Mwa 33
33
Yakovo Aikomana na Esaũ
1Yakovo nĩwookĩlilye metho na oona Esaũ okanĩtye na andũ maana ana. Kwoou nĩwaanisye syana syake, imwe ainenga Lea, na ingĩ Laeli na ila ingĩ anenga ala aka elĩ athũkũmi. 2Nĩwoosie aka make athũkũmi na syana syoo matongosye na maiatĩĩwa nĩ Lea na syana syake, nake Laeli na Yosevu meethĩwa ĩtina. 3Yakovo nĩwaendie e mbee woo na akumana aitina nthĩ na ũthyũ mavinda mũonza nginya athengeea mwana-a-inyia Esaũ. 4Ĩndĩ Esaũ nĩwasembie akomane na Yakovo. Nĩwamũkumbatĩilye kĩthũinĩ, amũkethya na ngethi ya wendo, na elĩ maĩa. 5Yĩla Esaũ woonie aka na syana nĩwakũlilye Yakovo atĩĩ, “Aa wĩ namo naaũ?”
Yakovo amũsũngĩa, “Ii nĩ syana ila Ngai ũnengete nyie mũthũkũmi waku kwa mumo wake.” 6Ala aka athũkũmi na syana syoo nĩmookie makumana matina nthĩ na ũthyũ. 7O ta ũu Lea na syana syake nĩmookie, na ĩtina Laeli na Yosevu o namo mooka. Onthe nĩmakumanie matina nthĩ na ũthyũ.
8Esaũ nĩwakũlilye Yakovo atĩĩ, “Kĩeleelo kya ila ndĩthya nĩnakomanie nasyo nĩ kyaũ?”
Yakovo amũsũngĩa, “Nĩ kana ndonye kwona ũseo kuma kwaku we mũnene wakwa.”
9Ĩndĩ Esaũ eea Yakovo, “Syĩndũ ila nĩ nasyo nindoetye mwana-a-ia; ĩkala na syĩndũ syaku.”
10Nake Yakovo amwĩa atĩĩ, “Aiee, mwa mwana-a-ia, ethĩwa nĩnoona ũseo mbee waku, ĩtĩkĩla mũthĩnzĩo wakwa. Nũndũ kwa w'o kwona ũthyũ waku nĩ ta kwona ũthyũ wa Ngai na nĩwanthokya na wendo mũnene. 11Mwa ĩtĩkĩla mũthĩnzĩo ũsu ũnaeteiwe, nĩkwĩthĩwa Ngai nũnengete mumo na nĩngwatĩte kyonthe kĩla ngwenda.” Yakovo nĩwaendeeie kũmũthing'ĩĩsya Esaũ nginya eetĩkĩla mũthĩnzĩo ũsu.
12Esaũ nĩweeie Yakovo atĩĩ, “Twambĩĩe kyalo tũthi na nĩngũũtongoesya.”
13Ĩndĩ Yakovo eea Esaũ, “Mũnene wakwa, we nowĩsĩ kana syana nĩ mbonzu, na nĩnaĩlĩte kũsũvĩa ndĩthya sya mbũi na malondu na indo ila ikwongya; syaingwa ikalaatĩtwe vandũ va mũthenya mũima syonthe niũkw'a. 14Ndongoesye nyie mũthũkũmi waku nakwa nĩngũkũatĩĩa kavola. Nĩngũka nĩendete kwĩanana na ũndũ indo na syana itonya kwĩkalaata, nginya ngwĩthĩĩle Etomu.”
15Esaũ nĩweeie Yakovo atĩĩ, “Eka ngũtiĩe amwe ma andũ makwa.”
Ĩndĩ Yakovo amũsũngĩa, “Vai vata wa kũmatia; nyie nĩnĩanĩwe nĩkwĩthĩwa nĩnoona ũseo kuma kwaku.” 16Kwoou mũthenya o ũsu Esaũ nĩwambĩĩie kyalo kyake kya kũsyoka Etomu. 17Ĩndĩ Yakovo aendie Sukothi, aaka nyũmba yake kw'o, na aaka nyũmba sya matũ sya kwĩkalaa indo syake. Kĩu nĩkyo kyatumie eta vandũ vau Sukothi.#33.17 Sukothi: Ũalyũlo wa ĩsyĩtwa yĩĩ nĩ nyũmba sya matũ.
18Yĩla Yakovo waumie Mesovotamia, nĩwavikie e mũsũvĩĩku ndũanĩ ya Sekemu nthĩ ya Kanaani, na amba maeema make vakuvĩ na ndũa ĩsu. 19#Yos 24.32; Yoa 4.5 Nĩwathooie kĩwanza kĩu wambĩte maeema na mbesa sya silĩva ĩana yĩmwe kuma kwa nzyawa sya Amolu ĩthe wa Sekemu. 20Nĩwaakie kĩthembeo vau na akĩta Ngai nĩwe Ngai wa Ĩsilaeli.
Currently Selected:
Mwa 33: KAMBA
Highlight
Share
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011
