Mwa 14
14
Avalamu Aitangĩĩa Loto
1Vaĩ asumbĩ ana ala masyĩtwa moo nĩ Amũlaveli mũsumbĩ wa Sinali, Alioko mũsumbĩ wa Elasali, Ketololaomeli mũsumbĩ wa Elamu, na Titali mũsumbĩ wa Ngoiimu. 2Nĩmaendie kũkita na asumbĩ angĩ atano ala masyĩtwa moo nĩ Vela mũsumbĩ wa Sondomu, Mbilisa mũsumbĩ wa Ngomola, Sinavu mũsumbĩ wa Atima, Semeveli mũsumbĩ wa Nzevoiimu, na mũsumbĩ wa Mbela (kana Nzoali). 3Asumbĩ asu me atano nĩmaseũvisye ngwatanĩo me Mwandanĩ wa Sitimu, ũla nĩw'o Ũkanga Mũkw'ũ#14.3 Ũkanga Mũkw'ũ: Kana Ũkanga wa Mũnyũ na makwatany'a asikalĩ moo. 4Vandũ va myaka ĩkũmi na ĩlĩ mathũkũmaa me ungu wa mũsumbĩ Ketololaomeli, ĩndĩ mwakanĩ wa ĩkũmi na itatũ nĩmaleanile nake. 5Mwakanĩ wa ĩkũmi na inya Mũsumbĩ Ketololaomeli na asumbĩ ala maĩ vamwe nake nĩmasindie Alevai me Asetelothi-kalinaimu, Asusi me Amu, na Aemi me ũiĩnĩ wa Kiliathaimu. 6O ta ũu nĩmasindie Aoli me kĩĩmanĩ kyoo kya Seili, na mamaatĩĩa kũvĩka Eli-valani vakuvĩ na weũ. 7Nĩmavĩndũkie masyoka Eni-misivati (ĩla nĩyo Katesi) na masinda nthĩ yonthe ya Aamaleki, na Aamoli ala matwĩe Asasoni-tamali. 8Nĩvo ĩndĩ asumbĩ ma Sondomu, Ngomola, Atima, Nzevoiimu na Mbela (ĩla nĩyo Nzoali), moombanisye asikalĩ moo Mwandanĩ wa Sitimu 9nĩ kana mokite na asumbĩ ma Elamu, Ngoiimu, Mbavilonĩ, Elasali; asumbĩ atano mayũkita me ngalĩko ĩmwe na asumbĩ ana me ngalĩko ĩla ĩngĩ. 10Mwanda wa Sitimu wausũĩte maima ma lami, na yĩla asumbĩ ma Sondomu na Ngomola masembie makĩĩte kaũ nĩmalikile maimanĩ asu, ĩndĩ asumbĩ ala angĩ atatũ nĩmakĩie maelete iĩmanĩ. 11Asumbĩ ana ala mokitaa namo nĩmakuie ũthwii w'onthe wa Sondomu na Ngomola vamwe na lĩu woo na mathi. 12O ta ũu nĩmoosie Loto, mwana wa mwana-a-inyia wa Avalamu ũla watwĩe Sondomu, vamwe na ũthwii wake na mathi.
13Mũndũ ũmwe nĩwavonokie na athi atavya Avalamu ũla waĩ Mũevelania watwĩe vakuvĩ na mĩtĩ mĩtheu ya mũndũ weetawa Mamile waĩ Mũamoli. Mamile na ana-a-inyia make Esikoli na Aneli maĩ na wĩw'ano na Avalamu. 14Yĩla Avalamu weewie kana mũndũ wa mũsyĩ wake nũtaviwe, nĩwoosie andũ maana atatũ na ĩkũmi na nyanya. Andũ asu maĩ amanyĩsye kũkita na mekalanasya na Avalamu. Nĩmaatĩĩie ala asumbĩ ana nginya Ndani. 15Me vau Avalamu nĩwaaanisye andũ asu make ikundi, na mavithũkĩa amaitha moo ũtukũ mamasinda. Nĩmamaatĩĩie kũvika Ova ĩla yĩ ngalĩko ya ĩũlũ ya Ndamasikũ. 16Avalamu nĩwatũngie ũthwii w'onthe ũla makuĩte na o ta ũu atũnga Loto, mwana wa mwana-a-ĩthe, vamwe na ũthwii wake na aka na andũ ala angĩ matavĩtwe.
Melikisendeki Aiathima Avalamu
17Yĩla Avalamu wasyokie ĩtina wa kũmũsinda mũsumbĩ Ketololaomeli na asumbĩ ala angĩ maĩ vamwe nake, mũsumbĩ wa Sondomu nĩwamũthaũĩie Mwandanĩ wa Save (ũla nĩ Mwanda wa Mũsumbĩ). 18#Aevl 7.1-10 Nĩvo ĩndĩ Melikisendeki mũsumbĩ wa Salemu waetie mũkate na ndivai. Melikisendeki aĩ mũthembi wa Ngai Ũla wĩ Ĩũlũ Mũno. 19Nĩwaathimie Avalamu na asya atĩĩ,
“Ngai Ũla wĩ Ĩũlũ Mũno,
ũla woombie ĩtu na nthĩ nĩakũathime we Avalamu.
20Nĩataĩwe Ngai Ũla wĩ Ĩũlũ Mũno,
ũla ũtumie ũsinda amaitha maku!”
Avalamu nĩwamũnengie Melikisendeki kĩlungu kya ĩkũmi kya syĩndũ syonthe ila watũngie.
21Mũsumbĩ wa Sondomu nĩweeie Avalamu atĩĩ, “Ndũngĩe andũ makwa na ũimesya i syĩndũ.”
22Nake Avalamu eea mũsumbĩ atĩĩ, “Nĩngwĩvĩta mbee wa Mwĩai Ngai, Ngai Ũla wĩ Ĩũlũ Mũno, Mũmbi wa ĩtu na nthĩ, 23kana ndiosa nĩmesye kĩndũ o na kĩmwe kyaku, o na ndiosa ũlii kana mũkwa wa kĩatũ, nĩ kana ndũkaaĩse kwasya, ‘Ninyie natumie Avalamu ethĩwa e mũthwii.’ 24Ndiosa kĩndũ o na kĩmwe ateo kĩla andũ makwa matũmĩie, ĩndĩ andũ ala nĩnaendanisye namo kaũnĩ ala nĩ Aneli, Esikoli, Mamile, nĩmose kĩlungu kĩla kyoo.”
Currently Selected:
Mwa 14: KAMBA
Highlight
Share
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011
