Mwa 20
20
Avalaamu na Avimeleki
1Avalaamu nĩwaumie Mamile athi ngalĩko ya ĩtheo ya Kanaani ĩla yĩtawa Nengevu na atũa katĩ wa Katesi na Suli. Nĩwekalile Ngelali kwa ĩvinda, 2#Mwa 12.13; 26.7 na e vau nĩweeie andũ kana Sala mũka wake nĩ mwĩĩtu-a-inyia. Kwoou Avimeleki mũsumbĩ wa Ngelali nĩwatũmanie Sala aetwe kwake. 3Ĩndĩ ũtukũ ũmwe Ngai nĩwaneenie na Avimeleki ndotonĩ amwĩa atĩĩ, “We ũkilĩlye kũkw'a nũndũ wa mũndũ mũka ũla wosete, nĩkwĩthĩwa Sala nĩ mũka wa Avalaamu.”
4Avimeleki ndaĩ anathengeanĩa na Sala na kwoou asya atĩĩ, “Ame Mwĩai nyie ndi na ĩvĩtyo! Nũũmbũaa nyie na andũ makwa? 5Avalaamu mwene aisye kana Sala nĩ mwĩĩtu-a-inyia, nake Sala mwene asya kana Avalaamu nĩ mwana-a-inyia. Kwoou nyie nĩkĩte ũu nĩna wasya mũseo wa ngoo na ndyĩkĩte ĩvĩtyo.”
6Nĩvo ĩndĩ Ngai wamũsũngĩie ndotonĩ amwĩa atĩĩ, “Ĩĩ, nyie nĩnĩsĩ kana wĩkie ũu na wasya mũseo wa ngoo, na kwoou nĩngũsiĩĩie, ndũkeke naĩ ũmbĩtĩsye. Kĩu nĩkyo kĩtumie nyie ndakũeka ũkiite Sala. 7Yu ĩndĩ tũngĩa Avalaamu kĩveti kyake, nũndũ we nĩ mwathani na kwoou nũkũũvoyea nĩ kana ndũkakw'e. Ĩndĩ walea kũkĩtũnga, manya kana ndwĩlea kũkw'a vamwe na andũ maku.”
8Ũnĩ ũsu Avimeleki nĩwookĩlile kĩoko tene, na eeta anini make onthe na amatavya maũndũ onthe ala Ngai wamũtavĩtye. Andũ asu nĩmakwatiwe nĩ w'ĩa mwingĩ mũno. 9Avimeleki nĩwatũmanie Avalaamu na amũkũlya atĩĩ, “Ũũ nĩ ũndũ mwaũ ũtwĩkĩte? Nyie ngũvĩtĩsye ũndũnĩ mwaũ nĩ kana ũndetee nyie na ũsumbĩ wakwa naĩ ĩnenevete ũũ? Ũmbĩkĩte ũndũ ũtaĩlĩte kwĩkwa mũndũ.” 10O ta ũu Avimeleki nĩwakũlilye Avalaamu atĩĩ, “Ũnaĩ na kĩtumi kyaũ kya kwĩka ũu?”
11Avalaamu amũsũngĩa amwĩa, “Nasũanĩaa kana kũũ andũ maikĩaa Ngai na kwoou nĩmeũmbũaa nĩ kana mose kĩveti kyakwa. 12O vamwe na ũu, kwa w'o Sala nĩtũsyaanĩw'e; twĩ ma ĩthe ũmwe, ĩndĩ tũi ma inyia ũmwe, na nĩnamũtwaie. 13Yĩla Ngai watumie numa mũsyĩ kwa ĩthe wakwa na nambĩĩa kwanganga, nĩneeie Sala atĩĩ, ‘Ethĩwa kwa w'o nũmbendete, kĩla vandũ twathi tavasya andũ kana nĩtũsyaanĩw'e.’ ”
14Nĩvo ĩndĩ Avimeleki woosie mbũi na malondu, ng'ombe na ngombo sya aka na sya aũme anenga Avalaamu, na amũtũngĩa Sala mũka wake. 15Avimeleki nĩweeie Avalaamu atĩĩ, “Sisya nthĩ yakwa yonthe nĩ ĩno; tũa vala ũkwenda!” 16O ta ũu nĩweeie Sala atĩĩ, “Nĩnanenga mwana-a-inyia waku silĩva mbingĩ ta wonany'o kwa onthe ala mwĩ namo kana inyw'ĩ mwĩ alũngalu; kĩla mũndũ nũkũmanya kana vai ĩvĩtyo mwĩkĩte.”
17Nĩvo ĩndĩ Avalaamu wavoyie Ngai, nake Ngai avosya Avimeleki, mũka wake na ngombo syake sya eĩtu nĩ kana methĩwe matonya kũsyaa ĩngĩ, 18nũndũ Mwĩai Ngai nĩwatumĩte kĩla mũndũ mũka wa nyũmba ya Avimeleki aeka kũsyaa, nũndũ wa Sala mũka wa Avalaamu.
Currently Selected:
Mwa 20: KAMBA
Highlight
Share
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011
