MARIKO 15

Yeso ase obosio bwa Pilato, gavuna o Rumi

(Mat 27:1–2,11–26; Luk 23:1–5,13–25; Yoh 18:26—19:16)

1Erio kobwachia gokia mambia, abakuani abanene bagakora ekina amo nabagaaka na aborokia b’amariko, na ekegambero ekegima. Bagasiba Yeso, bakamoira, bakamomoa Pilato. 2Pilato akamoboria, “Aye naye Omoruoti bw’Abayahudi?” Akamoiraneria, “Naboigo, aye gwatebire.” 3Abakuani abanene bakamosoera ase amang’ana amange. 4Pilato akamoboria naende, akabora, “Tokoiraneria ing’ana? Rora amang’ana aya amange bagosoeire.” 5Korende Yeso tairaneria ing’ana rinde naende, goika Pilato agakumia.

6Nabo ase rituko rinene nigo anarete kobasiborera omosibwa oyomo, oyobarigetie. 7Narengeo omonto ore korokwa Baraba, osibetwe amo nabanto abakorete eriomana, na gokora oboiti ase eriomana. 8Omoganda ogotiira gochiao, na barabwo bagachaka gosaba Pilato abakorere buna anarete kobakorera. 9Pilato akababoria, “Morigetie mbasiborere Omoruoti bw’Abayahudi?” 10Ekiagera amanyete ng’a abakuani abanene nigo bamorure ase obogechi. 11Abakuani abanene bakagenka abanto b’omoganda, erinde anche kobasiborera Baraba. 12Pilato akairaneria naende, akabatebia, “Imokore naki oyo mogoteba ng’a n’Omoruoti bw’Abayahudi?” 13Bagaaka eriogi naende, “Mobambe!” 14Pilato akababoria, “Nase ki? Mbobe ki akorete?” Bakamenta mono goaka eriogi, “Mobambe!” 15Pilato agancha gokora ayaragwenere omoganda, akabasiborera Baraba, na ekero aakire Yeso chinkini, akamorua abambwe.

Abarwani bagachecheria Yeso

(Mat 27:27–31; Yoh 19:2–3)

16Abarwani bakamoira ime ase enyomba y’ekegambero (nero Praitorio), bagasangererekana amo ekeombe ekegima. 17Bakamoboyia eanga emonyinga, bagatwang’a egutwa y’amagwa, bakamobekera motwe, 18bagachaka komokwania, “Masoge, Omoruoti bw’Abayahudi!” 19Bakamoaka omotwe negetonto, bakamotwera amate, bakabeka amaru inse, bakamosasima. 20Kobamochecheirie, bakamorusia eanga eria emonyinga, bakamoboyia chianga chiaye omonyene. Bakamoira isiko komobamba.

Okobambwa kwa Yesu

(Mat 27:32–44; Luk 23:26–43; Yoh 19:17–27)

21Bakabetereria omonto orenge goeta, Simion Omokurene, ore korwa borabu, ise Aleksanderi na Rufo, abogorie omosalaba o Yeso. 22Bakamoira aase akorokwa Gologotha (engencho yaye: Aase Ekeore). 23Bakamoa edivai yochoganirie na manemane anywe, ko tancha konywa. 24Bakamobamba, bagaatanana chianga chiaye, bagachiakera obomera eye kera omonto araire. 25Nigo chiare chinsa isato ekero bamobambete. 26Na amariko ’ogosoerwa kwaye nigo arikire igoro, “OMORUOTI BW’ABAYAHUDI.” 27Amo nere bakabamba abauri babere, oyomo ensemo y’okoboko kwaye gw’okorio, na oyomo ensemo y’okoboko kwaye gw’okobee. [ 28Nabo ririko rigaikerana, erigoteba, “Obareranigwe amo nabasaria.”] 29Na abanto abaare goeta bakamorama, bagosinga‐singisia emetwe yabo, bagoteba, “A! Aye oyogotagora Hekalu na koyeagacha ase amatuko atato, 30etoorie, ika korwa ase omosalaba!” 31Naboigo nabakuani abanene bakamosekereria barabwo ase barabwo, amo naborokia b’amariko, bagateba, “Natooretie abande, ere omonyene takonyara gwetooria. 32Tiga Kristo, Omoruoti bw’Abaisraeli, aike bono korwa ase omosalaba, tonyare korora na kwegena.” Na barabwo ababambetwe amo nere bakamorama.

Ogokwa kwa Yeso

(Mat 27:45–56; Luk 23:44–49; Yoh 19:28–30)

33Ekero chinsa isano nemo chiaika omosunte okaba igoro ase ense yonsi goika chinsa kianda. 34Ne chinsa kianda Yeso akarera ase eriogi rinene, “Eloi, Eloi, lama sabakitani?” Okoonchorwa kwaye: “Nyasae one, Nyasae one, naki gwantigire?” 35Na abande b’abwo bateneine ang’e koyaigwa bakabora, “Rora, nkorangeria are Elija.” 36Omonto akaminyoka bwango, akaimokia esifunchi, akayeichoria chinkama, akayebeka igoro ase egetonto, akamoa anywe, okobora, “Tiga torore gose Elija ngocha are komoikia.” 37Yeso agaaka eriogi rinene, agatweka mo. 38Egetambaa gi’okonacha Hekalu kegatondoka korwa igoro goika inse, gekaba bibere. 39Na ekero omotang’ani bw’abarwani rigana ateneine amorigereretie, agachia korora ng’a otwekire mo, akabora, “Ekeene, omonto oyo nigo arenge Omwana o Nyasae.”

40Mbarengeo abakungu barigereretie korwa are. Ase abwo nigo barenge Mariamu Magidalena na Mariamu ng’ina Yakobo omoke na Yose, na Salome. 41Aba nabwo bamotunyanete ekero arenge Galili na komokorera, amo nabande abange abakungu abatiirete amo nere goika Yerusalemu.

Ogotindekwa kwa Yeso

(Mat 27:57–61; Luk 23:50–56; Yoh 19:38–42)

42Riachia koba mogoroba, ekiagera nerituko ri’okwebeka ang’e, nario rituko ri’ogotang’anera eri’Esabato, 43Yusufu omonto bw’Arimathaya agacha, oyorenge omosike, omonto bw’ekegambero. Ere omonyene nigo aganyete oboruoti bwa Nyasae; agasoa noboremu ase obosio bwa Pilato, agasaba aegwe omobere o Yeso. 44Pilato agakumia, ekiagera aikire gokwa, akarangeria omotang’ani oria bw’abarwani rigana, akamoboria gose nkare akwete. 45Goika agachia konyora ekeene ng’a okure, akaa Yusufu omobere. 46Yusufu akagora egetambaa ki’egatani, akamoikia, akamoboyia egetambaa keria, akamobeka ase oboina bwabaachetwe ase egetare. Naende agaturunkania rigena gochia ase egesieri ki’oboina. 47Mariamu Magidalena na Mariamu ng’ina Yose bakarigereria aase abegetwe.

Currently Selected:

MARIKO 15: EKEGUSIIBBLE

Highlight

Copy