YOANA 21
21
Yesũ akĩyonan’ya ũtee wa Ũkanga wa Tivelia
1Ĩtina wa maũndũ aa Yesũ eeyonan’ya ĩngĩ kwa amanyĩw’a make ũtee wa ũkanga wa Tivelia; na kwĩyonan’ya kwake kwailyĩ ũũ. 2#Yoa 1.45.Simoni Vetelo, na Thoma ũla wetawa Ĩvatha, na Nathanaeli wa ndũa yĩtawa Kena ya Kalilii, na ala ana ma Sevetii, na angĩ elĩ ma amanyĩw’a make maĩ vamwe. 3Simoni Vetelo amea, Nĩngũthi kũtea makũyũ. Namo mamwĩa, O naitũ nĩtũũthi naku. Na maumaala mathi malika ngalawanĩ; na ũtukũ ũsu maiaakwatya kĩndũ. 4#Yoa 20.14; Lk 24.16.Na kũikya. Yesũ aũngama ũtee wa ũkanga: ĩndĩ amanyĩw’a maieesĩ kana nĩ Yesũ. 5#Lk 24.41.Na ĩndĩ Yesũ amea, Syana, mwĩ na kya ũya? Mamũsũngĩa, Aiee. 6#Lk 5.4–7.Na amea, Ĩkyai kĩtei ngalĩ ya kw’oko aũme kwa ngalawa, na nĩmũkwona. Na ĩndĩ mekya, na yu maemwa nĩ ũkusya nũndũ wa makũyũ kwingĩva. 7#Yoa 13.23.Na ĩndĩ mũmanyĩw’a ũla wendetwe nĩ Yesũ amwĩa Vetelo, Nĩ Mwĩaĩi. Na Simoni Vetelo eew’a kana nĩ Mwĩaĩi, oosa ngũa yake eevotoa (nũndũ aĩ mũthei), na eeyĩkya ũkanganĩ. 8Ĩndĩ amanyĩw’a ala angĩ mookie na kakalawa kala kanini (nũndũ maiaĩ kũasa na ũtee, no vandũ va mĩkono maana elĩ), makĩkusya kĩtei kyusũĩte makũyũ. 9Na maumĩla nthĩ, moona mwaki wa makaa vo, na ĩkũyũ yiĩtwe ĩũlũ, na kĩmũtũ. 10Yesũ amea, Etei makũyũ amwe ma ala mwakwatya oyu. 11Na ĩndĩ Simoni Vetelo alika ngalawanĩ, na akusya kĩtei ũtee, nakyo kyausũĩte makũyũ manene, ĩana yĩnwe na mĩongo ĩtano na atatũ: o na makũyũ maingĩvĩte ũu, kĩtei kĩtyaatembũka. 12Yesũ amea, Ũkai mwĩtw’a ĩta. Na vai ũmwe wa amanyĩw’a waatata kũmũkũlya, We, nue ũũ? Nũndũ nĩmeesĩ kana nĩ Mwĩaĩi. 13#Yoa 6.11.Yesũ athi, na oosa kĩmũtũ, na amanenga, na makũyũ ta ũu. 14#Yoa 20.19,26.Na ĩvinda yĩu nĩ ya katatũ Yesũ akĩyonan’ya kwa amanyĩw’a make, ĩtina wa athayũũka kuma kwa akw’ũ.
Ndeto sya mũminũkĩlyo kwĩ Vetelo
15 #
Yoa 1.42. Na ĩndĩ meetw’a ĩta, Yesũ amũkũlya Simoni Vetelo, Simoni, mwana wa Yona, nũmbendete mbee wa aa? Amũsũngĩa, Ĩĩ, Mwĩaĩi; we nĩwĩsĩ kana nĩngwendete. Amwĩa, Ĩthya tũlondu twakwa. 16#1 Vet 5.2,4.Na amũkũlya ĩngĩ ya kelĩ, Simoni, mwana wa Yona, nũmbendete? Amwĩa, Ĩĩ, Mwĩaĩi; we nĩwĩsĩ kana nĩngwendete. Amwĩa, Ĩthya malondu makwa. 17#Yoa 13.38; 16.30.Na amũkũlya ĩngĩ ya katatũ, Simoni, mwana wa Yona, nũmbendete? Na Vetelo amaka nũndũ wamũkũlya katatũ, Nũmbendete? Na amwĩa, Mwĩaĩi, nĩwĩsĩ maũndũ onthe; nĩwĩsĩ kana nĩngwendete. Yesũ amwĩa, Ĩthya malondu makwa. 18#Mt 16.22; 26.39.Nĩ w’o, nĩ w’o, nĩngũkwĩa, Yĩla waĩ mwanake, weevotoaa, ũkathi kũla ũkwenda: ĩndĩ yĩla wĩtumĩa, ũkatambũũkya moko maku, na ũngĩ akakũvotoa, na kũkũtwaa kũla ũtekwenda. 19#Yoa 13.36.Na aneenie ũu, akyonan’ya kĩkw’ũ kĩla ũkamũtaĩa Ngai nakyo. Na amina ũneena ũu, amwĩa, Mbikĩla. 20#Yoa 13.23.Na Vetelo, eethyũũa, amwona ũla mũmanyĩw’a wendetwe nĩ Yesũ aimaatĩĩa; nake nĩwe ũla wamwaĩĩe Yesũ kĩthũinĩ makĩya lĩu wa wĩoo, aimũkũlya, Mwĩaĩi, nũũ ũsu wĩkũvũnyanĩa? 21Na ĩndĩ Vetelo amwona ũsu amũkũlya Yesũ, Mwĩaĩi, mũndũ ũũ nake, akeka ata? 22Yesũ amwĩa, Ethĩwa nĩngwenda ekale mũvaka yĩ ngoka, wĩ ũndũ wa kĩ? We mbikĩla. 23Na ĩndĩ ndeto ĩno yanyaĩĩka katĩ wa ana‐a‐ithe, kana mũmanyĩw’a ũsu ndakakw’a: o na tiw’o Yesũ waisye kana ndakakw’a; ĩndĩ, Ethĩwa ngenda ekale mũvaka yĩ ngoka, wĩ ũndũ wa kĩ?
Ndeto sya kũminĩa
24 #
Yoa 15.27. Ũũ nĩwe mũmanyĩw’a ũla ũkũsĩĩaa maũndũ aa, na nĩwe ũandĩkĩte maũndũ aa: na ũkũsĩ wake nĩtwĩsĩ ni wa w’o.
25 #
Yoa 20.30. Na kwĩ maũndũ angĩ maingĩ ala Yesũ wekie, nao makaandĩkwa, ũmwe na ũmwe, nĩasya nthĩ nima ndĩanĩa mavuku ala maandĩkwa.
Currently Selected:
YOANA 21: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
