Yoa 17

Yesũ Aivoya Kwondũ Wake Mwene

1Yesũ amina kũneena ndeto isu, nĩwasyaisye ĩũlũ ĩtunĩ na avoya ayasya atĩĩ, “Asa, saa nĩwavika. Nenge ũkumyo nyie Mwana waku, nĩ kana nyie mwana waku nĩtonye ũkũnenga ũkumyo, 2nũndũ nũnengete ũkũmũ ĩũlũ wa andũ onthe, nĩ kana nĩnenge andũ onthe ala ũnengete thayũ ũtathela. 3Thayũ ũtathela nĩw'o ũũ: Kũũmanya we wĩ weka, Ngai ũla wa w'o, na kũmanya nyie Yesũ Klĩsto ũla we ũtũmĩte. 4Nĩnĩtumĩte ũkumw'a vaa ĩũlũ wa nthĩ, nũndũ wa kwĩthĩwa nĩnĩkĩte wĩa w'onthe ũla wanengie nĩke. 5Nayu ĩndĩ Asa, nenge ũkumyo ũla naĩ naw'o yĩla naĩ vamwe naku mbee wa nthĩ ĩtanamba kũmbwa.

Yesũ Aivoyea Amanyĩw'a Make

6“Nĩnĩtumĩte ũmanyĩka nĩ ala wanengie kuma andũnĩ ma nthĩ. Maĩ maku na wanenga mo. Nĩmekaa ũndũ ndeto yaku ĩkwasya, 7na yu nĩmesĩ kana maũndũ onthe ala ũnengete maumĩte kwaku. 8Nĩnĩmatavĩtye ndeto ila wandavisye na nĩmamyosete; yu nĩmamanyĩte kwa w'o kana naumie kwaku, na nĩmaĩkĩĩa kana nue ũndũmĩte.

9“Nĩvoya kwondũ wa asu; ndiũvoya kwondũ wa nthĩ, ĩndĩ nĩvoya kwondũ wa asu ũnengete, nũndũ nĩ maku. 10Kyonthe kĩla nĩ nakyo nĩ kyaku, na kyonthe kĩla wĩ nakyo nĩ kyakwa, na nyie nĩnĩkwataa ũkumyo nthĩnĩ wa syonthe. 11Nyie ndiendeea kwĩkala kũũ ĩũlũ wa nthĩ; nĩnũkĩte kwaku, ĩndĩ aa makeethĩawa kũũ ĩũlũ wa nthĩ. Asa Mũtheu, masũvĩae kwa ũtonyi wa ĩsyĩtwa yĩla ũnengete, nĩ kana meĩthĩwa me kĩndũ kĩmwe o ũndũ nyie naku twĩ kĩndũ kĩmwe. 12#Sav 41.9; Yoa 13.18 Yĩla nĩnaĩ namo, nĩnĩnekalaa ngĩmasũvĩa kwa ũtonyi wa ĩsyĩtwa yaku yĩla ũnengete. Nĩnĩmasũvĩĩte, vai ũmwe woo waaa, ate o ũla wa kwaa nĩ kana kĩla Maandĩko Matheu mawetete kĩanĩe. 13Nĩnũkĩte kũu kwaku, ĩndĩ nĩngũneena maũndũ aa yu nĩ o kũũ ĩũlũ wa nthĩ, nĩ kana matonye kwĩthĩwa mausũĩtwe nĩ ũtanu wakwa mathayũnĩ moo. 14Nĩnĩmamanyĩĩtye ndeto yaku, nayo nthĩ yamamena nũndũ mo ti andũ ma nthĩ, o ũndũ nyie nde wa nthĩ. 15Ndiũvoya nĩ kana ũmaumye kũũ ĩũlũ wa nthĩ, ĩndĩ nĩvoya ũmasũvĩae kuma kwa Ũla Mũthũku. 16Mo ti ma nthĩ ĩno, o ũndũ nyie nde wayo. 17Mavathe methĩwe atheu nthĩnĩ wa ũla w'o; ndeto yaku nĩyo w'o. 18Nĩngũmatũma kũũ nthĩ, o ũndũ we wandũmie kw'o. 19Kwondũ woo nyie nĩngwĩyumya vyũ kũla ũĩ, nĩ kana namo o ta ũu matonye kwa w'o kwĩnengane vyũ kũla ũĩ.

Yesũ Aivoya Kwondũ wa Aatĩĩi Make Onthe

20“Ndiũvoya kwondũ wa aa me oka, ĩndĩ nĩvoya o ta ũu kwondũ wa ala makandĩkĩĩa nũndũ wa ũmanyĩsyo woo. 21Nĩvoya nĩ kana onthe methĩwe me kĩndũ kĩmwe. Asa, methĩwe me nthĩnĩ waitũ, o ũndũ we wĩ nthĩnĩ wakwa nakwa nĩ nthĩnĩ waku, nĩ kana nthĩ ĩĩkĩĩe kana nĩ w'o we nũndũmĩte. 22Nĩnĩmanengete ũkumyo o ũla ũnengete, nĩ kana methĩwe me kĩndũ kĩmwe, o ũndũ nyie naku twĩ kĩndũ kĩmwe. 23Nyie nĩ nthĩnĩ woo naku wĩ nthĩnĩ wakwa, nĩ kana matonye kwĩthĩwa me kĩndũ kĩmwe vyũ. Nĩvo ĩndĩ nthĩ yĩmanya kana we nĩwandũmie, na nũmendete aatĩĩi makwa o ũndũ ũmbendete nyie.

24“Asa, nĩngwenda ala ũnengete methĩawe me nakwa vala nĩĩ, monae ũkumyo wakwa ũla we ũnengete nũndũ nĩwambendie mbee wa nthĩ ĩtanamba kũmbwa. 25Asa Mũlũngalu! Nthĩ ndĩkwĩsĩ, ĩndĩ Nyie nĩngwĩsĩ, na amanyĩw'a makwa nĩmesĩ kana we nũndũmĩte.

26“Nĩnĩtumĩte ũmanyĩka kwoo na ngaendeea na kwĩka ũu, nĩ kana wendo ũla wĩ naw'o kwakwa ũtonye kwĩthĩwa nthĩnĩ woo, nakwa o ta ũu ngĩthĩwa nthĩnĩ woo.”

Currently Selected:

Yoa 17: KAMBA

Highlight

Copy