YOANA 6
6
Kũvũnĩthw’a kwa andũ ngili itano
(MATHAYO 14.13–21; MALIKO 6.30–44; Luka 9.10–17)
1Ĩtina wa maũndũ asu Yesũ athi mũingo ũla ũngĩ wa ũkanga wa Kalilii, naw’o nĩ ũkanga wa Tivelia. 2Na avikĩlwa nĩ andũ nguthu nene, nũndũ nĩmoonie syama ila wekaa ala maĩ awau. 3Na Yesũ ambata kĩĩmanĩ, na ekala vo na amanyĩw’a make. 4#Yoa 2.13; 11.55; Lk 22.1.Na vasaka, ĩla mboka ya Ayuti, yaĩ vakuvĩ. 5Na ĩndĩ Yesũ ookĩlya metho make, oona nguthu nene ĩkyũka vala ũĩ, amwĩa Vilivu, Twĩthooa imũtũ va, kana aa maye? 6Aneenaa ũu aimũtata: nũndũ we mwene nĩwesĩ ũndũ ũkilĩlye kwĩka. 7Vilivu amũsũngĩa, Imũtũ sya silingi maana elĩ itimeanĩa, o na ethĩwa kĩla mũndũ akosa Kanini. 8Ũmwe wa amanyĩw’a make, Andalea, mwana‐a‐inyia wa Simoni Vetelo, amwĩa, 9#2 Asu 4.42,43.Vaa ve kavĩsĩ, ke na imũtũ itano sya mbaale na makũyũ elĩ: ĩndĩ isu nĩ syĩndũ myaũ vala ve andũ meanou? 10Yesũ asya, Ĩkalyai andũ nthĩ. Na vaĩ nyeki mbingĩ vala maĩ. Na ĩndĩ aũme mekala nthĩ, ũtalo woo waĩ ta ngili itano. 11Na ĩndĩ Yesũ oosa ila imũtũ; na atũnga mũvea, amaaĩa andũ ala mailyĩ nthĩ; na makũyũ o ta ũu o ũndũ mendie. 12Na mavũna, amea amanyĩw’a make, Ũmban’yai motialo ma ilungu ila ndile, vatikae kindũ. 13Na kwondũ wa ũu moomban’ya, na mausũsya ikavũ ĩkũmi na ilĩ na ilungu ila ndile sya imũtũ itano sya mbaale, ila syamatialĩle ala maĩe. 14#Kũt 18.15.Na ĩndĩ andũ moona kyama kyu Yesũ weka, masya, Nĩ w’o, ũũ nĩ mwathani ũla wũkĩte kũũ nthĩ.
Yesũ ayĩveta ethĩwe e weka, na kũkinyĩla ũkanganĩ ĩũlũ
(MATHAYO 14.22–33; MALIKO 6.45–52)
15 #
Yoa 18.36. Na ĩndĩ Yesũ amanya kana makilyĩ kũka mamũtwae na vinya, makamũtw’ĩkĩthye mũsumbĩ, eeveta aenda ĩngĩ kĩĩmanĩ e weka.
16Ĩndĩ kwavika wĩoo. Amanyĩw’a make matheea ũkanganĩ; 17na malika ngalawanĩ, mainganĩsye ũkanga mathi Kavelinaumi. Na kwaĩ kũnatuka, na Yesũ ndaĩ anamba ũvika vala maĩ. 18Na ũkanga waĩ ũkyũkilangw’a nũndũ wa kĩseve kĩnene kĩiuutana. 19Na maĩ manatwaa ngalawa maĩli atatũ kana ana, moona Yesũ akinyĩle ũkanganĩ ĩũlũ, akĩthengeea ngalawanĩ: na makwatwa nĩ w’ĩa mũnene. 20Nake amea, Ninyie; mũikakĩe. 21Na kwa ũu meetĩkĩla alike ngalawanĩ: na ĩvinda yĩu ngalawa yavika nthĩ ĩla maendaa.
Kĩmũtũ kya Thayũ
22Na ũnĩ ũsu ĩkomano yĩũngamĩte mũingo ũla ũngĩ wa ũkanga yoonie kana kũi kakalawa kangĩ, ate o kamwe, na Yesũ ndaneelika na amanyĩw’a make ngalawanĩ, ĩndĩ amanyĩw’a manalikile me oka 23(ĩndĩ kwookie tũkalawa tũngĩ tũmĩte Tivelia vakuvĩ na vala manaĩĩe imũtũ ĩtina wa Mwĩaĩi atũnga mũvea#Yoa 6.11.): 24na ĩndĩ andũ ma ĩkomano moona kana Yesũ nde vo, o na amanyĩw’a make, namo malika tũkalawanĩ, na mathi Kavelinaumi makĩmũmantha Yesũ. 25Na mamwona e mũingo ũngĩ wa ũkanga, mamwĩa, Lavai, wũkie vaa ĩndĩĩ? 26Yesũ amasũngĩa, amea, Nĩ w’o, nĩ w’o, ningũmũtavya, Mũiũmantha nũndũ mũnoonie syama, ĩndĩ nũndũ mũnaĩe imũtũ, mũnavũna. 27#Yoa 4.14; 5.36; Mt 16.12.Mũikathũkũmĩae lĩu ũla wanangĩkaa, ĩndĩ lĩu ũla wĩkalaa kũvika thayũ ũtathela, ũla Mwana wa mũndũ wĩmũnenga: nũndũ we ekĩĩtwe ũsiĩlo nĩ Ngai Asa. 28Na kwondũ wa ũu mamwĩa, Twĩĩka ata ĩndĩ, kana twĩkae mawĩa ma Ngai? 29#1 Yoa 3.23.Yesũ amasũngĩa, amea, Ũũ nĩw’o wĩa wa Ngai, mũmwĩtĩkĩle ũla watũmiwe nĩwe. 30#Yoa 2.18; Mko 8.11.Na ĩndĩ mamwĩa, Wĩĩka kyama kĩva, nĩ kana twone, tũkwĩtĩkĩle? Wĩĩka ũndũ mwaũ? 31#Kuma 16.13,14; Sav 78.24.Aasa maitũ nĩmaĩe lĩu wĩtawa mana weũnĩ; o ũndũ kũandĩkĩtwe, Amanengie imũtũ syumĩte ĩtunĩ maye. 32#Yoa 6.49.Yesũ amea, Nĩ w’o, nĩ w’o, nĩngũmwĩa, Ti Mose wamũnengie imũtũ syumĩte ĩtunĩ; ĩndĩ Asa wakwa nĩwe ũmũnengae kĩmũtũ kĩla kya w’o kyumĩte ĩtunĩ. 33#Yoa 6.51.Nũndũ kĩmũtũ kya Ngai nĩ kĩla kĩtheeaa kuma ĩtunĩ, na kĩnengae nthĩ thayũ. 34Na ĩndĩ mamwĩa, Mwĩaĩi, mavinda onthe tũnengae kĩmũtũ kyu. 35#Yoa 4.14; 6.48; 7.37.Yesũ amea, Nyie, ninyie kĩmũtũ kya thayũ: ũla wũkaa kwakwa ndakew’a nzaa, na ũla ũmbĩtĩkĩlaa ndakew’a waũni o na ĩndĩĩ. 36#Yoa 6.26,29.Ĩndĩ namwĩa, nĩmũmbonete na mũtiĩtĩkĩla. 37#Yoa 17.6–8; Mt 11.28.Kyonthe kĩla Asa ũnengae nĩkyũkaa kwakwa; na ũla wũkaa kwakwa ndikamwĩkya nza nongi. 38#Yoa 4.34; Mt 26.39.Nũndũ ndyaatheea kuma ĩtunĩ nĩke kwenda kwakwa, ĩndĩ no kwenda kwa ũla wandũmie. 39#Yoa 10.28,29; 17.12.Na kũũ nĩkw’o kwenda kwa ũla wandũmie, nĩ kana kyonthe kĩla wanengie ndikaasye kĩndũ o na kĩmwe, ĩndĩ ngakĩthayũũkya mũthenya wa mũmĩnũkĩlyo. 40#Yoa 5.29; 11.24.Nũndũ kũũ nĩkw’o kwenda kwa Asa wakwa, kana kĩla mũndũ ũmũsiasya Mwana, na ũmwĩtĩkĩlaa, ethĩwe na thayũ ũtathela; nakwa ngamũthayũũkya mũthenya wa mũminũkĩlyo.
41Kwondũ wa ũu Ayuti mamũnyungunyĩĩsya, nũndũ aisye, Nyie, ninyie kĩmũtũ kĩla kyatheeie kuma ĩtunĩ. 42#Lk 4.22.Namo masya, Ũũ ti Yesũ, mwana wa Yosevu, na ĩthe na nyinyia tũimesĩ? Easya ata yu, Nĩnatheeie kuma ĩtunĩ? 43Yesũ amasũngĩa, amea, Ekai ũnyungunyĩsya katĩ wenyu. 44#Yoa 6.65.Vai mũndũ ũtonya kũka kwakwa, ateũkusw’a nĩ Asa ũla wandũmie: nakwa ngamũthayũũkya mũthenya wa mũminũkĩlyo. 45#Isa 54.13; Yel 31.33,34.Nĩkũandĩkĩtwe maandĩkonĩ ma athani, Namo onthe makamanyĩw’a nĩ Ngai. Kĩla mũndũ wewie kuma kwa Asa, na akemanyĩsya, ũsu okaa kwakwa. 46#Yoa 1.18.Ti atĩ ve mũndũ waamwona Asa, ate o ũla waumie kwa Ngai, nĩwe wamwonie Asa. 47#Yoa 3.16.Nĩ w’o, nĩ w’o, nĩngũmwĩa, Ũla wĩtĩkĩlaa e na thayũ ũtathela. 48#Yoa 6.35.Nyie, ninyie kĩmũtũ kya thayũ. 49#Yoa 6.31,32; 1 Ako 10.3,5.Aaĩthe menyu mĩmaĩe lĩu ũla wĩtawa mana me weũnĩ, na makw’a. 50Kĩĩ nĩkyo kĩmũtũ kĩla kĩtheeete kuma ĩtunĩ, kya mũndũ kũya, na ndakw’a. 51#Aevl 10.5,10.Nyie, ninyie kĩmũtũ kĩ thayũ kĩla kyatheeie kuma ĩtunĩ: ethĩwa mũndũ o na wĩva nũnũũya kĩmũtũ kyu, akeethĩwa na thayũ tene na tene: ĩĩ, na kĩmũtũ kĩla nganengane nĩ nyama ya mwĩĩ wakwa, kwondũ wa thayũ wa nthĩ.
52 #
Yoa 6.60. Na ĩndĩ Ayuti makananĩa ene kwa ene, makyasya, Mũndũ ũũ atonya ata kũtũnenga nyama ya mwĩĩ wake tũkaya? 53Nĩvo ĩndĩ Yesũ wameie, Nĩ w’o, nĩ w’o, nĩngũmwĩa, Mũteũya nyama ya mwĩĩ wa Mwana wa mũndũ na kũmĩnyw’a nthakame yake, mũi na thayũ nthĩnĩ wenyu. 54Ũla ũnũũya nyama yakwa na kũnyw’a nthakame yakwa e na thayũ ũtathela; nakwa ngamũthayũũkya mũthenya wa mũminũkĩlyo. 55Nũndũ nyama ya mwĩĩ wakwa nĩ lĩu wa w’o, na nthakame yakwa nĩ kya ũnyw’a kya w’o. 56#Yoa 15.4; 1 Yoa 2.24; 3.24.Ũla ũnũũya nyama ya mwĩĩ wakwa na kũnyw’a nthakame yakwa, ũsũ ekalaa nthĩnĩ wakwa, nakwa nthĩnĩ wake. 57O tondũ Asa ũla wĩ thayũ wandũmie, na nikalaa thayũ kwondũ wa Asa; o ta ũu ũla ũnũũndya akekalaa thayũ kwondũ wakwa. 58Kĩĩ nĩkyo kĩmũtũ kĩla kyatheeie kuma ĩtunĩ: ti tondũ aaĩthe menyu maĩe, na makw’a; ũla ũnũũya kĩmũtũ kĩĩ akekala thayũ tene na tene. 59Ndeto ii aneenee ĩsinakokenĩ, akĩmanyĩsya Kavelinaumi.
Amanyĩw’a me na nzika
60Na ĩndĩ aingĩ ma amanyĩw’a make meew’a ũu, masya, Ndeto ĩno nĩ nyũmũ; ũla ũtonya ũmĩw’a nũũ? 61Ĩndĩ Yesũ amanya nthĩnĩ wake kana amanyĩw’a make nĩmeũnyungunyĩsya kwondũ wayo, amakũlya, Ndeto ĩno nĩnĩũmũlulutĩkya? 62#Yoa 3.13.Nata ĩndĩ ethĩwa mũkoona Mwana wa mũndũ akyambata kũla waĩ mbee? 63#2 Ako 3.6.Na veva ũla ũnengae thayũ; mwĩĩ ndũtandĩthya kĩndũ: ndeto ila nĩneenete nenyu nĩsyo veva, na nĩsyo thayũ. 64#Yoa 13.11.Ĩndĩ katĩ wenyu kwĩ amwe matekwĩtĩkĩla, Nũndũ kuma mwambĩlĩlyonĩ Yesũ nĩwesĩ ala matekwĩtĩkĩla, na ũla ũkamũvũnyanĩa. 65#Yoa 6.44.Na amea, Kwondũ wa ũu namwĩa, kana kũi mũndũ ũtonya kũka kwakwa, atanengetwe nĩ Asa.
Ũkũsĩ wa Vetelo ũndũ wa Yesũ
66Kwondũ wa ũu amanyĩw’a make aingĩ masyoka na ĩtina, na matyaathi nake ĩngĩ. 67Na ĩndĩ Yesũ amakũlya aia ikũmi na elĩ, Nenyu nĩmũkwenda ũthi? 68#Yoa 6.63.Simoni Vetelo amũsũngĩa, Mwĩaĩi, tũende kwaũ? Nue wĩ na ndeto sya thayũ ũtathela. 69#Yoa 1.49; 11.27; Mt 14.33; 16.16.Naitũ nĩtwĩtĩkĩlĩte na nĩtwisĩ kana wĩ Ũla Mũtheu wa Ngai. 70Yesũ amasũngia, Ndyaamũnyuva inyw’ĩ ĩkũmi na elĩ, na ũmwe wenyu nĩ wa Satani? 71Amũwetaa Yutasi, mwana wa Simoni Isikalioti, nũndũ nĩwe ũkamũvũnyanĩa, nake aĩ ũmwe wa ala ĩkũmi na elĩ.
Currently Selected:
YOANA 6: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
