MARIKO 10

Riborio igoro y’ogotigana

(Mat 19:1–12; Luk 16:18)

1Akaimoka korwa agwo, agaika chimbebe chia Boyahudi, ng’umbu ya Yorodan. Abanto abange bakamosangererekera naende; akaborokereria aroro, buna anarete botambe.

2Abafarisai bakamochiera, bakamoboria, “Inee! Mboronge omonto gotiga mokaye?” Bakamoteema. 3Ere akabairaneria, “Inki Musa abachigete?” 4Bagateba, “Musa nigo aruete ribaga korika rirube ri’ogotigana, na komotiga.” 5Yeso akabatebia, “Ase engencho y’obokong’u bwe chinkoro chiaino nakio kiagerete abarikerete ogochika oko. 6Korende korwa omochakano bw’ogotongwa gw’ense Nyasae nigo atongete omosacha na omokungu. 7Ase engencho eyio omonto natige ise na ng’ina, abwatane na mokaye, 8na abwo babere nigo barabe omobere oyomo. Ase igo tibakoba babere naende, korende omobere oyomo. 9Naboigo ebi Nyasae abwatanirie, mwanyabanto tabiatanana.”

10Naende nyomba ime aborokigwa bakamoboria engencho ye ring’ana erio. 11Akabatebia, “Kera omonto oratige mokaye, na kunyuoma oyonde, otomanire igoro asare: 12na omokungu karatige omosacha oye, na konyuomwa nomonto onde, nere otomanire.”

Yeso ogosesenia abana abake

(Mat 19:13–15; Luk 18:15–17)

13Bakamorentera abana abake, erinde anyare kobakuna; aborokigwa baye bakabatanga. 14Korende Yeso agachia korora, akabea mono, akabatebia, “Batige abana abake bache asende, timobaisa kobatanga, ekiagera abare buna aba, oboruoti bwa Nyasae nobwabo 15Ekeene nabatebirie: Onde bwensi otancheti oboruoti bwa Nyasae buna omwana omoke, takobosoa nonya ng’ake.” 16Akabaimokia, akabaagata ase amaboko aye, akabasesenia, okobeka amaboko aye igoro asebare.

Omomura omonda okorigia obogima bwa kare na kare

(Mat 19:16–22; Luk 18:18–23)

17Goika agachia koba ogosoka kogenda enchera, omonto oyomo agacha bwango, akamotung’amera, akamoboria, “Omworokia omuya, inki ndakore inyare koba nomwando bw’obogima bwa kare na kare?” 18Yeso akamotebia, “Naki okondoka omuya? Onde tari omuya otatiga Nyasae bweka. 19Kwamanyire amachiko: Toita, Totomana, Toiba, Toteba oborimo, Tong’aina, Sika iso na nyoko.” 20Akamotebia, “Omworokia, ayio onsi ninyabwatete korwa obwana bwane.” 21Yeso akamobeta amaiso, akamwancha, akamotebia, “Egento ekemo ngekoremerete; genda, oonie ebio ore nabio bionsi, oe abataka, na aye nobe nenibo igoro; erio oche ontunyane.” 22Korende ere abanyiria obosio ase ring’ana riria, akagenda nobororo, ekiagera arenge nenibo enyinge.

Obobe bw’oboteneneku

(Mat 19:23–30; Luk 18:24–30)

23Yeso akarigereria chinsemo chionsi, agatebia aborokigwa baye, “Nabe aakong’u ase abare abanda gosoa ase oboruoti bwa Nyasae.” 24Aborokigwa bagaichana ase amang’ana aya. Yeso akairaneria naende, akabatebia, “Abana, nabe aakong’u ase abasemeretie enibo gosoa ase oboruoti bwa Nyasae! 25Naororo engamia goeta ase ekebao gi’esindani kobua omonda gosoa ase oboruoti bwa Nyasae.” 26Barabwo bagaichana mono, bakaborania, “Ning’o rende oranyare gotooreka?” 27Yeso akabarigereria, akabora, “Ase mwanyabanto takonyarekana, korende ase Nyasae taibo, ekiagera onsi nigo akonyarekana ase Nyasae.” 28Petero agachaka komotebia, “Rora, intwe twatigire bionsi, twagotunyanire.”

29Yeso akabora, “Ekeene nabatebirie: Monto onde tari otigire enyomba, gose bamura bamwabo, gose basubati bamwabo, gose ng’ina, gose ise, gose abana, gose emegondo ase engencho yane, gose ase engencho y’enchili, 30otatiga aegwe ara rigana ase ekero kia bono, chinyomba, na bamura bamwabo, na basubati bamwabo, na abang’ina, na abana, na emegondo, ase emechando, na ase ense egochigocha obogima bwa kare na kare. 31Korende abange abare abe ritang’ani, nababe abanyuma; na abanyuma babe abe ritang’ani.”

Obobani bwa gatato bwa Yeso igoro y’ogokwa kwaye

(Mat 20:17–19; Luk 18:31–34)

32Bakaba inchera, bagotiira kogenda Yerusalemu. Yeso nigo arenge obatang’aine, na barabwo bagaichana, na abamotunyanete bakairoka. Akaira naende baria ikomi na babere, agachaka kobatebia ebirage bi’amang’ana agochia komonyora, 33akabora, “Rigereria, ngotiira tore kogenda Yerusalemu, na Omwana‐o‐mwanyabanto nabekwe ase amaboko ’abakuani abanene na aborokia b’amariko. Abwo nabamogambie akwe, na bamobeke ase amaboko abanto b’Ebisaku, 34na barabwo nabamochecherie, na komo aka chinkini, na komotwera amate, na komoita; nyuma y’amatuko atato naboke.”

Okoboria koegwa ogosika gw’ense eye

(Mat 20:20–23)

35Yakobo na Yohana, abana ba Zebedi, bakamochiera, bakamotebia, “Omworokia, ntorigetie otokorere rinde rionsi toragosabe.” 36Akababoria, “Inki morigetie mbakorere?” 37Bakamoiraneria, “Otwanchere intwe toikaranse, oyomo ensemo y’okoboko kwao gw’okorio, na oyonde ensemo y’okoboko kwao gw’okobee, ase obonene bwao.” 38Yeso akabatebia, “Timomanyeti eki mogosaba. Inee! Namonyare konywera egekombe nkonywera inche, na kobatiswa ebatiso mbatisire inche?” 39Bakamoiraneria, “Natonyare.” Yeso akabatebia, “Egekombe nkonywera inche namokenywere, na ebatiso mbatisire inche namobatiswe, 40korende ribaga ri’ogoikaransa ensemo y’okoboko kwane gw’okorio na okoboko kwane gw’okobee tinkonyara kobaa, otatiga abwo bagacheire barariegwe.”

Obonene bw’ekeene

(Mat 20:24–28; Luk 22:24–27)

41Ekero baria ikomi bachia koigwa aya, bagachaka kobea Yakobo na Yohana. 42Yeso akabarangeria, akabatebia, “Mwamanyire ng’a baria babarirwe koba abagambi b’abanto b’Ebisaku nigo bakobagambera ne chinguru, na abanene babo nigo bakobachika. 43Korende takoba bo asemore. Omonto origetie koba omonene asemore, nabe omokoreri oino. 44Na omonto orarigie koba oyo bwe ritang’ani asemore, nabe omosomba o bonsi. 45Naki Omwana‐o‐mwanyabanto tachete gokorerwa, korende gokorera, na korua obogima bwaye, erinde bobe embooria y’abange.”

Baritimayo oria orenge omouko okogwenigwa

(Mat 20:29–34; Luk 18:35–43)

46Bagaika Yeriko. Goika agachia koba okobwatia enchera korwa Yeriko amo naborokigwa baye na omoganda omonene, omwana o Timayo, Baritimayo, oria orenge omouko, nigo arenge oikaransete enchera ensemo, ogosaba ebiegwa. 47Agachia koigwa ng’a nere Yeso Omonazareti, agachaka goaka eriogi, na goteba, “Yeso, omwana o Daudi, indorera amabera!” 48Abanto abange bakamotogonyera, bakamotebia ng’a anyare gokira, korende akamenta goaka eriogi kobua, ogoteba “Omwana o Daudi, indorera amabera!” 49Yeso agatenena, akabora, “Morangerie!” Bakarangeria omouko oria, bakamotebia, “Remia enkoro yao, imoka, okorangeirie.” 50Ere agatuguta eanga yaye, agacharoka, agachiera Yeso. 51Yeso akamoboria, “Ninki origetie ngokorere?” Omonto oria orenge omouko akamoiraneria, “Omworokia, inyare korora.” 52Yeso akamotebia, “Genda! Okwegena kwao gwakogwenirie.” Erio kegima akaba nkorora are, agatunyana Yeso gochia inchera.

Currently Selected:

MARIKO 10: EKEGUSIIBBLE

Highlight

Copy