Yoa 8

1Ĩndĩ Yesũ athi Kĩĩmanĩ kya Mĩthata. 2Ũnĩ ũsu kwakya tene, Yesũ nĩwaendie ĩngĩ Ĩkalũnĩ. Andũ onthe nĩmaendie vala ũĩ, nake ekala nthĩ ambĩĩa kũmamanyĩsya. 3Amanyĩsya ma Mĩao na Avalisi nĩmaetie mũndũ mũka ũmwe wakwatĩtwe akĩlaalaa, na mamũũngamya mbee wa andũ onthe. 4Nĩmamwĩie Yesũ atĩĩ, “Mũmanyĩsya, mũndũ mũka ũũ akwatwa akĩlaalaa, 5#Ali 20.10; Kũt 22.22-24 na Mĩaonĩ, Mwose atwĩaĩĩte nĩtũkimangae mũndũ mũka wa mũthemba ũũ na mavia akw'e. Wĩasya ata ĩũlũ wake?” 6Mamũkũlasya ũu mamũteete nĩ kana matonye kũkwata ũndũ mamũsikata naw'o. Yesũ nĩwakumanie na ambĩĩa kũandĩka nthĩ na kyaa.

7Yĩla mathing'ĩĩisye kũmũkũlya, nĩwaũngalalile na amea atĩĩ, “Ethĩwa ve mũndũ ũte na naĩ katĩ wenyu, nĩethĩwe wa mbee kũmwĩkya ĩvia.” 8Nĩwakumanie ĩngĩ na aendeea kũandĩka nthĩ na kyaa. 9Yĩla meewie ũu, nĩmaendie onthe ũmwe kwa ũmwe, mambĩĩe na ala akũũ. Yesũ nĩwatiiwe e weka na ũla mũndũ mũka aũngeme o vau. 10Yesũ nĩwaũngalalile na amũkũlya atĩĩ, “Mũndũ mũka, maĩva ala andũ meũkũsikataa? No ve ũmwe ũnatiwa akaũsilĩla?” 11Mũndũ mũka ũsu amwĩa atĩĩ, “Vai ũmwe Mwĩai.”

Nĩvo ĩndĩ Yesũ wamwĩie, “O nakwa ndikũsilĩla. Thi na ndũkambĩle kwĩka naĩ.”]#8.11—8.11 Maandĩko maingĩ ma tene ma Ndeto ya Ngai mai na ngewa ĩno; angĩ mamĩandĩkĩte ĩtina wa Yoana 7.36, kana ĩtina wa 21.25; angĩ mamĩandĩkĩte ĩtina wa Lũka 21.38

Yesũ nĩwe Kyeni kya Nthĩ

12 # Mat 5.14; Yoa 9.5 Yesũ nĩwaneenie ĩngĩ na andũ amea atĩĩ, “Nyie ninyie kyeni kya nthĩ. Mũndũ o na wĩva ũla ũngatĩĩaa ndakaendela kĩvindunĩ, ĩndĩ akeethĩwa na kyeni kĩla kĩetae thayũ.”

13 # Yoa 5.31 Nĩvo ĩndĩ Avalisi mamwĩie atĩĩ, “We yu wĩĩyumĩsya ũkũsĩ na kwoou ũkũsĩ waku ti wa w'o.”

14Yesũ amasũngĩa amea atĩĩ, “O na ethĩwa nĩĩyumĩsya ũkũsĩ, ũkũsĩ wakwa nĩ wa w'o nũndũ nyie nĩnĩsĩ vala numĩte na vala nĩendete, ĩndĩ inyw'ĩ mũyĩsĩ vala numĩte na vala nĩendete. 15Mũsilĩlaa na mosũanĩo ma kĩ-mũndũ, ĩndĩ nyie ndisilĩlaa mũndũ. 16Ĩndĩ o na ngatw'ĩka nĩngũsilĩla, sila wakwa wĩthĩwa wĩ wa w'o nũndũ nyie ndi nyioka. Asa ũla ũndũmĩte e vamwe nakwa. 17Mĩaonĩ yenyu nĩkũandĩkĩtwe kana ũkũsĩ wa andũ elĩ nĩ wa w'o. 18Nyie nĩĩyumĩsya ũkũsĩ, na Asa ũla ũndũmĩte o nake nũmbumĩasya ũkũsĩ.”

19Kwondũ wa ũu mamũkũlya atĩĩ, “Ĩthe waku aĩva?” Yesũ amasũngĩa amea, “Nyie mũimbĩsĩ, o na mũyĩsĩ Ĩthe wakwa, ĩndĩ kethĩwa nĩmũmbĩsĩ, mwĩthĩwa mwĩsĩ Ĩthe wakwa o nake.”

20Yesũ aneenie maũndũ asu aimanyĩsya Ĩkalũnĩ, e kasũmbanĩ kala kaiawa masandũkũ ma kumĩsya nthembo. Vai mũndũ waamũkwata, nũndũ saa wake ndwaĩ ũnamba kũvika.

Vala Ngũthi Mũitonya Kũvika

21O ĩngĩ Yesũ nĩwameie atĩĩ, “Nyie nĩngũthi na inyw'ĩ mũkamantha, ĩndĩ mũkakw'ĩĩa naĩnĩ syenyu. Vala nĩendete inyw'ĩ mũitonya kũvika.”

22Nĩvo ĩndĩ atongoi ma Ayuti makũlanilye atĩĩ, “Ko ũkwenda kwĩyũaa ũndũ ũkwasya, ‘Vala nĩendete mũitonya kũvika?’ ”

23Yesũ amea atĩĩ, “Inyw'ĩ mumĩte vaa nthĩ, ĩndĩ nyie numĩte ĩũlũ; mwĩ ma nthĩ ĩno, ĩndĩ nyie ndi wa nthĩ ĩno. 24Kĩu nĩkyo kĩtumi nĩmwĩie kana mũkakw'ĩĩa naĩnĩ syenyu. Mũkakw'ĩĩa naĩnĩ syenyu mwalea kũĩkĩĩa kana, ‘Ninyie ũla Ninyie.’ ”

25Namo mamũkũlya atĩĩ, “We nue ũũ?” Yesũ amasũngĩa amea, “No kĩla namũtavisye kuma mwambĩlĩĩlyonĩ. 26Nĩna maũndũ maingĩ ma kũneena na kũsilĩla ĩũlũ wenyu. Ĩndĩ we ũla wandũmie nĩ wa w'o, na nĩtavasya nthĩ o kĩla nĩw'ĩte kuma kwake.”

27Mayaaelewa kana Yesũ ematavasya ĩũlũ wa Asa. 28Kwoou Yesũ amea atĩĩ, “Yĩla mwĩmũkĩlya Mwana wa Mũndũ ĩũlũ, nĩvo mwĩmanya kana Ninyie Ũla Ninyie, na mũimanya kana vai ũndũ nĩkaa na ũkũmũ wakwa mwene, ĩndĩ nĩneena o kĩla Asa ũmanyĩĩtye. 29Ũsu ũla wandũmie e vamwe nakwa; ndandiĩte nĩ nyioka nũndũ kĩla ĩvinda nĩkaa maũndũ ala mamwendeeasya.”

30Andũ aingĩ ala meewie Yesũ akĩneena maũndũ asu nĩmamũĩkĩĩie.

Ũw'o Ũkamũnenga Ũthasyo

31Nĩvo ĩndĩ Yesũ wameie Ayuti ala mamũĩkĩĩte atĩĩ, “Ethĩwa nĩmũkũatĩĩa momanyĩsyo makwa, mwĩ amanyĩw'a makwa w'o, 32na mũkamanya ũla w'o, na ũla w'o ũkamũnenga ũthasyo.”

33 # Mat 3.9; Lk 3.8 Namo mamwĩa atĩĩ, “Ithyĩ twĩ nzyawa sya Avalaamu, na tũyaaĩthĩwa twĩ ngombo sya mũndũ o na ũmwe. Wĩneena ĩũlũ wa kyaũ yĩla ũkwasya, ‘Mũkeethĩwa na ũthasyo?’ ”

34Yesũ amasũngĩa amea atĩĩ, “Nĩmũtavya w'o, kĩla mũndũ wĩkaa naĩ nĩ ngombo ya naĩ. 35Ngombo ndĩtũaa ta ũmwe wa andũ ma mũsyĩ matukũ onthe, ĩndĩ mwana atũaa e ũmwe wa mũsyĩ matukũ onthe. 36Ethĩwa Mwana akamũthasya, mũkeethĩwa kwa w'o mwĩ athasye. 37Nĩnĩsĩ kana mwĩ nzyawa sya Avalaamu, ĩndĩ ũu wĩ o vo mwĩenda kũmbũaa, nũndũ mũikwĩtĩkĩlana na momanyĩsyo makwa. 38Nyie nĩneena kĩla nonete kuma kwa Ĩthe wakwa, ĩndĩ inyw'ĩ mwĩĩka kĩla mwĩw'ĩte kuma kwa ĩthe wenyu.”

39Namo mamũsũngĩa mamwĩa atĩĩ, “Ĩthe waitũ nĩ Avalaamu.” Yesũ amea, “Kethĩwa mwĩ syana sya Avalaamu, mwĩka o ũndũ Avalaamu weekaa. 40Ĩndĩ yu mwĩenda kũmbũaa, nũndũ wa kũmũtavya ũw'o ũla neewie kuma kwa Ngai. Avalaamu ndaaĩka kĩndũ kya mũthemba ũsu. 41Inyw'ĩ mwĩkaa ũndũ ĩthe wenyu weekaa.”

Namo mamwĩa atĩĩ, “Ithyĩ tũisyaĩwe ũlaalainĩ; ĩthe waitũ nĩ ũmwe, nake nĩ Ngai.”

42Yesũ amea atĩĩ, “Kethĩwa Ngai nĩwe Ĩthe wenyu mwĩthĩwa mũimbenda, nũndũ naumie kwa Ngai nayu nĩ vaa. Ndyũkĩte nũndũ wakwa mwene; Asa nĩwe wandũmie. 43Mwĩtuma mũtaelewa nĩ kĩla ngũneena nĩkĩ? Nĩkwĩthĩwa mũitonya kũmĩanĩsya na ndeto syakwa. 44Inyw'ĩ ĩthe wenyu nĩ Satani, na mwendaa kwĩka kĩla ĩthe wenyu wendete kwĩka. Aĩ mũaani kuma mwambĩlĩĩlyonĩ na ndaatĩĩaa ũla w'o, nũndũ ũla w'o ndwĩ nthĩnĩ wake. Yĩla waneena ũvũngũ, ethĩawa aneena kwĩanana na mũmbĩle wake, nũndũ we nĩ mũkengani na nĩwe ĩthe wa ũvũngũ w'onthe. 45Ĩndĩ nũndũ nyie nĩneena ũla w'o, mũiũndĩkĩĩa. 46Nũũ katĩ wenyu ũtonya kwasya kana nyie nĩ na naĩ? Ethĩwa nĩneena ũla w'o, nĩkĩ ĩndĩ mũtekũndĩkĩĩa? 47Mũndũ ũla wa Ngai nĩwĩthukĩĩasya ndeto sya Ngai. Inyw'ĩ mũleaa kũsyĩw'a nũndũ mũi ma Ngai.”

Yesũ Aineena ĩũlũ Wake na Avalaamu

48Ayuti nĩmamũkũlilye Yesũ atĩĩ, “Ithyĩ nĩtũvĩtĩtye tũyasya kana we wĩ Mũsamalia na wĩ na maimũ?”

49Yesũ amasũngĩa amea, “Nyie ndi na maimũ. Nyie nĩnĩnengae Ĩthe wakwa ndaĩa, ĩndĩ inyw'ĩ mũinengae ndaĩa. 50Ĩndĩ ũu wĩ o vo nyie ndikwĩmanthĩa ndaĩa; ve ũla ũmanthaa ndaĩa ĩsu na nowe ũsilaa. 51Nĩmũtavya w'o, mũndũ ũla wĩkaa ũndũ ndeto syakwa ikwasya, ũsu ndakakw'a.”

52Kwoou Ayuti mamwĩa atĩĩ, “Yu nĩtwamanya kwa w'o kana wĩ na maimũ! Avalaamu nĩwakwie, na athani o namo nĩmakwie, naku wĩasya, ‘Mũndũ ũla wĩkaa ũndũ ndeto syakwa ikwasya, ũsu ndakakw'a.’ 53Nue mũnene kwĩ ĩthe waitũ Avalaamu? We nĩwakwie na athani o namo nĩmakwie. We wĩsũanĩa nue ũũ?”

54Yesũ amasũngĩa amea atĩĩ, “Ngetaĩa nyie mwene, ndaĩa ĩsu yĩthĩwa yĩ ya mana. Asa wakwa nĩwe ũkũndaĩa, ũla inyw'ĩ mũkwasya nĩ Ngai wenyu. 55Inyw'ĩ mũimwĩsĩ, ĩndĩ nyie nĩnĩmwĩsĩ. Ngasya ndimwĩsĩ nĩthĩwa nĩ mũkengani tenyu, ĩndĩ nyie nĩnĩmwĩsĩ, na nĩnĩkaa ũndũ ndeto syake ikwasya. 56Ĩthe wenyu Avalaamu nĩwatanie nũndũ wa kwĩthĩwa akoona ĩvinda ya kũka kwakwa. Nĩwayonie na eew'a mũyo.”

57Namo mamwĩa atĩĩ, “We o na ndũvikĩtye myaka mĩongo ĩtano, vatonyeka ata wĩthĩwe wamwonie Avalaamu?”

58Yesũ amasũngĩa amea atĩĩ, “Nĩmũtavya w'o, Avalaamu atemũsyae nyie naĩ kw'o.”

59Nĩvo ĩndĩ moosie mavia mamũkimange, ĩndĩ Yesũ eevitha auma vau Ĩkalũnĩ.

Currently Selected:

Yoa 8: KAMBA

Highlight

Copy