûvoro wîgiî Jesû Mûnazarethi. Ngai Nîwamûvere Roho Mûtheru na akîmûva vinya. Jesû nîwathiîcaga kûndû kuonthe agîkaga waro na akîvonagia arîa onthe maanyitîtwe nî Ngoma. Jesû eekaga ûguo nîûndû Ngai aarî vamwe nake. 39Rîu tue tûrî aira a maûndû monthe marîa ke eekire arî vûrûrirî wa Isiraeli na arî Jerusalemu. Nao Ayahudi arîa maarî Jerusalemu nîmaamûragire na njîra ya kûmwamba mûtharavarî îgûrû. 40Nwatî vuva wa mîthenya îthatû, Ngai nîwamûriûkirie na agîtûma onekane. 41Ke ndoonekana nî andû onthe, nwatî oonekanire tu nî aira arîa Ngai aarîkîtie kûthuura. Na rîu, tue nîtue aira arîa maarîcanîre na makînyunyanîra nake arîkia kûriûkua. 42Ke nîwatwathire tûvunjîrie andû na tûrute ûira tûmere atî ke nîke wathuurirwe nî Ngai atuîre andû onthe arîa marî mwoyo na arîa akuû. 43Arathi onthe nîmaarutire ûira wîgiî Jesû, na makiuga atî andû onthe arîa mamwîtîkîtie nîmakooverwa mevia mao na vinya wa rîîtwa rîake.”

Andû a ndûrîrî nîmaamûkîre Roho Mûtheru

44Rîrîa Petero aathiîcaga na mbere kwaria, Roho Mûtheru nîwanyûrûrûkîre arîa onthe maathikîrîrîtie ndûmîrîri îo. 45Nao etîkia a Kîyahudi arîa maaûkanîtie na Petero maumîte Jopa, nîmaamakire mûno nîûndû kîveo Kîam Roho Mûtheru nîkîavecanîtwe wana kûrî Andû a Ndûrîrî. 46Etîkia acio a Kîyahudi nîmaamegwire makîaria na nthiomi ng'eni na magîkumagia Ngai. Nake Petero nîwaûririe atîrî: 47“Kûrî mûndû ûngîgiria andû aya mavatithue na manjî na nîmarîkia kwamûkîra Roho Mûtheru wa tatue?” 48Kwoguo Petero nîwathanire akiuga andû acio mavatithue na rîîtwa rîa Jesû Kristû. Nao nîmaaûririe Petero ekaranie nao mîthenya mînini.

Currently Selected:

Ciîko 10: KKB

Highlight

Copy