Yoa Ũelesyo wa Ĩvuku Yĩĩ
Ũelesyo wa Ĩvuku Yĩĩ
Ũvoo Mũseo o tondũ ũandĩkĩtwe nĩ Yoana wĩtũtavya kana Yesũ nĩ Ndeto ya Ngai ya tene na tene, ũla, “Watw'ĩkie mũndũ na atũa naitũ.” (1.14) O tondũ ĩvuku yĩĩ yĩkwasya, Ũvoo ũũ Mũseo waandĩkiwe nĩ kana andũ ala mekũũsoma maĩkĩĩe kana Yesũ nĩwe Mũtangĩĩi ũla wathaniwe, nake nĩ Mwana wa Ngai, na o ta ũu kwa kũmũĩkĩĩa we matonye kwĩthĩwa thayũ. (20.31)
Ĩtina wa ũelesyo ũla ũkũweta kana Yesũ nĩwe Ndeto ya Ngai ya tene na tene, ilungu sya mbee sya ĩvuku yĩĩ ninenganĩte syama syĩ kĩvathũkany'o, ila ikwonany'a kana Yesũ nĩwe Mũtangĩĩi ũla wathanĩtwe, nake nĩ Mwana wa Ngai. Ilungu isu iatĩĩwe nĩ momanyĩsyo ala mekũelesya kĩla kĩũvuanw'a nĩ syama isu. Ilungu isu nasyo syĩweta ũndũ andũ amwe mamũĩkĩĩie Yesũ matw'ĩka aatĩĩi make, na angĩ maleana nake na maema kũmũĩkĩĩa. Kĩlungu kya ĩkũmi na itatũ kũvika kya ĩkũmi na mũonza ieleetye kwa ũliku ngwatanĩo ya mwanya ĩla Yesũ waĩ nayo na amanyĩw'a make ũtukũ ũla wakwatiwe, na o ta ũu, ndeto syake sya kũmombany'a na kũmathangaasya atanamba kwambwa ngelany'onĩ. Ilungu sya mũthya syĩweta ĩũlũ wa kũkwatwa kwa Yesũ, kũsilĩlwa, kwambwa ngelany'onĩ, na kũthayũũka kwake, na o ta ũu, kũmaumĩlĩĩla amanyĩw'a make ĩtina wa kũthayũũka.
Ũvoo wa ũla mũndũ mũka wakwatiwe ayĩka ũlaalai, (8.1-11) wiĩĩwe na ũvano ũũ [ ] nũndũ Maandĩko maingĩ ma Ndeto ya Ngai, o vamwe na maũalyũlo ma tene ma Ndeto ya Ngai mai na ũvoo ũsu, o yĩla Maandĩko angĩ maũandĩkĩle kũndũ kũngĩ.
Ũvoo Mũseo o tondũ ũandĩkĩtwe nĩ Yoana wĩneena mũno ĩũlũ wa mũthĩnzĩo wa thayũ ũtathela, naw'o ũkwatĩkanaa kwĩsĩla kwa Klĩsto. Mũthĩnzĩo ũũ wambĩĩaa yu na wũkaa kwa ala mamwĩtĩkĩlaa Yesũ, ũla nĩwe nzĩa, na nĩwe w'o, na nĩwe thayũ. Ũndũ ũmwe wumĩlĩte mũno ĩvukunĩ yĩĩ nĩ ũndũ Yoana ũtũmĩĩte syĩndũ ila twĩthĩawa nasyo kĩla mũthenya, akaelesya maũndũ ma kĩ-veva, nasyo nĩ kĩw'ũ, mũkate, kyeni, mũĩthi na malondu make, na mũsavivũ na ũsyao wa w'o.
Maũndũ ala me Ĩvukunĩ Yĩĩ
Ndeto sya mbee 1.1-18
Yoana Mũvatisi na amanyĩw'a ma mbee ma Yesũ 1.19-51
Ũthũkũmi wa Yesũ andũnĩ 2.1—12.50
Yesũ e vakuvĩ na Yelũsalemu na e nthĩnĩ wayo mĩthenyanĩ yake ya mũthya e kũũ nthĩ 13.1—19.42
Kũthayũũka kwa Mwĩai na kũmaumĩlĩĩla amanyĩw'a make 20.1-31
Ndeto sya mũthya na Mwĩai ayumĩlĩĩla amanyĩw'a make ĩngĩ kĩsionĩ kya Kalilii 21.1-25
Currently Selected:
Yoa Ũelesyo wa Ĩvuku Yĩĩ: KAMBA
Highlight
Share
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011