Yoa 4

Yesũ na Kĩveti Kĩmũsamalia

1Mwĩai nĩwamanyie kana Avalisi nĩmew'ĩte kana aendee kũkwata amanyĩw'a aingĩ kũte Yoana na kũmavatisa, 2o na kau ti we wavatisaa ĩndĩ nĩ amanyĩw'a make. 3Kwoou Yesũ nĩwaumie kũu Yutia asyoka o ĩngĩ Kalilii. 4Akĩthi kw'o aĩ esĩle Samalia.

5 # Mwa 33.19; Yos 24.32 Kũu Samalia nĩwavikie ndũanĩ yĩtawa Saikale, nayo yĩ vakuvĩ na mũũnda ũla Yakovo wanengete Yosevu mwana wake. 6Kĩthima kya Yakovo kyaĩ vau, na kwoou nũndũ Yesũ nĩwanoetw'e mũno nĩ kyalo kĩasa kĩla waendete, nĩwaendie ekala nthĩ ũtee wa kĩthima kĩu. Kwaĩ ta saa sita sya mũthenya.

7Nĩvo ĩndĩ kĩveti kĩmwe kya kũu Samalia kyookie kũtava kĩw'ũ. Yesũ nĩwakĩie atĩĩ, “Ndavĩle kĩw'ũ nĩnyw'e.” 8Amanyĩw'a ma Yesũ maĩ manathi ndũanĩ kũthooa lĩu.

9 # Esa 4.1-5; Nee 4.1-2 Kĩveti kĩu Kĩmũsamalia nĩkyamũkũlilye atĩĩ, “We na wĩ Mũyuti nakwa nĩ Mũsamalia, ũtonya ata kũmbĩa nĩkũtavĩle kĩw'ũ?” Ayuti na Asamalia mayatũmĩanĩaa syĩndũ. 10Yesũ akĩsũngĩa, “Kethĩwa nũmanya mũthĩnzĩo ũla Ngai ũnenganae, na nũũ ũla ũkũkwĩtya kĩw'ũ anyw'e, we wĩthĩwa wamwĩtya kĩw'ũ, nake ethĩwa akũnenga kĩw'ũ kĩetae thayũ.”

11Kĩveti kĩu kyamũkũlya atĩĩ, “Mũnene, yu na ndwĩ na kĩndũ kya kũtava kĩw'ũ nakyo, na kĩthima now'o kĩlikĩte, wĩumya kĩw'ũ kĩu kĩetae thayũ va? 12Nue mũnene kwĩ ĩthe waitũ Yakovo, ũla watũnengie kĩthima kĩĩ, nawe mwene nokyo wanyusaa vamwe na syana na indo syake?”

13Yesũ akĩsũngĩa, “Mũndũ o na wĩva ũla ũnyusaa kĩw'ũ kĩĩ akeew'a waũni ĩngĩ, 14ĩndĩ mũndũ ũla wĩnyw'a kĩw'ũ kĩla nĩmũnenga, ndakew'a waũni ĩngĩ o na vanini. Kwa w'o kĩkatw'ĩka nthongo nthĩnĩ wake, ĩkũvulutya ĩmũnenge kĩw'ũ kĩla kĩetae thayũ ũtathela.”

15Kĩveti kĩu kyamwĩa atĩĩ, “Mũnene, nenge kĩw'ũ kĩu nĩ kana ndikaaĩw'e waũni ĩngĩ, kana kũtindaa ndyũka vaa kũtava kĩw'ũ.”

16Yesũ akĩsũngĩa, “Enda ũkete mũemeu wũke nake vaa.” 17Nakyo kĩveti kĩu kyamwĩa atĩĩ, “Nyie ndi mũũme.” Yesũ akĩa, “Waneena w'o kwasya ndwĩ mũũme. 18Kwa w'o ũtwaĩtwe nĩ aũme makavika atano, na o na mũndũ ũla wĩ nake yu ti mũemeu. Kwoou kĩu waneena nĩ kya w'o.”

19Kĩveti kĩu kyamwĩa atĩĩ, “Mũnene, nĩngwona wĩ mwathani. 20Aaũmae maitũ mathaithĩaa kĩĩmanĩ kĩĩ, ĩndĩ inyw'ĩ Ayuti mwaasya kana Yelũsalemu nĩvo vandũ vala andũ maĩlĩte kũthaithĩa.”

21Yesũ akĩsũngĩa akĩa atĩĩ, “Ndĩkĩĩe kĩveti, ĩvinda nĩyũkĩte yĩla mũtakathaithĩa Asa kĩĩmanĩ kĩĩ kana Yelũsalemu. 22Inyw'ĩ Asamalia mũthaithaa kĩla mũtesĩ; ithyĩ nĩtwĩsĩ kĩla tũthaithaa nũndũ ũtangĩĩo wumaa kwa Ayuti. 23Ĩndĩ ĩvinda nĩyũkĩte, o na yu nĩ ĩviku, yĩla athaithi ala maw'o makathaithaa Asa nthĩnĩ wa Veva na nthĩnĩ wa w'o, nũndũ athaithi ma mũthemba ũsu nĩmo Asa wendaa mamũthaithae. 24Ngai nĩ Veva na kwoou ala mamũthaithaa no nginya mamũthaithae nthĩnĩ wa Veva na nthĩnĩ wa w'o.” 25Kĩveti kĩu kyeea Yesũ atĩĩ, “Nĩnĩsĩ kana Masia ũla nĩ Klĩsto akooka; yĩla wĩũka, akatũtavya maũndũ onthe.”

26Yesũ akĩsũngĩa, “Nyie ngũneena naku ninyie we.”

27Saanĩ ũsu amanyĩw'a ma Yesũ nĩmasyokie kuma ndũanĩ, na maseng'a mũno mamwĩthĩa aineena na kĩveti. Ĩndĩ vai ũmwe waakũlya, “Wĩenda kyaũ?” Kana akamũkũlya, “Wĩneenaa nakyo nĩkĩ?”

28Kĩveti kĩu nĩkyatiie mũtũngi wakyo kyasyoka ndũanĩ na kyatavya andũ kyamea atĩĩ, 29“Ũkai mũkone mũndũ wandavya maũndũ onthe ala naaĩka. Nokwĩthĩwa mũndũ ũsu nowe Klĩsto?” 30Andũ nĩmaumie ndũanĩ mathi vala ve Yesũ.

31Maũndũ asu maendee, amanyĩw'a nĩmamwĩsũvaa Yesũ makĩmwĩa atĩĩ, “Mũmanyĩsya, ya lĩu.” 32Ĩndĩ Yesũ amea, “Nĩna lĩu wa kũya inyw'ĩ mũtawĩsĩ.”

33Nĩvo ĩndĩ amanyĩw'a make mambĩĩie kũkũlany'a atĩĩ, “Nokwĩthĩwa ve mũndũ wamũetee lĩu?”

34Yesũ amea, “Lĩu wakwa nĩ kwĩka kwenda kwa ũla wandũmie, na kũminũkĩlya wĩa ũla ũnengete. 35Inyw'ĩ mũineenaa mũkasya, ‘No myei ĩna ĩtialĩte na tũilika ngethanĩ?’ Ĩndĩ nyie nĩmwĩa kwa sisyai mĩũnda mwone! Lĩu nũvikĩe ĩvinda yaw'o ya kũkethwa na nĩwaĩlĩte kũkethwa.

36“Mũkethi nũendeeaa na kũĩvwa na ayũmbany'a ngetha kwondũ wa thayũ ũtathela. Kwoou mũvandi na mũkethi makatana ĩmwe. 37Kwondũ wa ũu ũneeni ũũ nĩ wa w'o: ‘Ũmwe nũvandaa na ũngĩ aiketha.’ 38Nĩmũtũma mũkakethe ngetha mũtaathũkũmĩa; andũ angĩ nĩmo matethisye wĩa, nenyu mwĩketha ũsyao wa yuutĩa yoo.”

39Asamalia aingĩ ma ndũa ĩsu nĩmookie vala ve Yesũ nũndũ wa kĩla mataviw'e nĩ kĩla kĩveti kana, “Andavya maũndũ onthe ala naaĩka.” 40Kwoou yĩla Asamalia asu mookie vala ve Yesũ, nĩmamũkũlilye ekale namo, nake ekala namo vandũ va mĩthenya ĩlĩ.

41Asamalia angĩ aingĩ nĩmamũĩkĩĩie Yesũ kwondũ wa ndeto syake, 42na meea kĩla kĩveti atĩĩ, “Yu nĩtwaĩkĩĩa, na ti ũndũ wa ndeto syaku syoka, ĩndĩ nũndũ nĩtweeyĩw'ĩa na nĩtwamanya nesa ki kana ũũ nĩwe Mũtangĩĩi wa nthĩ.”

Yesũ Aivosya Mwana wa Mũnene Ũmwe wa Silikalĩ

43Ĩtina wa kwĩkala mĩthenya ĩlĩ Samalia, Yesũ nĩwaumie kũu athi Kalilii. 44#Mat 13.57; Mk 6.4; Lk 4.24 Yesũ mwene nĩwaĩtye: “Mwathani ndanengetwe ndaĩa nthĩ ĩla wumĩte.” 45#Yoa 2.23 Yĩla wavikie Kalilii andũ ma kũu nĩmamũthokisye nesa, nũndũ nĩmoonete maũndũ onthe ala weekĩte Yelũsalemu ĩvindanĩ ya Mboka ya Vasaka, nũndũ o namo maĩ kw'o mbokanĩ ĩsu.

46 # Yoa 2.1-11 Nĩvo ĩndĩ Yesũ waendie o ĩngĩ ndũanĩ ya Kena nthĩ ya Kalilii, vala waalyũlĩte kĩw'ũ kĩkatw'ĩka ndivai. Kavelinaũmu kwaĩ mũnene ũmwe wa silikalĩ kamwana kake kaĩ kawau mũno. 47Yĩla weewie kana Yesũ nĩwũkie Kalilii kuma Yutia, nĩwookie vala ũĩ na amwĩsũva athi kũu akamũvoesye kamwana kake kala kaĩ vakuvĩ kũkw'a. 48Yesũ nĩwamwĩie atĩĩ, “Mũtonete syama na maũndũ ma kũseng'ya inyw'ĩ mũitonya kũĩkĩĩa!” 49Mũnene ũsu amwĩa atĩĩ, “Mũnene, ũka tũthi mwana wakwa atanakw'a.” 50Yesũ amwĩa atĩĩ, “Enda mwana waku nũkũvoa.” Mũndũ ũsu nĩwaĩkĩĩie ndeto sya Yesũ na kwoou athi. 51E nzĩanĩ enũkĩte, athũkũmi make nĩmamũkomanie mamwĩa atĩĩ, “Kavĩsĩ kaku nĩkavoie.”

52Nĩwamakũlilye atĩĩ, “Kambĩĩie kũkwata kavaa ĩndĩĩ?” Namo mamwĩa, “Ĩyoo saa mũonza sya mũthenya nĩw'o ndetema ĩsu ĩnaumie mwĩĩ.” 53Ĩthe wa kamwana kau nĩwalilikanile kana saa isu nosyo Yesũ ũnamwĩie atĩĩ, “Mwana waku nũkũvoa,” na kwoou we na mũsyĩ wake maĩkĩĩa Yesũ. 54Kĩĩ nĩkyo kyama kya kelĩ kĩla Yesũ weekie ooka Kalilii kuma Yutia.

Currently Selected:

Yoa 4: KAMBA

Highlight

Copy