Mwa 23

Kĩkw'ũ kya Sala na Kũthikwa kwake

1Sala ekalile thayũ vandũ va myaka ĩana na mĩongo ĩlĩ na mũonza. 2Akw'ĩĩe Eviloni ĩla yĩ nthĩ ya Kanaani. Avalaamu nĩweethĩiwe na kyeva na kĩĩo nũndũ wa kĩkw'ũ kya Sala.

3Avalaamu nĩwaumie vala mwĩĩ wa mũka wake waĩ, na athi kwa Aititi na amea atĩĩ, 4#Aevl 11.9,13; Meko 7.16 “Nyie nĩ mũeni na nĩkalaa katĩ wenyu; nthooesyaĩ vandũ va kũthika mũka wakwa.”

5Namo Aititi mamũsũngĩa mamwĩa atĩĩ, 6“Twĩthukĩĩsye mũnene, ithyĩ tũkwosaa ta mũtongoi wĩ nguma; thika mũka waku mbũanĩ ĩla nzeo vyũ katĩ wa ila twĩ nasyo. Vai ũmwe katĩ waitũ wĩkũvata mbũa yake ũithika mũka waku vo.”

7Avalaamu nĩwakumanie mbee woo, 8na amea atĩĩ, “Ethĩwa nĩmũkwenda nĩthike mũka wakwa vaa, mũkũlyei Eveloni mwana wa Nzoali 9anthooesye ngunga yake ĩla yĩ Makivela ũtee wa kĩtheka kyake. Mũkũlyei anthooesye na thooa ũla wĩanĩe mbũa ĩsu nĩ kana vethĩwe vandũ vakwa va kũthikaa andũ, nenyu mũyĩthĩwa ngũsĩ.”

10Eveloni ekalĩte vamwe na Aititi ala angĩ moombanĩte mũvĩanĩ wa ndũa. Nĩwasũngĩie Avalaamu mbee wa andũ onthe amwĩa atĩĩ, 11“Ĩthukĩĩsye mũnene wakwa; nĩngũũnenga kĩtheka kĩu kyonthe vamwe na ngunga ĩla yĩ nthĩnĩ wakyo. Nĩngũũnenga kĩtheka kĩu nĩ kana ũthike mũka waku, na andũ aa ma nthĩ yakwa mayĩthĩwa ngũsĩ.”

12Avalaamu nĩwakumanie ĩngĩ mbee wa Aititi, 13na andũ onthe methukĩĩsye eea Eveloni atĩĩ, “Mwa nĩngũũkũlya ũmbĩthukĩĩsye. Nĩngũthooa kĩtheka kĩu kyonthe. Ĩtĩkĩla kĩla ngũkũĩva, nakwa nĩngũthika mũka wakwa vo.”

14Eveloni nĩwasũngĩie amwĩa atĩĩ, 15“Ĩthukĩĩsye mũnene wakwa; thooa wa kĩtheka kĩu nĩ ithimo maana ana sya silĩva. Ĩndĩ kĩu ti kĩndũ katĩ waku nakwa. Enda ũthike mũka waku vo.” 16Avalaamu nĩweetĩkĩlanile na Eveloni na amũthimĩa silĩva ũla Eveloni wawetete Aititi mayĩw'a. Amũnengie ithimo maana ana sya silĩva, kwĩanana na kĩthimo kĩla kyatũmĩawa nĩ athoosya ma syĩndũ ma ĩvinda yĩu.

17Ũu nĩw'o kĩtheka kya Eveloni kĩla kyaĩ Makivela, ngalĩko ya wumĩlonĩ wa syũa wa Mamile, ngunga na mĩtĩ yonthe ĩla yaĩ kĩthekanĩ kĩu kyonthe yatw'ĩkie ya 18Avalaamu, na Aititi onthe ala makomanĩte mũvĩanĩ wa ndũa meethĩwa ngũsĩ.

19Ĩtina wa ũu Avalaamu nĩwathikie Sala mũka wake ngunganĩ ĩla yaĩ kĩthekanĩ Makivela vakuvĩ na Mamile, nthĩ ya Kanaani. 20Kwoou Aititi nĩmanengie Avalaamu kĩtheka na ngunga ĩla yaĩ nthĩnĩ wakyo, kĩtw'ĩke kyake athikae andũ vo.

Currently Selected:

Mwa 23: KAMBA

Highlight

Copy