Mat 7
7
Kũsilĩla Andũ ala Angĩ
(Lk 6.37-38,41-42)
1“Mũikasilĩle andũ ala angĩ, nĩ kana o nenyu mũikasilĩlwe nĩ Ngai. 2#Mk 4.24 O ũndũ mũsilĩlaa andũ ala angĩ, now'o o nenyu mwĩsilĩlwa nĩ Ngai, na akamwĩka o ũndũ mwĩkaa andũ ala angĩ. 3Nĩkĩ ũkwona kaũvavathĩ ke ithonĩ ya mũnyanyau na ndũkwona kĩting'ĩ kĩla kĩ ithonĩ yaku? 4Ũtonya ata kwĩa mũnyanyau atĩĩ, ‘Eka ngumye kaũvavathĩ kau ke ithonĩ yaku,’ o yĩla ve kĩting'ĩ kĩ ithonĩ kwaku? 5We mũndũ wa mĩseũvyo! Amba kumya kĩting'ĩ kĩu kĩ ithonĩ yaku, na ĩndĩ nũkwĩthĩwa ũtonya kwona nesa na kumya kaũvavathĩ ithonĩ ya mũnyanyau.
6“Mũikanenge ngitĩ syĩndũ sya Ngai, nũndũ ikeeka o kũmũvĩndũka imũũmange. O ta ũu, mũikekĩsye ngũlũe masoa menyu ma thooa mũnene nũndũ syĩĩka o kũmakinyangĩa nthĩ.
Kũvoya Ngai Kĩla Tũkwenda
(Lk 11.9-13)
7“Ĩtyai Ngai kĩla mũkwenda na akamũnenga; manthai na mũkakwata; vingũsyai kwake, na mũkavingũĩwa. 8Nũndũ mũndũ ũla wĩtasya Ngai kĩndũ o na kĩva nũnengawe; ũla ũmanthaa, nũkwataa; ũla ũvingũasya kwake, nũvingũĩawa. 9Nũũ katĩ wenyu ũtonya kũnenga mwana wake ĩvia amwĩtya mũkate? 10Kana akamũnenga nzoka amwĩtya ĩkũyũ? 11Ethĩwa inyw'ĩ ĩndĩ mũthũkĩte ũndũ mũthũkĩte nĩmwĩsĩ kũnenga syana syenyu syĩndũ nzeo, Ĩthe wenyu ũla wĩ ĩtunĩ akamanenga syĩndũ nzeo mũno mbeange ata andũ ala mamwĩtasya!
12 #
Lk 6.31
“Kwoou ĩkaai andũ ala angĩ o ũndũ mwenda mo mamwĩkae, nũndũ ũu nĩw'o Mĩao ya Mwose na momanyĩsyo ma athani mekwasya.
Kũlikĩla Kamũlomonĩ kala Katheke
(Lk 13.24)
13“Likĩlai kamũlomonĩ kala katheke, nũndũ mũomo wa kũlika wanangĩkonĩ nĩ mũthanthau, na nzĩa ĩla ĩendete vo yĩ laisi kwĩsĩla. Andũ aingĩ nĩmesĩlaa nzĩanĩ ĩsu. 14Ĩndĩ kamũlomo ka kũlika thayũnĩ ũtathela nĩ katheke, na kasĩla kala kaendete vo ke vinya kũatĩĩkĩka. No andũ anini makonaa.
Mũtĩ Ũmanyĩkaa nĩ Ũsyao wa W'o
(Lk 6.43-44)
15“Ĩsũvĩanei na athani ma ũvũngũ! Mokaa kũla mũĩ mevw'ĩkĩte ũa wa ĩlondu, ĩndĩ nthĩnĩ nĩ nzũi mbai. 16Mũkamamanya kwĩsĩla mekonĩ moo. Nzavivũ syaatuwa kĩthiianĩ, kana makũyũ makatuwa kĩkondunĩ? 17Mũtĩ mũseo wĩthĩawa na ũsyao mũseo, ĩndĩ mũtĩ mũthũku wĩthĩawa na ũsyao mũthũku. 18Mũtĩ mũseo ndũtonya kwĩthĩwa na ũsyao mũthũku, o tondũ naw'o mũtĩ mũthũku ũtatonya kwĩthĩwa na ũsyao mũseo. 19#Mat 3.10; Lk 3.9 Mũtĩ ũla ũtasyaa ũsyao mũseo nũtemawa na kwĩkw'a mwakinĩ. 20#Mat 12.33 Kwoou mũkamanyaa athani ma ũvũngũ kwĩsĩla mekonĩ moo.
Andũ ala Makalika Ũsumbĩnĩ wa Ĩtu
(Lk 13.25-27)
21“Ti kĩla mũndũ ũmbĩtaa, ‘Mwĩai, Mwĩai,’ ũkalika ũsumbĩnĩ wa ĩtu, ĩndĩ no ũla wĩkaa kwenda kwa Ĩthe wakwa ũla wĩ ĩtunĩ. 22Mũthenyanĩ wa Ũsilĩlo andũ aingĩ nĩmakambĩa atĩĩ, ‘Mwĩai, Mwĩai, ithyĩ tũnatavanasya ũvoo wa Ngai ĩsyĩtwanĩ yaku; o na nĩtũnalũngasya maimũ na kwĩka syama mbingĩ tũitũmĩa ĩsyĩtwa yaku.’ 23#Sav 6.9 Ĩndĩ nakwa ngamea atĩĩ, ‘Nyie ndimwĩsĩ! Umai vaa nĩĩ inyw'ĩ andũ aa mwĩkaa maũndũ mathũku!’
Andũ Elĩ Maakĩte Nyũmba Syoo Kũndũ kwĩ Kĩvathũkany'o
(Lk 6.47-49)
24“Kwoou ĩndĩ, mũndũ ũla wĩthukĩĩasya momanyĩsyo aa makwa na kwĩka ũndũ mekwasya, avw'ana mũndũ ũmwe waĩ mũĩ ũla waakie nyũmba yake ĩvianĩ. 25Mbua mbingĩ nĩyauie, mbũsĩ syausũa kũvikĩa kĩw'ũ kyakĩla, na iseve syauutana syakũna ĩla nyũmba. Ĩndĩ nyũmba ĩsu ndyaavalũka, nũndũ yaakĩtwe ĩvianĩ.
26“Nake mũndũ ũla wĩthukĩĩasya momanyĩsyo aa makwa na ailea kwĩka ũndũ mekwasya, avw'ana mũndũ ũmwe waĩ mũtumanu ũla waakie nyũmba yake kĩthangathĩnĩ. 27Mbua mbingĩ nĩyauie, mbũsĩ syausũa kũvikĩa kĩw'ũ kyakĩla, na iseve syauutana syakũna ĩla nyũmba yavalũka. Nyũmba ĩsu nĩyavalũkile na kĩlitũko kĩnene!”
28 #
Mk 1.22; Lk 4.32 Yesũ amina kũmanyĩsya maũndũ asu onthe, andũ onthe ala maĩ vau nĩmaseng'iw'e mũno nĩ ũndũ ũkũmanyĩasya. 29We amanyĩasya na ũkũmũ, na ti ũndũ amanyĩsya ma Mĩao mamanyĩasya.
Currently Selected:
Mat 7: KAMBA
Highlight
Share
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011
