Mwa 9
9
Ngai Aiseũvya Ũtianĩo na Noa
1 #
Mwa 1.28
Ngai nĩwaathimie Noa na ana make na amea atĩĩ, “Syaanai, mwingĩve musũe ĩũlũ wa nthĩ. 2Mũkakĩawa nĩ nyamũ syonthe sya kĩthekanĩ, nyũnyi, tũsamũ tũnini na makũyũ; isu syonthe ikeethĩawa ungu wa ũtonyi wenyu. 3Nĩnamũnenga syĩndũ syonthe ila iendaa na syĩ thayũ mũĩsae. O tondũ namũnengie mĩmea mũĩsae now'o namũnenga isu syonthe. 4#Ali 7.26-27; 17.10-14; Ali 19.26; Kũt 12.16,23; 15.23 Kĩla mũtaĩlĩte kwĩka nĩ kũya nyama ĩte mbumye nthakame; nĩnĩleete ũndũ ũsu nũndũ thayũ wĩ nthakamenĩ. 5Ethĩwa mũndũ akoaa ũngĩ akasilĩlwa, o nayo nyamũ ĩla yĩũaa mũndũ ĩkooawa. 6#Mwa 1.26; Kuma 20.13 Mũndũ ũla wĩũaa ũngĩ, o nake akooawa nĩ ũngĩ, nũndũ Ngai oombie mũndũ na mũvw'ano wake.
7 #
Mwa 1.28
“Ĩndĩ inyw'ĩ syaanai mwingĩve na kwongeleka mũno ĩũlũ wa nthĩ.”
8Ngai nĩweeie Noa na ana make atĩĩ, 9“Yu nĩngũseũvya ũtianĩo naku na nzyawa syaku, 10na syũmbe syonthe ila syĩ thayũ, nyũnyi, nyamũ sya mũsyĩ, sya kĩthekanĩ na nyamũ ila ingĩ syonthe syaumie ngalawanĩ vamwe naku. 11Nĩngũseũvya ũtianĩo nenyu kwa ndeto ii: Nĩngũmwatha kana ndikananga ĩngĩ syũmbe syonthe ila syĩ thayũ na mbua ya kĩw'ũ kingĩ; kũikaua ĩngĩ mbua ya kĩw'ũ kingĩ yanange nthĩ.”
12Ngai nĩwaisye atĩĩ, “Ũũ nĩw'o wonany'o wa ũtianĩo wakwa nenyu na syũmbe syonthe ila syĩ thayũ wa ĩvinda yonthe yĩla yũkĩte: 13Nyie nĩngwĩkĩa ũtaathi wakwa matunĩ naw'o ũkeethĩawa wonany'o wa ũtianĩo katĩ wakwa na syũmbe syonthe ĩũlũ wa nthĩ. 14Yĩla naete matu ĩũlũ wa nthĩ na ũtaathi ũyumĩla matunĩ, 15ngalilikanaa ũtianĩo katĩ wakwa nenyu na syũmbe syonthe ila syĩ thayũ ĩũlũ wa nthĩ. Kĩw'ũ kĩikaingĩva ĩngĩ kyũae syũmbe syonthe. 16Yĩla ũtaathi ũsu waumĩla matunĩ, ngawonaa na ngĩlilikana ũtianĩo wa tene na tene katĩ wakwa na syũmbe syonthe ila syĩ thayũ ĩũlũ wa nthĩ.”
17Ngai nĩwaendeeie kũneena na Noa amwĩa atĩĩ, “Ũsu nĩw'o wonany'o wa ũtianĩo ũla naseũvya katĩ wakwa na syũmbe syonthe ila syĩ thayũ ĩũlũ wa nthĩ.”
Noa na Ana Make
18Ana ma Noa ala maumie ngalawanĩ nĩ Semu, Amu, na Yavethi. (Amu nĩwe waĩ ĩthe wa Kanaani.) 19Andũ onthe ĩũlũ wa nthĩ nĩ nzyawa sya ana asu atatũ ma Noa.
20Noa aĩ mũĩmi na nĩwe waĩ mũndũ wa mbee kũvanda mũũnda wa mĩsavivũ. 21Nĩwanywie ndivai amilwa, aumya ngũa syake na akoma ĩeemanĩ yake e mũthei. 22Yĩla Amu, ĩthe wa Kanaani woonie ĩthe e mũthei, nĩwaendie nza atavya ana-a-inyia make elĩ. 23Nĩvo ĩndĩ Semu na Yavethi moosie ngũa, mamilĩĩla ituonĩ syoo na mathi na kyamũtete mavw'ĩka ĩthe woo ũla waĩ mũthei. Mothyũ moo masyaĩtye kũndũ kũngĩ, na kwoou mayaaona ĩthe woo e mũthei. 24Yĩla Noa wamilũkilwe na amanya ũndũ mwana wake ũla mũnini wĩkie, 25nĩwaisye atĩĩ,
“Kanaani nĩaumanĩwe!
Akeethĩwa e ngombo ya ana-a-inyia make.”
26Nĩwasyokie asya,
“Nĩataĩwe Mwĩai Ngai, Ngai wa Semu!
Kanaani nĩethĩwe ngombo ya Semu.
27Ngai nĩanenevye kĩsio kya nthĩ ya Yavethi,
nzyawa syake nĩsyĩkalanasye na sya Semu,
na Kanaani nĩethĩwe ngombo ya Yavethi.”
28Ĩtina wa ĩla mbua ya kĩw'ũ kingĩ, Noa nĩwekalile thayũ myaka maana atatũ na mĩongo ĩtano, 29na akw'a e na ũkũũ wa myaka maana kenda na mĩongo ĩtano.
Currently Selected:
Mwa 9: KAMBA
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
BIBLE SOCIETY OF KENYA © 2011