Mwa 28
28
1Nĩvo ĩndĩ Isaka weetie Yakovo amũathima na amwĩaĩa atĩĩ, “Ndũkaatwae mũndũ mũka wa mbaĩ ya Akanaani. 2Uma vaa ũthi Mesovotamia mũsyĩ kwa Mbethũeli ũmae waku, na ũitwaa ũmwe wa eĩtu ma Lavani mwana-a-inyia wa inyia waku ethĩwe kĩveti kyaku. 3Ngai Mwene Ũtonyi W'onthe nĩakũathime, na aikũnenga syana mbingĩ nĩ kana wĩthĩwe ĩthe wa mbaĩ mbingĩ sya andũ! 4#Mwa 17.4-8 Akũnenge we na nzyawa syaku ũathimo ũla wanengie Avalaamu, nĩ kana ũmesye nthĩ ĩla yu ũtũaa ta mũeni, ĩla Ngai wanengie Avalaamu.” 5Nĩvo ĩndĩ Isaka weeie Yakovo nĩathi Mesovotamia kwa Lavani, mwana wa Mbethueli ũla waĩ Mũalamia. Lavani o ta ũu aĩ mwana-a-inyia wa Laveka inyia ya Yakovo na Esaũ.
Esaũ Aitwaa Kĩveti Kĩngĩ
6Esaũ nĩwamanyie kana Isaka nĩwamũathimĩte Yakovo, na akamwĩa nĩathi Mesovotamia akamanthe mũka kw'o. O ta ũu nĩwamanyie kana yĩla Isaka waathimie Yakovo nĩwamwĩaĩie kana ndaĩlĩte kũtwaa mũndũ mũka kuma mbaĩnĩ ya Akanaani, 7na kana Yakovo nĩweew'ĩte ĩthe na nyinyia na akathi Mesovotamia. 8Kumana na ũu Esaũ nĩwamanyie kana Isaka ndendeeaw'a nĩ aka ma Akanaani. 9Kwoou Esaũ nĩwaendie kwa Ĩsumaeli mwana wa Avalaamu, na atwaa mwĩĩtu wake Maalathi, ũla wasyaanĩw'e na Nevaiothi, atw'ĩka mũka wake vamwe na iveti ila ingĩ waĩ nasyo.
Ndoto ya Yakovo e Mbethi-eli
10Yakovo nĩwaumie Mbeeli-sieva na ambĩĩa kyalo elekele Aalani. 11Nĩwavikie vandũ vamwe na akomela vo nũndũ syũa yaĩ yĩnathũa. Nĩwoosie ĩvia yĩmwe vau na ayia ungu wa mũtwe wake na akoma. 12#Yoa 1.51 Nĩwaotie ndoto, na ndotonĩ yake oona ngasi yumĩte nthĩ nginya ĩtunĩ, na alaĩka ma Ngai mayambata na kũtheea ngasinĩ ĩsu. 13#Mwa 13.14-15 Mwĩai Ngai nĩwaũngyĩ ĩũlũ wayo#28.13 Ĩũlũ wayo: Maandĩko amwe maĩtye ũtee wake. na asya, “Ninyie Mwĩai Ngai, Ngai wa ĩthe waku Avalaamu, na Ngai wa Isaka. Ngakũnenga we na nzyawa syaku nthĩ ĩno ya Kanaani ĩla ũkomete. 14#Mwa 12.3; 22.18 Nzyawa syaku ikeethĩwa singĩvĩte ta mũthanga. Mũkanyaĩĩka kwelekela ngalĩko ya wumĩlonĩ na ũthũĩlonĩ wa syũa, ngalĩko ya ĩũlũ na ya ĩtheo. Kwĩsĩla kwaku na nzyawa syaku ngaathima andũ ma mbaĩ syonthe. 15Nĩ vamwe naku na ngakũsũvĩaa kũndũ kw'onthe kũla wĩendaa, na ngakũtũnga nthĩ ĩno. Ndikakũtia nginya nĩanĩsye ũndũ nakwatha.”
16Yĩla Yakovo waamũkie nĩwasũanĩie ayasya, “Kwa w'o Mwĩai Ngai e vaa, nakwa ndyĩĩsĩ!” 17Nĩwakwatiwe nĩ w'ĩa na asya atĩĩ, “Vaa nĩ vandũ va kũtelemya mũno! No nginya vethĩwe nĩ nyũmba ya Ngai; nĩ mũomo wa ĩtunĩ.”
18Yakovo nĩwookĩlile kwakya tene, na oosa ĩvia yĩla wakomesye mũtwe na ayĩnzĩla yĩthĩwe ta ũlilikany'o. Nĩwayĩtĩkĩisye mauta ĩũlũ nĩ kana ayĩvathe kwondũ wa Ngai. 19Yakovo nĩweetie vandũ vau Mbethi-eli#28.19 Mbethi-eli: Ĩsyĩtwa yĩĩ ũalyũlo wayo nĩ Nyũmba ya Ngai. Ndũa ĩsu vau mbeenĩ yeetawa Lusu. 20Yakovo nĩweevĩtie ayasya atĩĩ, “Ethĩwa we Ngai nũkwĩthĩwa vamwe nakwa, na kũnzũvĩa kyalonĩ kĩĩ kyakwa, na kũnenga lĩu na ngũa, 21na ethĩwa ngasyoka mũsyĩ kwa ĩthe wakwa nĩ ũsũvĩonĩ, nĩvo ĩndĩ we Mwĩai Ngai wĩĩthĩwa Ngai wakwa. 22Ĩvia yĩĩ ya ũlilikany'o nenzĩla vaa yĩkeethĩwa vandũ vala wĩthaithĩawa, nakwa ngakũnengae kĩlungu kya ĩkũmi kya syĩndũ syonthe ila wĩnengae.”
Currently Selected:
Mwa 28: KAMBA
Highlight
Share
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011
